خربشات شعرية

[أشرف صلاح السعيد]

مدنى درة بلد

مدنى يا درة بلد
يا ندوة لامة ومنارة ضاوية
عتق الزمان بُعد الأمد..
حلقة ذكر ومسيد كبير
لالوب سبح جلاليب تدور
ومجدوب شرد..
مدنى يا السنى الجليل
رفض السحر وكل الفتن
يشهد عليو نهر الرهد..
يا خليط فريد
ضم القصيد وكل الضواد
بنسق جميل بيو إنفرد..
حويتى الجمال وسمح الخصال
إنتى الحنان صدر الأمان
للبعيد قبل الولد..
صغتى الحُسن لوحة أدب
نسيمك أريج نداه الشعر
بانِّك يميل ثملان يقين
ولمن يجف يخطو فيو صورة الصمد..
الأزرق يدندن مع الأصيل
ترقص مراكبو
والقبة ترقب فى طرب..
مدنى يا أبوى الفقير
لين الطباع
خُلق الكرام
سطوة أسد..
ياكى الملاذ
ياكى الجوار
والنصرة لكل الورد..
الجامع الكبير ياهو الدليل
نادى الجميع صحى الضمير
الكل زهد والكل حمد..
سقانا اليقين من زمن الأمين
فطام تقى فى كل كبد..
وواصل المسير محمد سعيد
إمام جليل ساد العُمد..
مدنى يا الحضن الكبير
يا يمة الحنون
مارضيتى ضيم
وقفتى للمحتل وتد
بالمؤتر شحذت الهمم
طلعت شرارة عمت ربوع
جابت ارجاء البلد
ياكى القيادة
ياكى الريادة
و ياكى الجلّد
ودفاك معانا من المهد حتى اللحد..
فى صدرك تتمازج عروق
حتى الغريب وعابر السبيل
جواك ما ينفرزو من ود البلد..

بقلم : أشرف صلاح الدين السعيد

[أشرف صلاح السعيد]

مدنى يا..
مدنى ياسودان كبير
فيكى المِلَّل..كل التلاوين
من ربوع ارض الملايين
زنتى المزيج طعم العدل
وكنتى للسودان ضمير
بتطبطبى للكل جراح
بتهدى للكون الصلّاح
بتضوى للعميان طريق
بتسمعى الطرشان نشيد
وكنتين جمالك فيهو الكتير
همسك سماع
وغضبك صداع
بكسر اعتاو جبين
عشان يستبين
مايستكين وقت الصراع
وجواك كتير لساو كتير والله كتير
وفى إستراع..

بقلم /أشرف صلاح الدين السعيد

[أشرف صلاح السعيد]

شوقى ليك..
مدنى ياجواى حنينة
البوم ذكريات وورق قصاصة
ياسبيل لموية باردة
بغربتى اكوسك كواسة
متين ارجع ليك تانى
والقى فيك احلى الوناسة
تعرفى يايمة الحبيبة
حاسى بسجن معاو حراسة
غريب تايه بحبستو
زى المصلى وطى للنجاسة
او اغيبشن القفة همو
ملّ كل الوان السياسة
اللقيمة بقت هميمو
زى النجاح وقت الدراسة
زى المنتظر وقت الاذان
يسمع بدالو صدى انتكاسة

بقلم / أشرف صلاح الدين السعيد

[أشرف صلاح السعيد]

رأيت صورة بجنوب البلد فيها وليد من الجوع سجد..
ووراهو انتظر العقاب عشان يبقى ليو ود الاحد..
زعلت ليو ومن الجميع وقام القلم يسرد سرد..

والله حرام..

شفتو الوليد كوم العضام
وعقاب راجيو يكون طعام..
صورة أغرب من خيال
وبعازة بيحصل ده الكلام!!
شنو السبب وشنو العلاج
كيفن نرمم إنسان حطام؟
أما السبب مفضوح عيان
تاجر حرب ومعاو خدام..
عبدو القرش عيشة القصور
غشو الجميع بدون إعلام..
شغلونا بهم الرغيف
وكيفن نندد بالنظام..
ورغم كبر الكروش
إدسو فى وسط الزحام..
وكان للعلاج معروف بيان
ما هو الهتاف بصوت تمام..
وأُلوف تسير تردد نشيد
ودموع تسيل على ده الغلام..
القصة أعمق من كده
ميراث طويل خمسون عام..
يوم داك لمن طلعو الإنجليز
وقلنا ودعنا الإنهزام..
بس للأسف ما ودعنا الشتات
وآلام نفوس سر الخصام..
وقالوها أولاد الجنوب
شنو الجديد ووينو العلام..
سيدن مشى وجانا الجديد
ماالملك ما بيفضل دوام..
القصة عشعش فينا خوف
نضل نتوه ما نحقق مرام..
وشنو المرام؟ الله أعلم
يمكن يكون نعيش وئام؟
وبرضو فشّلنا الحلم
والكل بيفتش عن مُلام..
مرة الظروف مرة القفوف
والكل يشير على الحكام..
ونيسنا من بيناتنا إحنا
بيتخلق كل النظام..
وإنو الخلل جوانا نحن
ومن جوانا بجى السلام..
ماهو اغانى وتجمهرات
وخطاب حماسى وطِيّير حمام
يا اخوانا أبحثو عن يقين
واعرفو الحلال من الحرام..
وكل الحرام وعين الحرام
الطفل بينا يكون ركام..
بقلم / أشرف صلاح الدين السعيد

[أشرف صلاح السعيد]

والله حرام 2
ياوليد حليلك كتير
راجى الرغيف؟
ماتستنى بطول انتظارك
ماالكل بطابور السلطة بيقيف
كيمان شايلين سلاح
وكيمان محتارة بالمذكرة والتوقيف
مااتلخبطت اتجاهات الطريق
لاشرطى بينظم مرور ولا عريف
والكل بدفس فى شبكتو
وبيتسابقو الشتران حتى الحريف
قوم يا وليد ناسك نسوك
كل المشاهداتلونت بلون مخيف
لون الطمع لون الضياع لون الأنا
جو النفوس داكن مخفيف
قوم ياوليد اتخطى الالم
لملم شتاتك اوقف نزيف
كترو عقبان للبلد الجريح
المابعافو الفطيس او حتى جيف
قوى القليب املاو عزم
ما بيناتم بيتعفص القلب الرهيف
مابراعو احن المصاب
لابينجو منهم البصير ولا الكفيف
قوم ياوليد ماتفقد امل
ربك رحيم خلاالجفاف وراو خريف
خلق الضواد بكل زمن
بوسط اللصوص بيعيش شريف
عز السموم وعز الحموم
بيجى الرشاش باحراهو صيف
قوم ياضمير كفاك خوف
كفاك نوم بكل بيت وبكل ريف
قوم ياضمير سيب الاستكانة
بالظلال وبالحوارى وبالرصيف
قوم ياوليد نسند بعض
انا زاتى زيك شالنى خوف ماقادر اقيف

بقلم /أشرف صلاح الدين السعيد

[أشرف صلاح السعيد]

سافرت زوجتى فشعرت بغربة وشجن..

وقلت:

إنتى قايلا بلاكى ببقى..

إنت قايلا بلاك ببقى
أو بضوق الراحة حبه..
كيفن أضوقا أو أشوفا
ومصدر هناى عنى غبّا..
بلاك إنت الغربة مرة
ولو معاى ألف صحبه..
ما إنت لىّ كل حاجة
بأعلى بيك كل رتبه..
تايه زمان قبل أعرفك
ما سماى ما فيهو نجمه..
بلاك إحتار الدليل
وين النجيم يكشفلو دربه..
ودونك إتعرت دروب
حتى الرياض يبسانه جدبه..
ودع يمام فارق بلوم
خاف المكان يبقالو تربه..
حتى الخرير لجمو السكون
جمد حراكو الفيهو شبّه..
أما القمر مخنوق هزيم
راجى الشمس تفرجلو كربه..
ما بلاك بتنعكس الضواد
وكل العلوم بتبقى كذبه..
وتختل موازين البحور
حتى المفردة بتبقى صعبه..
إنت قايلا بلاك ببقى
أو بضوق الراحة حبه..

بقلم/ أشرف صلاح الدين السعيد

[أشرف صلاح السعيد]

وقلت فيها..


فيّض الفرح..
قالو الفرح بيحويه شعور
إلا بيك عم المدائن والثغور..
يتنسم الياسمين شذاك
تبسم تشع كل الزهور..
أما المسيد ولهان ذكر
خالط الفرح عطر البخور..
رفض الكنارى يحط رحال
زان الفضا يصول يدور..
وكل الحياة طعمت سمو
إنهزم الحزن عم السرور..
وإتغيرت صور الدروب
كساها الوميض زى البدور..
كل الورى تنهل فرح
ولسه الفرح ما فيو كسور..
كيف تنتقص أو ينكسر؟
وإنتى النبع لكل الحبور..
تتشابا ليك كل القلوب
تهديها منك أحلى العطور..
غاب البدر قايدو الخجل
كيف للنجوم معاك حضور..
وحاشاى ما عرفت الحسد
لما السحر كسر جسور..
ثملان أنا مشبع عشق
عايز مزيد مدمن شعور..
مشتاق كتير رغم اللقا
كيفن يكون لحظ الفتور..
أمنان أنا فى عشرتك
ما بحضرتك بتتلاشا الشرور..
وكيفن تحل غيمة كدر
والطيبة روية منك بحور..

بقلم/ أشرف صلاح الدين السعيد

[أشرف صلاح السعيد]

سألونى عنك..


سألونى عنك كيفن اجيب؟
ووينو الحرف البملى مساحات جمال
مزروعة فيك
وينو اللحن ؟
وينو الشعر البوصف الحسن العجيب
كيفن اجيب؟
احكى روع الحضور؟
احكى احساس الذهول؟
احكى لمن ارتمى بحضنك نعيم؟
كيفن بتبدد ظلامات الغيوم
وبترتحل كل عصابات الهموم
ولا احكى عن الحبيب
كيف الحكى
ووين الكلام البيتلقى
ماكل الكلام بيكون ممل
بيكون رتيب
وأرد اقول
انتى الهبة
و خير من نعم الحمر
زى ماقال الرسول
ارد اقول
انتى السبب لكل الرضا
ويكفينى بيك للفجر بقوم
ارد اقول
انك معاى يكفينى قول

أشرف صلاح الدين السعيد
__________________

[أشرف صلاح السعيد]

لما زعلتها قلت..

برغم سماحك حاسى الأسف..
آه ياأسف لو كنتا بتفيد
تقدر لذرة ألم من قلبو التشيل
كنت طولت السهر
و إعتذارى مستمر صبح وليل
عشان حبيب شديد قريب
بسكن معاو بدنيا الغرام
إلا من غير قصد زعلت الخليل
كيفن حصل مادا المهم
ورينى كيف ابدد حزنو النبيل
ياريت تقول او حتى التشير
كيف بنغسل ذنبى الكبير
كيفن ارجع للزمن
واوقف كل المواقيت
عشان اقول فيو بس نشيد
لذنبى ماارجع أعيد
عشان مايحس الألم
أفديهو بقلبى البريد
أحذف لحظ الحزن منو
ورينى كيف ماتقول مستحيل
خليهو طيب هو اليقول
كيف لخلاصى بكون طريق
خليهو يتمنى الخيال
يطلب كل أنواع المحال
بلقى المحال حواليو ذليل
بقيت معاو بحس بخجل
وبعينو بحس الغرق
بعد ما كانو الرمال
لشط أمان فيهو النخيل
فيهو السفن من غير شراع
بترسو فيو من غير دليل
آه ياأسف كم بكرهك
بقيت أعرفك
بقيت أحسك
بقيت اشوفك
بعد غياب زمنا طويل
والواجعنى منك
بقيت بتكبر
وخايف اوالفك
مااقدر أخالفك
تملكنى أطيافك
وتبقى ادمان
تبقى جواى تقيل..

أشرف صلاح الدين السعيد

[أشرف صلاح السعيد]

قرت القصيدة وتبسمت..

قلت:

مامرورك فيهو الجمال بخطوتك
فيهو الحنان شايل كتير من حنتك
فيهو السماحة اتجملت من سحنتك
فيهو السكينة توشحت من سكنتك
فيهو العبير اسكر شعور بس من طلتك
خليك قريب بملكنى الفرح من فرحتك ..

[أشرف صلاح السعيد]

الناس فقدت المنطق واليقين ..
خربشت وقلت:

ليه الشفقة؟؟
هاااى يازول تعال بيجاى
مالك جارى زى السعران؟
شنو البتفات
غير الثعلب ابو سبع لفات
فى زولن مات؟
رزقك قاعد وهو برجاك
زى الموت الحتما ابدا ماحيختاك
سيب الجرسة
سيب الشفقة
كان للسترة وكان للقفة
مابتجيبن شلهتا ولا حتى الوقفة
اصلو القصة ماعايزا الهلعة
سمعت بيوم كترت البرجسة جابت سفة
ولا عريس نفض الكيس بحتة خلعة
بالايمان
تقى القلبان
وحسن الظن بالرحمن كلو بيكون
وياها السنة عمق ازمان
كان الارزاق بييد انسان
ولا مهمة كمان للجان
ليك الحق وكل الحق تكون قلقان
تكون سهران وشديد مهموم
وكمان حيران
بس يازول ماياهو كلام
وكل الحق اسمعو تمام
كل نفيسة ليها نصيب
ليها رزق ماهو بغيب
وغير مكتوبا مابتصيب
ماالتوزيع بيد العادل الحنان
ووزع رزقو قبل ماتخلق يا انسان
عطاؤ كتير
عطفو كبير
مااصلو كريم
اهدا وروق حس بأمان
استغفر ربك
واتفل تلاتا بيسراك على الشيطان
__________________

[أشرف صلاح السعيد]

اخوكم اتخيل واحدة طولت لسانا عليو..

كتب وقال:

أدب الرجال..
صبر الرجال كان حد ..الجاية ما معروفا
ياحرمة لزمى حدود قارورة ماهى بخوفا
وصانا حبيبنا رسول ووصيتو ما بنعوفا
الرفق بيك مطلوب الرجالا ما مألوفا
ما بستقو ع النسوان بكلمة قايدا حروفا
والسافرة ببقالا غطا عينيا ما بتشوفا
انا للحرابة ترس للحارة بسيوفا
حاشاو كلامى جرس للعايرة والمكشوفا
ودمدنى زولا كلس كلماتو ما مكسوفا
اسألى عنو البلد صحراها وجروفا
طبيعتو فيها الادب والعيبة ما بلوفا
كلمتو فيها دهب برميها ما محدوفا
وكان للجراءة اسد صيدتو ما معيوفا
ونارو باقة لهب للقبيلة بضيوفا
*************************
يالسمحة اعرفى مانى بكشيف الحال
وفى الشينة مانى البقضعو وصال
وليكى منىنصح ما تكررى الموال
خلى الاخوة تدوم وماتقطعيها حبال
نتلاقا فى الافراح واديك كمان شبال
اصلو القليب الحر ماتهمو قيل وقال
وودمدنى زولا جد تريان وما قدال
راضع الشهامة تد ود عزيز الرجال
داقى الرجولة وتد بصخرة ما برمال
طبعو الامان بجد اصلو ما بشكال
بس للحقارة كعب ان وقفو قصادو جبال
يالسمحة روقى تب مانى بهوين حال
اخوك بالله فحسب اقصرى اللسان الطال

معانى الكلمات:
ودمدنى: اخوكم الكلس (بس فى منتداكم يظهر سبقنى زول للاسم)

بقلم /أشرف صلاح الدين السعيد

[أشرف صلاح السعيد]

حنين مغترب..

عازة يا أحلى كلمة
طالعة من جوايا غنوة
يا حلاة معناها لو عدت ليك يمة..
ما كى الأمان وسط الشرور
وكل الحنان
فرحة عروس يوم المتمة..
فيك الكرم ماليو حدود
بطرانة جد
كلك سبيل بدور لى جغمة..
تزيل عطش كل السنين والإغتراب
مشتاق خلاص أدينى ضمة..

[أشرف صلاح السعيد]

خربانة الزايلة..

هاى يا زول الزم الجابرة
كشف الحال
شين القول..ماهو تمام..
كترة الغيبة
سيرة الناس
اكان بالدين كلو حرام..
وين المتعة برد النبزة
وشتمة بشتمة
وسب الغير كأنو لزام..
ماهى غنيمة رد الشينة
كلمة شر بكلمة شر
وشجار وشتام..
ووين الحكمة ازعل زول
اشرشح فيو
امسخر فيو ونعيش فى خصام..
اطرا الآخرة
واذكر ربك
عمل الخير ولو بى بسمة تلقاو قدام..

بقلم / أشرف صلاح الدين السعيد

[أشرف صلاح السعيد]

فلاحة الدنيا..

هاى يا شاب شمر ساعدك
فلاحة الدنيا بتدورلها همة..
زود نفسك عزيمة قوية
وسيب القعدة وناس اللمة..
كل سعاية ليها عداوة
كرب صبرك وما تهتمة..
شد مجدافك بالإيمان
يقينك بهزم قول الرمة..
وكان للدنيا ياهى دول
مرة سعادة ومرة فى غمة..
وكل الناس بيها جلل
ماكا براك يا ود اب عمة..
على مقامك بالصلوات
وبجهد إنسان بتقود للأمة..
لمن يصحى جواك ضمير
بجى حوليك صاحب الذمة..
ممكن تتعب حبة كمان
بس بسعيك بتصل القمة..
ونجاح انسان رهنو كفاح
مهما طال مشوار الظلمة..
بقلم/أشرف صلاح الدين السعيد

[أشرف صلاح السعيد]

لقاء عازة..
عازة لو إتأخر لقانا
بعزمنا ممكن نبدر..
المهم إرادة عيالك
باقى الكلام لا بقدم لا بأخر..
الزمن إن ترسو سارع
البتزرع لابد بيثمر..
ماالمستحيل حجة ضعيف
لو النوايا عدمة معكر..
والسبيل ماليهو تالت
يا يقين يا بيهو نكفر..
والإرادة طبع أصيل
ولو المعاول فيها تكسر..
والصدق كنز الحياة
مابيوازيو ألف متجر..
يا زمن لف ودور
إحنا برضو ما حنفتر..
والزمان مهما طال
بذر الإرادة لابد بيزهر..
لو عقدنا العزم نية
قطاف حصادنا ما بيودر..
لا ندم يعرف طريقنا
لا كأابة تحل تعسكر..
تشعر الورقاء هديل
ترقص الياسمين تعطر..
وينجب الحلم الحقيقة
موعد لقانا بيكون مبكر..

بقلم/أشرف صلاح الدين السعيد

[أشرف صلاح السعيد]

بوش مصلح (حلمنتيش)
يا بوشاً على الطلسِ
تصلحا و بالجِبّانِ تظبطا..
مكسياً بمبشور الدِحاحِ
فزاد الخليط تألُقا..
علاك سمسم متقطرا
كأنه الثريا مُتلألئا..
إرحم لعابىّ وهيبتى
فغدوت بين البرية مُتهبلا..
السمسم دغدغ منخرى
فأردانى ومنخرى مُتسطِّلا..
أدرى بأنك صارعى
فكيف الهرب بكرشٍ مُتهدلا..
حزوتنى ببصل أخضرٍ
والجكس أعيتهُ الهرولا..
لوكسُ وكامى ونيفيةٌ
ما ضيعوه ولاتسويكة السِجنَّلا..
برغمه أعشق أكلك
فلا تسمم فيك و لا تلتلا..
يشهد التاريخ لك
لم يمت بك أحداً مُجندلا..
بل نديم الفقراء
فلغيرك لن نٌحيد أو نُبدلا..

أشرف المتبوش

[أشرف صلاح السعيد]

البشير قد نختلف أو نتفق معه، لكن الا تتفقون معى أن قضاينا ومشاكلنا الداخلية هى شأننا الخاص ؟ ولا شنو الراى؟

لا للغرباء بيننا..

نحنُ قد أمنا ولن نُلدغ نوبة أُخرى
ففطنةُ المؤمن تقيه شر ذاتِ الحفرة
سُلبنا الحق أمساً من شعوبٍ غير حرة
لذنبٍ ما جنيناه سوى عتمة البشرة
فرنجة جاؤوا غزاةً نهبوا النهر والخضرة
ثم جاروا وتمادوا فاستعبدوا الناس قصرا
أرسلوهم بالبحر غرباً بلا ماء لا زادٍ و لا سترا
وبعد أحقاب الزمان أتونا ليعاودوا الكرة
بتهيمات زائفات لحثالات ليسو ببشرا
بأنّا إغتصبنا نساؤنا وعِثنا بأرضنا شرا
وأحاجىُّ ملفقات لا تحمل من الحق ذرة
وتناسوا سرقة الأطفال ووئد محمد الدُرة
أبو غريب تشهد على كل أطياف المعرة
حاكموا العربى علناً وبنى الفرنجة سرا
بدساتير إبتدعوها كأنهم ملكوا المجرة
حللوا الحرمات إفكاً وحقروا الأديان جهرا
يأتون الرجال دناءةً كأنهم لا يصنعون فجرا
تحت مسمى الحضارة جعلوا القذارة طهرا
هيهات دارفور لكم فما لكم بها قدرة
و لا بفاروق البلاد فلتستبعدوا تلكم الفكرة
بالأمس دحرنا جحافلكم بتكبير وعشرة
واليوم أقسمنا من البشير لن تمسوا الظفرا
فإن هلك الرجال فنساؤنا له نصرا
فمن نصر الإله فلن تصيبه العسرا
ومهما توالت خطوب فنحن لها دخرا
فنحن قد أمنا إن مع العسر يسرا

بقلم / أشرف صلاح الدين السعيد

[أشرف صلاح السعيد]

كان يا ماكان..

لابد نسير..

ياقليب ودع خلاص
زولك نساك لعهدو باع..
ركب السفين ما هو بحزين
كان الربان فك الشراع..
مخر السفين دوى الصفير
بليل بهيم من غير وداع..
يا قليب لملم شتاتك واستبين
كفاك حداد وهم إلتياع..
كل دى السنين لساك حزين
لازلت تطعم عبرة وداع!!
خمس سنين ما فقدت الامل
يمكن يلوح فى البعد شعاع..
زى داك فقير
الكسرة همو لما جاع..
فك الخيام وإرتحل
وإن إهترى كل المتاع..
أصلو الرجا قبيل إنهزم
زبل الشعر خرس اليراع..
وإتبدلت كل التياب
وإتبدل أمن الأمس ضاع..
يا قليب حرام كفاك
هلكو المُحِبة من غير صراع..
ودع الحلم الجميل
زولك نساك لعهدو باع..
أنسى لازم ده المهم
أكسر جواك حس الضياع..
ماالدنيا لابد تسير
ولو إنكشف مليون قناع..

بقلم / أشرف صلاح الدين السعيد

[أشرف صلاح السعيد]

ديل ناسى..


يا عظمة الشعب البعانى
لما يدس همومو ورا الهظار..
وما ينتظر على القضبان
يفرفر فى إنكسار للقطار..
ياسلام عل اهلى الغبش
لما يسعو للرزق طول النهار..
فاس يسهل سلوقة تبذر
وينقلب حال البوار لعمار..
سيد اللبن ينده يغنى
ترقص معاو تُمن الحمار..
فتاح عليم رزاق كريم
إترشرش شوال الخضار..
أهلى الغبش ناس حااارة جد
وغوث البنادى مالو نظار..
هداك البحر أسألو
يوم جنا سجنوهو بجدار..
بالمتاريس ملكوكة بعرق
الصغار قبل الكبار..
ما الشهامة بتتولد
مع الرضيع قبل الطُهار..
ياهو شعبى البعرفو
ولو كساو مليون غبار..
بينكشف حرم قريب
ويبقو للناس منار..



بقلم: أشرف صلاح الدين السعيد
__________________

[أشرف صلاح السعيد]

قصة شاكوش (حلمنتيش)
كل المحن جيانا من داك الجميل
ويشهد التاريخ كم من عبر خطاها صاحب القد الرشيق
واول خطا عرفو البشر كان الغواية من الرجيم
يا حوا ليه ما عندك صبر
تبيعى الرخيص بخلد الجنان
وتطبعى الجايات وراك ما نطوق معاهم طعم امان
يبيعو فينا زى دواب
يا زول تعال بكم تبيع؟
ابيع شنو؟ ما معاك هداك احلى شاب!
فاهم غلط..
تقصد هناى؟ انا وهو يادوب صحاب..
بين يوم وليلة إتباع هناى برخص التراب..
أصلو الجديد عرف الخليج
تعب كتير وشد الحزام
سوى الوفر ترك الطعام
عشان يعود راكب الجديد
ونزل البلد بعد سنين
نسي فيها زولو القديم
الباعو يوم داك لمغترب..
ويتكرر اليوم من جديد
يا بت انا ما زول عرس
الود خلاص عامل شفت..
راجع بعد شهر للدوام
وترد عليو:منو الجاب سيرة العرس؟
ظرافتك بتساعد نكون جوز حمام..
وإتخدر المطعون قبيل بحلو الكلام
أدمن الوش الصبوح
وإتجهجه كتير لدنو الاوان
طبعا خلاص راجع هناك
للبيداء والبترول والخيام
ممكن اقول
تقول شنو ؟
ما تدللي عارفه شنو ورا الكلام
فاجئتني
بعدين تعال
ما قلت مالاعب قبيل
شنو الحكاية ؟
كان معاك ورق شين
ما تقلبي الموضوع هزار
رايك شنو : يكون متين ؟
يكون العقد قبل الرحيل ؟
أرجع انا وأرسل ليك الاستقدام ؟
بالسرعه دي؟
تكون خطوبة ونجرب بعض
ويسافر هناي المغترب
ويمطر سماها بالهدايا وبالعلب
شي دهب وكمان هدم
وقروش مطر وشوقا لهب
الو الو اهلا سلام
شوفي الزمن وبيقينا والله جوز حمام
رسل الشيله وكمان ريال
ومرت سنين ولف عام
ومن المطار للسمحة ست الحسان
اتبدل العش القبيل لقصر رخام
وصيوان كبير وحديد زحام
وتوقف التكسي العتيق
نزل الظريف فارس همام
شق الحشود والفين سؤال
اللمه دي وفنان تمام ؟
وبلفته خاطفة كان الزهول
برك الجمل سقط الحسام
ودمعه حاره فوق الخديد
الفرده كانت هي العروس
ضاع الشقى وشد الحزام
لحق العتيق واداهو لزه
ياعم طويل للمطار
وفي الغربه واكب كل شريط
عساهو يلقى فردة حمام



بقلم أشرف صلاح الدين السعيد
__________________

[أشرف صلاح السعيد]

الود عاقد ومشمشتو ادللت عليو ..

كبا الجرسا وقال:

مشمشه

مشمشه

يامشمة سيبي الجفا
خليها تطلع من شفا
فيها السعادة المترفا
قوليها مافيها الشفا
وما تخافي ابدا احرفا
بيها المحنة نولفا
ننبذ اناتنا نكتفا
تعسكر موده ونعرفا
تسري السكينه مع الدفا
تصبح ارواحنا مرفرفا
وحاشانا ابدا نخالفا
*******

قوليها وسيبي الاختشا
معذوفا حلوه مدندشا
تطفي ليهبا بالحشا
تحضن حواس وترعشا
تزيد الحماس وتحرشا
نصل القمرا ونهبشا
نتسامر معاها ندردشا
وامرح معاك في فرفشا
واهتف بحبك مشمشا
ما القلب بيك انتشا
وودع ايامو الموحشا
***************

قوليها وسيبي الوسوسا
كرامتك باقيه مترسا
حاشايا قطعا ادنسا
اظلل عليها واحرسا
صرح وقولا و اهمسا
خلي الخجل والدسدسا
ارحم شعوري ماتجرسا
كانت قويه متمرسا
معاك عايزه تدرسا
وعن حياتك تحدثا
تمعن ملامحك تفرسا
تملاها رقه تهندسا
تخلد معاك تهامسا
قولا اوعك تحبسا


بقلم اشرف صلاح الدين السعيد

[أشرف صلاح السعيد]

انتى فى روحى جوه..

انتى فى روحى جوه
زى يقين ماليهو آخر
زى قناعات السنين
بتدعو بكل المنابر
بالمساجد والكنائس
فيها حق باين وظاهر
زى الصدق أكوان ضيا
قايدا للعميان مساير
اتيقن أمان بخطوتو
تابع خطاك لوين تسافر
أبقى جوه
ولسه جوه
وجوه جوه فى المشاعر
أبقى غنوه
وغنوه حلوه
والأمانى لكل شاعر
يكون غناهو قالو هوا
وباقى الحكى يسكن مقابر
انتى فى روحى جوه
زى يقين ماليهو آخر
انتى ماجواى ضمير
وين اكون بلقاهو حاضر
كل التعاريج بيو تستقيم
ماانتى للخط المساطر
انتى مازعيمة كل قبيلة
وللمكارم وللعشائر
انتى ماللكون غنيمة
والفضيلة ليك تشاور
انتى سكنة كل مواسم
مراسى شط للمواخر
انتى ماكل المكاتب
والدوايات والمحابر
للحكايات الجميلة
والدهشة من عينيك خواطر
انتى الفهم لكل طالب
حتى لو كان مامذاكر
ديما برسى بشواطئك
وبتحتوى الجوايا ثائر
زى جنون الريح وموج
بتنهزم طرف الجزائر
انتى مااستراحات السفر
وفرحة لقا للكان مسافر
انتى فى روحى جوه
وجوه جوه
وأحمدك ياربى شاكر
لعطاءات الروائع
البيها أبدا مانى ناكر..

[ابوخالد]

اخى أشرف ..

الروعة ذاتا مكملا ... عقد من اللآلئ منضوم بالحروف

الراسمة لوحة شفافة ... خطوط ناعمة وأنيقة ...

لله درك أخى أبدعت كلمات تمطر دعاش يتساقط

علينا بردآ وسلامآ يغير الآجواء الرمضانية الحارة

الى ضباب يرطب حرارة الجوف ... ينعش الأرواح

بمعانى غاية فى الإبداع ....

صديقى موعودون بشلالات من الأشواق الى حرفك

الدافئ الرصين .... فلا تبخل علينا بين لحظة وأخرى

بمدنا بما تفيض به قريحتك علينا .....

ودمت بألف خير أخى

ورمضان كريم

[اسلام فرح]

مدنى درة بلد

مدنى يا درة بلد
يا ندوة لامة ومنارة ضاوية
عتق الزمان بُعد الأمد..
حلقة ذكر ومسيد كبير
لالوب سبح جلاليب تدور
ومجدوب شرد..
مدنى يا السنى الجليل
رفض السحر وكل الفتن
يشهد عليو نهر الرهد..
يا خليط فريد
ضم القصيد وكل الضواد
بنسق جميل بيو إنفرد..
حويتى الجمال وسمح الخصال
إنتى الحنان صدر الأمان
للبعيد قبل الولد..
صغتى الحُسن لوحة أدب
نسيمك أريج نداه الشعر
بانِّك يميل ثملان يقين
ولمن يجف يخطو فيو صورة الصمد..
الأزرق يدندن مع الأصيل
ترقص مراكبو
والقبة ترقب فى طرب..
مدنى يا أبوى الفقير
لين الطباع
خُلق الكرام
سطوة أسد..
ياكى الملاذ
ياكى الجوار
والنصرة لكل الورد..
الجامع الكبير ياهو الدليل
نادى الجميع صحى الضمير
الكل زهد والكل حمد..
سقانا اليقين من زمن الأمين
فطام تقى فى كل كبد..
وواصل المسير محمد سعيد
إمام جليل ساد العُمد..
مدنى يا الحضن الكبير
يا يمة الحنون
مارضيتى ضيم
وقفتى للمحتل وتد
بالمؤتر شحذت الهمم
طلعت شرارة عمت ربوع
جابت ارجاء البلد
ياكى القيادة
ياكى الريادة
و ياكى الجلّد
ودفاك معانا من المهد حتى اللحد..
فى صدرك تتمازج عروق
حتى الغريب وعابر السبيل
جواك ما ينفرزو من ود البلد..

بقلم : أشرف صلاح الدين السعيد

صدقته يا اشرف ومدني تستاهل احلى القصيد بارك الله فيك