البت جزيرة واختها مناقل

[omerahmed5]

حكي لينا الحاج فلسفه عن شيخنا خزان سنار وقال انو خيرو للسودان دوام مدرار انا الليلة ببقي ليكم إعلامي قولوا تلفزيون رادي انترنت إنشاء الله صحيفة الدار الما عندهم غير فلان كتلو وفلانه طلقوها وفلانه ازوجها بالمسيار ما حكو لينا عن شيخنا المغوار ... يلا اسمع انت يافرده ياشتات شيخنا دا عندو بتين واحده اسمها مناقل والتانية اسمها جزيرة بيتا في بركات ممكن تقول عليهن زمنن فات لكن هن والله متعلمات لكن بهدلوهن ودمروهن اخوان....... البنات مرة من ذات المرات لقيتن ليك داخلات مع الشباب في الشاات بتحسرن على ماضيهن الفات وبي لقافه مني تابعت الكلام الليه كاتبات قالت

managil@falsafa.com تذكري يا بت بركات لامن اولادنا الصغار اشكلوا في شان البصات طبعا اولاد جزيرة كانو بقولوا باص الجزيرة وصل (بكسر الواو والصاد) باص المناقل خسر ( بكسر الخاء والسين)
Al-Jazeera@falsafa.com آه لو اه تفيد مجروح نحن سبب دمارنا النظريات العملوها فينا اخوان ....... البنات سلمونا ليهن الانجليز بنياتن التحتية لليوم ثابتات لكن تقولي شنو في تعاقب الحكومات اول ما الواحد يقعد على الكرسي فكرو كله كيف ينهب بركات لكن نشكي للواحد المننان يرجع لينا حقنا من مؤسسة الاقطان حقي اولادي الدبيبة وفحل ودسلفاب وبقية اولادي ناس ودنعمان .
managil@falsafa.com والله يا خيتي يا جزيرة انت ما الكبيرة خيرك كميتو وفيرة اولادك زرعوا قطنن وبصلن وقمحن وبي عايدو جابوا الشيلة وسويتي ليهن الحنة والضريرة .... الله على الزمن شتت اولادك وشردن عن الوطن مشوا إجيبو التوب الجديد لام الحسن ما اصلو وعدهن ليها بالتوب الجديد و باي التمن وعلشان يصوتوا لاخوان البنات بالهرولة خارج الوطن .
وفجا دخلت عليهن واحده من حناكيش الزمن اسمها عفراء بت ميل الزمن وكانت متابعه للحوار الداير بين البنات عبر الشات وقالت ليهن يآيييي سوفجاج ....... قا طعتها البت مناقل قالت ليها عليك الله كان ما نحنا اهلك ما كان محنتن محنة بجدعوا بينا بيقولوا يا فلانه اختينا وقمحنا كتير مكفينا التقول تعبانين فيه دا ما تعب اولادنا صفاتن وارثنها من اجدادنا
وفجاة ظهرت إشارة بدخول ضيف جديد للشات مسجل زيارة طبعا دي حبوبت البنات ودمدني وبي ادب واحترام كتبت سلامي لجميع اعضاء الشات واخص بناتي مناقل والجزيرة بركات إنشاء الله تكونن مبسوطات انا عارفاكن مضيومات لكن عاينن لي انا امكن الكبيرة كم ضربة وكم لكمات من اخوان البنات حقي ما عافياه ليهن يخلصه لي رب العالمين يوم الممات انا بناشد اولادي الفى الغربة ناس عشا البايتات بقول ليهن امكم الربتكن ودمدني السني الحفر الخليتوها فيها لسع فاعدات ما دايراكم توسوا لي الجسور والكباري الطايرات دايراكن بس ترسلوا لي حق دفن الحفر الفي توالي هندسي زايدات (ود مدني الحبيبة)

[منتهى]

تسلم الاستاذ عمر حامد وقصه حقيقيه واقعيه عشناها وماقادرين نغير شى

وتقبل مرورى

[مرتضى يوسف العركي]

الحبيب omerhamed
اهني نفسي بما كتبت فقد اصبت في مقتل نحو مكان وانسان ...على مشهد الملأ ...
ما اجمل ماسطرتم فانتازيا تستدعي ايام لها ايقاع على مستوى البلد اين نحن منها في واقع الحال في بلد يموت فيه المنتج
التحية لكم وانتم تنثرون فينا روعة الاشياء ودمتم بالف خير والله نساله حسن الخاتمة

[moh_alnour]

الأخ : عمر حامد
لك أسلوب في الكتابة أقل ما يوصف بأنه روعة تحاكي الواقع وتصفه بمتعة متناهية
مشروع الجزيرة وما أدراك ما مشروع الجزيرة ذلك المارد الذي سقط سقوطاً داوياً لم يكن أكثر المتشائمين يتنبأ له بهذا المصير المرير والذي أصبح واقعاً ليتنا نستطيع أن نغيره
وإذا كان بعض مناطق السودان تتحدث عن التهميش وقسمة السلطة والثروة فالجزيرة أعطت السودان الثروة على مدار تأريخه الكبير بدون منى أو اذى وبدون أن يطالب اهلها بنصيبهم من الكيكة وهذا ديدن أهل الوسط البذل بدون إنتظار المقابل ، وتقبل مروري
سعدت كثيراً بهذه الإفادات الرائعة ، وفي إنتظار الكثير منكم

[النور محمد يوسف]

النبيل أبو حسام .... بعد قراءتي للبوست "فدى الدجاجة بنفسه" صرت أبحث لمشاركاتك فوجدت هذا البوست ....حقيقةً تجدنا جميعا سعداء بوجودك بالمنتدى وبهذا الاسلوب الرائع .....فانت الان قمت بتشخيص مشاكل بنتينا الجزيرة والمناقل في هذه الاسطر البسيطة باسلوب مبسط وجميل وحلو وكمان لم ترفض القادم الجديد عفراء ..... مالو تعالي يا عفراء ومعاك اخواتك البلازا والمول لكن اردموا لينا الحفر أولا .... وهذا توفيق ..... ردم الحفر معناه عناية بصحة البيئة معناهو الوعي معناهو الصحة ومعناه الانتاج والجزيرة والمناقل بلا انتاج تصبحان عبارة عن مقبرة وسط هذه الابتلاءات من بعوض ونمتي وجنادب

وفقك الله ابو حسام ...فنحن سعداء بقلمك

[omerahmed5]

لك التحية يا ابو النور ارجو الاطلاع على موضوع الجمرة الخبيثة بتحرق المستهلك

[عثمان جلالة]

كلام في المليان