اخونا "ود الضواي" زول ما هيَّن ... بس كان مشهورا بانه لا يحب الدخول في الصعاب والحتات الضيقة،
تخلو القرية عادة منذ الصباح الباكر من الرجال والشباب فلا تجد في المارة الا شوية نساء واطفال هنا وهناك ومن تعذر سعيه في الحياة
في صباح ذلك اليوم ... تأخر "ود الضواي" عن عمله وبقي في القرية لفترة متأخرة من النهار ...
زهج من القعدة الطويلة في البيت فخرج راكبا حماره ، والشوارع لا يوجد بها حائم الا اخونا "ود الضواي"، وخلاص وقت خروج الطلاب من المدرسة للفطور قد اقترب
سكون ، هدوء كل شيء في مكانه .... فجأة يسمع ليك صوت واحدة ست من داخل احد البيوت تصيح
الحقوني الحقوني ،،، ياااابو مروءة ياااابومروءة
اتلفت ود الضواي مخلوعا ....ونهر ليك الحمار كي يبتعد من هذا الصوت المستنجد.
لسوء حظه ، شافتو السيدة ونادت له باسمه
يااا ود الضواي الحقني
الحقني يا ود الضواي .....الدابي دخل لينا في البيت
اخونا خلاص اعصابو كلها رقدت موووية
الله ينعل ود الضواي وينعل الدرب الجابني بيجاي ،،، انا ماالي ومال الدوابي
انا الجابني شنو الليلة بيجاي
غايتو خجل شوية ورجع ليها علي مضض
وين الدابي وين شفتيهو ومشى وين؟
قالت ليهو: والله هسع كان هنا ودخل تحت الحلَّة هناك
الحلة دي وطاااخ بالعكاز على الحلة ...
(ما طلع منها أي دابي طلع بس الملاح وانكشح كلو)
قات ليهو: لالا.... يمكن يكون دخل هنا جنب الزير
وبالعكاز طااااخ على الزير ضربة اودت بحياة الزير وخرج كل مخزونه من الماء ماليا كل البيت طينا
مافيش تحت الزير لا دابي ولا قعونجة
قالت : شوفو شوفو هناك دخل تحت صينية الكسرة ،،، وفجأة تذكرت الفطور واولادها ح يجو من المدرسة جوعانين ،،، تذكرت هذا وهي ترى اخانا ود الضواي يتقدم متعنترا نحو صينية الكسرة ،
يرفع العكازويلوح به في الهواء ويهوي به نحو صينية الكسرة ولكن قبل أن تصل الضربة للصينية تدخلت السيدة وامسكت بذراع اخينا ود الضواي والعكاز
وبدات تستجديه أن يتوقف عن هذه المطاردة الخطيرة وينقذ ما تبقى من اثاث
خليهو ياود الضواي .... خليهو الدابي عاوزنو معانا ....ماعاوزين نقتلو
خليهو... ما قصرت انت تب ... سويت العليك وشكرا ليك
لا شكر على واجب ، ايوة عاوزنك تثقي دائما انو وراك رجالة
وانقذت السيدة الكسرة... وفطر اولادها وهذا واجبها حتى تلك اللحظة
ولكن الدابي ينتظر غير عكاز ود الضواي وفي داخلها لا بد ان يرحل
رد مع اقتباس
المفضلات