عمر غلام الله شغال مع ناس رواتانا تبع الامير وليد بن طلال يتبادر لذهنك أي اتصال من الجهات التجاريه ليها اسم بدون مقدمه فال خير لو الاتصال من هايبر بنده أو ساسكو علي طول بتقول كسبته عربية من كثرة الكبونات البنختها في الصناديق سنين ولسع ما كسبنا اما حكاية روتانا وعمر غلام الله والوليد بن طلال جديده علي وكما يقول السعودين ((قوية)) اتصل علي شخص بلهجة خليجيه:
المتصل: الو استاذ عباس انا من طرف الاستاذ عمر غلام الله هلا فيك
عباس: هلا وغلا عمر غلام الله من ربعنا .... بالسوداني (( من أهلنا)) أي خدمه يا استاذ
المتصل: ابدا والله ونأسف لو ازعجناك معانا هدية ليك !!!!!!!!!!!
قلتا أمك الشرك قبض عمر غلام الله اكون دخل في مسابقه بي اسمي و ل عندو عربية عايزة ازحلقا لي وبعدين نتقاسم بالله شوف الدنيا وقت تديك في صمت خشمك زمنك كلو ترمي في صناديق المحلات التجارية عجلة ما وقعت ليك عمر جابا ليك عربية عديل.
نرجع للاتصال:
عباس: يا استاذ أنا فاضي في أي وقت اجيكم هناك لو قلته الان بجيكم معقول نتاخر عليكم وخاصة من طرف انسان عزيز (( الوقت ده بالذات أنا مشغول شغله وقت المدارس وزايغ من الشغل وعندي مليون مشكله))
المتصل: لا يا استاذ ما بنتعبك بنصلك في بيتك قول لينا المواعيد المناسبة ليك عندنا مكنسه حديثه نشرح ليك طريقة شغلها ومعاها هداية !!!!!!!!!!!!!!
كما يقال بالعاميه رقدته سلطه أو رقدته رز مكنسه علي أنا يا محبطه يا ما عندك شغله من عربيه تطلع مكنسه وفي المكانس سعرها عشرة الف ريال بالسوداني 14 مليون يا مفتري طبعا الكلام ده في دواخلي وأنا ماسك الجوال. يا ربي الزول ده اتفكو منو كيف ياخ مناديب مبيعات المكنسه عبيطين عباطه وخاصه الموضوع قبل كده مرة علي رشحني ليهم واحد وجوني في البيت صادف معاي زول قريب الدرديري مهندس زول شليق الراجل قعد اشرح لينا في شغل المكنسه ساعتين وطلع بيتي البشهد بيهو الجميع من النضافة والترتيب طلعو لي درجة الوساخه فيهو 70% وهاك يا تجارب جيب المخده اطلع منها وسخ الملاية من الدولاب ونضيفه ومكويه طلع منها وسخ السراميك في زول بقول اطلع منو وسخ الراجل طلع منو وسخ جاري المهندس الشليق شال منو واحده بي عشرة الف وأنا عشان المدام ما اخدتها شورتا ما بقدر بتصرف وكانت مافي قلت ليهو يا الحبيب بعد توافق لي المدام... اتعبط فيني عباطه لازم اجيب المدام إشرح ليها من شدة عباطو لما تحسست في حكاية المدام جاني احساس الراجل عايز اشرح مكنسه ولا عايز اطلقا مني واعرسا المهم وقت شاف القرار ما عندي قبل علي مضض وقال لي بتصل بيك عشان نحدد مواعيد تعال شوف تاني يوم وباقي الايام كل يوم اتصالين تلاتة ازعاج بصورة غريبه مشكلتي نساي عشان اتفكا من الازعاج بنسي اشاور المدام ومرت الايام والاتصالات فيني أكون في اجتماع بتاع المكنسه سائق العربية بتاع المكنسه انسي الجوال في الصلاة فاتح بتاع المكنسه .... يوم اتذكرته وكلمته المدام عشان اتفك من الموضوع المدام بدورها مشت لي زوجة صاحبنا المهندس تسأل عن المكنسه قالت ليها والله راجلي غشو غشه عليك الله كان ما راجل فارغ اشتري مكنسه بي عشرة الف ريال ومكنسة شنو دي دايره ليها نسوان عشان اشغلوها والله الراجل كان اعرس ليهو واحده تانية لي المكنسه ام عشرة الف رميتا ليهو هناك ... المدام من سمعت حكاية المرأة التانية بدون تدخل في تفاصيل قلبا ابا الشغله رفضت المكنسه وأنا اتخارجته من الزول وقت اتصل علي بفتح ليهو الخط وما برد واحيانتا بعمل ما سامع اضاني تقيله كم يوم والراجل وقف .
مرت الايام الموضوع جاء في المدام واحده صاحبتا رشحتا لي ناس المكنسه اتصلو عليها قالو ليها عندك هديه اخدو منها مواعيد وقت انا بجي للمدارس |((مصايبنا كلها وقت المدارس)) دخلتي البيت الجرس ضرب المدام قالت لي الله انا نست في ناس جايبين لينا هديه بتاعين شركة قلتا ليها تاني الفلم ده يا استاذه في زول بديك هديه لي الله ديل ناس المكنسه الله عملتيها فينا بالله من سمعت ناس المكنسه دخلت جوه وحلفت بي التقطعا ما تطلع .
جات امها وقابلنا الراجل الزول ضرب لينا الجرس ....ضيف علينا لازم نستقبلو.... بالله الزول من سلم توش دخل جوه البيت وطلع ليك العدة بتاعتو عايز ابدأ الفلم بتاع الشرح الخشيتو قبل كده وانا مستعجل ماشي المدارس طوالي ختيتو معاهو قرض.
اسمع يا اخونا البيت بتاعنا بعد نظافتو والسراميك بتديهو وساخه 70% فتيت ليهو باقي الموال كلو وفي النهاية قلت ليهو احنا بالمناسبة سودانيين اولادنا التراب ما بأثر فيهم وكمان كل يوم بنطلعهم بره اتمردقو فيهو وفي السودان النسوان بنضفو بي حاجة اسمها مقشاشة المرأة لو ما شمت التراب بجيها صداع زي صداع الجبنه وعندنا المرأة الحامل لازم تاكل الطين والتراب يعني علاقتنا بالتراب قوية ودولابي حسي فيهو جردل تراب للطواري عشان ما نضيع زمنك وانا مستعجل شوف ليك زول تاني مشيت علي الباب افتحو ليهو....
عاين لي والدة زوجتي قال ليها الزول ده شغال شنو قالت ليهو مدير في شركة قال ليها الحمد لله الما شغال معاهو الراجل كسح مننا.
نرجع لي زول عمر غلام الله.......
قلته اتفكه من الزول كيف جاتني فكرة.
الو يا سلاااااااااااااام بالله انتو بتاعين المكنسه الكهربائية ربنا اديك العافيه والصحة ياخ المكنسه دي سحريه عدددددددددددددددددديل افضل اختراع اشوفو انا.
المتصل: ريحتني في المهمة الحمد لله انت انسان مستوعب
عباس: مستوعب البسيطه أنا اشتريت المكنسه قبل كده وباظت مني بالله مشيت ليكم في محلكم الفاتح علي طريق الملك فهد اشتريت تاني وحده شكرا ليك انتو بتخدمو البشريه والبئة.
المتصل: يعني انت اشتريت شكرا ياخ أي مساعده
عباس: شكرا ليك انت يا جميل مع السلامة..............
رد مع اقتباس
المشاركة الأصلية كتبت بواسطة روبش
المفضلات