ماد لينا يونانيه .... وفاطمة سودانية

[نزار حسن محمد]

ماد لينا يونانيه .... وفاطمة سودانية

ماد لينا الأم سليلة امهراه والوالد من قلب أسينا... أما فاطمة السودانية فهي من أم حضرميه وأب سوداني من قبلية الجعلين عاشت فطين وهو اسم الدلع لي فاطمة في مدينة بور سودان .
في عام 83 -84 انتدبت من قبل مشروع الجزيرة للعمل لفترة مؤقتة بمكتب الجزيرة ببورسودان .. ومنذ اليوم الأول وأنا بسمع من الاخوه الزملاء نحن ماشين نشرب شاي مع فطين في منطقة الخور وهو مكان معروف لسكان بورسودان تجد فيه جميع الأكلات السودانية والقهوة والشاي المظبط . ومشيت معهم عشان أشوف فطين دى ...؟؟ وسبحان من صور وجدته ملاك في شكل إنسان وجدته حورية البحر الأحمر.. رجعت المكتب وكان معنا عمنا الأديب والشاعر احمد إسماعيل البيلى وهو رجل متدين ذو خلق رفيع من سكان مدينة الحصاحيصا .. جاني وبمنتهى الاستحياء وسالنى يانزار عمك مادا ير يشوف فطين دى .. اتفقت معه على أن يذهب معنا غدا بعد الفطور نشرب الشاي مع ست الاسم.
وقد كان.... لم ينطق بكلمه ولم أكن اعلم بان العم احمد من الشعراء الفطاحله ... في المساء طلب منى العم احمد بان نذهب ونجلس على الكنبات الموجود قبالة البحر الأحمر اخرج من جيبه ورقه وبداء يقراء.... تعالوا اسمعوا عم احمد قال شنو في فطين....


كذب القائل في الحياة حبين الغــــرام واحد ما بكون اتنين
الله يوم قسم ما خلق قلبين وقال قلب واحد لك يامسكين
شوف قدرة الله في جمالها فطيــــــــــــــــــــــــــــــــــن

دى ألرموشه سلاح قاطع الحدين والعيـــــون مازجه موية النيلين
من سواد وبياض ديمه مجتمعين نظره مابتروى بس تزيدنا حنين

تلمع الوجنات في الخدود نجفات مزجوه بنور وكملوها صفات
فوق جمال تاجوج رهبت الملكات شاعرك احتار يوصف الكلمات
اخرسوا عيـــــــــــــــــــــــــون و علمـــوا عظـــــــــــــــات


ابلغ التعبير فيك ياشـــــــــفتين الحديث مسكر وفى سكاته حنين
والله ما مضق كلمـــــــــــات وما صبـــــغ حاجبيـــــــــــــــــن

الله من نطقك والله فيك يافطيـــــــــــــــــــــــــــــــــن
النهيد حق عاج استدار بمقاس مافى زول طالة وقيمه بالماس
الخصير ضامر والقوام مياس توجوها فطين فوق رووس الناس

أتجمعوا العشاق وقالوا هات يلبيب أحكى في صفاته وكتر التحبيب

قلت مابقدر حاشا حاشا أجيب أو أصل ليها حتى بالتقريب

دى قدرة الله ودى علوم الغيب

كذب القائل في الحياة حبين الغرام واحد مابكون أتنين الله يوم قسم ماخلق قلبين
وقال قلب واحد لك يامسكين شوف قدرة الله في جمالها فطيــــــــــــن..


انتهت قابلني الأخ العزيز صالح مطر المخرج التلفزيوني في مناسبة عائليه وكنت قد لحنت هذه القصيدة وطلب منى أن اسجلها ببرنامج إبداعات بلادي وهى موجود حاليا بمكتبة التلفزيون السوداني ..... لكم كل الود والحب ،

[أبوبكرحامد]

لك نزار وللعم احمد البيلى ولملهمته فطين كل التقدير ، وهى سانحة طيبة للتعرف على ابداعاتك فنرجو المزيد من الابداعات

[نزار حسن محمد]

اخى ابوبكر لك التحايا والاحترام.....ها انا قد بدات وانشاء الله بجهودك المقدر سوف نرتقى بالمنتدى الى ما نسمو ودمت ياستاذ

[خالد هاشم علي]

تسلم يانزار وأرمي لي قدام......................


سؤال بريء كده( هسي فطين دي كان مشيت بورتسودان بلقاها؟؟؟؟؟؟؟؟ عشان انا نازل تريبتيك)

[ابراهيم]

استاذنا العزيز .. نزار
لك كل الود والتقدير
وانت تنثر هذا العطر هنا .. وفي هذه الاستراحة ..
استمتعت كثيراً بالقراءة ..
اسلوبك في السرد جعلنا كما كنا معكم في الرحلة
ليتنا نسمع هذا اللحن يوماً ..
ومؤكد انه كما درة فطين اعلاه ان لم يكن أكثر جمالاً

لك المودة

[الجندي المجهول]

كذب القائل في الحياة حبين الغرام واحد مابكون أتنين الله يوم قسم ماخلق قلبين
وقال قلب واحد لك يامسكين شوف قدرة الله في جمالها فطيــــــــــــن..


************************************************** *****************

انت قمة في الروعة والحا يشجعني اكتر احضر زواج غسان هو حضورك عشان التقيك يا استاذ نزار يا اخونا الاكبر ودمت

[ابراهيم]

تسلم يانزار وأرمي لي قدام......................


سؤال بريء كده( هسي فطين دي كان مشيت بورتسودان بلقاها؟؟؟؟؟؟؟؟ عشان انا نازل تريبتيك)

ابو هاشم كيفك ..
مشتاقين ..

[sambaaa]

سؤال بريء كده( هسي فطين دي كان مشيت بورتسودان بلقاها؟؟؟؟؟؟؟؟ عشان انا نازل تريبتيك)

ههههههههههههههههههههههههههههههههههه
ابوهاشم ..

عاوز تكتب شعر يعني ولا تشرب شاي ولا شنو ؟؟؟؟؟؟؟؟؟؟؟؟
تحيه خاصة للمبدع نزار .. وكدي تعال لي جاااااااي ..

[نزار حسن محمد]

الاعزاء دائما وابدا : خالد هاشم على
ابراهيم المشرف العام
الجندى النجمه
ساااااااامبا
خالد هاشم ... كلام بينى وبينك فى زمنا كانت البلد فيها مليــــــــــــــــــــــون فطين لكن الان...... كريم؟؟؟.((ديانا))!!!! وبس
ابراهيم ياحبيب اسلوبك انت ارقى ... وبالمناسبه شايف ودالماذون بقوليك ابرهوته سر الاسم دا شنو .. ودمت يالعزيز
الجندى النجمه انا فى انتظارك بحى المنيره فى يوليو مع دعاش الخريف وجلسات الابداع علــــــــــى المباشــــــــر
سامباااا والله امبارح كنت على البال واتمنيت اكون عندى رقم تلفونك .. تصدق ياسامبا امبارح انا متعشى بى الاغاشى
اكتشفت بالصدفه افتتاح محل بامارة عجمان واحد من ابناء الدباغه جاء مخصوص للنادى السودانى بعجمان عشان يعمل الاغاشى
لكن ما اغاشى خطير اكلت وانتوا معاى فى الخاطر... دمتم ياحبائب