الأمل الرحل
للشاعر صلاح البوج

يا فرحة فى بحر السراب

يا كلمة فى اول جواب
يا واحه فى ليل الصعاب
يا خيط شعاع وسط الضباب
يا نجم من دنيانا غاب
يا اغلى من تحت التراب
من خلف قضبان العذاب
ليك برسل الآهات خطاب
يا يمه يا الأمل الرحل قبال يقول كلمة وداع
يمه يا النور الخفت قبال يرسل خيط شعاع
يمه يا دمعة فطيم خلوهو لى ليل الضياع
يمه يا مركب نجاة غرقت تفرد شراع
يمه يا نجمات صباح مرن سراع
...مرن سراع
يا يمه من بعدك انا اصبحت للآهات وطن
دروشت فى خلة اساى سبحت بخرز المحن
كتحت صبرى انا للرياح غنيت للأحزان بكن
دقيت باب الزكريات كان القى لى هناك سكن
لا لقيت صورتك فى الخيال لا شفت من بعدك زمن
ودرت لى درب الرجوع كل المعانى الأختفن
فتشت فى كل البلاد كان القى طيبتك مثيل
دورت فى كل البقاع شايل عذاب ليلاً طويل
زادى الوحيد كان الصبر فى الظلمة والزمن العليل
زمناً يشيل حق الضعيف يديهو لى عابر سبيل
زمناً يغير كل شئ حتى الزمان كان مستحيل
يا يمه كيف يتبل شوق والشوق على كل يوم يزيد
لا أنتى بنتى ولا هو راح لا غيروا الزمن المديد
يا يمه من بعدك لا فرح طلانا لا ضمانا عيد
غير خيط امل يبداء ويروح كل ما العذاب يرجع يعيد
كل ما اقول ياداك فرح القاهو منى بعيد
...بعيد
لكنى راجع ليك انا بالرغم من كل المحال
جاييك عشان أعرف خطاى من وين تستف للرحال
جاييكى لو كان مستحيل جاييكى لو كان فى الخيال
لأقينى لو كان فى الحلم ما الدنيا من بعدك زوال
عنوانى خلف الاوجود يا أمى يا ابعد منال