محن العزابة!!

[ود الأصيل]

غايتو ، جنس شلااااقة!!!..
مطلوب من الجميع تزويدنا بحكاوي عن شلاقات و نوادر ولطائف وخفائف عن حياة العزابة في هذا البوست..حتى نستفيد و نأخذ العظات و العبر، و أيضا حتى نضحك و نمتع نفوسنا بالدهشة و الروعة والابداع.. وهاكم مني واحدة كضربة بداية ، باعتبار أن البسوي اسم لازم يضوقو أول زول:-
عزابة تكاسة من عرب العسيلات كانو ساكنين بحري حلة حمد تحتحديقة البلدية .. ففي ذات ذات مرة كان ـأب عاج الرئيس جعفر نميري جاتو صحوة ضمير، قام عمل لو نظام عفو عام فك سجانء ا لرأي من نزلاء كوبر. لكن الظاهر السجانين غلتو قامو فكوهم دون فرز ليخرج كل من هب ودب عن بكرة أبيهم ، فمهم و احد سوابق كتال كتلة، قام طوالي مشى استلم عدتو وهدوم الشغل.. يا زول بدلة و كرفتة والذي منو آخر قشرة ، ثم انطلق بشارع البلدية ناحية قصر الصداقة ..لف جا جاي.. و كت ما لقا أية ضحية و هو يتسكع في أزقة الحي الفقير لما ليه في اتنين من التكاسة الغلابة ديل.. قال ما برجع قمحان فطوالي لفق قصتو المثيرة.. عمل فيها خبير موارد بشرية و هسي مندتب من شركة توريد للسعودية.. جاي من هاك في مأموية مستعجلة عايز سواقيين و حرفيين .. طوالي ساقوه جري على البيت.. فيهم واحد فراعي مرطب شوية أخونا النصاب خاف منو يكشف نومتو فركز عليه بالأسئلة بتعرف عوض إبراهيم عوض ؟ كيف ياخ ، جداً!!.. طيب معاكم عمر الجزلي و سهام العمرابي ..؟ ياخ الجزلي دا بالذات فردتي و بقية الجماعة ديل كلهم شلتنا عدييييييل كدا في الجامعة كيف ياخ ! دا كلامك؟! المهم أخونا لقط الفيها النصيب من هؤلاء العبطاء .. و بعد داك قام شحنهم ليك في أتنين من تكاسيهم و الباقين لمن أجرو ليهم دفار عايز يطفشم و يزوغ.. و احدين قال ليهم طبعاً بيتنا في الصبابي ولا الصافية مش فاكر ، المهم بعد طرمبة صلاح ابن البادية طوالي ، و بعدها بشويييية بجيك بيت كابلي قدامو شدرة دقن الباشة تحتها مزيرة سبيل.. أها انتو بس أرجونا هناك نمشي نظبط التاشيرات و نجيكم فلللي..و انطلق بالباقيين .. مرقو بجوار سيمنا حلفاية في الأملاك و قطعو بكبري النقل الميكانكي وبهناك بين جمعة الخرطوم و البركس ، فلما جو مقابلين بوابة النشاط , والداون تاون قام النصاب قال لعمك بتاع التاكسي.. لو سمحت يا حاج ، بس تديني عشرة دقايق بالكتير، أسلم على البروف محمد هاشم عوض دا.. دي فرصة ما ح تتعوض بس ح أمرق ليكم هوا..أها من حيسو داك و اتلحس.. تاني لا يوم الليلة دي .. و جماعتك العسيلاتية لا هو لا الجوازات.. صنقرو كل واحد يحمر للتاني.. لمان ريقم خلاس نشف شتتو .. راجعين لجماعة كابلي ديلك لقوهم ملطوعين يشربو ما إروو لمان نشفو المزيرة.

[ود المطامير]

الحبيب
وليك هذه الهديه منى
علشان رجعتنا للزمن الجميل
http://wadmadani.com/vb/showthread.p...373&highlight=

[mahagoub]

حياة العزابه فيها المحن

بجيك راجع

[ود الأصيل]

الحبيب
وليك هذه الهديه منى
علشان رجعتنا للزمن الجميل
http://wadmadani.com/vb/showthread.p...373&highlight=

هههههههههههههههههههه
ود المطامير ياخي كطعت مصارينا من الضحك. و كنت أعلم أن هذه الرزانة و السمت الرفيع لا بد و أن ينطوي على روح من الدعابة و الظرافة و لا أطعم.. طبعاً أقول قولي هذا و نحن أمة مفترى علينا بتهمة التجهم و يقال إن صرة الوش ماركة مسجلة باسمنا في كافة المحافل الدولية.. فتعظيم سلام ليك يا شليق و قد أبت نفسي إلا ترد عليك التحية بأشفلق منها بصاعين ونصف. فالجاياك دي خطيرة بالجد ، دايراك تمسك الشناط كويس:
عرب جزيرة من جيهة العزازي في السعودية .. كلهم شباب و خبرة في التعامل مع زبانية بوليس الكشة ديلك.. المهم معاهم واحد عمك جاي لنج من البلد، مطلش ما عارف الشمش ظاتا بتطلع من علي وين.. من النوع العندو إسهل كلام داك يقابض برا شغلة.. و عندو شعور خليط بالفرحة و بالحنين كلما يلاقي ليه جماعة يحكي موسوعة حياتو من و إلى في 10 مجلدات ، و بالذات ما مصدق كيف أفلح في المجئ للسعودية عمرة و تشتيتة..قال بايع لو تلات بقرات و حمار نعير بكاروهو.. ما خلا لشفعو و لا البتحلب الطنوب. أها يوم قاعدين بتغدو في مطعم يمني؛ عمك أتحكر ليك في النص الجماعة و لم ليك في الجماعة طوالي قعد يربق و يرص.. طبعاً الناس هنا متحرفة على داب وردة تأكل لهمقة والعين على الباب(كشأن المومس العمياء في ملاحم بدر شاكر السياب).. هنا كبست الكشة.. قام الحكا القصة دي (قريب عمك الشايب داك) قال أنا كنت في اللحظة ديك بحاسب الجرسون جا شرطي الجوازات أول زول قبضني ليك من يد العراقي و طلب الأقامة و الهوية.. لكن أخوكم خبرة، أصلي ماشلت هم لنفسي قت لو: طيب ياخ كدي لو سمحت بس أرخي لي شوية خليني أحاسب الرجال و بمشي معاك إلى تحشرني في جحر ضب.. أها مما الشرطي رخا لي شوية كدي رحت ناتل ليك يدي منو جدعتو رميتو ليك متل هناك و لحست رااحاتي و يا فكيكي قمت سداري.. لما و قفت هنوووك في قعر الزقاق تعتريني نشوة الانتصار التي لم تكتمل؛ لأني ما صدقت نفدت بجلدي ، أكان أشوف ليك عمي يتمرجح بين شرطيين و مشتح أضيناتو متل صفق العشر.. أها قلت ليه شوف ليك طريقة من هنا العزازيي راس.. لاكين شن ينسو ليك لو عامل لي فيها سندباد ، تشيل و تربق مع اللغاشي والمامشي!!!

[ود المطامير]

هع هع هع هع

والله أحلى صباح يا الحبيب
قلت عمنا شغال يحكى بالطريقه الصاح
وفجأه عمتوهو ؟ هع هع هع

يديك العافيه يا الحبيب .. والله معاك نحلق فى أفق وردى جميل

[ود الأصيل]

هع هع هع هع
والله أحلى صباح يا الحبيب
قلت عمنا شغال يحكى بالطريقه الصاح
وفجأه عمتوهو ؟ هع هع هع
يديك العافيه يا الحبيب .. والله معاك نحلق فى أفق وردى جميل

دايماً تخجلني تواضعاً يا ود المطامير يا رائع و تشحنني شخصياً بدافعية شديدة لقبول التحدي مع قلمي هذا المتجهم و الضنين بمداده والعصي في و داده..و إني سائله بالله أن يعتصر لي نطفة من دموعه فيسكبها هتوناً على قصاصاتي اليباب كي يدعني أبوح لك وللجميع بما في جعبتي كي ندير كؤوسنا مترعة بخمر المعاني، ناضحة بكل إشراق جميل و تفرد أصيل.. لدي الكثير من النوادر لو لا أخشى عليكم الإطالة / خاصة وأننا شعب عزوبي بامتياز و لو كنا في بيوت زوجيتنا و تجلب لنا نساؤنا لبن الطير لإنتزاع ابتسامة رضا من شلاضيمنا.. بهذه المناسبة أخوياً لينا يمني حب ذات مرة يمارس معي نوعاً من الخبث البريء و فاجأني بسؤال خشن و مسيح لسفايف الركب، حيث سألني عن اسم دلعي:مما جعلني ارتعش خوفاً و غلقت الأبواب و قلت له زاجراً:كدي آآللخو أنت الحتة المهببة دي ما تفطها شوية! لأنو دي أسرار دولة.
لاكين بالطريقة دي ح ترجعونا ورا شديد لقصة أخوياً لينا واحد مسكين و ألتغ (ألجن) كان ساكن مع العزابة.. فقامو يوم يتونسو (هبشات ماقبل جر البطانية). رميات نمة دوبيت من هنا، وشمارات و شمارات غادي عن الغراميات و ما شابه.. فكان أكتر واحد بقرقو عليه أخونا الطيب دا.. قالو ليه أها اللخو أنت كيف مع (مرض حامد) والحاجات الناعمة دي؟؟ و الله الليلة أصلو مانخليك تنوم يا ود اللذينة، علا تقول لينا اسم الحنان بتاعك منو! زولك حلف بالتكطعو) ما يجيب سيرة الجكس( قال خايف الهوا يقسمو) قدر ما اتحايلو عليه قالو: طيب ياخي لمح لينا ساااه، إن شاء الله بأية حاجة.. في النهاية بعد ما نعس طب قام قال ليهم ثمح كدي أمهلو لي شيوة النجر نفسي.. أنا بقول براي.. لكن بس ينطق ليكن فرد حرف واحد بث من إثما ما بزيدكم عليه! خلاث؟
يا الجماعة :هيييييه..هييييه صفقوا قالو ثمح حلاث أها قول آسجم و خلصنا : قال: إثما إثما,, ياخي إثما فاطنة بت عبدالقا!!!.

[ود المطامير]

هع هع هع هع
كل دا والحاله فرد حرف من إسمها ؟
دا الحنان ولأ بلاش

يا الحبيب .. لا إطاله ولا شئ بل معك نتمنى ألا تنتهى السطور

[ود الأصيل]

هع هع هع هع
كل دا والحاله فرد حرف من إسمها ؟
دا الحنان ولأ بلاش
يا الحبيب .. لا إطاله و لا شئ بل معك نتمنى ألا تنتهى السطور

و للكتابة عن نوادر العزابة نكهة أحلى ولا تضاهيها سوى شمومة البن الحبشي على ظهر قلاية وهي تتهادي بين يدي جبوبة بت ود التاي، وقد تحلقنا حولها نحيط بها ذات عصرية و من بيننا أخينا العزابي الذي هو بطل حكايتي التي أنا بصددها ، يوم أن جاءنا في إحدى زياراته المكوكية المتكررة و كان في نفسه حاجة يريد قضاءها عند خاله في بيتنا و هو يتحين بكل بساطة فرصة القاء (نظرة شرعية) على بابنة خاله و التي تمت خطبتها له على سنة الله دون أن يملأ شوفو فيها. و في أثناء تلك الجلسة العائلية و عشرة الونسة مدورة ،إذا بالخطيبة تدخل علينا على حين غرة منا جميعاً، أحد سوى أخينا المتيم و الذي كان مترحفاً أصلاً لقدومها ، دنت البنية و في يدها صينية جبنة متلكفة من مجاميعه : من ليفة و فناجين بيض مرصوصات تحتها متل السواسيو. و بسرعة البرق خطف صاحبنا فنجان (البكرية) بحركة لا أرادية و شربه بشفطة واحدة ليضعه فارغاً و لسان حاله يقول ( الجائي من الحبيب كلو حبابو عشرة) و من ثم بدأنا بقيتنا وعلى رأسنا الخال العزيز في الاستمتاع بشرب القهوة وعند أول (جقمة) بزغناها كلنا و بضربة واحدة و دفقنا الفناجين ثم نظر الخال الى بن أخته ليجده قد أفرغ محتواه في جوفه , و جعل يتلمض في انتظار دور(البركة)
الخال مستعجباً!: يا باشري يا ود أختي انت الجبنة دي شربتها كيف؟!! البت الملخومة المطرطشة دي طعمتو بملح وشطة
باشري: و الله يا خال ماني عارفو لو مطعم بشنو و ما حسيتبو زاتو ، المهم إنو طفي النار الكانت باقة في جوفي.
الخال: كيفن يا ود أختي، لا عاد كان كدي النقوم على النسوان بهناك أقول لهن زغرتن!!
والحمد لله باشري يعيش منذ ذاك اليوم حياة هادئة و جميلة مع البلايق الشعيرية بالويكة و بطعم الجبنة بكاتولة الجردقة مع الويكاب. و يتذوق الملح عسلاً مصفى وشهدا مراقاً على شفاه المحبين.

.

[ود الأصيل]

حياة العزابه فيها المحن

بجيك راجع

ينصر دينك يا أستاذ و تسمح لي أقول: برافو على الجنا باشري قام كاتح ا لفنجان بي حرو سريع كدا! تقول خشمو منقل.. على العموم ياها دي فعايل الحبيب وحلاة الكف من إيدو المتل أكل الزبيب..
و تسمح لي بهذه المناسبة وتقديراً لجهدك المقدر معنا ، أدخل بيك لا جوة شوية أديك خارطة كروكية و لمحة فلاشية لوصف غرفة عزابة ما، في مكان ما على متن الكوكب...
غرفة العزابه ليها طابع خاص غير كل الطوابع. سواء أكان من حيث الترتيب والتنظيم أو النظافه العامة" الملايات طبعاً نادرة الوجود من أساسو ، و إلا إن وجدت فوسخة و معفصة كأنما أخرجت للتو من خشم بقرة . و لا عاركين بيها دوكة: توجد على الحيطة بعض الكتابات المعهودة بخطوط كفافية: كرقم موبايل أو تاريخ ميلاد شويفعة ما شافوها سنين و دنين(متل الزرع و ولى) أو جكسوية مزيلة بتذكار من(فلان)؛ ناهيك عن أكياس الصعوط و بجان البتيخ و كراكيب النعلات تعتر للزائر لمن ترميه على مناخيره. بينما في ركن الغرفة هنوووووك ، تقبع إحدى كبابي الشاي مجدوعة و قد تسلقها الذباب كيوم الجمرات في منى، بعد أن استخدمها عزابي زائر قرفان كمستجير منم الرمضاء بالنار, هو محروق الحشا أثناء عشرة كتشينة ليطفئ لهيب( إسنة و ست) أخدها للتو ساخنة على قفا صنقوره.
الحرج مرفوع و العجب منزوع دسمه عن كل زائر أغبرأشعث ليأتي في أي ساعة من ليل أنو نهار و غير متوقع أن يصدم بأية مطبات خشنة و مفاجئات غير سارة ، كأن يجد تحت السرير مثلاً طشتاً لغسيل مرزوع ليه جمعيتن لحدت ما تحلل إلى عوامله الأولية ؛ أو يندرع في رقبته حبل هدوم مشرور عليه شرموط معفن أو حتى جليد بهيمة مدبوخ بي قرض. هذا حال بيوت العزابة في الاغلب الأعم طبعا ًالا ما رحم ربي . ودي ما شنافة في حقهم لا شيتين، بس من باب الأحقاق لحقوق الأنسان لأخية الإنسان ليس إلا ..و لا ننسي مرآة مكسورة مجدوعة في الصقيعة وقد سال على خديها بقايا من بزغات عزابي متسوك هسة بي مطرق لعوت..طبعاً ممنوع أي حنكوش ما يجي بجاي يتاوق ليسمع الطلاسم دي .
و لو مشينا على كيف يعيش العزابة و كيف يصنعون ملحاتهم من أم شعيفة أو أم جنون (الموية بس والقرون) ولو الجماعة مرطبين خالس خمسة نجوم تلاقهم شادين أم تكشو، التكاوين حسب وصفة الشيف أبو عزب: فرطاقة بصلة صغيره لزوم الكشنة و ملعقه زيت عليها (كراع شرموط) و نترك الخلطة (تجقجق) ونضيف الدواشات و نحت فوقا الخدرة اليابسة . بعد داك نجي كوووولنا نتتفن ليه في سدر العوضة نلهمقا مع مكطاع كسرة لقمة (بيني كربو) عيش ود عكر، من المزرعة إلى الطاحونة وعلى اطاجن راسوووووووووووو عديل.
عارفين ، مرة دخلنا على عزابة و أخذناهم على حين غرة شلنا لينا طوبة قعدنا ندق في الباب ندق نقد ندق و قلبنا يدق يدق كو كو كو كو كو كو ...لاكين لاحظنا في سلكة مدروعة في الكيلون ، عاينا بالرقراق ،ثم حشرنا أنفنا شمينا لينا ريحة حراق حلة والشباب مشغولين بكونكان الكوتشينة رمينا عليهم السلام مافيش أي رد لا بالتحية و لا حتى بأسوأ منها ؛ الكوتشينة مولعة يا جماعة هوووووي السلام عليكم برضو مافيش فايدة ولا حياة لمن تنادي .في اللحظة دي في واحد قافل قفلة على 6 أسود الزول رمي ليه 6 شيرية وصاحبنا طوالي خمسييييييين لامن الجيران سمعو وطلعت غلط وأنا قلت الحمد لله يا جماعه تالت مرة السلام عليكم ألحقو حلتكم دي حرقت قامت شيط.

[mahagoub]

يعجبنى التشبيه
ففيه اتقان يجمع بين الهزل والجد
لكن ما قلت لى عشته عذابى كم سنه
ده وصف زول خبره

[ود الأصيل]

يعجبنى التشبيه
ففيه اتقان يجمع بين الهزل والجد
لكن ما قلت لى عشته عذابى كم سنه
ده وصف زول خبره

تشكر يا غالي الغالين أستاذي المحجوب ،،،،، وللإجابة على سؤالك، يمكن القول إنه ما بين شهقات الحنين و زفرات الألم ، كانت صرخة ميلادي.....
ثم من تالة خبرة دي كطع شك لدرجة أن سنيني مع العزوبية رغم إنها شر مستطير إلا أنني بلاقي متعة في ذكرياتها ، علماً بأني من جيل محظوظ تربى على أبوية الدولة حيث مجانية والتعليم و العلاج والترحيل . رغم أنني و للأمانة لم أدرك عهد ناس أخوي الكاشف ديل الكانو ماسكنها من ذات الرأسين، ثم الوسطى، فالثانوي ، ثم لا عند البركس، حيث السكن داخلي و الإعاشة من حر جزلان أبهاتنا ، عبر إدارة مشروع الجزيرة.
و لنا عودة إلى نفاج العزابة إن كانت لديك رغبة في المزيد، وكان للعمر بقية......
..

[آلاء عبد الرحمن]

وااااادي قعدة

[mahagoub]

تشكر يا غالي الغالين أستاذي المحجوب ،،،،، وللإجابة على سؤالك، يمكن القول إنه ما بين شهقات الحنين و زفرات الألم ، كانت صرخة ميلادي.....
ثم من تالة خبرة دي كطع شك لدرجة أن سنيني مع العزوبية رغم إنها شر مستطير إلا أنني بلاقي متعة في ذكرياتها ، علماً بأني من جيل محظوظ تربى على أبوية الدولة حيث مجانية والتعليم و العلاج والترحيل . رغم أنني و للأمانة لم أدرك عهد ناس أخوي الكاشف ديل الكانو ماسكنها من ذات الرأسين، ثم الوسطى، فالثانوي ، ثم لا عند البركس، حيث السكن داخلي و الإعاشة من حر جزلان أبهاتنا ، عبر إدارة مشروع الجزيرة.
و لنا عودة إلى نفاج العزابة إن كانت لديك رغبة في المزيد، وكان للعمر بقية......
..

كيفن ما بدور الزياده
بس صلحا
لكن ما تقول لى لقيتك جولكين
من زمن القراية البلاش

[ود الأصيل]

كيفن ما بدور الزياده
بس صلحا
لكن ما تقول لى لقيتك جولكين
من زمن القراية البلاش

تسلم يا أستاذ و أنا الكنت فاكرك عمنا من قبال ما يحفرو ترعة أب زيد، لكن طلعت لي شكلك "برلوم" يديك لي طول العمر،،،،
و لكن تعرف اللخو أنو هناك من هو أسوأ مني حالاً!
نعم و هو العبد لله ، أنا نفسي لمان أكون عزابي بمحض إرادتي طبعاً، بمعنى متزوج مع وقف التنفيذ. ففي رمضان الفات دا قعدت عزابي براي في البيبت أنا و الليل والقمر بعدما طفشنا الشفع و أمهم قلنا نغير شوية في محاولة لكسر الرتابة و خفض الصرف (نظام شلاقة ساااه) كدي خليني النحكي ليكم جانب من بشتنة الأيام ديلك. ولعل شر البلية ما يضحك.. طبعاً الواحد ندم كتير في حياتو لاكين عن نفسي أندم ما أندمني سحور اليوم داك عندما ظبطت ليك الرقاق العجيب معطون في الروب ومتقل بأوتاد من بلح القنديلة الغلاد و جنبو النشاية معطرة بروس المحريب و الآبري الصاقط... ديل كلهن زحيتن ليك جانباً و أنا أضمر نية السوء إني أقوم عليهن بعد غفوة تعسيلة بسيطة لا كنها جرت معاي لليوم التالي فأصبحت أندب حظي وأقرع سن الندم عندما صحيت لأجد الندي وقد تجمع إكليلاً خمرياً يرصع وجنات الآنية..
أصبحت باكر من الصباح بين مغستي ديك مشيت ليم الجزر جبت لي عقلة خدرة ماكنة ومن عصيراً بدري ورقتها و كطعت البصل و أنا أزرف دموع التماسيح و رميتا فوق الخلطة من سليقة اللحم والذي منو ثم قدحتها ليك بكاتولة كربونات و يلا قعدت أدرج ليك فيها بالمفراكة لحد قريب الإفطار.. و لكن يا لخيبة الأمل لقد مات كل شيء في تلك الوصفة حتي عضلات إيدي عدا شيئاً واحداً لم يمت ، ألا وهو الخدرة ظاطا.. فاضطررت ألايقها ثم أنزلها سوداء متل بوهية الجملكة بعد أن شممت رائحة الحرق في نخري.. بعد داك ركبت الطاجن عست اللقمة ثم ربطت رأسي بعصاابة حمرااء على طريقة " الدبابين" وقعدت آكل فيها أبلع ليك ظط ظط بلا طعم و لا لون محددين و لم يحملني على ذلك سوى مغسة الدواشات و التكاوين الخسرتها فيها.
أها بعد داك ما فضل لي خيار قدامي علا أقابل موائد الرحمن ولا أمشي الحق أهلي أتكاملن!!
بجيك منقلب

[ود الأصيل]

ود عماري الجيد
عزابة من عروبنا ديل في سوق المناقل دقشو كل مجالات التجارة ما خلو لا عناقريب، لا جلود و حبال عاشميق، لغاية ما كنّبو جيبهم قرب ينحت، غايتو فضل ليهم كراويش رأس مال قامو حشروها في حقة تمباك قالو: نغير الكار، دايرين فد مرة ينافسو عمك عبد الحق. فطوالي مطروليك و عطرنو و فرشو و قعدو يكوركو:
- يلا علينا جاي ، دا ود عماري الجيد!
- و الراسو برا كيف ، أريتو عاد بالسيف!
- و سفة من دا تعدل الراس، وتنعش جوك، تمرقك في كدباس!
قام جا خارت ليك عليهم عزابي ليه جلحات، عطلنجي بتاع لبط مفلس عدمان السفة . قال أنمشي على العروب الطرش ديلك، أخمش لي منهم سفة بلاش.
- أها آآآ جنيات صعودكم كيف؟!
هم من ما شافوه ليك ، واحد قال للتاني، خلاس هسي بنستفح في عمك أب شلاضيم دا عامل متل (أحمد منقة) كل المعطيات عندو ، بس فاضل يبرهن:
- ها زول قرب جاي بس، و الله دا وارد فرشاية و جردقتو حصاية،
- خلاس ، أكان كدي ، أدوني النضوق،
أها زول بعدما خلاس دنكلا ليك وختاها متل دقار البطاح سكس ويل، داير يكب الزوغة ، يلا وقعد يتفلفس و يبطح في الحديث:
- والله آآجنا، مو متل أبوك، علا لاكين بربيك؛
هنا جماعتك اتحادرو لبعض:
- يعني شن قولك، تمباكنا مو عاجبك! و لا شنو؛
- والله ياخي ما أظنو يجيب ليكم مريسة تام زينو؛
الجنا لكز ليك أخوه و قال ليه:
- قوم آ جنا علي الهامل المنطلق دا شلخوا و ما تخليهو علا تبزغو السفاها دي؛
أها داك من حيسو سل ليك سكينو من ضراعو و تتتتتترب قمز ليك في عنقرة عمك المستنكح ، ختاها ليه مع أرنبة نخريه و قال مهدداً:
- و حاة الله كان تشمها!!
هنا زولك انبهط و فضل متنح واقف متل الجخس في سلخانة الكريبة، لحدت ما خرتوها ليك من شلاضيمو و أدوهو تلكدتين، وهو سلم راحاتو للريح و قام بنمرة خمسة.
وصاحو ليك فيهو:-
وت العفنة ، تاني عشان تجي المولد شايل أصابعيك متل السلعلع و حايم.

[mahagoub]

طلعته عزابى حنكوشه
سحورك بات
وحلتك بى كبوبه حرقانه
ولقمتك تضرس
من كترة الكراضيم فيها
اتكامل اولادك ساى
بس ما تنسى كيس التمباك

[ود الأصيل]

طلعته عزابى حنكوشه
سحورك بات وحلتك بى كبوبه حرقانه ولقمتك تضرس من كترة الكراضيم فيها اتكامل اولادك ساىبس ما تنسى كيس التمباك

أنت في كيس التمباك يا عمنا محجوب و لا في كلمة عزابة دي ظاطا ليش بكتبوها بال(زين) رغم أنها و (عذاب الجحيم) متلازمتين كتوأم سيامي لا يمكن فصلهما إلا بعميلة تدخل جراحي مضمون الفشل. و معلوم إنو(العزوبة شر) مستطير و حبوبتي بتشبها دايماً بالبشتنة في أدق و أحك صورها.
وصف منطقي لبيت عزابة سودانيين
المهم ياهو دا حالنا كان عجبك و لو داير تزورنا هاك الوصف الدقيق دا ، يجيبك لينا عدييييل لحدت خشم الباب...
أول حاجة ، تخش بشارع العناقريب تلقى ليك محل حلويات(شامية) جنبه طابونة( فرن أب نفاج) ؛ تمشي طوالي بلاقيك حلاق و مصفف شعر(لبناني). جنبو بتاع تدليك و حمام (مغربي). و في الركن هنووك، بتاع سراميك و فسيفساء (سوري). تلف بأول زقاق تلقى ليك شلة سباكين (نيبال)، تفطهم و تواصل، بعديهم في عمارة ساكننها لعيبة كورة أفارقة( أولاد قرف)، ديل ظاهرين من ريحة أباطاطم تجيب الضهبان، تكسر شمالك حتة كدا، بواجهك بيت عمال نضافة (بنغال) جابوهم يحفرو مجاري الخريف. و بعدين بلاقيك مقهى شيشة مليان(مصريين) مشغلين ليالي الحلمية ، و كابية فوقيه شدرة نيمة منشرة مية متر ، تحتها ست كسرة و معاها ست شاى(حبشية) تظبط ليك منها فنجان مدنكل وترفع رأسك قدامها طوالي في بيت عزابة عواطلية قرفا نين لمان ضبان جلدهم مابيهم ، أها ياهو ديل الوحيديين ال(سودانيين).