مشيت الازبتالية ازور مختار ود محمدين . . قالوا نطحتو بقرة في محسنو . . كانت دايرة تودرو من الدنيا أم بقر . . دخلت عليهو في العنبر . . حاملاً معي كيس موز و كيس خيار . . قالوا الموز و الخيار الكمدة بالرمدة لمنطوح البقر . . لقيت مختار مبطوح علي بطنو . . و مغتغت من نصو . . و يقند . . الحقيقة صوت القندة . . أكدت لي أنو البقرة دي أتلومت مع مختار لوم السواد و الرماد. . الله يفك كربتك يا مختار . . أها بعد سالمتو و طايبتو . . قلت ليو . . يا مختار شاحد ربي الحنان المنان . . نطيحة البقرة دي تبقى ليك نطيحة خير و بركة ياخي . . و يديك بيها الجنة . . و البقرة النطحتك دي ربنا يسلط عليها وحيد قرن ينطحها محل نطحتك . . مختار بعد سمع سلامي ليهو . . رفع راصو يااااا الله و يامين . . و بعد كان راقد علي بطنو . . انقلب علي ضهرو . . و قعد يصرصر لي في وشيهو . . قال لي . . انت جيت يا فيفيد . . قلت ليهو آآآآآي يا مختار . . مسكين مختار . . ظنيتو كان ناوي يحفر ليهو حفرة و يدفن فيها سر نطيحة البقرة . . لاكين بعد زيارتي ليهو . . الخبر فاح . . موضوع النطيحة دا أنا حدست بيهو فطين ست الكسرة . . و فطين حدست صاحبتا عجبونا النوباوية . . بعدين جات خالتي السعدية شايلة لي خبر نطيحة البقرة لي مختار مع صينية العشاء مفتكراني ما سمعت بالخبر . . الله يفك كربتك يا مختار.
بعد مرور ازبوع من يوم نطيحة البقرة لي مختار ود محمدين . . خالتي السعدية جاتني جارية و تكركر في توبها . . قالت لي . . يا فيفيد . . بكرة بدورك تمشي معاي بحر أبيض . . ما سمعتا بي عسمان ود محمدين يا فيفيد؟؟؟ . . عسمان أخو مختار يا فيفيد ما بتعرفو؟؟؟ . . أمس مرتو اتصلت من بحر أبيض . . قالت عسمان نطحتو بقرة في محسنو . . قلت ليها . . انتي البقر دا مالو مع وليدات محمدين . . خلي بالك البقر دا ما براهو . . و محل نطحيهو دا فيهو اجندة سياسية.
مشينا بحر أبيض أنا و خالتي السعدية و مختار أخو عسمان بعد مرقوهو من الازبتالية . . وصلنا بحر أبيض بالليل . . لقينا عسمان ود محمدين راقد في الصيلون . . كرعينو مربوطات في عراضة السرير . . و خاتين ليهو مخدة تحت صلبو . . الحقيقة حالتو تحنن . . الله يسترنا من قرون البقر . . قمنا سالمناهو و طايبناهو و دعينا ليهو أنو نطيحة البقرة دي تحرق ليهو سيئآتو و تخدر ليهو طريقو للجنة.
و بالليييييييييل . . خالتي السعدية مشت بي عند النساوين و رقدت مع مراة عسمان . . و أنا مرقت لي سرير و ختيتو جمب سرير مختار . . و أنا شاعر بي حالة أسى لي وليدات محمدين . . الحقيقة وليدات محمدين ينوم معاهم الجن . . شاحد ربي بكرة بقر بحر أبيض كلو يجي يغزغز قريناتو فيكم . . وليدات محمدين ما بعرفو النوم و ما بعرفو علاقات حسن الجوار عند النوم . . الليل كلو يمدغو في سنيناتهم و يبزقو . . و البزاق محل يجي يجي . . شفتو كيفن؟؟؟ . . شاحد ربي تنوم معاهم بقرة من بقر الزاندي . .كنت راقد في أمان الله جمب مختار . قوووم انت يا مختار أقعد أمدغ و كركر في سنيناتك . . و انقب علي جمبتك الشمال . . و أبزق لي في وشي . . قلت ليهو . . يا مختار انت صاحي . . يا مختار انقلب علي جمبتك التانية . . يا مختار شوف ليك ستيانة لملم بيها شخمك دا . . و مختار يشخر . . و خشمو ينملي بزاق تاني . . و المرة دي يكبو لي في أضاني . . قمت شلت سرير و لحافي و ختيتها جمب سرير عسمان . . و عسمان من يومو سنينات يمسكن البزاق ما عندو . . في اللوال بزق لي في أصابعين كرعيني . . فرحتا و قلت عسمان احسن من مختار . . بعد شوية قام كباهو لي (جوووووو) في سدري . . قمتا صنقرتا علي قعّاداتي في نص السرير . . و حرست الدفعة الجديدة من بزاق عسمان المنطوح . . و عسمان يقرر أنو ما ييزق عيلا مع طقت النباه . . الساعة التي نفخ فيها جضيماتو . . أنا شلت مخدتي و اتلافيت بيها البزاق و هو في الجو . . كان ما كدي كان جابو لي في خشمي.
الصباح . . مختار كوك لي . . يا فيفيد صباحاتك بيض . . اصبحتا كيفنك . . طيب؟؟؟ قلت ليهو أصبحتا مستحمي بي بزاق.
كوركتا لي السعدية خالي . . قلت ليها أبقي مارقة . . السعدية جاتني مارقة زعلانة . . قلت ليها مالك انتي كمان يا خالتي؟؟؟ . . قالت لي . . يا فيفيد الليل كلو عيوني ما غمدن . . بخيتة مراة عسمان الليل كلو تشيل و تبزق فيني يا فيفيد.
رد مع اقتباس
المشاركة الأصلية كتبت بواسطة ود المطامير
المفضلات