القبول الخاص بالجامعات

[امينو]

بعد التحية والسلام


اخواني اعضاء المنتدى في الحقيقة انا طرحتا الموضوع دا لاني بصراحة ما قادر احدد

هل للقبول الخاص بالجامعات مساوئ ام هو مجرد حل لمشكلة ؟؟؟؟؟

انا داير اطرح الموضوع دا من جانبي كطالب قبول عام وبرضو من الجانب الاخر

اولا انا كطالب قبول عام لما ادخل الجامعة ومعاي زملائي القبول الخاص ما اعتقد انهم بسببوا

لي مشكلة في الدراسة او اي جانب اخر سواء سلوكي او غيره بالعكس احتمال طالب القبول الخاص

يكون مستواه افضل مني وقد يكون العكس لكن انا كطالب قبول عام بعتبر انو الطلبة ديل اشترو

الدرجات بقروشهم ودي قد تخلق شوية حساسية في الحرم الجامعي بين طلبة الكليات العليا وطلبة
الكليات الاقل منهم . دا من جانبي كطالب

طيب المجتمع بقول انو الطلبة ديل غير اكفاء يعني لما يتخرجوا ويعملوا في المجتمع وخصوصا

المجالات الحساسة زي الطب .

طيب هل الطلبة ديل اثبتوا وجودهم في الجامعات وهل الخريجين منهم اذا اتخرجوا كانوا بنفس

جدارة طالب القبول العام ولا من الاول الحكاية وما فيها انو مجرد مصدر جديد للدخل اوجدتوا وزارة التعليم العالي .

انا بالموضوع دا ما داير اظلم زول بس داير اي زول يقرا الموضوع دا يديني رأيو في مسألة القبول

الخاص هل بتأثر على نوعية الخريجين لي قدام ولا نعتبرا حل لذوي النسبة المحدودة
والدخل اللا محدود .

شاركونا يا اهل العلم برأيكم

ولكم جزيل الشكر

[همس الشوق]

يديـــــــــــــك العافية عل ى الموضوع الجميل ده وانا متأكدة انو القبول الخاص ده عامل مشكلة كبيرة لكتير من الناس خاصة المغتربين زينا كدة بالرغم من انو منهجنا الي درسناه اقوى بكتير من المنهج السوداني غير كدة نحنا عندنا ثقافة عامة كبيرة في مختلف المجالات غير الخبرات المكتسبينها وانا ما بقلل من شان طالب الشهادة السوداني بل بالعكس طالب الشهادة السوداني بيجلس لي امتحان صعب او باالاصح شبة تعجيزي .
لكن نحنا مستوانا احسن بكتيـــــــر ودة من الواقع اسي عندنا في الكلية الطب اغلب الطلاب شهادة المتفوقين شهادة عربية (خاشين قبول خاص) كلهم نسبهم فوق 95% ومعدلاتهم في الجامعة فوق 3. وناس فارضين روحهم بيقدراتهم سواءً في اللغة الانجليزية والحاسب الالي ومواكبة التطور وفي كل المجالات حتى اسرة الدفعة اغلبها شهادة عربية (قبول خاص) وأي زول متميز في الجامعة تلقاه شهادة عربية (قبول خاص) .
صراحة انا الموضوع دة مزعلني شديد اسي اهلنا ذنبهم شنو ......
بالقوة موفرين لقمة العيش وصابرين على الغربة ومشاكله عشان في الاخر بتو ولا ولدو يجيبو نسبة كويسة وهو مقتنع انو ولدو كويس وبعد دة كلو بيقرية بالقروش.
ما اقدر اقول الا ربنا يعين الأهل التعبانين في بلاد الغربة........

[اللمسة الساحرة]

الاخ امينو بعد التحية والسلام
اختي وحبيبتي همس الشوق ماخلت لي حاجة اقولا ،،،
بس عندي شوية كلام كدة عايزة اضيفو ،،، بالنسبة لمستويات ناس القبول الخاص طبعا هم من احسن الناس اكاديميا ولكن للاسف في سوداننا الحبيب لاينظر الى المستوى الاكاديمي بقدر ماينظر الى الجانب المادي ،،، والمؤسف في الامر انو اغلب من يلجؤوون للقبول الخاص هم من الشهادة العربية حيث ان حكومتنا الرشيدة للاسف تنظر للمغتربين على انهم كبفرة حلوب تدر عليهم المال وهي فرصة ثمينة للاستفادة القصوى منها،،، للاسف طالب الشهادة العربية لا يجد مع اجتهاده طوال العام رغبته ،،، فلا ادري كيف قيم احبائنا في التعليم العالي الشهادة العربية هل من ضعفها ؟ فانا اقسم بالله لكم ان مناهجنا اقوى من مناهج السودان بكثير ولكن نقول شنو حكم القوي على الضعييييف انا طبعا حاسة بيمعاناة اهلينا ممن دخلو اولادهم قبول خاص ربنا اكون في عونم ولذلك حاولت اعبر ولو بشي قليل عن رايهم،،ن

[امينو]

اختي همس الشوق واللمسة الساحرة انا بشكركم على التفاعل مع الموضوع وفعلا يا همس طلاب الشهادة العربية ( بعضهم ) متفوق لكن ما كلهم وانا عموما ما كنتا بقصد بالموضوع ناس( ش - ع ) بس في ناس الشهادة السودانية برضوا بدخلوا قبول خاص وفي الحقيقة انا عندي احصائيات كدا بسيطة من الناس البعرفهم في الجامعة من القبول الخاص اكتر من 60% منهم عندهم انذار اول وحوالي 51% منهم انذار تاني سواء شهادة عربية او شهادة سودانية ودي نسب حقيقية من الجامعة ودي فعلا مشكلة كبيرة لي قدام .

[قمر الزمان]

السلام عليكم اخوانى ..
بالنسبة للقبول الخاص انا شايفة انو ناس التعليم العالي ما ادو ايي فرصة لناس الشهادة العربية ،، يعنى انا امتحنت شهادة عربية السنة الماضية وقالو انو نسبنا ح تكون نفسها يعنى ما ح ينقصوها وعلى هذا الاساس قدمنا في القبول العام والنتيجة انو اخدو بس اربعة من الممتحنين في السلطنة في الجامعات الحكومية .. اما الباقين ما كان عندهم حل غير القبول الخاص .. وزى ماقلت يا امين انهم اشترو الدرجات فهم ما اشتروها لكن هم مجبورين على كدا والماعندهم قروش والله اهم بطلو الجامعة والحاجة دي انت بتكون ملاحظها في اولاد السلطنة اللي كلهم بالوقت قاعدين بس ..
بعدين في اولاد وبنات شهادة عربية والله من المتميزين في كلياتهم بعدين نحن في كليتنا والحمد لله ما حاسين انو ديل[ ش .ع ] وديل سودانية او قبول خاص وعام ..
بعدين الوزارة وضعت نسب معينة للقبول الخاص .. وانا شايفة انو ما باثر على نوعية الخريجين لى قدام ... بالعكس
وآسفة على الاطالة ..
ودمتم

[امينو]

شكرا على المشاركة يا قمر الزمان
طبعا حكاية التنقيص من نسبة الشهادة العربية ناس التعليم العالي قالوا دي معادلة لانو ناس ش ع مناهجهم اضعف ومافي نفس مستوى الشهادة السودانية طبعا دا كلام خارج المنطق لانو و ببساطة اسي ناس الشهادة السودانية نسبهم بقت عالية جدا وفي حاجة ذكرتيها يا قمر الزمان فعلا مؤسفة وهي الطلبة القاعدين لحدي اسي ما دخلوا جامعات مع انهم امتحنوا ليهم سنة او 2 دي فعلا مشكله المساكين ما لاقين طريقة لا برا البلد ولا جوا البلد بس ارجع واقول العيب منهم كان لازم يشدوا حيلهم عشان يقدروا ينافسوا . . .

[So-Br]

السلام عليكم يا امينو شكرا على طرحك الموضوع دا وانا احب ان اضيف اضافه بسيطه انا طالب في جامعه الجزيره وانا امتحنتا شهاده عربيه وكان لى رغبه محدده لكن لما اتعادلت شهادتى بالشهاده السودانيه نقصونى 13% فلم يكن امامى الا القبول الخاص وهل برأيك انا مشترى الدرجات دى ولا مظلوم كونى
دارس خارج السودان ورغم انو المنهج اللي انا درسته اقوى من المنهج السودانى ومعليش على الاطاله وشكرا.

[امينو]

شكرا على المشاركة يا اخ So-Br وفعلا طلاب ش ع اتظلموا في مسألة القبول بس هل ناس القبول الخاص اثبتوا وجودهم ولا دي كانت مجرد استنزاف لموارد ابائنا المغتربين ووسيلة ضغط جديدة لدفع المزيد من الاموال لحكومتنا الرشيدة !!!!!!!!!!!!

[مزوني]

بعد التحية والسلام
ما عارف أقول شنو لكن أنا من وجهة نظري الضعيفة والمتواضعة
لكن طبعا متفقين ان لأي شي سلاح ذو حدين في النافع وفيه الضار
وبعدين ناس القبول الخاص وانا بعرف كتير منهم يكون شاطر لكن خانو الحظ في الشهاده السودانية ودي كتيييييييييييييييييييييرة جدا هنا
وما بختلف معاكم في حتة انو في طلبة من طلبة القبول الخاص
والمحليين وبكل صراحة"قليلين أدب" على الاخر وهم عايشين بي فهم انو انا أدرس بي حقي تاني ما في زول يفتح خشمو معاي يعني ممكن تصل لي درجة انو يقل أدبو حتى مع العميد او أستاذ أو حتى مع الطلبة انفسهم ويتكابر عليهم ووووو
وبرضو ما نظلم الطرف التاني وهو على العموم في الكويس وفي الكعب
وكان الله في العون
ويديك العافية اخوي أمينو على الموضوع يا عسل

[امينو]

الله يخليك يا مزوني وشكرا لي تفاعلك معانا في الموضوع وكلامك 100% صاح بس ربنا يكتر الناس الكويسين

[صلاح ودالطاهر]

الابناء الاعزاء لكم التحية والتقدير وانتم جيل المستقبل وانتم تناقشون هذه القضية اولاً احب ان اوضح بان كل انسان له ظروفه الخاصة ايام الامتحانات وانا اتحدث بصفتي معلم انني درست طلاب في غاية الذكاء لكنهم لم يتوفقوا في مواصلة دراستهم وربما الانسان الذي فرضت عليه الظرف ان يقراء بالقروش ليس بالمعني انه شخص لايستحق اقول لا... وربما يكون هنالك شخص دخل الجامعة من القبول العام وهو لايستحق واحب ان اوضح انه ليس تحيز لمنهج السوداني سهولة المنهج السوداني ساعد علي ذالك وجود المعلم السوداني القدير وصعوبة المناهج العربية ساعد ذلك وجود المعلم الذي يهتم بجمع الاموال اكثر من اهتمامه بالتدريس واتمني الا نظلم المناهج السودانية وانا اتحدي جميع الدول العربية ان تكون مناهجها بقوة المناهج السودانية وهذا ليس بتقليل من شان المناهج العربية وانا اتكلم عن ذالك عن تجربة بين المنهج السوداني والمناهج الاخري
ختامأ اقول الي الابن امين لكل مجتهد نصيب سوى دخل بالقروش اودخل عن طريق القبول العام

[صلاح ودالطاهر]

الابناء الاعزاء لكم التحية والتقدير وانتم جيل المستقبل وانتم تناقشون هذه القضية اولاً احب ان اوضح بان كل انسان له ظروفه الخاصة ايام الامتحانات وانا اتحدث بصفتي معلم انني درست طلاب في غاية الذكاء لكنهم لم يتوفقوا في مواصلة دراستهم وربما الانسان الذي فرضت عليه الظرف ان يقراء بالقروش ليس بالمعني انه شخص لايستحق اقول لا... وربما يكون هنالك شخص دخل الجامعة من القبول العام وهو لايستحق واحب ان اوضح انه ليس تحيز لمنهج السوداني سهولة المنهج السوداني ساعد علي ذالك وجود المعلم السوداني القدير وصعوبة المناهج العربية ساعد ذلك وجود المعلم الذي يهتم بجمع الاموال اكثر من اهتمامه بالتدريس واتمني الا نظلم المناهج السودانية وانا اتحدي جميع الدول العربية ان تكون مناهجها بقوة المناهج السودانية وهذا ليس بتقليل من شان المناهج العربية وانا اتكلم عن ذالك عن تجربة بين المنهج السوداني والمناهج الاخري
ختامأ اقول الي الابن امين لكل مجتهد نصيب سوى دخل بالقروش اودخل عن طريق القبول العام



--------------------------------------------
ودالطاهر

[امينو]

شكرا يا عم صلاح على المشاركة المزدوجة وفعلا في النهاية لكل مجتهد نصيب وربنا يوفق الجميع