ودعتك الله والرسول
يا حزن دموع الفراق
ويا وجع عبرة سفر تايهة أوصافها
يا شجن ألم المسافة
يا الله كيف يكون الوداع؟؟؟؟
حرقة ووحدة وضياع
دوامة في نفس الصراع
دموع الدم تابا الامتناع
والذكريات تبكي وتئن
والصور تهيج الشوق اللي بيجن
والصوت باقي زى جرح الزمن الغاير
مابيرحل ولا بيغادر ولا بيقل
وتاني الشوق ما بيفتر
وكل فرحة ولا بهجة أشوفك قصادي
تبتسمي .. تشتكي لي من الشوق
من السفر .. ومن الغربة ألما بترحم أو تحن
وريدي ليك تقيل براي أشيلو
وألقاك كيف ؟؟؟ ما حليل اللقيا
وأناديك وين ؟؟؟ ما زادت الفرقة
امزج دموعك مع دموعي متين؟؟؟ ما ناحت الغربة
وجفت العيون بسراب زيف العودة
فكرتك رائعة
وعودتك تحصيل حاصل لظروف لازم نعيشها
بس الحقيقة انك في جواي ثواني عمري الأخيرة الضايعة
وبيني وبينك خوف اللقاء من زمن ما معروف مداه
ويتاورني حنينك الزمان
الممزوج بأيام حُــــنان كنا بنقاسيها
لكن عشناها بمودة ووئام
وهدف نبيل حققناه بأمان
مخضرين بشبابنا الريان
أتاريها كانت روض بهيج نديان
كنا جاهلين قيمة العمر لما يسكنوه اتنين
الأول يعطش لما يكون الثاني بيحلم انه ظمآن
والأول يسقم لما الثاني يكون عيان
والأول يبتهج... ينتشي ... يهيم روائع...لما يكون الثاني عاشق ولهان
عيب عمرنا الرَّوح لما تضيع معالمه أو تتبدد ملامحه في وقت ضيق ما بيعدي
ولما تتمدد ساعات البعاد..نتسارع
نتجاري
كيف نتلاقى ولو في الإحساس أو الفؤاد؟؟؟؟
سكين غريقة متغلغلة في جواي من ساعة رجفة السفر الأكيد
دايرة احكي ودايرة اكتب
دايرة ابكي ودايرة انتحب
دايرة أتشبك فيكِ
أو أدس بين أنامل أيديك
أو بين تذاكر السفر العنيد...
ودايراني أودعك؟؟؟؟؟؟؟؟؟
صعبة على أودعك
خلينا من غير وداع
اخدع نفسي بوجودك
وانك ماشة مشوار دقائق ولو طولتِ
قلبي حارس ورودك
صعبة على أودعك
الزيك ما بيتودع
والمكلوم زيّ أنا ما بودع
أنا بس عند ربنا وديعة بودعك
ألما بتضيع ودائعه ولا بتروح أمانة عنده
ربنا يعدل خطوتك
تلقى الروعة والجمال والجنائن في سكتك
تتحقق أهدافك وطموحاتك ومنيتك
لا تزورك آهة ولا طيف حزن أو ألم
وتفضلي دائماً معافاة في صحتك
تبقي دائماً معززة ... مكرمة ... مرفهة في دنيتك
ما تغادر الضحكات شفاهك ونكتفي نحنا ببسمتك
عيونك ما تعرف مدامع ونحيا نحنا بإشراق نظرتك
ربنا يحقق ليك مرادك
ويزرع الفرح والخير والسعادة والأماني الجميلة في كل مقاصدك
ويعوض ليك مكان الشقا دائم هنا
وان شاء الله ما تحسي بكربة
ولا يمر عليك ليل أسى
أو قهر دنيا
أو ظلم بشر
وما يطول عليك ليل البعاد من عزاز
ولا تلاقي حبايب الريد الشقي
وما تعرفي جراح الزمن
ولا تصادفي إحساس الحزن
ولا تمر بيك نفحة تعاسة أو خذلان يلازمك بشعور شجن
تلقى الأمان في كل خطوة
وربنا يعدل طريقك
وربنا يحقق دعانا
ودعتك الله والرسول
رد مع اقتباس
المشاركة الأصلية كتبت بواسطة عباد الشمس
المفضلات