تلفزيون السودان : تلفزيون الفتة واللقيمات

[عبد المنعم فتحي]

التلفزيون السوداني أصبح بوقاً لنشر البدع والضلالات
تتنقل كاميرا التلفزيون يومياً ما بين ضريح الشيخ فلان ومسيد الشيخ علان
اولاد الشيخ البرعي ومن بعدهم أولاد حاج الماحي والسهرة يوم الإثنين اسبوعياً مع برنامج الدجل والشعوذة
اين البرامج الدينية التي تفيد المشاهد كبرامج التفسير والسيرة وغيرها من البرامج التي تعلم المسلم شؤون دينه
بصراحة هذا التلفزيون كرّس جهوده لنشر الفكر الصوفي واستضافة أصحاب الكروش المليئة بأموال المساكين
أقترح تغيير الإسم من تلفزيون السودان
إلى تلفزيون المحايات والبخرات والحوليات

[العاقب مصباح]

توجد جوانب ايجابية كثيرة جدا فى الطرق الصوفية

إن سمح لى الوقت سأعود للنقاش معك

لك احترامى

[كمال احمد]

الاخ عبد المنعم تحيه عطره الطرق الصوفيه كل اتباعها اوصافهم الطيبه والمسامحه والوجوه النيره والخلق الحسن انظر للشباب التدين ظاهر عليهم وبعدين ياعبد المنعم الطرق الصوفيه منهجهم الدعوه الى حب الله ورسوله ده عمل جميل وبعدين خلاوى تحفيظ والتربيه الدنينيه عليك الله ماحسن من القنوات العربيه الاخرى ناس الرقيص اده الود لابوه وبعدين ياخى حلقه فى الاسبوع مابتاسر وانا والله ماقاعد اتابعها لكن شايف عندها رواد والحمد لله لاشيعه ولاانقسامات طائفيه الله ورسوله بس

[نخيل طيبة]

التلفزيون السوداني أصبح بوقاً لنشر البدع والضلالات
تتنقل كاميرا التلفزيون يومياً ما بين ضريح الشيخ فلان ومسيد الشيخ علان
اولاد الشيخ البرعي ومن بعدهم أولاد حاج الماحي والسهرة يوم الإثنين اسبوعياً مع برنامج الدجل والشعوذة
اين البرامج الدينية التي تفيد المشاهد كبرامج التفسير والسيرة وغيرها من البرامج التي تعلم المسلم شؤون دينه
بصراحة هذا التلفزيون كرّس جهوده لنشر الفكر الصوفي واستضافة أصحاب الكروش المليئة بأموال المساكين
أقترح تغيير الإسم من تلفزيون السودان
إلى تلفزيون المحايات والبخرات والحوليات

هجووووووووووووووووووووووووووووووووم شديد وواضح على الصوفيه..........

[كمال احمد]

انا عندى سؤالين محيرنى شديد ليه فى النشره يقولوا مثلاالنشره الرياضيه فلان النشره الجويه فلان ماممكن دون اسامى الثانى مقدمى الاخبار اثناء جمع الورق نهاية الاخبار بقولوا فى شنو لبعض

[وجدى محمد خميس]

قدر ماتفتح التلفزيون تلقى اتنين ولا تلاته بتونسو

[زاهر النويري]

التلفزيون السوداني أصبح بوقاً لنشر البدع والضلالات
تتنقل كاميرا التلفزيون يومياً ما بين ضريح الشيخ فلان ومسيد الشيخ علان
اولاد الشيخ البرعي ومن بعدهم أولاد حاج الماحي والسهرة يوم الإثنين اسبوعياً مع برنامج الدجل والشعوذة
اين البرامج الدينية التي تفيد المشاهد كبرامج التفسير والسيرة وغيرها من البرامج التي تعلم المسلم شؤون دينه
بصراحة هذا التلفزيون كرّس جهوده لنشر الفكر الصوفي واستضافة أصحاب الكروش المليئة بأموال المساكين
أقترح تغيير الإسم من تلفزيون السودان
إلى تلفزيون المحايات والبخرات والحوليات

يعني التلفزيون هو المشكلة
ولا الصوفية
والله مرية الاعلام في السودان لوح خشب
لكن الصوفية نارهم قايده بدو تلفزيون
بعدين رفع رآية لا إله إلا الله محمد رسول الله شي جميل
والذكر اجمل.
بس شوف مشكلة الصوت
والصوره والحاجات المابتليق
بالتلفزيون السوداني

[زاهر النويري]

إن سمح لى الوقت سأعود للنقاش معك

[elfatih61]

بتفق تماما مع الاخر " النويري" 000 كلوا كوم والصوت والصورة دى حاجة تانية خالص
يا أخى موضوع الصوت دا بالذات .. يعنى كارثة حقيقية في التلفزيون السوداني
الشىء الما قادر استوعبوا ليه بختوا كل برنامج بي مدى صوت غير المبرنامج القبلوا
ولا أقول ليك يا أخى كل فقرة في اي برنامج ليها صوت بختلف
يا أخى دا التفلزيون بزيد وبخفض الصوت التقول ما سيه شيطان
يعنى يا حبيب لو ما عندك " ريموت كنترول" وبتتفرج على تلفزيون
السودان .. أحسن تحول ليك محطة تانية لانو ح تكره حياتك وانت
رايح جاي على التلفزيون.
اما الصورة ( بقصد الاخراج ) دا فلم تاني وما بحدث إلا في تلفزيون السودان
انو بكون في شخص بتكلم وسعادة المصور والمخرج جايبين لي صورة واحد تاني
من الجالسين 000 والاعجب لمن يكون مقدم برنامج عندو ضيوف بقدم فيهم بديهى
أنو كل ما يرحب بي شخص الكاميرا بتنتقل عشان نشوف الاخ البعرفوا فيه دا منو
من الجالسين 00 يعنى نحن ما مخرجين لكن بنشوف كويس
عشان ما توجع قلبك يا حبيب .... خليك بس وقت النشرة والباقي انساه

:d

[عبد المنعم فتحي]

الأخوة الأعزاء
من اتفق ومن اختلف
لكم التحية مُضَمَّخة بعَبَقِ الفتّة وأريج اللقيمات

و لنا عودة

[يوسف كيكل]

الاخ عبد المنعم لك التحيه
بعض الطرق الصوفيه تعمل على تضليل
الناس واللعب بعقولهم لأسباب ماديه
كالزيارات والعلاج وكثير من البدع والخرافات
نتمنى من الاعلام ان لايروج لهذه الطوايف
وخاصة تلفزيون السودان وساهووور
وتقبل مروري

[عبد المنعم فتحي]

لك التحية أخي يوسف كيكل
لكن أعمل حسابك من الصوفية ديل ، بعملو ليك (( رتنزة ))

[شيخ الدين]

متل ما قال نخيل طيبة يا فتحي ده هجوم عديل كده علي الصوفية الحبيب ناس الصوفية ديل نا س مسالميين وناس لهم فضل كبير نشر نشر الاسلام وتحفيظ القران والتقرب الي الله ومحبة النبي ( صلى الله عليه وسلم ) بطريقتهم الجميلة من قصائد صدقا في قمة الروعة وديل ناس الخير والبركة ويكفيهم انهم لا يبحسون عن مال ولا ملك واضرب متل بالشيخ محمد مدني السني له الفضل في نشاء وتكوين مدينة ود مدني بشكلها الجميل وطيبة اهلها وكرمهم وحبهم للناس هذه كل الاشياء من تعالم ابونا الشيخ محمد مدني السني بعتعرفء قصة المدينة مكان ياتوني الي خلوة حبيبنا وسيخا الجليل الي تعلم القران او استراحة حتي يذهبون الي ابو حراز ما عايز اقول القصة معروفة حي تغني لها االشعراءقبة السني وبيوتنا حول حلقات الزكر. والمثل بقول الما عندو شيخ يروح يشتري .
والظاهر انت مختلط عليك الامر بين الصوفية والدجاليين وشتان ما بينهم.
علي كل حال اذا الموضوع عن الصوفية تحدث مباشرة وتعمل تلفزيون السودان شماعة اضرح موضوع مباشر عن الصوفية وما عندي اي مشكله ونحنا في الانتظار ما تخاف من الرتيزات

[عبد المنعم فتحي]

الأخ / شيخ الدين
كان داير الكلام الدغري ، أبقى مارق وتعال لي بي هناك
في المشاركات التالية :
دعوة لتحطيم الأصنام في بلادي
واعترافات قطب الطريقة التيجانية - الصفحة الثانية

[أشرف صلاح السعيد]

سلام اخى عبد المنعم..
الصوفية شايف بعض الاخوة دافعوا عنها بالمطلق والبعض هاجمها بالمطلق..
هناك بعض الأسئلة الهامة للجميع..
هل الصوفية كانت موجودة بزمن الرسول عليه أفضل الصلاة وأتم التسليم؟
هل ما يطلق على من يسمون أولياء الله الصالحين دليل بأنهم أولياء ؟
وهل هذه الشهادة " لا إله ألا الله "اسم الشيخ " ولى الله" شهادة جديدة؟
وهل من له كرامة يطلقها بين أتباعه أم يجعلها بينه وبين الله درءً للفتنة؟
وهل علو الأطرحة والقبور بالبنيان أقره الإسلام؟
وهل مسكة العدد يحددها الشيخ أم التسبيح كيفما كان عدده فى إطمئنان للقلوب؟
وهل درجات الحوار "عقيد وعميد ووو" رتب ربانية وعليها وزعها الشيخ على حيرانه؟
وهل التدين والعبادة والمشيخة وراثية؟..

التلفزيون ليس له كبير وليس له توجه سوى إلهاء الناس بأيما كان صوفية ولا كرة ولا حتى محجبات يتغنون..

ولعلى أذكر أخى شيخ الدين بأن الشيخ محمد بن مدنى لقب بالسنى لأن أحد شيوخ أبو حراز عندما وصلا للنهر أراد أن يلقى "فروته" بالنهر ليعبرا بها ولكن شيخ ودمدنى رفض وقال له سأركب سنة الله ورسوله وأشار الى المركب القادم من الضفة الأخرى.. ودمدنى السنى من قال عليه بأنه من أهل الصوفية؟؟ أنا حفيده ولعمرى بنية قبته بعد موته ولو علم الرجل بذلك لأوصى بلا بنائها فمن ركب المركب خشية الفتنة من ركوب السفروكة حرى به أن يخشى أن تقام القباب على قبره..
ولعلى أقص قصة أخرى حصلت لى شخصيا ..بأحد الموالد وأنا مع أبى أقبل عليه رجل وإنحنى ليقبل يد أبى!!!!!ولكن أبى أزاح يداه..فأى ضلال أبعد من ذلك؟؟ لم تقبل يدى أطهر الناس وأشرفهم المصطفى عليه أفضل الصلاة وأتم التسليم فأى يد تلك تستحق التقبيل من بعده..
اللهم نسألك شر فتنة المحيا والممات ..اللهم اجعل خير أيامنا يوم لقاك وخير أعمالنا خواتمها..وتهدنا وسائر المسلمين..

[عبد المنعم فتحي]

الأخ أشرف صلاح السعيد
لنا مشاركات أخرى مع هؤلاء المتصوفة يمكنك الإطلاع عليها والمشاركات بعنوان

اعترافات قطب الطريقة التيجانية - الصفحة الثانية

التبرك والتوسل من أجل قبول الدعاء

دعوة لتحطيم الأصنام في بلادي