لقيتو قاعد جنب باب الشقة حقتو.. جنبو انبوبة غاز.. متفن في واطة الله.. سلمت عليهو.. ازيك يا يازول.. مالك قاعد هنا؟.. عاين لي..
وهو ياشر بايدو للشقة.. وقال الشقة مقفولة وانا ما عندي مفتاح.. المفتاح جوا.. اصلها محاسن قاعدة جوا.. لكن متحننه.. وما دايرة
تقوم تحوم وتخرب حنتها.. قالت لي انتظر لحدي ما الحنة تشيل.. واخرطها.. وبعدين اجي افتح لك الباب.. اهه انا حسي قاعد وراجي
الحنة تشيل.. لكن يا خوي الحنة بتشيل في كم ساعة؟.. عاينت ليهو.. وكلي شفقة على هذا الزوج الأليف.. الوديع.. الذي ابدع الفكي
بتاع محاسن.. في ان يخلق منه نعجة.. وقلت ليهو.. والله يا اخينا شيّل الحنة ومدتو بيعتمد على عوامل كتيرة.. لكن اهمها.. نوع الحنة..
نوع المحلبية او الصبغة..
انتهيت من نضمي وشرحي الوافي عن العلاقة المعقدة بين شيّل الحنة والمدة الزمنية لذلك وعاينت ليه.. لقيتو الهم باين على وشيهو..
وعلى وشك ان يزرف الدمع الثخين.. قال لي.. تعرف الحنة نمرة واحد جايانا مخصوص من الدامر.. والمحلبية ميسو الاصلية.. محاسن
ما قاعدة تستعمل صبغة عندها حساسية الله يحفظها ويغتي عليها من عين الناس.. و بطن كرعين محاسن صلاتي علي النبي.. جضوم ليلي علوي
وداخلات في سفنجة.. يعني بي نضمك دا حنتها عشان تشيل دايره لها تلاتة ساعات.. وانا ماشي الشغل.. كيف الحل؟.. قلت ليهو.. طيب يا اخي كلمها..
وخليها تفرتق الحنة وتقوم تفتح لك الباب.. عاين لي وبانزعاج وغضب.. نهرني لمن نطيت.. يا بت انت ماك نصيح..؟ داير حنتها تخرب.. وتطلع شينة..
والنسوان يقعدن يتقارصن ويتونسن فيها؟.. يا اخوي كل شي ولا زعل حسونتى دي.. ان شاء الله يرفدوني.. بس هي حنتها تطلع سمحة.. واتلفت على باب
الشقة وقعد يكورك.. يا محاسن .. محاسن.. ما شالت؟.. وجاء صوت من الداخل.. وكأنو صوت عسكري في الحركة.. وبحدة شديدة.. قالت ليهو.. يشيلك التمساح..
ما قلنا لك لسه.. كرهتني الحنة زاتها يا اخي.. زولي هنا.. قعد يبلع في ريقو.. ويضحك.. وعاين لي وقال.. والله.. الله يهديها بس.. عصبية خلاص.. الا طيبة واللهِ..
وحنينة..
لملمت بعضي.. ونزلت وانا ما مشيت تلاتة خطوات الا واسمع اخونا يغني.. ويدندن:
الزول السمح.. فات الكبار والقدرو
كان شافوهو ناس نوع دي كانو يعزرو
رد مع اقتباس
المشاركة الأصلية كتبت بواسطة سمر ادم
المفضلات