بيقولوا.. الصراحة راحة

[عزيز عيسى]

أهلنا دائما بيقولوا الصراحة راحة.. من الملاحظ أن هذا المثل أصبح شبه روتيني ويتداوله العديد من عامة الشعب السوداني في شتى المجالات والمناسبات.. ولا يقتصر مجلس أو حضور فيه جماعة إلا وجاء ذكر هذا المثل في أكثر من مناسبة.. لكن إذا وضعنا هذا المثل أو هذه النظرية في قالب محوري ونظرنا إليها بعين مجهرية لخرجنا بالتساؤلات التالية:

هل فعلا نحن أمينين أو صريحين مع أنفسنا أو مع بعضنا البعض بما فيه الكفاية حول تطبيق مضمون هذه النظرية؟!!.. وهل دائما الناس على قدر من الشجاعة أو لديها الأمانة التامة في قول الصراحة؟؟.. أشعر في كثير من الأحيان بأن الصراحة تكاد تكون مفقودة تماما أو شبه معدومة بين غالبية الناس في شتى المجالات حتى في تعاملتنا مع بعضنا البعض..

من الملاحظ في بلاد الغرب أن العديد من المواطنين لديه الجرأة على كشف المستخبيء على العامة خاصة إذا شعر أحدهم بأن هنالك خطأ أو تصرف قد يتضرر منه العامة لأنه يرى بأن من واجب الأمانة يحتم عليه أن يكشفها حتى ولو أن ذلك يكلفه وظيفته أو منصبه أو حتى على حساب سمعته.. ولا يترددون أو يخافون لومة لائم في كشف المستخبيء وإظهاره على حيز الوجود ليعرفه الجميع حتى ولو كان المخطيء يعتلي مرتبة وظيفية عالية كرئيس البلاد مثلا.. أما عدا ذلك الأشخاص السياسيون فنجدهم دائما يتكتمون على أهم الأسرار والمعلومات الهامة خاصة إذا كانت في غير صالحهم.. لذلك دائما لايتوقع منهم قول الصراحة.. وما أكثر الكذابون السياسيون في هذا الزمان..

وسؤالي: لماذا نحن السودانيين بالذات نتكتم على الكثير من الأمور والأسرار التي قد يراها البعض منا بأنها أمور شخصية بحته ولكن في نفس الوقت قد تهم أو تؤثر على علاقات العامة.. أو (كما يقال) نتهرب من الواقع ونتخوف من الصراحة والمكاشفة ودائما نتجنب بعضنا البعض.. هل هذا ناتج عن عدم الثقة بالنفس أم الخوف من رد الفعل وعدم الاستطاعة على مواجهة الحقائق.. أم أن عادتنا والبيئة المحيطة التي نشأنا عليها أثرت تأثيرا مباشرا على طبائعنا مما جعلنا نتفادى دائما تحمل المسؤولية.. لماذا.. هذا الموضوع يقلقني كثيرا.. أرجو أن تجيبوني..

هذه مجرد خواطر وملاحظات رأيت أن أعرف رأيكم.. علما بأنني لم أقصد شخوص معينة؟

[ابراهيم]

سلامات يا عزيزنا ...
لمست موضوع هام ...
والصراحة نحن شعب بحب يظهر مثالي دايماً ودي المشكلة الاساسية .. وبندفع ثمنها غالي
والكلام دة حاصل في اغلب المجتمعات السودانية على وجه الخصوص والمجتمعات الشرقية بصفة عامة يعني الواحد دايماً بحب يظهر إنسان مثالي وعشان تكون مثالي في مجتمعنا لازم تدوس على الصراحة في بعض الاحيان واذا بقيت صريح بتبقى مبغوض ..
لذلك تجد اغلب الناس مثاليين وغير تلقائيين عكس المجتمعات الغربية ..
عندك مثلاً هنا في المنتدى كان في بوست بعنوان: ( اول ما نتظر الى فتاة ما الذي يعجبك فيها)
والردود كانت .. (اخلاقها ، حشمتها ، ادبها) وطبعاً ردود مثالية تفتقر الصراحة
وانا متأكد في ناس بتعجبهم العيون ، القوام ، الخدود ، الابتسامة ، الشعر ، المشية، اللفتة...الخ
دي الحاجات البتعجب العين وما عيب الواحد يقول كدة طالما دة راي بصراحة .. أما (اخلاقها ، حشمتها ، ادبها) دي بالنظر ما بتتعرف ... لأنو نحن في زمن التبرج فيهو طغى على الدواخل كل الناس لابسة ثياب ما معروف جواها في شنو ... مع الاخذ في الاعتبار انو الكلام ما بشمل كل الناس.
واسباب كتيرة واهية وهشة بتخلى الناس ما صريحين وما تلقائيين.

دي وجهة نظر

ليك تحياتي اخوى عزيز
وبجيك صادي

[عزيز عيسى]

سلامات يا عزيزنا ...
لمست موضوع هام ...
والصراحة نحن شعب بحب يظهر مثالي دايماً ودي المشكلة الاساسية .. وبندفع ثمنها غالي

ليك تحياتي اخوى عزيز
وبجيك صادي

ابراهيم يا زينة الشباب،

اللي يعجبني فيك إنك دائما بتفهم قصدي..
وهو فعلا هذا حال مجتمعاتنا اليومين ديل..
وأكيد الكل بيدفع الثمن غالي..
تلقى العديد بيحمل وجهين.. ولايقول النصيحة..
يواجهك بالوجه المثالي ويخبيء عنك الوجه المخالف لنظرته الحقيقية في دواخله..
محاولا بذلك التقاضي عن الأمر ظانا بأنه قد يجلب له المتاعب..
مع إنه لو قال الصراحة أو الحقيقة قد تكون فيها فائدة أو إصلاح أمر ما..
ويقيظني الأشخاص الذين يقولون: يازول أبعد عن الشر وغنيلو..
أو يقولون: الخواف ربى عيالو.. بس كيف يكون خواف ويربى عياله..
وكل هذه الأسباب تؤدي الى تأخر أو بالأحرى تخلف مجتمعاتنا..
أشكرك أخوي على إثراء الموضوع بوجهة نظرك الغالية..
ودمت لنا.

[ابراهيم]

وملاحظة يا عزيز في السودان

اذا قدمت لشغل في شركة او اي مصلحة خاصة او حكومية
لو ما عايزنك ما بقولوا ليك ما قبلناك يقولوا ليك انتظرنا حنتصل عليك
وانت تبني آمالك عليهم وتنتظر اسبوع سنة شهر قرن ... وفي الآخر تجني السراب
مع إنو لو قالوا ليك ياخ انت ما مؤهل او مؤهلاتك ناقصة بكون ساعدوك تمشى تشوف الناقص شنو وتكملوا
لكن بس يخلوك عايم .. وانت تكون ضحية الامتناع عن الصراحة في عز حوجتك ليها والكلام دة عن تجربة والله انا نص عمري قضيتو انتظار في السودان لغاية ما اكتشفت مؤخراً انو مشكلتي ما عندي واسطة وعجبي ..
اقل حاجة كان يصارحوني ياخ انت ما عندك واسطة ..
كان كسبت زمني شفتى لي بلد اغتربت فيها او فتحت لي مطعم فول
على الاقل كان بكسبوا اجر

[عزيز عيسى]

مسألة الواسطة دي أكبر كارثة.. وسمعت إنها إنتشرت كثير في مجتمعنا السوداني..
وفعلا الشخص الذي لايملك واسطة سيضطر يسافر خارج البلد يبحث عن الرزق ولو في الصين..
على الأقل علشان يوفر لقمة العيش لأسرته وباقي أفراد عائلته التي تعتمد عليه..
وهذا أيضا من أحدى أسباب الهجرة..
عندنا في إمريكا تقوم الشركات بأختيار أشخاص معينين تعادل مؤهلاتهم وخبراتهم متطلبات الوظيفة المعلن عنها..
بعد المعاينة مباشرة يصارحك الشخص الذي أجرى معك المعاينة بعدد الأشخاص الذين تقدموا للوظيفة
وكم عدد الأشخاص الذين تمت معاينتهم حتى تأريخه..
ويقول ليك إتصل بينا بعد اسبوع لتعرف النتيجة..
وإذا لم يتم إختيارك للوظيفة ترسل رسالة رقيقة تشيد بمؤهلاتك وأنه تم إختيار الشخص المناسب للوظيفة..
وما بيقفلوا الباب في وجهك.. لكن بيشجعوك على التقديم لوظائف في أماكن أخرى..
وسيتم الاحتفاظ بالسيرة الذاتية لمدة ستة شهور الى سنة.. وفي حالة ظهور فرص أخرى
سيتم الاتصال بك.. يعني ما بخلوك عايش في الأوهام..
تفتكر كلام زي دا موجود في السودان.. ولا برضو لسه بكذبوا على الناس ويقولوا حنتصل بيك..
ويخلوك عايش على وهم؟؟

[خالد عبدالماجد]

الأخ عزيز
تحية لإثارة الموضوع الجميل الهادف وتحيات للأخ إبراهيم للإضافات الجيدة والحقيقية .
بإعتقادي أن تقاليدنا السودانية رغم مابها من الحميد الجيد إلا أن بها الكثير من الإشياء غير المحمودة فتأثير هذه العادات جعلت نظرة المجاملة طاغية بشدة على الحقيقة مما يجعل الإنسان يفاضل بين قول الحقيقة وخسران المعني بها أو مداراتها والإبقاء على الود محفوظ لان الصراحة المعنية أعتقد أنها التي تحمل جوانب سلبية .
هذا الشئ نتاج عدم تقبل معظم السودانيون لكلمة الحق الصريحة وبمبررات واهية مثلاً ( ماكان تقولها بالطريقة دي ) أو ( كان تقولها لي وحدي ) في حالات خاصة .
تجد معظم السودانيون وفي حال رغبة أحدهم في القول الصريح يعمل جاهداً لتغليفه بعبارات كثر ليغطي عليها وذلك خوفاً من عدم تقبل الآخر لها .
المسألة في مجملها أعتقد أنها ( جبن ) مستفحل في هذه الأمور .

[Jamal Elmahi]

ياخواجه دايماَ مواضيعك حاره وملهلبه...والكلام هنا دخل الحوش...والكلامم ليك يا المسدد اضنيك....الصراحه راحه لكن الطريقه التقنع الدّيك شنو؟؟؟
والصراحه راحه في كل شي ...يعني مثلاّ البوبار والعنطزه والقندفه والفشخره والانكشاخه والانفلاخه و...كلها نوع من أنواع عدم الصراحه والواقعيه..أي الظهور بالمظهر غير الحقيقي او الصريح وسرعان ما تظهر الحقيقه وتقول ياريتني لو كنت عادي وصريح من الاول....والصراحه نوع من أنواع الامانه وما عداها فهو كذب وتلفيق ونفاق مع تعدد المغلفات من مجاملات وأتوكيت وخلافه....والله يكضّب الشينه...

ود الماحي

[عزيز عيسى]

الأخ عزيز
تحية لإثارة الموضوع الجميل الهادف وتحيات للأخ إبراهيم للإضافات الجيدة والحقيقية .
بإعتقادي أن تقاليدنا السودانية رغم مابها من الحميد الجيد إلا أن بها الكثير من الإشياء غير المحمودة فتأثير هذه العادات جعلت نظرة المجاملة طاغية بشدة على الحقيقة مما يجعل الإنسان يفاضل بين قول الحقيقة وخسران المعني بها أو مداراتها والإبقاء على الود محفوظ لان الصراحة المعنية أعتقد أنها التي تحمل جوانب سلبية .
هذا الشئ نتاج عدم تقبل معظم السودانيون لكلمة الحق الصريحة وبمبررات واهية مثلاً ( ماكان تقولها بالطريقة دي ) أو ( كان تقولها لي وحدي ) في حالات خاصة .
تجد معظم السودانيون وفي حال رغبة أحدهم في القول الصريح يعمل جاهداً لتغليفه بعبارات كثر ليغطي عليها وذلك خوفاً من عدم تقبل الآخر لها .
المسألة في مجملها أعتقد أنها ( جبن ) مستفحل في هذه الأمور .

الأخ العزيز خالد ودكسلا،

أسعدني مروركم الكريم ومداخلتكم البهية التي أثرت الموضوع
وأضفت عليه رونقا بتعليقكم القيم المتمثل في
إلقاء بعض الملاحظات على تقاليدنا السودانية..

بالنسبة للمجاملة فعلا دائما تكون سلبية في مجتمعاتنا
والتجمل يعتبر نوع من التحايل أيضا..
ففي رأيي لو أي أنسان تجرأ قليلا وتحدث مع ذلك الشخص على إنفراد
بأن يرشده ويوضح له الصاح من الغلط لكان خيرا من المجاملة أو الكذب..
لأنه بهذه الطريقة قد يساعد على استمرارية الخطأ..
والناس لابد أن يتسع صدرها وتقبل النقد مهما كان نوعه..
والحماقات الزائدة عن اللزم تفقد العديد من الأصحاب..
أما الشخص أو الصديق الذي لاينصحك ويقول لك الحقيقة
أخير عدمه فهذا ليس بصديق
و الذي لا يقول الحقيقة عمره ما يتقدم.

ولك مني كل الود

[عزيز عيسى]

ياخواجه دايماَ مواضيعك حاره وملهلبه...ود الماحي

وإنت يا جيمي اللي يعجبني فيك دائما اسلوبك المميز الظريف الساخر والبساطة في تناول المواضيع.

والصراحه راحه في كل شي ...يعني مثلاّ البوبار والعنطزه والقندفه والفشخره والانكشاخه والانفلاخه و...كلها نوع من أنواع عدم الصراحه والواقعيه..أي الظهور بالمظهر غير الحقيقي او الصريح وسرعان ما تظهر الحقيقه وتقول ياريتني لو كنت عادي وصريح من الاول....والصراحه نوع من أنواع الامانه وما عداها فهو كذب وتلفيق ونفاق مع تعدد المغلفات من مجاملات وأتوكيت وخلافه....والله يكضّب الشينه...

ود الماحي

الصدق الأمانة النزاهة الاخلاص هذه صفات حميدة يجب أن يتحلى بها الجميع.
هو فعلا شيء محير.. الناس دي أيه الجابرها على المجاملات الهدامة التي ذكرتها..
مثل البوبار والعنطزة والفشخرة والكشكرة والانكشاحة والانفلاخة
- الانفلاخة دي حلوة أول مرة أسمع بيها.. من أين جاءت؟
هل من الفعل: إنفلخ ينفلخ إنفلاخا.. -
هذه كلها مجتمعة صفات مهلكة ومدمرة وتؤخر أكثر.
كثير من الناس أصبح يعمل على غرار محمود الكضاب..
أليس من الأفضل قول الصراحة..
ويريحوا أنفسهم بدل الكذب و اللف والدوران على الفاضي
والندم على قول الكذب لا يجدي في النهاية..
والعرجة ما بتصلح المشي

[ابراهيم]

- الانفلاخة دي حلوة أول مرة أسمع بيها.. من أين جاءت؟
هل من الفعل: إنفلخ ينفلخ إنفلاخا.. -

والله الانفلاخة دي صعبة يا ود الماحي ..
وعزيز بالتصريف دة صعبها زيادة
دلونا الى النور يا جماعة
رفقاً بالحناكيش

[مزوني]

يا عمنا عزيز حبابك والله وحبابو موضعك وبالجد هبشت وتر حساااااااااااااااااااااااااس

يا جماعه أنا مما جيت السودان والله مانفسي أعرف الا حاجه واحده بس :-

الشعب السوداني زي ما قلتوا بطبعوا وبدون زعل حق بوبار.. والمشكله انو معظم المواطنين أو شخص بيعينوا

بشوف نفسوا انو هو العااااااااااااالم داك والزول المقطعها ومافي زول مالي عينو

وناااااااااااااااااااااااااااااااااادر ما تلقى ليك زول بعترف ليه بحق زول ... وحتى لو إعترف لازم ينكت فيها عيب

وبعدين بي صراحه السوداني ملك التنظير وبعد ده كلو لا بعجبو العجب ولا الصيام في رجب

والواحد يا عم عزيز تلقاه بكذب عليك وبحلف ليك انو دي الصراحه ودي الحقيقه وومكن تصل لي مرحلة انك بتسمع فيه

وانت عارفوا انك كذاب وتقوم تواجهو بي كذبتوا والله مستعد يغالطك لي بكره ولو حكيتها معاه بي دلايلها

( طبعا الدليل يكون فئه من الناس وما يكون بي الكلام ) برضو ما حيقتنع وحينسحب وفي النهايه يجي يعمل معاك شكله

كييييييييييييييف تطلعني كذاب قدام الناس ..؟؟ تقول ليه لكن انت فعلا كنت بتكذب؟؟ يا زوووووووووووووووووووول

ده طبعا برنامج براه واحتمال يصل لي مرحله انا مربى أحسن منك وماعارف ايه وموال ماليه أي داعي

وبي صراحه الشعب السوداني الله يكون في عونه

وتسلم يا عمنا الغالي على موضوعك الجميل

ومعليش يا جماعه أخدت لي زوغه من الموضوع لكن في النهايه حاجات حاصله وبالجد بتزعل

وربنا يكتب الفيه الخير

[Jamal Elmahi]

والله الانفلاخة دي صعبة يا ود الماحي ..
وعزيز بالتصريف دة صعبها زيادة
دلونا الى النور يا جماعة
رفقاً بالحناكيش

يا برهومه يا خواجه القاهره...أنفلخ علي وزن أنبطح ..أنبطح في العنقريب اقصد في الكلام يعني أخد راحتو ...أنفلخ مرادفه لشطح يشطح فهو منشطح...شطح في الكلام أي أجتاز مجال المعقول الي اللامعقول...مجال الصراحه وقول الحقيقه الي اللاصراحه...ألا هل بلّغت اللهم فأشهد....

مشاققه...
عبدالله الطيب دا الاّ يكون مشلّخ....

ود الماحي

[عزيز عيسى]

والله الانفلاخة دي صعبة يا ود الماحي ..
وعزيز بالتصريف دة صعبها زيادة
دلونا الى النور يا جماعة
رفقاً بالحناكيش

ابراهيم إفتكرت نفسي فاهم معنى الكلمة..
حاولت أصرفها علشان تتفهم..
لكن ودالماحي ما قصر..
وإن شاء الله الحناكيش يفهموها..

[عزيز عيسى]

يا عمنا عزيز حبابك والله وحبابو موضعك وبالجد هبشت وتر حساااااااااااااااااااااااااس

يا جماعه أنا مما جيت السودان والله مانفسي أعرف الا حاجه واحده بس :-

يا مزوني والله ألف مرحب بيك ونورت،
إنت الجابك السودان شنو؟ ههههه.

الشعب السوداني زي ما قلتوا بطبعوا وبدون زعل حق بوبار.. والمشكله انو معظم المواطنين أو شخص بيعينوا

بشوف نفسوا انو هو العااااااااااااالم داك والزول المقطعها ومافي زول مالي عينو

وفي رواية أخرى شناف و(بكجن) كل شيء.

وناااااااااااااااااااااااااااااااااادر ما تلقى ليك زول بعترف ليه بحق زول ... وحتى لو إعترف لازم ينكت فيها عيب

وبعدين بي صراحه السوداني ملك التنظير وبعد ده كلو لا بعجبو العجب ولا الصيام في رجب

والواحد يا عم عزيز تلقاه بكذب عليك وبحلف ليك انو دي الصراحه ودي الحقيقه وومكن تصل لي مرحلة انك بتسمع فيه

وانت عارفوا انك كذاب وتقوم تواجهو بي كذبتوا والله مستعد يغالطك لي بكره ولو حكيتها معاه بي دلايلها

( طبعا الدليل يكون فئه من الناس وما يكون بي الكلام ) برضو ما حيقتنع وحينسحب وفي النهايه يجي يعمل معاك شكله

كييييييييييييييف تطلعني كذاب قدام الناس ..؟؟ تقول ليه لكن انت فعلا كنت بتكذب؟؟ يا زوووووووووووووووووووول

ده طبعا برنامج براه واحتمال يصل لي مرحله انا مربى أحسن منك وماعارف ايه وموال ماليه أي داعي

الشعب السوداني من ناحية عامة مثقف ومتعلم بالفطرة..
أو (بالجربندية).. جربندية دي بيعرفوها أعمامك الكبار أسأل عنها أعمامك ودأبوشوارب..
ودالماحي.. ودالصول.. أو أعمامك ودالمأذون.. وخالد هاشم.. بيشرحوها ليك..
نرجع لموضوعنا..
السوداني ممكن ينظر في السياسة بدرجة إمتياز،
الفن، الرياضة، الآقتصاد، المسائل الاجتماعية.. الثقافية..
والعلوم بشكل عام... وعادي جدا ممكن تلقى ليك واحد يحلف ليك طلاق
ويقول ليك الكرة الأرضية إبتدأت تتآكل من جهتها الشرقية أو الغربية
ويحدد ليك بنسبة كذا وفي عام كذا سيصبح حجمها كذا..
عارف ليه لأنو بيكون شايل مقاسات في جيب العراقي بتاعو!!
ولو قلت ليه الكلام دا جبتو من وين يا محمود!!؟
ما يلقى حل غير إنو يعمل معاك شكلة!!
وبي كدا يكون أقنعك!!!
نسأل الله السلامة.

[عزيز عيسى]

يا برهومه يا خواجه القاهره...أنفلخ علي وزن أنبطح ..أنبطح في العنقريب اقصد في الكلام يعني أخد راحتو ...أنفلخ مرادفه لشطح يشطح فهو منشطح...شطح في الكلام أي أجتاز مجال المعقول الي اللامعقول...مجال الصراحه وقول الحقيقه الي اللاصراحه...ألا هل بلّغت اللهم فأشهد....

مشاققه...
عبدالله الطيب دا الاّ يكون مشلّخ....

ود الماحي

يا ودالماحي.. لو كان قلت لينا انبطح وانشطح كان ريحتنا من الانفلاخ..
إنبطح وإنشطح على وزن بلا وانجلا..

[أبوبكرحامد]

لك الشكر عزيز وانت تفتح " كوة " للضوء ونفاج للتواصل الوجدانى والفكرى بين أعضاء المنتدى - فى البدء دعنى أحكى لك عن موقف يتعلق بموضوع البوست ، اتصلت هاتفياً بصديقى الطيب بشير المقيم بميامى وتربطنى به اواصر الصداقة التى تفوقت على علاقة الدم ، وخلال المحادثة طلب من ابنه بشير التحدث لى ، وبشير عمره الآن ست سنوات وكانت آخر مرة أراه فيها قبل حوالى أربع سنوات وهى فترة ليست بالقصيرة ولايمكن لمدارك من فى سنه أن تستذكر ماحدث الاسبوع الماضى ، لذا لم أستغرب حين قال لوالده لاأذكر عمو بكو " هكذا كان ينادينى " ، وقد أصاب صديقى الطيب بعض الحرج جراء ماجرى ، فضحكت وطمأنته بأننى فى غاية السعادة لصراحة ابنه ، وقلت له أن السبب فى هذه الصراحة يعود للنهج الأمريكى الذى تربى عليه ، ولو كان يعيش بالسودان لأستجاب لضغوطات والده وأومأ وتظاهر بأنه يذكرنى .
ماسبق ذكره يوضح بجلاء الخلل فى مناهجنا التربوية وعدم ترسيخ قيم الصراحة والصدق لدى النشء ، وليت الأمر يقف عند هذا الحد بل إن الصراحة قد تعرضهم للعقاب كما حدث لإبن خالتى حين كان فى اولى سنواته بالمرحلة الإبتدائية ، وكان استاذ التربية الإسلامية يحكى لهم قصة سيدنا ابراهيم عليه السلام حين قرر قومه انزال العقاب به وحرقه بالنار انتصاراً لآلهتهم وكيف أن النار لم تحرقه بإذن الله ، وعند نهاية القصة صاح ابن خالتى وعبر بعفوية عن عدم تصديقه لهذه المعجزة وصاح بأعلى صوته " دُل - وهى شفرة استخدمت قديماً للتعبير عن كذب الرواية أو راويها " فما كان من المدرس إلا إنزال العقاب به متهماً إياه بالشرك وربما الشيوعية .
بمشى واجيك راجع - لاتقولى مين عارف المصاير

[عزيز عيسى]

لك الشكر عزيز وانت تفتح " كوة " للضوء ونفاج للتواصل الوجدانى والفكرى بين أعضاء المنتدى -
ولو كان يعيش بالسودان لأستجاب لضغوطات والده وأومأ وتظاهر بأنه يذكرنى .
ماسبق ذكره يوضح بجلاء الخلل فى مناهجنا التربوية وعدم ترسيخ قيم الصراحة والصدق لدى النشء ، وليت الأمر يقف عند هذا الحد بل إن الصراحة قد تعرضهم للعقاب.

بالفعل هذا هو الحاصل بالضبط..
فمسألة العقاب هذه لها نتائج سلبية وخيمة قد تنعكس على تصرفات الطفل مستقبلا..
وتجعله يفقد الثقة في نفسه.. ويصبح إنسان معقد أو إنطوائي إذا صح التعبير حينما يكبر ويصير رجل..
وغالبا ما تجده يتردد في إتخاذ القرار من تلقاء نفسه.. ودائما يستعين بالأخرين..
لأنه يخاف من مواجهة الحقائق بنفسه وبالتالي يكون مصيره الفشل.
فتربية النشء لابد أن تبنى على الصراحة والتشجيع بإعطاء الطفل كامل الحرية للتعبير عن رأيه..
وعن ما يدور بخاطره..
دون الضغط عليه أو الوعد بتوبيخه..

وكان استاذ التربية الإسلامية يحكى لهم قصة سيدنا ابراهيم عليه السلام حين قرر قومه انزال العقاب به وحرقه بالنار انتصاراً لآلهتهم وكيف أن النار لم تحرقه بإذن الله ، وعند نهاية القصة صاح ابن خالتى وعبر بعفوية عن عدم تصديقه لهذه المعجزة وصاح بأعلى صوته " دُل - وهى شفرة استخدمت قديماً للتعبير عن كذب الرواية أو راويها " فما كان من المدرس إلا إنزال العقاب به متهماً إياه بالشرك وربما الشيوعية .
بمشى واجيك راجع - لاتقولى مين عارف المصاير

دُل دي ضحكت فيها لمان دموعي جرن.. دي نكتها من وين يا ودالمأذون؟
وفي مجاز آخر فك ليه قنبلة..
الجنى دا الظاهر عليه شقي..
غايتو جنس محن!!

[ابومرام]

اولاً احيك اخي عزيز وانت تطرق الباب على اسخن المواضيع والتحية للاعمام ذي ماقلت ودا لماذون ودالصول وكل الكوكبة النيرة ،، صراحة الموضوع احلى مافيه انى اضفت للذاكرة معلومات متعة ( انفلاخة _ دل واشياء ) عموما نحن بطبيعتنا السودانية كما اسلف الاخوان نداري او نهرب او نتجمل او نحاول ان نظهر بثوب اجمل ما يكون فيه المرء ولكن هذا الجمال قد يضيع عنا الكثير او يجعلنا نعيش في هاوية مثلاً كما ذكر اخي ودالماذون اذا كان الشخص لم يعرفك قد لا يبوح اليك بتلك الحقيقة وقد يجلس معك ساعات وساعات ولا يوضع لك بانه لم عرفك وهذا عيبنا عموما نسال الله ان يصلح حالنا وان يجمنا واياكم في الرفيق الاعلى والدعوات من الجميع بالتوفيق والتحية لك اخي ابرهومة لينا عودة اذا مدة الله في الاجال ،،،،،،،،،،،،،

×××××××××××××××××××××××××××××××××××××××××
عارفني منك لا الزمن يقدر يحول قلبي عنك لا المسافة ولا الخيال يحرمني منك

[عزيز عيسى]

اولاً احيك اخي عزيز وانت تطرق الباب على اسخن المواضيع والتحية للاعمام ذي ماقلت ودا لماذون ودالصول وكل الكوكبة النيرة ،، صراحة الموضوع احلى مافيه انى اضفت للذاكرة معلومات متعة ( انفلاخة _ دل واشياء ) عموما نحن بطبيعتنا السودانية كما اسلف الاخوان نداري او نهرب او نتجمل او نحاول ان نظهر بثوب اجمل ما يكون فيه المرء ولكن هذا الجمال قد يضيع عنا الكثير او يجعلنا نعيش في هاوية عموما

الاخ الغالي أبو مرام،

ألف مرحب بيك يا راجل وألف مرحب باليوم السعيد الليلة جابك..
وينك طالت غيبتك عنا..
الحمد لله الشفناك بخير..

لقد أسعدني مرورك الكريم وتعليقك على الموضوع..
فعلا ودالماحي وودالمأذون أعادوا الى الذكرة كلمات نسيناها تماما..
وبالطبع التداري والتهرب من الواقع ليس بحل..
فلذلك لابد أن نواجه الحقيقة ونقول الصراحة مهما كانت تكلفتها..
ولا أيه رأيك؟
أرجو عدم الانقطاع والمداومة على الدخول للمنتدى لنسعد بلقاءكم.

ولك كل مودتي،