زمان كانت علاقتى مع المدرسه هع هع هع بشتنه شديده .
شكل جد أنا والمدرسه وهى تقول لى شكيتك على الله يعنى ضربتك على يديك عشان تجينى وأنا أقول ليها خليتك لله حرمتينى من النبله والقلابه وود أبرق بالله بقى يكاوينى ويرك لى فى الشباك .. كانوا بجرونى ليها جر ومرات يشيلونى فى الكارو ويرمونى فى الفصل .. وترتيبى على حسب الموجه مرات فى الخمسه الأوائل ومرات مع الخمسه الطيشه ..
فى المرحله الثانويه العامه .. زاد الشقاق بينى وبين المدرسه علشان عملوا لينا مزاكره مسائيه إجبارى .. يعنى لاشريك للطير بالنهار ولا حضور المسلسل بالمساء
فى المرحله الثانويه العليا .. الله .. حبيت المدرسه تصدقو ؟
حبيتها من القلب والله .. حبيت الحيطه حقت الدفويه والشمس وحبيت المزيره وحبيت الشارع الطوووويل من البيوت لحد المدرسه .. لكن لا حبيت تاريخ ولا علوم ولا انقليزى ولا ( رياضيات .. واااو بطنى .. جانى مغص ) ولا عربى حبيت المدرسه كمدرسه عشان جابوا لينا الجكس هع هع هع هع
فى الفصول معاهن .. فى الشارع الطويل معاهن وكلما أشوف واحده ماشيه تشرب أخوكم طوالى يمشى يقطع كوز وكوز وراء كوز البطن تبقى شتم
وجات الإمتحات ونجحت نجاح فى الخط الفاصل بين النجاح والرسوب يعنى ذى الزول الماشى على حبل معلق بين بيتين .. الرياضيات .. 2 بس .. وحات الله لحد اليوم ما عارف أدونى ليهم فى شنو ؟ أنا مليت الورقه شعر ودوبيت جت
أمى قالت لى إمكن أدوك ليها علشان الشئ الوحيد الكتبتو صاح هو إسمك الثلاثى
أنا قلت ليها أكان كدا كان مفروض يدونى 3 من 100 .. ضحكت
وإغتربت ومشيت لواحد فى بيتو واسطه يعنى لوظيفه وشاف درجاتى فى الرياضيات قعد يضحك ولمّ علىّ أهل بيتو كلهم وإتخارجت طوالى
والوظائف لا تحتاج للدرجات بس المهم تكون نجاح ونجاحى هع هع هع
وال2 حقت الرياضيات دى فضحتنى فى كترة مكاتب لمّا سبيت للنبله والقلابه
وهسى بقينا تابعين لشركه وقبل شويه بالتلفون قالوا لى جيب شهادتك .. أها .. والله دى مصيبه
التاريخ يعيد نفسه .. وح أرجع تانى أسب للنبله والقلابه ..
أنا فضيحه , مُش ؟ هع هع هع
رد مع اقتباس
المشاركة الأصلية كتبت بواسطة zukibush
المفضلات