عيدية ...و... ذكريات......في مدني

[nasir]

طبعا بكرة العيد ايوه انا ماشي اتجاه واحد اشوف لي طاقية وكمان نغشي الحبشي نحلق وياناصر ماتنسي تجيب معاك فتيل ريحة وشوية رمله للحوش والله الواحد مجبور يمشي يسوي شنو وطبعا الجلابية عند الاطرش الترزي في المزاد ماعارفو انتهي منها ولا
الحاجة ياولدي جبت الملايات معاك ولا والحلاوة اغشي جيبه معاك كويس
طبعا الخبيز قبل اسبوعين جاهز
ياجماعة العيد ثبتو ولا لسع عندنا جير ما انتهي ياريت بكره يكون رمضان عشان الواحد ينتهي من البوهية و يضرب الحيطان جير
الشفع طبعا امورهم منتهية من بدري
وبكره نبدا لفة العيد من اول يوم بعد الصلاة لحدي رابع يوم
يلا ياشباب لو بكره العيد كل سنة وانتو طيبين
ولو مازاعو تعالو اضربو معنا الجير والعصيدة

[أبوبكرحامد]

ياناصر كل سنة وانت طيب وربنا احقق امنياتك وتعيد فى مدنى ، بس ماتنسى تمر على عبدالحق تشيل ليك ربعين صعوط .

[هيثم عبدالعال]

لكن يا ناصر مشاويرك دي مع زحمة الأكشاك وشارع إتجاه واحد حتخلص الساعه ثلاثة صباحاً ، وما تنسى إنك حتجي راجع البيت يقولوا ليك نسينا الشئ الفلاني أصلوا كل الحاجات مبتكون مؤجله لليوم ده ، كل عام وأنت وكل مدني بخير
سؤال : ما حصل كنتوا في معسكر في العيد أو مسافرين بره مدني ؟

[nasir]

والله ياشباب مشيت لقيت الترزي مزنوق زنقة الحلاق يوم الوقفة
وطبعا الزحمة مافي طريقة الواحد يصل الاكشاك الا يركب مواصلات الدباغة
والله ياهيثم فعلا نسيت الخضار ولازم كمان اشوف الملجة بس ماعارف البهارات اشتروها ولا
والله يا ابوبكر سف البايت لحدي ما نعمل اللفة يوم العيد ونشتري من بوش
المهم طلع بكر ه العيد
كل عام وانتو بخير وصحة وعافية
والعفو والعافية من الجميع وللجميع

[محمد الشايقي]

ادب وثقافه رصينه 00 تفوح من خلال الكلمات البسيطه الجميله ريحه احلى من ريحتك اللاشتريتا من اتجاه واحد

[nasir]

والله يا محمد كلمات بوزن دهب
للعيد طعم كلماتك بجوار اهلي واحبابي
للعيد فرحة قلبية عندما تلتقي شلة باخري هم يدخلون الاخرون يخرجون كم هي جميلة تلك الحلوي التي نملا بها جيوبنا دون تفكير في السكري ونفرغها عند العودة والتفكير بجولة اخري لمزيد من التهاني والحلوي
في كثير من المرات تتداخل الحلويات وتختلط علامة لكثرة الزيارات فهذه حلوة سعد والثانية حلوة كرميله وديلك عندهم كعك ونحن عندنا بلح وتختلف بختلاف المشاعر و ما اجملها من لفة
لكم عيدية خاصة اخوتي

[abomazeen]

كل عام وانتو بخير وصحة وعافية
والعفو والعافية من الجميع وللجميع

[nasir]

ابومازن
كلمة العفو والعافية ارتبطي معي في كل اعيادي
كنت اتحين الفرصة لطلب العفو من كثيرين وسط الزحام والان هو طلبي الاول من الوالدة في كل اتصالاتي
لك منا العفو ونسال الله العافية للجميع
العفو والعافية

[خالد أحمد الصول]

كنت جدا من الرافضين فكرة الذهاب (للكشكة) -كما يحلو لنا ان نطلق عليها - مع بناتي فكان الفارق بين ثقافة الجيلين هي التي ورطتني ... فقد أستدرجنني بأن أوصلهم فقط السوق ...إمعانا في العناد فقد أرتديت عراقي قدت به عربتي حتي لا أتورط في الدخول للسوق و كان شرطي وآضح ... خلاص بنتظركم في العربية أنتو امشو أشتروا و تعالوا ... وصلنا الكشكه ... و لدهشتي فقد رأيت أمواجا بشرية تسير كالانهار و يتخلل سيرها غبار يقابلك من علي بعد أميال ... فإطررت أن أذهب معهم ... كنت خجلا من العراقي الفي نص السوق .. ولكني أكتشفت أن مدي الرؤيا لا يتعدي السنتمترات لذلك لم يراني أحد و أنا أكابس بالعرراقي و كل واحد الفيهو مكفيهو ... اسلمت نفسي لاول موجه و تركت لها الخيار في توصيلي الي ما تشاء فكان أن وقف المد بي مكان الاحزية ... و دخلت ابنتاي و بدأت رحلة البحث عن الافضل و الاجمل و الاحلي ... و كنت انتظر الارخص ... كانت الاسعار نار و البائعين كأننهم جراحين أنجليز ...و يا حليل ... تعال يا زول أنت بتدفع كم ... و أنتهي مهرجان الاحزية ليبداء مهرجان الطرح ... فعلمت أنها ألوان و أن في الالوان درجات و هكذا تأخذ من الوقت أكثر من حجمها ... و حسدت بائعي الطرح علي طولة بالهم ... و عرجنا علي الشرابات النسائية فوجدتها بإصابع و بدون .. مزركشة مبهرجة ... عدت بعدها مرهقا للمنزل فأكتشفت انني نسيت الشبشب بتاعي في دكان الاحذية عندما ملصته لاقيس شبشب جديد ... ولا أشتريت الجديد وكنت طوال هذه الجوله حافي القدمين و لا أدري ...

[nasir]

والله يا ود الصول الحمدلله البقت علي الشبشب
تعرف مرة موجة ذي ده ودتني الجزارات وفقدت اي اتصال باخواتي
الكشكة حكاوي وبلاوي وطبعا هي وقفة النشل وشريط الجيوب بس الحمدلله انت كنت بالعراقي يعني نشال ينشل نشال
وكل عام انت والاهل بخير

[عمر معتصم]

والله كل سنة عام وانتم بخيرجميعا والعيد الجاي نلقي العازب انشاء الله مزوج وربنا احقق الاماني

[nasir]

امين ياعمر المعتصم وربنا يحقق امانيك
تعرف امنية فطور اول يوم في العيد قدام بيتنا بعصيدة ولمة كل ناس الفريق من عمر سنة لحدي اكبر زول ويجوا الجماعة معيدين نقول ليهم خلو السلام حصلو الفطور

[nasir]

سابع يوم العيد قالو الشباب نعمل رحلة لام سنط وطبعا الجلابية خلاص ادت الغرض المهم نرجع للقديم وفي نفس اليوم في زواج زميلتنا في بيكة والعزومة غداء والواحد لازم يكون عندو عيدين وفيهم سابع يوم يومين يازول بتحلا ما في مشكلة والغريبة نحن عيدنا هنا انتهي مع مراسم الدفن ( الصلاة) وناس تحسب لي خمستاشر العيد اعياد اعياد

[mahagoub]

ناصر وودالصول لكم المعزة والاجلال عشنا معاكم اجواء العيد بكل روعتها .
تخريمه
الاخ بابكر الظاهر عليك كييف جد

ودمتم

[مرتضى يوسف العركي]

ناصر الحريف
كل سنة وانت طيب
بالغت عديل كدة والله يا ناصر عشت مع الامر تماما نفس التكليفات نفس الكلام نفس الاتجاهات نفس الجير والبوهية والفزعة مع الجيران نفس البرامج اللفة والاعراس والرحلات البتبدأ ثالث يوم ف يالعيد يا سلام .... ما ابعدنا مش لريحة والله بس لبخة من ريحة واحد فردة في العيد ... التحية لكم وانتم تنقلوننا نقلا مباشر لايام حبيبة في بلدنا الحبيبة تحياتي للاسرة الكريمة

[nasir]

محجوب لك التقدير والامنيات بس مادخلت يدك معانا في الفطور الظاهر عندكم شية في البيت
اخي المستشار مرتضي اعياد اعياد جمعتنا بكم تحياتي للوالد والوالدة والاسرة
تعرف مع اللفة والواحد بيكون عندو غشوات وهي قبل ما ندخل ناس كنترول عمنا الواحد بيدخل علي بيتكم ويشيل الزاد من الصالون والحاجة قاعدة علي الصاج وتكورك الفطور اقعدو ناس الريو لفين وشوقي مشنا ناس اختو
كل عام وانت بخير والاهل