مخرج أول :
ما قصدي أروِّج
لي فكرة موتك فيني
ولا داير أثبت
إنك أصلاً فعلاً مُتِي ،
لأنك فعلاً أصلاً مُتِي ...
ولا محتاج شان أنسى ملامحك
إني أغمِّض عين الذكرى
واحد عندي نا لو أنصفتي ،
أو لو جرتي آبنية عليّْ
بيك ، وبلاك ... الدنيا بتمشي
لا شمس الله بتسقط شانك
لا بهاجر نيلنا ويمشي
لا بتأسف وأبكي عليكي
لاني البعبُد يوم عينيكي
أقوى نا منك ومن ذكراكي
وقادر أضحك برضو وراكْ
مخرج ثاني :
إذا كُنتي الصباح إنتي ،
أنا الشمس البتمنح
لون بهاكِ الضي
وتزرع فيكي باقي نهار ...
وإذا جاتك
مجرد فكرة إنك غيم ،
أنا البحر البيستكتر
علي ريق السحابة الري
ويجدِّع ليكي
من فايض مياهو بخار ...
فما تشوفيني ساكت ساي عليك
مسكين ولا جايب خبر ،
وتقولي تلعبي بي هواي
وتْدُقِّي بي حيطة صدودك ود غُناي
وأنا كلما أصبر عليك
كلما أصبر عليك ،
القاك تشتِّري بي ظنونك
في يقيني وتنكسر منك رؤاي
قايلاني ما قادر عليك !!
قايلاني خايف من جفاك !!
قايله يعني عشان بريدك ،
أحتمِل نيران هواجسك
وارضى اْعيش في ضل أساك !!!
وإني زي ما قُتَّ ليك
لو عليْ يرضَنْ عيونك ،
أبقى جمبك عمري كلو
أبكي جمبك عمري كلو
وبرضو أسبح في رضاك !!!!
قايلاني ما قادر أفوتك
وماني قادر أحب سواك ؟!
قايلاني مفتون بي بريقك
ولسه مفتون بي صفاك ؟!!
قايلاني لسع
زولك البشتنْتِي داك ؟؟؟؟!!
قايلاني ما قادر أفوتك
وماني قادر أحب سواك !!؟؟؟
قايلاني ما قادر عليك !!
قايلاني خايف من جفاك ؟؟؟؟!!
كان راجله طالعيني الخلا
بس
كان راجله طالعيني الخلا
لو ما أمرمِط كبرياك
وأدقَّ بيك دلجة هواي ،
لو ما دفنتك إنتِ حيه
وكتَبْ علي قبرك ندم
ورقَصْ علي قبرك براي ،
أبقى يا ناس ما معز
وأبقى يا بت ود حرام
رد مع اقتباس
المشاركة الأصلية كتبت بواسطة معز عوض
المفضلات