سمع أضاني القدر الطشت، قالوا أخونا خالد ودهاشم السنة دي لامي الناس في جدة أول يوم في العيد.
و كل يوم يصحي الدغش قبل آذان الصبح وطيران على (الحلقة) علشان يختار خروف سواكني مغترب من 24 القرشي، جميل الشكل يسر الناظرين، أصيل المنشأء ذو قرنين كبير وخالي من العيوب الطبيعية وضكران ما بقول (باع) يوم الوقفة. وقالوا أمير عبدالباقي في الطائف بدأ يخمخم ويستف شنيطته وجهز (بقجه) كبيرة وجاي بأولاده على ودهاشم يقضي العيد.
ودهاشم طلب من الدكتورة أم هاشم تجهز الدكوة والشطات والمخللات وباقي المحدقات لزوم المرارات والشيات والكمونيات حتى العصايد للنعيمية وجارتها حلفت بالتخربها إنها شافت أم هاشم قطعت اللحمة وعلقتها في السطوح جمب الدش تنشف الشرموط. وكمان ودهاشم خطف كراعه ومشى على ستات الكسرة وحجز الكسرة من بدري لزوم ملاح أم دقوقة والشرموط. سمعنا الأدمن وعماد الصادق وعمر غلام الله وعبدالمنعم (الزول الفردة ) وهشام شيخ الدين وخالد ودكسلا وراشد خضر وسواح أقترحوا على ودهاشم إنهم يقسموا الضبايح على أيام العيد الثلاثة، يعني كل يوم مثلا يفطروا في بيت هشام شيخ الدين ويتغدوا في بيت عمر ويتعشوا في بيت سواح. لكن عماد الصادق ركب راسه وحلف طلاق علا يحولها على كورنيش الحمراء، ولو حصلت أي شوشرة أو أي عنكبة يقوم يحول الضحية عند أهله في كساب - سنار.
وقالوا بابكر ودالصول بعد ما ربنا كتب عليه السلامة من حادث الحركة إتصل بأخونا هشام (رهيب) ومحمد يوسف (فاقد حنان) في مكة وعرف إنه السنة دي الجماعة ما ناوين الحج وعايزين يفاجؤا الجماعة يوم العيد وينزلوا متلبين تووش علشان يلحقوا اللمة والعضة.
وفي الرياض صالح أبوشوارب (أبو اللجابو) الأيام دي لابس بردلوبة ويبرم في شواربو العاملات ذي الكديس وشمر عراقيهو وساني سكينته ومجهز ساطور جزارين وفرار (تقول داخل حرابة) ومنتظر متين يصلي صلاة العيد ويجري يضبح ثلاثه كبش في الرياض. سمعنا عازم أخوانا الزبير (السفير) وياسر أبوريان والرشيد وياسر فقيري وأبومرام والزول الفنان مصدق والمحامي حيدر شبندر وعثمان (سامبا) وعوض صقير وأشرف السر وباقي شلة الشرامة في الرياض وما حولها حتى أخوانا العزابة الغلابة مقطعوعين الراس لاميهم. كمان الناس الجميلين أبوروان وخالد حسن موسى وأبوقيس وعزت الهادي وعبيد خالد صديق وولد مارنجان وباقي الشلة في المنطقة الشرقية وصلتهم الدعوة وقالوا جايين سيرة. وقالوا أم الله جابو متفنه في الواطة وبتفكر كيف تجهز برنامج للعيد يليق بالمناسبة.
يا ودهاشم ما تنسوا ترسلوا الجلود لصالح ودأبوشوارب علشان السنة دي عنده النية يبيعها في سوق مدني بسعر 25 قرشا صاغ مقابل الجلد الواحد. بس يا ريت يخلي لينا جلد واحد نعمل منه فروة للصلاة. وبرضو الريسين والكوارع أرسلوهن لي أنا وجمال ودالماحي وحنعزم أخونا الفنان ياسر مبيوع وهارون أحمد علشان نمزمز بيهن ونقول على الأقل تذوقنا طعم السواكني.
نزار ودحسن الضبيحة عندكم السنة دي كيف.. كدي شاور أخوانا ضياء الدين وجمال الدين (الزمن المريح) و وائل عبدالرحمن (ويلي) وصالح فرح وإتصل بأخوانا خطاب العبيد (الزول الشين) وطارق التوم وحسون في قطر وأحكي معاهم لأنه نبيل زاغ مشي السودان وخلاكم تحملوا الراية من بعده وتتحملوا مسؤولية الضبيحة والمرارة أم فتفت وتظبطوا الشغلة .
أنحنا الله لينا من الخواجات الغبيانين ديل، نسلمهم خروف الضحية كامل يرجعوه لينا لحم فقط وباقي (العتي والعفشة) يرموها. بالله الخواجات ديل مش إتلوموا معانا ولو تذوقوا المرارة والكمونية كان عرفوا أهمية (العتي والعفشة) عند أهلنا السودانيين لكن الحمدلله الما بعرفوها كان زاحموا أهلنا في أكلها.
وبرضو سمعنا نبيل حمدتو قدم دعوة للشباب في مدني أخونا عمك تنقو وعوض أبوالمهتدي وصول سودان ومعتصم عيدروس والسلامي وحسن علي و ودأبكرش وأبوطاقية وأختنا فدوي الحسن ومدنية وباقي الشباب. طبعا الفردة عشوشة حتجيكم مخصوص من كسلا وتجيب ليكم معاها بركة الشيخ الحسن وهمبريب توريت. حتى ناس الجنيد فادي الماحي وأبوه لحق عزمهم وما قصر طب لأنه حيجوا شايلين معاهم شوال شوالين سكر علشان يضيفوا طعم لذيذ للقاء. وطبعا أخونا المميز حيكون برضو معاهم علشان يمزمز بالشية والمرارة وأم فتفت والكمونية ولو لميتوا فيه ما تخلوه يهرب لازم يعمل ليكم سماية 40 بنته. يا نبيل إن شاء الله قدرتوا تحجزوا ودالمأذون لغاية العيد الزول دا أمسكوا فيه قوي ما تخلوه يرجع على البحرين وكمان طالبوه بدل ضحية واحدة يضحي بخروفين.
أخونا ابراهيم عثمان حيعزم أخونا الأمين. لكن يا أخوي الأمين ما تعشم في خروف ولا يحزنون لآنه الزول دا حيضحي بفرخة ويعمل نايم ويقول الضحية غير واجبه عليه لأنه البيه غير متجوز. أها الفرخة دي حتطبخ إزاي يعني حتتحمر ولا تتسلق ولا تتشوي، لا بقى أحسن إحشوها.
لكن والله أنا بس محتار في ناس الهند وماليزيا الرفقاء ديل مزوني ومهند وعمر محمد بحر (ماليزي) وأمين يوسف (مكتول مدني) وجماعتهم كدي فكروا معاي حيضحوا بي شنو.
غايتو أنا بضمن ليكم أخوانا كاظم وبشري الفكي في أستراليا إنه يكونوا ضابحين السنة دي (كنجارو). وكان أخوكم معتز تروتسكي في أوربا قريب ليكم ما تنسوه إن شاء الله ترسلوا ليه العتي.
وفي سلطنة عمان قالوا أختنا جيد بت العمرابي (مهيرة) عازمة أختها آلاء (قمر الزمان). بس لي طلب أعزموا
أخوكم أمين سعيد (أمينو) وأدوه يأكل المرارة وبس ولما تبقوا على الشية أعملوا حسابكم أطرودوه لأنه زول جبجاب وحيكملها ليكم.
يا جماعة إنتو وين أخوانا الرشيد وضياء شلة كبدة الإبل وزيكو منيب وسوباوي والشايقي وسمل الحلفاوي؟.. وأخونا خالد حمد موسى الله يطراهم بالخير.
ودالماحي إيه رأيك أنا عازمك إنت وشلتك ثاني يوم في العيد. طبعا عارف أخوك خواجة ومسألة (العتي والعفشة)
دي مكجنة وحأتخلص منها عند الضباح، وحأشتري خروف بدون فشفاش عشان ما تجي تنفخه وتترك السفة جوه. وبرضو ماتعشم ليك في كمونية ولا مرارة ولا أم فتفت. لكن الشية والضلع حنظبتهم. وحأحاول الجزار لو ممكن يدينا العتي أجيبها ليك تشربها. ولو عرفت محل الشربوت وين السنة دي ما تنسى تدي أخوك خبر، باقيلك عطيشان شديد.
أها يا جماعة في حد نسينا نعزمه. وأعذروني أكان نسيت لأنه الكبر والخرف حاصل.
طبعا الشمار دا جابو لي واحد شمشرجي قصده شريف. وأكيد تكونوا فهمتوا قصده.
رد مع اقتباس
المشاركة الأصلية كتبت بواسطة شاكسس
المفضلات