القصور الدائم فى كافة المرافق والخدمات والمشكلات التى طال أمدها من (غير حل) أو حتى (شوية تحسن) كالصحة والتعليم والطرق يبدو أن حلها الجذرى يكمن فى اللجؤ إلى الخبرات الأجنبية وأعتقد أن أكثر مجالين يحتاجان إلى (إسعاف عاجل) وإلى (خبير أجنبى) (سرو باتع) هما مجالى (الكهرباء والكورة) فقد أصبح الخلل فيهما واضحاً على الرغم من (القروش الإتصرفت فيهم) لذا فأنا أدعو المسئولين (الكبار طبعن) للعمل على استيراد عدد واحد خبير (كهربجى) أجنبى عشان ينتهى لينا من مسألة (الكهرباء) دى ونخلص وكمان واحد خبير (كورنجى) أجنبى يرجع لينا الكورة دى أربعين سنة لى وراء أيام ناس جكسا وماجد والدحيش علشان ما يطق فى المشجعين ديل (عرق) يلحقهم أمات طه وهم يشاهدون فرقهم تنهزم فى عقر دارها بالأربعات والخمسات !
قد يتساءل البعض عن الآلية التى سوف يتم بها إستيراد هذا الخبير أنا شخصيا ًأعتقد أن المسألة لابد أن يكون فيها قدر من السرية إذ لا يصح أن تقوم الحكومة بعمل إعلان فى الصحف العالمية تعلن فيه حاجتها لإستيراد واحد خبير (خواجة) متخصص فى (متابعة) سير (التيار) من (السدود) وحتى (البيوت) ! لأنو حاجه (تكسف) أن تعلن بلد بحالها عن نجاحها فى بناء (سد) وعجزها عن توفير الكهرباء (الطالعة منو) !
وترشيداً للإنفاق أقترح أن يكون ذات الخبير بيفهم فى الكورة برضو يعنى يكون خبير (كورة وكهرباء) عشان بعد ما ينتهى لينا من موضوع (الكهرباء) يقوم يقبل لينا على موضوع (الكورة) وينجضو لينا وبى أقل التكاليف !
وحتى لا نكون عرضة للتهكم من (اليسوى واللى ما يسواش) والناس تقول علينا (عملو السد وما قدرو يوصلو كهربتو) فأنا أعتقد أن يتم التعاقد بدون ذلك الإعلان وبصورة شخصية (كتامى) ، وأن يتم تكوين وفد عال المستوى من أجل إنجاز هذه المهمة يجوب بلاد العالم المتحضر متسائلاً فى كل قطر يزوره :
- يا جماعة ما عندكم لينا خبير (كورة) وتوصيل تيار سدود !!
حتى إذا ظفر أعضاء الوفد بأحد الخبراء وإطلعو على ملف سيرته الذاتية وإتضح لهم أن (الخواجه) خبير (كورة وكهرباء) وقعوا معه عقداً وأحضروه معهم على نفس الطائرة
- شوف يا خواجه الكهرباء دى زمااان كانت بتقطع عندنا عادى .. ساعة ساعتين تلاته فى اليوم ... مره تقطع هنا ومرة تقطع هناك لكن بعد ما عملنا السد ده بقت تقطع كلو كلو وبقت البلد كووولها تقعد بالساعات فى (إظلام شامل) !
وكمان شوف لينا معاكا كورتنا دى زمان ما كنا بنصرف عليها ولا مليم لكن كانت عال العال نلاقى (الهونفيد) نغلبو نلاقى الجن الأزرق نغلبو لكن بعد ما بقينا نصرف عليها ملايين الدولارات بقينا ملطشة وما شلنا لينا ولا (علبت صلصة) !!
- أوكى أوكى خواجه يشوف أول كهرباء بعدين يشوف كورة ! بعدين يوريكم الحاصل شنو!
قام (الخواجه) بزيارات ميدانية شملت كل المحطات الحراريه والمدارية والسدود والخزانات وتحصل على صورة من جميع الدراسات التى تخصها وكل البيانات اللازمة ثم بعد ذلك قام بزيارة ميدانية لكل الإستادات والميادين والفرق الرياضية وتم نزويده بالسيرة الذاتية لكل الإداريين والحكام ولجان التدريب واللاعبين وحتى المشجعين بعدها طلب الخواجه أن يعتكف فى مقر إقامته ليومين لدراسة المشكلتين ومعرفة الإخفاقات التى تلازمانهما !
- أها يا خواجه ما إتوصلتا لى مشكلتنا مع الكورة والكهرباء لسه ؟ ما لقيت لينا حل ؟
- مفيش حل .. مفيش فائده .. الظاهر إنو مكتوب عليكم أى (كهرباء) تولدوها (تطلع) برة الشبكة وأى لاعب تجيبوهو (يطلع) (ماسورة) !!
من موقع الفاتح جبرا على الرابط
http://www.alfatihgabra.net/index.aspx
رد مع اقتباس
المفضلات