الإتيكيت وريم

[مايسة]

الإتيكيت هو:
فن التعامل/ السلوك / أخلاق / ذوق / تصرف/احترام الذات والآخرين / فن التعامل مع الآخرين / فن الخصال الحميدة / فن التصرف الراقي المقبول اجتماعيا.

مفهوم الإتكيت في الموسوعة البريطانية:
السلوك الذي يساعد على الانسجام والتلاؤم مع بعضهم البعض ومع البيئة التي يعيشون فيها.


مفهوم الإتكيت في الموسوعة البريطانية:
الاتيكيت كلمة تعني التهذيب واللياقة وتحمل الفرد على تحسين علاقته بالآخرين.
الاتيكيت يعني حسن التصرف واللطف للحصول على احترام الذات وتقدير الآخرين.

أصل كلمة اتكيت :
كلمة فرنسية لفظيا معناها البطاقة : The ticket - (ما علاقة البطاقة بالإتكيت – بطاقات الدعوة للمناسبات – لو دعيت الى برج العرب مثلا : كيف أتصرف – خلف بطاقة الدعوة التعليمات / الوصول – سلم المعطف على باب الفندق ... ادخل سلم على الداعي .. اجلس في غرفة الشاي ... كلم كبير الخدم وهو يعطيك التعليمات.


لماذا الاتكيت
لأن أي تصرف أو سلوك قد يعطي صورة عن ذاتك جيدة أو سيئة.
الاتكيت يحميك من أي اساءة في أي مكان
الاتكيت الدولي : مقبول في أي مجتمع




الكلام الفوق دا كلو منقول عن المحاضر محمد حسن المرزوقي (الاتيكيت العائلي)

[مايسة]

نخش في القصة الحلوة التي لا تخلو من عِبر يمكننا ان نستفيد منها جميعا في منتدانا وحياتنا
بإعتبارنا عائلة وأسرة واحدة وإن إختلفنا في كثير الصفات

جاتني ريم ماخدة في خاطرها (زعلانة وعايزة تطق ) –
خير يا ريم –
قالت لي - يا ماما انا الليلة زعلانة شديد جدا من واحدة معانا في المدرسة وفي نفس الصف –

واليكم القصة ببساطة شديدة

ريم بتلعب مع صديقتها (عائشة) - في الفسحة في امان الله وموعد الفسحة قرب ينتهي
جات واحدة تالته (أريام) صديقتهم برضو ولكن ليس الانتيم (يعني ما شديد خالص )- ومن غير أي مقدمات بقت تلعب مع عائشة وخلت ريم في (الرف)

اها لحد هنا القصة إنتهت

[مايسة]

طيب يا ريم انت المزعلك شنو


ريم : يا ماما لكن ما ما ممكن انا وعائشة بنلعب المفروض أريام دي تقول لي يا ريم انا عايزة اشيل منك أريام ونلعب سوا
او على الاقل تقول لي شكرا يا ريم خلاص دورك انتهى وأمشي خلينا نلعب سوا (انا عائشة )

[مايسة]

كلامي لريم : يعني يا ريم انت حردانة (زعلانة) كدا عشان البت الاسمها أريام دي ما قالت ليك عن إذنك يا ريم ولا حتى عبرتك
ولا حتى إشتغلت بيك والمفروض يكون عندها إتيكيت وذوق وفن التعامل بالذات كمان انتو في حوش واحد وقوقعة واحدة
وهى ما عارفة انو بتصرفه دا خلتك تفكري مليون حاجة انو هي مثلا ما بترتاح ليك عشان كدا انتقمت منك كدا
وباي طريقة حاولت تنزلك من المصطبة الكنتو بتلعبو فيها انت وعائشة
صراحة يا ريم صحبتك أريام دي تفتقر للذوق العام واللباقة
وما راعت مشاعرك وأحاسيسك المفرطة والمفعمة بالأمل خصوصا هى عارفاك انك شخصية عامة ومهمة في الصف
ويمكن كمان غارت عشان انتى طوالي ضاربه الرقم القياسي في حُسن المعشر والطيبة بشهادة من هم حولك

[مايسة]

ريم نست مشكلتها وبقت عايزة تفهم معاني الكلمات الفوق دي كلها

[مايسة]

اها قعدته مع نفسي كدا وقلته دي أكيد قصة دسمة وممكن الواحد يستفيد منها هنا في المنتدى
خلال تعاملنا مع بعضنا البعض وإن إختلفت المواضع (بوستات) والشخوص أكيد –
وبالذات من يكون في يديهم ذمام الأمور


مشاركة واحدة تجبر بها خاطر شخص لا تكلفك شئ وإن كنت تحمل في نفسك شئ إتجاهه – فنحن جميعا إخوة يربطنا حُسن المعشر

البوست دا للجميع

فتكم بعافية

[isamzaki1978]

البوست دا للجميع

فتكم بعافية

عافك الله من كل سوء
من اعلاه لى الحق فى التعليق

الاتكيت بتاع ناس برطانيا دا انا بعرفوا من المستحضره الآن حديث رسول الله صلى الله عليم وسلم فى معناه : ( اذا تحدث احدكم فليقل خير او يصمت )
والثانى : ( حب لاخيك كما تحب لنفسك )
الحديث الثانى دا عجيب شديد بغنيك من حاجات كثيرة اهمها الحسد والحسد دا فى تعريفى انا: " اعتراض على قسمة الله : اهلنا بقولوا كلام فارغ وخطير جدا زى يعطى الحلق ل الماعندو اضان - الله يهدينا ويهديهم " ربنا قال : ( أَمْ يَحْسُدُونَ النَّاسَ عَلَى مَا آتَاهُمُ اللَّهُ مِنْ فَضْلِهِ فَقَدْ آتَيْنَا آلَ إِبْرَاهِيمَ الْكِتَابَ وَالْحِكْمَةَ وَآتَيْنَاهُمْ مُلْكًا عَظِيمًا (54) النساء)
تلقى الواحد حاسد زول فى شطارة ولا فى قروشو ولا فى سماحة ولا ولا .....
ناسين دى قسمة رب العالمين
اها شطحته ، نرجع لى موضوع الاتكيت واقول قول احد الصحابه
وانا لنبش " نتبسم " فى وجوه اقوام وان باطننا ليمقتهم "ليكرههم"

[حنونة.]

الغالية ميسو ازيك وكيفك ، ياخى ريم ده قمة فى الفهم والذوق زى امها مهتمة بمراعاة مشاعر الاخرين واحترامهم وتقديرهم
اها جبر الخواطر ده ماحاجة هنية فى المعنى وللشخص المحتاج ليه
وفى نفس الوقت هو هين بس للشخص القمة فى الذوق والفهم والاتكيت مهم فى كل تعاملاتنا مع الاخرين بصورته البسيطة الراقية فهو حسن خلق واحتواء للاخرين وتفهم ومراعاة .......الخ
شفت ياميسو ريم ليها حق تحرد وليس تزعل الاولى حلوووة

[الشريف الهندي]

تحياتي يا أم ريم ..
القصة وتصرفك حيال الموقف رائع جداً وأثار فيني الكثير .. وإن كُنا فعلاً ننظر للجانب المُضيئ دوماً في حياتنا لما أصابنا النصب والتعب .. القضية تتلخص في حسن الظن دوماً ، فعندما يفتح الانسان في قلبه نافذة تُشرق على النور .. سيأتي النور مقتحماً اعماقنا.

ربنا يحفظ ليك ريم وأسلوبك في الحديث معها اعجبني جداً وتصرفك في لفت انتباهها لشيئ آخر يمحو ضيقها عين العقل

كوني بعافية

[مايسة]

عافك الله من كل سوء
من اعلاءه لى الحق فى التعليق

الاتكيت بتاع ناس برطانيا دا انا بعرفوا من المستحضره الآن حديث رسول الله صلى الله عليم وسلم فى معناه : ( اذا تحدث احدكم فليقل خير او يصمت )
والثانى : ( حب لاخيك كما تحب لنفسك )
الحديث الثانى دا عجيب شديد بغنيك من حاجات كثيرة اهمها الحسد والحسد دا فى تعريفى انا: " اعتراض على قسمة الله : اهلنا بقولوا كلام فارغ وخطير جدا زى يعطى الحلق ل الماعندو اضان - الله يهدينا ويهديهم " ربنا قال : ( أَمْ يَحْسُدُونَ النَّاسَ عَلَى مَا آتَاهُمُ اللَّهُ مِنْ فَضْلِهِ فَقَدْ آتَيْنَا آلَ إِبْرَاهِيمَ الْكِتَابَ وَالْحِكْمَةَ وَآتَيْنَاهُمْ مُلْكًا عَظِيمًا (54) النساء)
تلقى الواحد حاسد زول فى شطارة ولا فى قروشو ولا فى سماحة ولا ولا .....
ناسين دى قسمة رب العالمين
اها شطحته ، نرجع لى موضوع الاتكيت واقول قول احد الصحابه
وانا لنبش " نتبسم " فى وجوه اقوام وان باطننا ليمقتهم "ليكرههم"

الله يخليك عصام
وأكيد ديينا الحنيف وضح ذلك جليا
كما قال صل الله عليه وسلم: إن من أحبكم إلي وأقربكم مني مجلسا يوم القيامة أحاسنكم أخلاقا. رواه الترمذي

لكن تقول شنو في الناس البتحب الانتقام لشئ في نفسها -

[مايسة]

الغالية ميسو ازيك وكيفك ، ياخى ريم ده قمة فى الفهم والذوق زى امها مهتمة بمراعاة مشاعر الاخرين واحترامهم وتقديرهم
اها جبر الخواطر ده ماحاجة هنية فى المعنى وللشخص المحتاج ليه
وفى نفس الوقت هو هين بس للشخص القمة فى الذوق والفهم والاتكيت مهم فى كل تعاملاتنا مع الاخرين بصورته البسيطة الراقية فهو حسن خلق واحتواء للاخرين وتفهم ومراعاة .......الخ
شفت ياميسو ريم ليها حق تحرد وليس تزعل الاولى حلوووة

حنونة الحنينة - كويسين كلنا ياخ بس مشتاقين ليك
كسر الخواطر دا صراحة أصعب حاجة بالجد - بالذات كمان لمن تكون انت اصلا بعيد كل البعد عن المشاكل
وهدفك وهمك الاساسي هو المصلحة العامة -
قصة ريم يمكن تكون بسيطة ولكن في داخلها تحمل معاني كثيرة
تحياتي ليك يا دُرة

[isamzaki1978]

الله يخليك عصام
وأكيد ديينا الحنيف وضح ذلك جليا
كما قال صل الله عليه وسلم: إن من أحبكم إلي وأقربكم مني مجلسا يوم القيامة أحاسنكم أخلاقا. رواه الترمذي

لكن تقول شنو في الناس البتحب الانتقام لشئ في نفسها -

سبحان الله حتى الانتقام بقولوا فيه
افضل انتقام هو الغفران
وبقولوا اذا ابتسم المهزوم فقد المنتصر لذة النصر

[مايسة]

تحياتي يا أم ريم ..
القصة وتصرفك حيال الموقف رائع جداً وأثار فيني الكثير .. وإن كُنا فعلاً ننظر للجانب المُضيئ دوماً في حياتنا لما أصابنا النصب والتعب .. القضية تتلخص في حسن الظن دوماً ، فعندما يفتح الانسان في قلبه نافذة تُشرق على النور .. سيأتي النور مقتحماً اعماقنا.

ربنا يحفظ ليك ريم وأسلوبك في الحديث معها اعجبني جداً وتصرفك في لفت انتباهها لشيئ آخر يمحو ضيقها عين العقل

كوني بعافية

سلامات أخي الشريف

القلوب عندما تكون صافية - لا تكترث كثيرا للغبار حولها -
كثيرا ما أجد التعامل صعبا جدا مع الأطفال - فهم محدودي التفكير -
ولكن مع هذا - يعطونا دروس نحاول بقدر الامكان نستفيد منها في حياتنا

ودائما أقول بأن حُسن الظن يريح كل الأطراف -

-----------------
سعدت أيما سعادة بمداخلتك هذه - فأنت من الزمن الجميل
تحياتي لك أينما كنت وجعل الله نوافذ وليس نافذة بقلبك دائما يدخل الضوء من خلالها
تشكراتي مرة أخرى

[مايسة]

سبحان الله حتى الانتقام بقولوا فيه
افضل انتقام هو الغفران
وبقولوا اذا ابتسم المهزوم فقد المنتصر لذة النصر

تسلم أخي عصام -
حتى في الغنية بقولو
البحب دائما مسامح والمسامح هو الكريم

[آلاء عبد الرحمن]

كلامي لريم : يعني يا ريم انت حردانة (زعلانة) كدا عشان البت الاسمها أريام دي ما قالت ليك عن إذنك يا ريم ولا حتى عبرتك
ولا حتى إشتغلت بيك والمفروض يكون عندها إتيكيت وذوق وفن التعامل بالذات كمان انتو في حوش واحد وقوقعة واحدة
وهى ما عارفة انو بتصرفه دا خلتك تفكري مليون حاجة انو هي مثلا ما بترتاح ليك عشان كدا انتقمت منك كدا
وباي طريقة حاولت تنزلك من المصطبة الكنتو بتلعبو فيها انت وعائشة
صراحة يا ريم صحبتك أريام دي تفتقر للذوق العام واللباقة
وما راعت مشاعرك وأحاسيسك المفرطة والمفعمة بالأمل خصوصا هى عارفاك انك شخصية عامة ومهمة في الصف
ويمكن كمان غارت عشان انتى طوالي ضاربه الرقم القياسي في حُسن المعشر والطيبة بشهادة من هم حولك

كدي النسعلك ريم دي عمرها كم

[آلاء عبد الرحمن]

الكلمة زي الرصاصة
مابترجع

واحسن شي تتعامل بصورة واسلوب حلو في النهاية ماف حد عايز من حد شي غير الكلمة الطيبة
تسلمي يا مايثة

[المسافر]

يا أخوانا ( أم ريم ) دي عندها حكمة كبيرة ورا القصة المؤثرة دي
ويا ريت نلتفت وننظر ليها بنظرة فاحصة ودقيقة وهي العلاقة بيينا
كأسرة المنتدى .

[آلاء عبد الرحمن]

يا أخوانا ( أم ريم ) دي عندها حكمة كبيرة ورا القصة المؤثرة دي
ويا ريت نلتفت وننظر ليها بنظرة فاحصة ودقيقة وهي العلاقة بيينا
كأسرة المنتدى .

ازيك ياشخس

[mahagoub]

كدي النسعلك ريم دي عمرها كم

شفته لكن
عايزه تعملى ليها باى نق تربيع وتطلعى عمرها كم

مايسه
ده شنو ده
البت اديتيها كميه بتاعة دراب
انا لو كنت محلها بزعل منك انتى

[ريمون]

هسه يا مايسه انا قلت من العنوان ده الزوله دي جايه تشكرني ولا تنبذني ؟؟
وياربي انا عملت شنو ؟؟
للاختصاص وكده تاني اكتبي ريم الصغيره .. ريم بتي .. اي شئ ..
في داعي للهجمه دي ياخ ..؟؟!!





كلام مائة في المائة وتربية حديثة صحيحة ..
ورد فعل ريم بيدل علي فعل مايسه ..
وانا اشهد ليك انك حتي في افعالك في المنتدي بتحاولوي تبثي _ شفتي تبثي دي حلوه كيف _ روح الاخلاق الحميده والتعامل الجميل ..
مع انك مرات كده بتكوني هبابة بجد .. وما تزعلي ..
يا ريت لو التزمنا بالتعامل الراقي في المنتدي ..والاهم حسن النية ..









وش بحب يجيب المشاكل لي روحه ..
البوست ده ما تحولوه العام ..

[بحيرى]

والله يا مايسه اول ما قريت البوست ....
كنت قايلها خالتى ريمون ....
اصلوا عدم الاوتكيت ده ما غريب عنها ...!!!
الكلام ده بينى وبينك .... ثمح ....!!!

[mahagoub]

والله يا مايسه اول ما قريت البوست ....
كنت قايلها خالتى ريمون ....
اصلوا عدم الاوتكيت ده ما غريب عنها ...!!!
الكلام ده بينى وبينك .... ثمح ....!!!

قمنا للخميج وعجن الطين

[isam saboon]

الاخت مايسه
احييك بشده على تناولك لهذا الموضوع
مدخل اخر:
نحن كسودانيين ينقصنا الكثير والكثير من الاتكيت وفن التعامل بالاتكيت - داخل الاسره الواحده وفى المجتمع عامة - مدارس - الشارع - المكتب وبصوره عامه حياتنا غير منظمه وسلوكنا غير مهذب وتعاملنا مع انفسنا ومع الاخرين فى اغلب الاحيان عشوائى جداً - حتى فى اكلنا وفى شربنا وفى لبسنا وفى اشياء اخرى كثيره تحتاج لتقويم وترقيه فى السلوك وتعلم الاتكيت حتى نكون شعبا اكثر تحضراً
قصدت من هذا المدخل ان نهتم جميعا بترقية السلوك العام وتعلم فن الاتكيت ولنعلم بعضنا البعض وارجو ان يتم تثبيت هذا الموضوع وان يكون تحت رعايتك حتى نستفيد جميعا منه.
والله الموفق

[مدنيّة]

تعرفي ياميسو
انا ما زعلانة من اريام
انا زعلانة من عائشة
لانها ما احترمت ريم صاحبتها
واول ما لقيت ليها صاحبة تانية
نزلت ريم من حسابها
شفتي كيف الزمن غدار كيف!!

[عنكوليب]

ميوسا ،،،، اشرت لهذا التعامل في كثير من مشاركاتي ،، وأتفهم تماما ماذا كان رأي الناس
في المنتدى عن كلماتي تلك والتي تتعلق بأن الكلمة جواز سفر ، وأن الأنسان لا يعيش
بين الناس وحيدا ،، وان الأسلوب في المشاركة يجب أن يدرك صاحبه أنه رساله كاملة
في حروف ، وأن المتلقي أي من كان يصله القصد بطريقته هو ،،، فيجب علينا تدارك الحروف
والألفاظ والمكنونات ،،، وما يسمو اليه الحرف ،،،
أن أحترم الآخرين لكي أحظى بحبهم ، واحترامهم ، وأن يصل مفهومي لهم بطريقة تلائم من هم
وذلك باتباع الأسلوب السامي ، لأنني أحترم نفسي ، وفي احترام النفس ، احترام الأخرين ،
أي كلمة في غير مكانها أو معناها بعيد ، قد تجرح كثيرين ، وأي أسلوب ، أن كان واضحا
او غير واضح يصل لأخرين بطريقتهم هم ،،، وقد حدث أن نزلت بوست هنا في النفاج ، ولم أقصد
به شخص معين ، ولم أتناول شخصه لا من قريب ولا من بعيد ،، ولكن أسلوبي كان به ركاكة
نعم ركاكة ،، وأعترف ، ولكنني تداركت ذلك بعد ثواني من ذلك وأقمت الدنيا ولم أقعدها ن حتى
أعدت الحرف الى مساره لكي لا أفقد شخصا أعزه وجدا ،،،ولم أنم الليل ،، وعندما أصبح الصبح
تنفست الصعداء لأنني نجحت في ذلك بمساعدة بعض الأبناء - جزاهم الله خيرا -

من هنا أتمنى ألا نجرح الأخرين كما جرحت ريم ،، والأنتيمات وغير ذلك من الأساليب ،،،وأن
نحسن من فن النقاش والتجادل ،، واحترام الأخرين ، ورأيهم ،،

ميوسا ،،،
أصبتيني في مقتل ،،، لك أجمل التحيات العطرات ،،،