يا الضويت الحته الضلمة
فرهد نورك جوة الزحمة
من بينات الضي المرسل
لي اهداب الدنيا السمحة
تقعد جنبك كل جراح العمر الراحت
تفتق نجمة
تطلع تنزل تحت الغيمة
وتحت الغم الساكن عتمة
وانا باريتك
ضلك
فوق الحب الساكن حزنك
الا الضل من ضيك اضهب
وكت النور في جوفك اسطع
حتى ظلال الخوف في برقك تهجع
تنعس تحلم بي عافيتك
وبي ذريتك تملا مكان الشمس الشرقت منك
وانا باريتك من جواك
لي براك
تمسك فيني
جوة وريدي
دافق حبك
عشمك فيني
عشمك انت نور الشمس الغاقع هيلي
وضي البدر الفاتح جوة الغيمة
اسرج خيل البرق السابق نيلي
وانا باريتك ضلك
وضل الضو الفاتح فيني
وانا باريتك
ما استنيتك
تشرق عيدي
انا سالمتك فوق الطيف السابق ايدي
وبيني وبينك وبين الدنيا
انا حبيتك
انا صاحبتك انت خليلي
الا الزمن البفرق
بين الضل ما بينك
انا قدرتو وكت باريتك
زي الوقت البفصل بين القمر الابيض
وبين الشمس السكنت بيتك
زي ما بيني وبينك
انت الاصل الضو العمة
وانت القمر البدر التمة
وانت النجم البشرق جمة
وانت الشمس الاصل العمة
وانا باريتك ضلك
من جواك
رد مع اقتباس
المفضلات