لقيت ليك روحى أبيخ من الفضائية السودانية

[بدرالدين أحمد موسى]

لقيت ليكم روحى أبيخ من تلفزيون السودان

و أنا قاعد ليك فى البيت حدانا فى البلد .. فاتح ليك التلفزيون من تصبح .. مع إنو مافى زول غيرى أنا بيتفرج فى قناة السودان .. و الله قالوا ليك فى دراسة عن نسبة المشاهدين .. لقو ليك المسؤلين زاتهم بيشوفو الأخبار فى القنوات التانية !!

وأنا متحكر و هم قايلين روحهم بايخين و ماعارفين إنى أبيخ منهم بدرجة وزير بكامل مخصصاته فى تلك الجمهورية حتى وإن تقزمت الى حجم جمهورية الدومينيكان .. برضه بدرجة وزير .. و مين عارف .. يمكن نطلع لينا بى ملكة جمال و لاحاجة !!

المهم و أنا فى رقدتى ديك يجيبو ليك برنامج طبخ ( لاحظ أنا فى البلد) و راقد لى فى عنقريب !! اشوف ليك الشيف لابس أبيض فى أبيض .. بياض من الله خلقنى لا شفتوا فى جلابية فى عقد .. و لا فى توب فى مكتب !! سوهوا كيفن ما بعرف .. و مطبخ حدادى مدادى و عدة من الله خلقنى .. فى معمل الكيمياء ما شفتها !!

الطبق طلع سمك سالمون !!! آآآآآآآآآآآآى سالمون عديل .. ما قرقور و المقادير عاوزه ليها مترجم :
شرائح سالمون , أورجيانو مفروم خشن / كووب إكليل الجبل مفروم خشن/ ربع كوب بصل أخضر مقطع / 1 حص ثوم / ملعقة عصير ليمون / ملعقة زيت زيتون/ ملعقتين خل تفاح ..



فى الوقت ده جابو لى صينية الغدا .. الشغالين فيها مما صبحت .. جيبو الزيت .. جيبوا اللحمة .. حمروا البصله .. اتناولو الثوم .. الغاز كمل .. الحلة مسكت ..!!
و المحتويات .. و الحمد لله .. سلطة و ملاح رجلة و بامية مفروكة .. و طبعا معاهم كسرة و رغيف .. يعنى 5 أصناف .. مش تقول لى سالمون !! و الناس بتجابد فى حق البوش !!

تخريمة : الليلية غايتو موضوع الطيارة الضربت حمار كلتوم دى بتشغلهم شوية .. أهو لقو ليهم ( شطر) يرضعوا فيه !!

تحياتى

[مدنيّة]

لقيت ليك روحى أبيخ من الفضائية السودانية

غايتو يابدر
طلعت بايخ
جنس بواخة ):

[بت أم درمان]

غايتو يابدر
طلعت بايخ
جنس بواخة ):

وانتي يا مدنية
فظيعة فظاعة
هاهاها

[بت أم درمان]

لقيت ليكم روحى أبيخ من تلفزيون السودان

بالله هو تلفزيون السودان بايخ؟
غايتو انا كنت بفتش ليهو في مسمى
يليق بيهو

[مدنيّة]

وانتي يا مدنية
فظيعة فظاعة
هاهاها

هههههههههههههههه
يديك العافية حبيبة

[بدرالدين أحمد موسى]

غايتو يابدر
طلعت بايخ
جنس بواخة ):

و رحم الله إمرئ عرف قدر نفسه .. و لا كيف !!

تحياتى

[بدرالدين أحمد موسى]

وانتي يا مدنية
فظيعة فظاعة
هاهاها

المديدة حرقتنى !!

تحياتى

[بدرالدين أحمد موسى]

بالله هو تلفزيون السودان بايخ؟
غايتو انا كنت بفتش ليهو في مسمى
يليق بيهو

و إن شاء الله لقيتيى .. على أى حال تقدرى تقولى ما أبيخ من بدرالدين !!

تحياتى

[تغريدا]

أستاذما الكاتب المبدع بدرالدين محمد بالجد الحاجات الفى حيتنا الباااااااااااااااااااااااااايخة كتيرة وفى بياخة بتقدر تتحكم فيها وفى بياخة مابتقدر تتحكم فيها وفى بيااااااااااااااااااااخة توجع القلب من جوووووووووووة وفى بياخة تضحك .....الخ
دوماً لك أحترامى

[آلاء عبد الرحمن]

براك البتجيبو لي روحك اسه في زول بحضر تلفزيون السودان خليو طبيخ مابنعرفو
انا شخصيا اعتزلته التلفزيون كله
"قالو لما تجي تحضر تلفزيون السودان تحضر حبوب ضغط قبل ماتقعد فيو"

[أحمد عمر ( MOODY )]

العزيز .. اللذيذ
بدر الدين


غايتو كان ختّيت روحك في محل مقارنة مع تلفزون السودان
معناتو تلفزيونّا بيستاهل نشوفو على الأقل خمسة ساعات في اليوم



النصيحة لي الله .. عَصَرتْ على روحك شديييييييييد

[mahagoub]

بخت التلفزيون كسب مشاهد
انا لو محلهم بديك المشاهد المثالى
ده انت قاعد ليه بمزاج

[أحمد عبدالله]

الحبيب والمبدع دائما بدرالدين احمد موسى قناه السودان اقصد(بيت البكاء) مافي زول بفتحها في السعوديه وبعدين انت لوعاوز تحضر طبق اليوم افتح قناه ابوظبي مع منال العالم المره دي خطيرررره خلاس(خطيره في الطبخ مافي حاجه تانيه خلي بالك من الحكومه المعاك)
ولو عاوز تحضر طبق يوم مضحك افتح قناه الفجيره فيها تجتوج السوداني يلا ياكتموتو(الرجال مابعروفو يطبخو اكل النسوان طاعم خلاس راجل شنو؟؟!!)
على قول كاتب صحفي سعودي قال قناه السودان كلها استراحات غنائيه وبرامجها غير هادفه واخبارها قديمه ازيلو الغبار عن هذه الشاشه...!!(الكلام خش الحوش)
ماتفتح بيت البكاء(قناه السودان) يابدر الدين

[أحمد عبدالله]

اليكم مقال عبدالعزيز الزهراني من صحيفه الوطن السعوديه الذي كتب عن تلفزيون السودان قائلا:


التلفزيون السوداني لا يعمل بشكل جيد، وهذا وصف فيه مجاملة طويلة عريضة، هو بلا مجاملة: تلفزيون لا يعمل.
سبحان الله، الشاشة السودانية لا تشبه الإنسان السوداني المثقف، بل إنها لا توازيه لا في الوعي ولا في الحضور ولا في الأهمية.
شاشة لا تعرض أكثر من أخبار منقولة في وقت متأخر دائماً وأبداً، وبرامج حوارية غير مهمة للمشاهد العربي وغير مهمة للمشاهد السوداني، ومباراة الهلال والمريخ.
نمط تلفزيوني قديم جداً جداً، وتلفزيون لا يحرك يديه ليضع الميكرفون بشكل جيد، ولا يحرّك لسانه ليتكلم بشكل جيّد، وفضائية تقدم كل نصف ساعة استراحة موسيقية.
البعض يقول: هذا إعلام رسمي، طيب: طالما أنه إعلام رسمي يمثل دولة السودان؛ أين الشاشة من سخونة الصراع السياسي في (دارفور)؟ وأين هي نفس الشاشة من القلق السياسي الانقسامي المتوتر والمتذبذب والمتغيّر بين شمال السودان وجنوبه؟ أين الكشف والتغطية؟ أين الحوار والمهنية؟
نحن ضدّ من يتهم ويروّج لحكاية التكاسل الملصقة دائماً بشخصية الإنسان السوداني وكينونته، وتراخيه الدائم عن العمل، سواءً كان ذلك العمل إعلامياً أو غيره، لكن ما يحدث في قناة الفضائية السودانية الرسمية، ليس كسلاً إطلاقاً، بل موت دماغي.
من محبتنا الكبيرة للسودان بلداً وناساً وإعلاماً، يداخلنا أمل كبير جداً، في إزاحة الغبار عن الشاشة السودانية، وتطبيق الحدّ الأدنى من المهنية الإعلامية، وظهور تلفزيون يعكس حقيقة إنسان السودان، فكره والنبض.
يضيع بقوة، تلفزيون السودان بشكله الحالي، في زمن يتطور في سباق تقني ومعرفي محموم تجاه تقديم الجودة النوعية في المادة البصرية المعروضة، وفي زمن تلعب فيه الصورة ما تلعب.
السؤال الذي (نطرحه) ونضربه ونقسمه على نفسه، في آخر هذا المقال الحزين، هو:
متى تنتهي مباراة الهلال والمريخ؟.
تخريمه: (انتهت وقد فاز الهلال) ههههاي
الخبر من موقع الراكوبه والمصدرمن: الوطن السعودية

[بدرالدين أحمد موسى]

أستاذما الكاتب المبدع بدرالدين محمد بالجد الحاجات الفى حيتنا الباااااااااااااااااااااااااايخة كتيرة وفى بياخة بتقدر تتحكم فيها وفى بياخة مابتقدر تتحكم فيها وفى بيااااااااااااااااااااخة توجع القلب من جوووووووووووة وفى بياخة تضحك .....الخ
دوماً لك أحترامى

شكر كتير يا تغريد بدون بياخة .. لكن كدى ورينى بياختى دى ياته فى البياخات الفوق ديل .. أوع تكون البتوجع القلب !!

تحياتى

[بدرالدين أحمد موسى]

براك البتجيبو لي روحك اسه في زول بحضر تلفزيون السودان خليو طبيخ مابنعرفو
انا شخصيا اعتزلته التلفزيون كله
"قالو لما تجي تحضر تلفزيون السودان تحضر حبوب ضغط قبل ماتقعد فيو"

و الله يا آلاء نصيحة كاربة لأى زول ما بيايخ زيى كدى !!

تحياتى

[بدرالدين أحمد موسى]

العزيز .. اللذيذ
بدر الدين


غايتو كان ختّيت روحك في محل مقارنة مع تلفزون السودان
معناتو تلفزيونّا بيستاهل نشوفو على الأقل خمسة ساعات في اليوم



النصيحة لي الله .. عَصَرتْ على روحك شديييييييييد

مشكور يا شيخ أحمد .. أصلو أنا كنت منتظر لى برنامج مواعيدو ما معروفة .. قالوا اليوم داك كان فى لقاء جماهيرى .. !!

تحياتى

[بدرالدين أحمد موسى]

بخت التلفزيون كسب مشاهد
انا لو محلهم بديك المشاهد المثالى
ده انت قاعد ليه بمزاج

و الجائزة يا محجوب تمشى تستلمها من مبنى التلفزيون .. و هناك يودك ورقة تمشى لى الجهة مقدمة الجائزة يقولوا ليك الورقة مامختومة .. ترجع تختمها يقولوا ليك الموظف العندو الختم عندو مناسبة فى الشمالية .. تجيهم بعد أسبوع .. يختموا ليك .. ترجع لى ناس الجائزة .. يقولوا ليك انتهى الزمن و الطيارة سافرت .. لكن نعوضك بى سكراتش !!

تحياتى

[بدرالدين أحمد موسى]

الحبيب والمبدع دائما بدرالدين احمد موسى قناه السودان اقصد(بيت البكاء) مافي زول بفتحها في السعوديه وبعدين انت لوعاوز تحضر طبق اليوم افتح قناه ابوظبي مع منال العالم المره دي خطيرررره خلاس(خطيره في الطبخ مافي حاجه تانيه خلي بالك من الحكومه المعاك)
ولو عاوز تحضر طبق يوم مضحك افتح قناه الفجيره فيها تجتوج السوداني يلا ياكتموتو(الرجال مابعروفو يطبخو اكل النسوان طاعم خلاس راجل شنو؟؟!!)
على قول كاتب صحفي سعودي قال قناه السودان كلها استراحات غنائيه وبرامجها غير هادفه واخبارها قديمه ازيلو الغبار عن هذه الشاشه...!!(الكلام خش الحوش)
ماتفتح بيت البكاء(قناه السودان) يابدر الدين

تحياتى يا مشتاق ..

أنا شلاقة ساى قلت أبل شوقى طالما فى إجازة .. وكان قايلهم بايخين كدى ما كنت قعدت !!

و تانى تحياتى