سقوط اول :
لحظة دهشة .. !!
لحظة قامت رقصت
غنت كل الوان الطيف
صفق جواي جواها الموج ...
صحت صدف النيل النايم حول
شال النيل شبال ...
بلل شعرك ...
وشك كان هو الواصل
مابين الليل ونهاية الغنية
وبداية الفاصل
كان بتراقص فيك القمرة
وكنا نفاضل بينك وبينا ...
انا والكانو معاي ..
ذات الوان الطيف
تحت القيف ادلت
اتوضت وصلت
فرشت حزمة نال
سجادة في درب اطفال
اطفال جأيين ...
في الزمن الهامش
الزمن الانسان ...
سقوط ثاني :
لحظة خوف ....-
الارض من غير سقف
السماء من فوق دليتو
لوليتو ...
علقتو ...
في كتفي حقيبة
وشك والشوق
والكان بينا ...
جوه الليل دسيتو
سلمتو اغلى حبيبة
ورغم أمان الضلمة
الا بتفضح فيك الضوء
وبفتح عين الماشي يكوسك
ما بين الليل والنغم النافر
وما كنت حزين ..
لما افوتك
وسط الفقراء
بيوت الطين ...
الفاطين وجبة وكباية شاي
الجايين راجعين
في اخر الليل وبداية الخاطر
الشايلين الهم تيراب
الساقين الارض العرق المر
ومن دون تخصيب ...
_ في كل سنبلة مية حبة _
وما كنت حزين ...
لما افوتك
وسط الفقراء
بيوت الطين ....
الفاطين وجبة وكباية شاي
ولا كان اخر الاي
في المصحف سورة الناس
بعد الناس بين قوسين (وحبيبة)
صدق الحب
في الزمن السافل
الزمن الا ......
سقوط ثالث واخير :
لحظة ثبات ..._
لا تقلقي
مثلما افترقنا قد نلتقي
ويرجع صوت الصدى
لييردد ما قلنا سوى ...
لن نفترق ...
فلنخترق كل المداخل والبحار
والصحاري الفاره فوق المضارب
اجنحة الرمال ...
نقفز فوق الخطوط والنقاط
في المسامات عند التلاشي
ونفرش الغرام بساط
للعشاق المسافرين
المقيمين
والغواشي ...
نجتاح الفضاء
نحو السماء...
كالعاقبات النسور ...
فلا الخوارط تمنع العشق العبور
ولا الحواجز تسكن الحب القبور
لا تقلقي
مثلما افترقنا
قد نلتقي
قد نلتقي ...
التحية لكل رواد المنتدى
وتحية خاصة لكاتب هذه الابيات صديقي واخي
مجاهد سوباوي
والدعوة مجددا له بالانضمام الينا واتحافنا بابداعاته
رد مع اقتباس
المفضلات