مرات كدا!
تتوارى لي سحنة وشيك ..
زي طيف مرق من الشروق
واسأل عليك ..
حواتي خايد في الطمي
رامي الشباك ..
لو صدفة صادك .. او لقاك.
وانا في الأساس ..
متشابي لى لوحة بروق
مغموسة بي وهجك متاع
بدفر عليك نواتي بسأل عن نغم
بلقاهُ فيك ...
مقطع شرد وصداه راجع منكسر
أو يحتويك ..
نحات عظيم يتأملك
بيناتو موعد يبتديك
واجعاهو فكرة لقاها فيك
اوحتلو في لحظة شرود ..
انك ترانيم للعشق
وإزميلو جايب شكل غيم
انا من متين واقف حداك؟
متلهفك ...!
كبي الوجع .. شان أغرفو
واملي الفراغ ..
عبيه تـبّْ .. بي طلعتك
… برسم على الهامش .. شعار
حرفين قيام ..
خط في الوسط ..
لون في الإطار.
رد مع اقتباس
المفضلات