رياضة المشي من الرياضات التي تستهوي الجنس اللطيف البكون يوموا كلوا ضارب النوم خوفا من السمنه والامراض العصريه ناسا جسما مندي ما زينا كده في الجري وراء الرزق اجي البيت حيلوا مهدود يكون عايز ليهوا رياضة يوجا الاسترخاء بعدها ياخذ ليهو نومه دي حالتنا احنا بتاعين الدوام في البلد دي (خروج عن النص) حكاية الدوام دي ليها قصه قالوا في واحد اتزوج بت عموا بعد الزواج عمل استقدام جابا البلد هنا البت متكيفه كندشه دواجن منفخ بعد شهر العسل العريس نزل الشغل اطلع الصباح اجي الظهر اتغذي انوم اطلع تاني مع زحمة الشوارع اصل البيت منتصف الليل والحال كده تسألوا مالك يا فلان اقول ليها والله الدوام ده تاعبنا تعب كلوا يوم الدوام ده تاعبنا تعب بعد فترة البت قالت اطلقوها .....الرجال ابين عمم والاجاويد ظهروا قالوا ليها يا بت الحلال الراجل ود عمك وممتاز مالك طالبه الطلاق بعدين انتو عرسان يادوبكم شهرين ما تميتوا .....شنو القصه البت قالت ليهم الراجل ده خلاني أعرف للعرس طعم من انتهي شهر العسل يا نايم يا مع صاحبو الدوام الهادي حيلوا ده... نرجع لي موضوعنا في شوارع في الرياض تم تخصيصها لرياضة المشي شوارع متعه تلقي مع كل ناصيه محلات للمثلجات والكوفي شوب مواقف سيارات اماكن جلوس للسواقين مساطب اسمنتيه وانت ماشي شغاله في راسك مكائن مياه البخار البارد فيها رزاز متعه زي نهاية المطره مع الهمبريب في السودان كل مره بجي بالشوارع دي بشوف غالبية الناس البتريضوا نساء ده كان قبل الزواج افتكرت النسوان ديل بمشوا عشان الولاده .....غالبية النسوان سمان ما كنت بدقق في البطون للانشغال والسرعه بعد الزواج بفترة ناس البيت قالوا عايزين اتمشوا مشينا لشارع الحمل زي ما مسميهوا انا وبعض الناس الما عندهم علاقه بالحياة الاسريه طبعا اكتشفت مافي علاقه بين الاسم والشارع والنسوان ديل البمشوا سمان والرياضه دي للرشاقه والخفه يعني نوع من الجمال وقفت العربية بتاعتي مع الارهاق حيلي مهدود قلت اشوف لي محل اجلس فيهو مشيت علي سواقين العوائل اتونس معاهم لما جماعتي اخلصوا المشي الونسه مع الاسيويين صعبه لعدم الفهم معاهم تلقط الكلام تلقط عايزه مجهود ذهني لا بعرفوا عربي لا انجليزي.... ربنا هداني علي سوداني قلت احسن شيء ولد بلد قعدنا نتونس سواء:
سألني الاخو من وين قلت ليهو من مدني قال لي انا من الشماليه لاكن اسمع ما اكون من قري مدني تقول لي من مدني ...عشان الونسه تكون ساهله قلت ليهوا قول من الجزيره قال لي ... ها زول ها الجابرك علي الكذب شنو كلنا سواقين الحريم ديل الله اقبحم.... بتكلم معاي جات حرمه ماشه نحيفه سكت الراجل بعد فترة قال لي انا شغال مع الماشه دي زي الشهفوفه انا ما عارف الناس دول السمان بمشوا عشان انحفوا الداهيه دي الذي السخل دي ماشه عايزه تبقي شنو قنايه لكن نقول شنو رزقنا نحرسا لما تتم المشي تنطط زي الصبره بعد داك نمشي والله رزق.. نكسر الزمن يا الاخو بالونسه انت زولتك انشاءالله كويسه معاك قلت ليهوا والله يعني نص نص.. قلت ليهو طيب انت وقتين زهجان منها ما تخليها الجابرك شنو زولنا اخذ ليهو تململه او قعد كويس قال لي شوف الناس ديل عندهم مزرعه قدر ما حاولت امشي اشتغل فيها مالقيت طريقه كمان عندهم اسواق مواد غذائيه دي جاجيتم فيها لمن الله غفر لي مالقيت طريقه قلت لي زوجها انا زهجت من الشغله دي اديني نقل كفاله ولا اعمل لي خروج نهائي الراجل طيب بس الكلام ما عندوا عند الشهفوفه دي بعد كترت عليهوا الكلام زنيت ليهو في اضانوا الظاهر مشي شاورا قال لي خلاص انا عندي فيزة سواق سوداني شوف لينا واحد استلم منك اكون زيك كده انا بوديك الاسواق من الفرحه عايز اطير.... عندنا وليدا لي اخونا شغال في لوري طوب في البلد حالتوا بي البلا قلت نجيبوا هنا الولد مسكين ابوهوا عدمان التكتحوا رسلنا ليهوا والحمد ليك يا الله الراجل جاء مشينا استقبلنا في المطار اتقول مطلعنوا من دوكه الليلت عواسه والتفه زي الشيطان مشينا البيت جيهتوا بي الحمام حلقت ليهوا بعد ما طلعنا ليهوا الاقامه والرخصه انا ودوني الاسواق عليك امان الله ما قعدته لي شهر الشهفوفه دي اتصلت بي قالت لي تعال الحين... مشيت قلنا نشوف الحاصل شنوا ما اكون الوليد ده جاب لينا مصيبه مع الحرمه دي دقلا اكركب وقتين قابلت الحرمه قالت لي الجبتو ده ما عايزنوا....هي يا بت الحلال استهدي بي الله الحاصل شنو قالت يلا روح استلم منوا المفتاح.... مشيت اشوف الحاصل سألت الوليد ياولد انا عايزك تنفع اهلك تشتغل هنا المشاكل العملتها دي شنو الولد قال لي:
بعد اديتني المفتاح كنت بمشي مع السواق الهندي في الشوارع كلاموا شتر شتر المهم عرفت اسوق كيف في البلد دي انا نايم المغربيه جاتنا الحرمه الذي المسواك دي قالت لي لازم تلبس ثوب قالت افو انا اخوك يا امنه انا البس ثوب عليك الله المرأ دي ما مطرطشه.... قلت ليهوا التوب هنا يعني جلابيه يا الاصنج الما بتفهم... هي لاكن جماعتك ديل خلوني افهم الحرمه زعلت مشت مني جاني الراجل شايل جلابيه بي لياقه او معاها شيتا كدي بختوا في الراس او معاهو حبل اسود قال لي البس ديل بكره قلنا طيب.......... ثاني يوم لبستهن والله الجلابيه وقتين شفتها في المرايه قلته الجماعه في السودان كان شافوني اقولوا عثمان ود طه بقي خائب جلابيه بي لياقه ضيقه بقيت زي الصارقيلا ختيت الداهي الاحمر في الراس معاهو الحبل الاسود والله بقيت بس زي الطيره ام قدوما احمر قلنا طيب اكل عيش نعديها ليهم بعد يومين جابوا لي الداهي ده قالوا لي إن اتصلنا عليك تشوف النمره ما ترد علينا كان انت في البيت تطلع لي بره عندنا مشوار يعني الجرس وقت اسوي ررررررررننن انا ابقي لي بره اها الشهفوفه دي حمتني النوم الليل كلوا ررننننن عليك امان الله زهجت منوا رميتوا ليك في الجك الليل المويه ده جمبلغ جمبلغ كضم كضمت حبوبتي ديك او نمت نومي قفلت اللوضه الزي بيت الحمام دي او نمت تاني يوم قايلني هربت اهرب وين عليك الله في بلد الطرش دي وقتين صحيت من النوم جاتني الحرمه النجاضه دي تكورك وللل وللل قلت ليها ما تصني راسنا بي كوراكك ده مرقت ليها الموبايل قلت ليها الداهي ده خرب خربااااان يا وليه والله خربان دي فهمتا ليك جري اها ساقوني مشوار بعد رجعت جاتني شايلا ليها واحد تاني قلت في سري الناس ديل نتحلا منهم كيف (( احلني الحلا بله)) لاكن والله كان ارمي ليها في الجك تاني عليك امان الله ما قعدنا شويه أنا افكر في الخلاص منهم الداهي ده رن رنننننن لمان جفلته نطيط نطه اتقول عضاني دبيب قالوا طالعين تاني طلعنا لي حفله في قصر (( صالة الافراح) وقفت العربيه قدام القصر المرأ الشهفوفه دي قالت لي انزل افتح الباب قلت امكن الباب عصلج معاها نزلت فتحتوا لقيتوا زي الباسطه الحريم كلهن اعاين لي تاري الباب ما معصلج افو الحرمه استقفلتني والله زعلت زعله انا قاعد منتظرم لي الساعة اربعه صباحا قاعدين مع السواقين كاضم خشمي ده بقم ما قلتها ما إتونست معاهم وقتين جو طالعين مع جوطة النسوان وقفت لي زي الصنفور قالت لي افتح الباب قلت ليها افو انا اخوك يا امنه افتح ليك الباب انا امي دار النعيم في لوري الطوب ما بفتح ليها الباب افتح ليك انتي......... ده كلوا الحصل.
اتملم صاحبنا في القعده من الجلوس علي حجر الاسمنت او قال الوليد طلع انجض مني والله حسي شغال في الاسواق بقي زي التور من اكل الطحنيه وأنا موكح بالحرمه الشهفوفه دي في اللحظه دي جات المدام بتاعتوا زولنا قام فتح ليها الباب مع السلامه ما قالا لي........
رد مع اقتباس
[/]
المشاركة الأصلية كتبت بواسطة عوض الكريم الخواض
المفضلات