النتائج 1 إلى 24 من 24

الموضوع: يُمة حموني الإجازي...

     
  1. #1
    عضو مجتهد
    Array الصورة الرمزية طارق جبريل
    تاريخ التسجيل
    Sep 2009
    المشاركات
    101

    يُمة حموني الإجازي...

    يمة قوليلم انا ماني حاريلي شي..
    قوليلم انا مشتهي اصليلي ركعتين عند قبرك..
    يمة داير اقعد واتفرجخ عند راسك واحكيلك حالي وحال وليداتي..
    يمة داير اسألك ان بقيتي شفتي خالتي زينب..
    الرسول يمة قوليلا طارق مشتهي القعدي جنبك في تُكُل ود الكرسني...
    قوليلا مشتهي مناداتك للنعام فشان يشيل (التُرمي) يودها عند الحاج في الديوان..
    قوليلا طارق مشتهي ياكل معاكي حرف أليل قراصي بي ملاحا اخدر في التُكُل التالا دكان العوضابي..
    يمة الرسول إن شفتي ستنور بت ابو دية تقوليلا طارق غلبوا الصبر وداير يقعد معاكي في خور السواعير في شبا وتحكيلو عن التمر والنعاج ألات جدو..
    يمة ان قابلتك حبوبتي نفيسي قوليلا ولدك جبيرين غلبوا المشي ضُمة ضُمة وكل ما اشيل التليفون واضربلو يقولي: طارق يا ولدي انا انتهيت ما كفاك ترجع
    يمة الصاج أليلك كبسو الصدأ... وحاتك من فوتي مافي زولا ولع فيهو واقود..
    يمة قُفَافِك ألات القمح والمريق عشعش فيهن العنكبوت.. وكرارتك مرميي في مخزن جبيرين..
    يمة أم النصر ماتت والطاقة المن تالاها مافي زولا تاني مدة راسو منها..
    يمة الحمام المعشعش في صفايح الزيت الفوق المخزن كَبَر زغاليلو وطار خلاهن..
    يمة التمُر كله بقى صيص والكان سمح فيهو رقابو انقصن..
    يمة بيوت ود ابو دية اتهدمن والأرضي أكلت المُروق ألتو وتُكل الفردوس بت الريح معشعش فيهو الزرازير وبقى مليان كُدُندي..
    يمة الجَر أليلي حق البركاوي التالا بت موزة انكسر ومافي زولا تاني ملاهو لي..
    يمة المنقايي ألت الكوشتنير الفي القيفي ماتت وقطعوها..
    يمة مشتهيلي لِبِيني مَقَنَني من مراح نورة مرت عمي الطيب..
    يمة نفسي أندلا لااااتحت عند بير ود جبارة وألعب (أول حَوَل) بعد بُطان القرونة..
    يمة وليداتي كبروا هني لاضاقولم هرود لا شافولم مِشْرِق...
    يمة اشتهيت أقالد إبراهيم اخوي وابكي وادمع لامن أبِل جلابيتو..
    يمة لطفي كل ما يضربلي يسألني: إنت أصلك داير تجي متين..
    يمة طلحة في قفاي بقيت مشدوه لاني عارف أمشيلو وأسألو من وليداتو
    لاني كمان قادر أصبر علي بُعادو..
    يمة اعتماد عرست لي ولدها وصادا السكري وأنا بي هني مكتول في شوقها..
    يمة سلمى بت عفاف الكانت من حجرك آآبتنزل بقت كبيري وفضلها عام تتخرج من جامعة الخرطوم...
    يمة أواب هُول سهير أختي كبر ضُمة ضُمة وداخل علي الجامعي..

    يمة وحات الله أنا فِتِر..

  2.  
  3. #2
    عضو فضي
    Array الصورة الرمزية zahid
    تاريخ التسجيل
    Jun 2009
    المشاركات
    1,026

    رائع ياطارق ...موضوع مؤثر جداً جداً .

  4.  
  5. #3
    عضو ماسي
    Array
    تاريخ التسجيل
    May 2009
    المشاركات
    6,855

    والله دموعني جرت يادكتور بالغت شديد ....
    ماكافك تعال ان شاء الله احضر حش التمر ولا شوف "الدفيق" ...

    لو أعيش زول ليهو قيمة أسعد الناس بوجودي
    زي نضارة غصن طيب كل يوم يخضر عودي
    وأبقي زولآ ليهو قيمة
    وأبقي زولآ ليهو قيمة
  6.  
  7. #4
    عضو فضي
    Array الصورة الرمزية محب
    تاريخ التسجيل
    Mar 2006
    الدولة
    ودمدني / حي المدنيين
    المشاركات
    1,244

    تسلم يدك اخوي

  8.  
  9. #5
    عضو مجتهد
    Array الصورة الرمزية طارق جبريل
    تاريخ التسجيل
    Sep 2009
    المشاركات
    101

    اقتباس المشاركة الأصلية كتبت بواسطة zahid مشاهدة المشاركة
    رائع ياطارق ...موضوع مؤثر جداً جداً .
    زاهد كيفنك ابوي

  10.  
  11. #6
    عضو مجتهد
    Array الصورة الرمزية طارق جبريل
    تاريخ التسجيل
    Sep 2009
    المشاركات
    101

    اقتباس المشاركة الأصلية كتبت بواسطة بت مارنجان مشاهدة المشاركة
    والله دموعني جرت يادكتور بالغت شديد ....
    ماكافك تعال ان شاء الله احضر حش التمر ولا شوف "الدفيق" ...
    ابو يدوني الاجازي يا بت اهلي الحنان

  12.  
  13. #7
    عضو مجتهد
    Array الصورة الرمزية طارق جبريل
    تاريخ التسجيل
    Sep 2009
    المشاركات
    101

    اقتباس المشاركة الأصلية كتبت بواسطة محب مشاهدة المشاركة
    تسلم يدك اخوي
    تسلم يا حبيبنا

  14.  
  15. #8
    عضو ماسي
    Array الصورة الرمزية مايسة
    تاريخ التسجيل
    May 2009
    المشاركات
    7,300

    لا نستطيع ان نقول شئ يا دكتور طارق

    غير

    ارجعك الله الي اهلك سالما غانما - وربنا يرد غربة الكل ويسهلها عليهم

    سبحان الله وبحمده سبحان الله العظيم
    *************************************

    لك الرحمة والمغفرة تيسير وعوّض الله شبابك الجنة
    --------------------------------------------------

    لا تحاول أن تعيد حساب الأمس وما خسرت فيه ...
    فالعمر حين تسقط أوراقه لن تعود مرة أخرى......
    ولكن مع كل ربيع جديد سوف تنبت أوراق أخرى...
    فأنظر إلى تلك الأوراق التي تغطي وجهه السماء ...
    ودعك مما سقط على الأرض فقد صارت جزء منها ...
  16.  
  17. #9
    عضو فضي
    Array الصورة الرمزية النويري
    تاريخ التسجيل
    Oct 2004
    الدولة
    مايو أربعين ـ قريب من البحر شديد
    المشاركات
    1,704

    كثيراً ما كانت هذه اللكنة واللهجة من شمال السودان لها تأثيرها وسحرها حيث أنها تجمع بين الحنية والأدب الجم وذلك يرجع إلى طبيعة المنطقة وطبيعة الناس الذين يقطنونها فهم في حياة إجتماعية مترابطة بسيطة كلها مسرة وحب وتراحم وهذه المدرسة التي خرجت حميد والقائمة تطول تأثرنا بما كتبوه وأستمتعنا بكل ما هو كائن في إنسان الشمال

    شكراً كثيراً طارق على هذه الكلمات ورد الله غربتك وغربتنا جميعاً وجمعنا بأهلنا وأحبائنا ورحم الله أمك رحمة واسعة وأدخلها الجنة مع الصديقين والشهداء وحسن أولائك رفيقاً


    لحن الختام : على من أراد أن يرجع للوطن فليحرق كل السفن حتى يقطع طريق العودة

    [SIGPIC][/SIGPIC]
  18.  
  19. #10
    عضو برونزي
    Array
    تاريخ التسجيل
    Feb 2005
    الدولة
    الزمالك
    المشاركات
    620

    حبيبنا الدكتور طارق نحمد الله علي شوفتك يااخوي ....... وذي ماقالوا من طول الغيبات جاب الغنائم والله الحال من بعضو يااخوي وربنا يرد غربتنا جميعا وربنا يرحم الوالدة رحمة واسعة ويتغمدها برحمته

    ابوريم
  20.  
  21. #11
    نائب المشرف العام
    Array
    تاريخ التسجيل
    Dec 2006
    المشاركات
    9,979

    غايتو يا أخوي غلبني أتم القراءة،
    والله يهون ليك وترجع، ونرجع نحن ياااارب في أحسن حال.


    علِّمي نفسك ما تندهشي

    صدِّقي كل الما معقول!!

    -----------------------

    سأبقى ماحييت بدار دنيا .. رفيقاً لا يخون ولا يجافي
    وأحفظ عهدكم في عمق قلبي .. ويروي ودكم نظم القوافي

    ويبقى دائماً هناك وإن (مرام) لتحقيقه.

    -----------------------------------------------

    اللهم اغفر لوالدي، وارحمهما وأطل في عمريهما يارب العالمين.

    -----------------------------------------------

    اللهم ارحمني برحمتك، واغفر لي يا مالك الغُفران،
    واجعل قبري روضة من رياضك، وأدخلني فسيح جناتك،
    يا رب العالمين.
  22.  
  23. #12
    عضو مجتهد
    Array الصورة الرمزية محمد النصيح
    تاريخ التسجيل
    Nov 2009
    الدولة
    قطر الدوحه
    المشاركات
    182

    الاخ طارق السلام عليكم
    والله دموعنا جرت ربنا اديك العافية جرستنا اصلنا متجرسين من الغربة وشقنا لي ست الحبايب

    ‎ يامدني ياعشقي الوحيد
    ياكل ماضينا
    التليد
    تاريخك اسطع من بعيد
    ياغنوه الشوق
  24.  
  25. #13
    عضو مميز
    Array الصورة الرمزية امال مالك
    تاريخ التسجيل
    Aug 2009
    الدولة
    -اركويت
    المشاركات
    360

    اخي الفاضل
    طارق جبرين
    لم اجد ما اكتبه امام كلماتك الر ائعة غير هذه الحروف
    يا وليدي اريتك تبقى انتا طيب وانا البي كلو هين زي ما قال فنانا النعام
    مالك يا وليدي مشلهت قلبي عليك شكيتك كترت الغربة خرابة ..
    كان للاهل طيبين لا تشفك على اعتماد والله طيبي وشديدي وكان لي السكري ما خلالو زول ما صادو ...
    وكان لي سلمى بت عفاف مشتاقالك وتسأل منك جنس سعال (سؤال )
    وكان لي الصاج من وصل جوابك نظفنا ومسحنا بحتت طايوقه اصلو قبل يومين ضبحنالنا عتيت
    الغنم والدات وشلنا الطايوق عشان العواسي ..
    وعسنالنا فيهو حريف قراصي اريته في خشمك وفي حشاك
    وفي المغيرب قننا اللبيني وشربنا الشاي في حوش ابوك ....
    والدميعات جرت والمصارين اتقطعت من كتر البكا
    والله يا وليدي مشتاىقين دوام والله طارنك نتذكر سلامك لينا تقالد فينا بالاحضان نونس لي اواخر الليل ...
    تشكيلنا عن الغربة وايامك سنين الغيبة والطولي ..
    تعال يــــــــا وليدي دايرنك حليلك يـــــــــا وليدي راجنك
    دوام ادينا لي الله مرفوعات ندعي ليك يحفظك انتا و وليداتك
    تعال يا وليدي نتشاوف قبل المولي يشيل امانتو .
    وان بقينا ما تشاوفنا اعفى مننا وعافين منك

    سلامي للوليدات وامن ....


    خـــــــــــــــــالتـــــــك / زيــــــــــــــــنب ......

    اذا كنت في حاجة مرسلا** فأرسل حكيما ولا توصيهِ
    وان ناصحا منك يوما دنــــا** فلا تنأ عنه ولا تقصـــــيهِ
    وانا باب امر عليك التــــوى** فشاور حكيما ولا تعصيهِ
  26.  
  27. #14
    فخر المنتديات
    Array الصورة الرمزية عثمان جلالة
    تاريخ التسجيل
    Jun 2007
    الدولة
    أم تريبات
    المشاركات
    3,822

    دكتورنا طارق .. فوق الوصف والله .. وربنا يلم الشمل .. نص ولا أروع

    بسم الله .... إبتديت متل البرق لاحت

    فى الشين والفسل بقينا نتباحت

    طال الكان قصير والعالى إتاحت

    والصولات حليلن ملكتن راحت

    *****************
    ومن يتهيب صعود الجبال ......... يعش أبد الدهر بين الحفر
  28.  
  29. #15
    عضو ماسي
    Array
    تاريخ التسجيل
    May 2009
    المشاركات
    6,855

    البوست دة مهدي لي "ابو مازن "

    لو أعيش زول ليهو قيمة أسعد الناس بوجودي
    زي نضارة غصن طيب كل يوم يخضر عودي
    وأبقي زولآ ليهو قيمة
    وأبقي زولآ ليهو قيمة
  30.  
  31. #16
    عضو جديد
    Array
    تاريخ التسجيل
    Jan 2010
    المشاركات
    87

    كلماتك لامست وتر حساسا نعاني منه احنا البعيدين عن الاهل ربنا يرد غربتك وغربتنا

  32.  
  33. #17
    عضو برونزي
    Array الصورة الرمزية telecom
    تاريخ التسجيل
    Aug 2009
    المشاركات
    800

    كل طائر مرتحل عبر البحر قاصد الاهل حملتو اشواقى الدفيقه
    رد الله غربتكم جميعا

    اللهم اغفر لى وارحمنى وعافنى وارزقنى
  34.  
  35. #18
    مشرف المنتدي العام
    Array الصورة الرمزية أحمد عمر ( MOODY )
    تاريخ التسجيل
    May 2009
    الدولة
    أبوظبي
    المشاركات
    3,309

    الرايع د. طارق ود جبرين

    بعد الكتبتو ده .. الحماك الإجازة
    ظنيتو بودهو النار


    تسلم يا معوّدِنا الروعة في كتاباتك
    تسلم يا الساكن فينا بنور كلماتك

    لم نولد شياطيناً .. ولا سنموت ملائكة
    نحن بشر و كلنا يخطئ .. وخير الخطّائين التوّابون

    سبحانك اللهم وبحمدك .. أشهد أن لا إله إلاّ أنت
    أستغفرك وأتوب إليك
  36.  
  37. #19
    مشرف منتدي النفاج
    Array الصورة الرمزية ابوالنور
    تاريخ التسجيل
    Sep 2006
    الدولة
    مدني
    المشاركات
    6,658

    لو أن البكاء يخرس ألمي
    لبكيت دماً يتساقط
    كالشرر
    لو أن الكتابة تجدي قلمي
    لنظمت درا ً مكتوبا ً بالعطر
    ود جبريل الراقي


    يا ربي انا وين
    sun shine
  38.  
  39. #20
    عضو فضي
    Array
    تاريخ التسجيل
    Aug 2009
    المشاركات
    1,228

    الكثيرين كتبوا عن هذه الغربة الفجيعة
    ولكن هذه الكتابة ياطارق من نوع آخر
    تجبر الدموع ان تنزل
    ردّ الله غربتك وغربة الجميع
    مشاققة :
    بس لو يبقي الوطن لسة فيهو باقي حضن ..

    انا وانت والدنيا الامان
  40.  
  41. #21
    عضو برونزي
    Array
    تاريخ التسجيل
    Aug 2007
    الدولة
    مدني - حي ودازرق
    المشاركات
    702

    والله يا طارق كلام اجمل من الجمال الله يديك العافية
    بس شايف الدعوات كلها بان يرد الله غربتنا ، دعا لي احدهم ان يرد غربتي ، قلت له مالك علي. داير تقفل بعض البيوت ولا شنو ،، ومما لا شك فيه ومع الجزم الاكيد ان الرزق على الله في كل مكان وكل زمان ولكن نحن زماننا الترحاااااال
    تحية عميقة لك

    ليالي لقانا جميلة
    كانت كانت يا سلام
  42.  
  43. #22
    عضو فضي
    Array الصورة الرمزية ودالعمدة
    تاريخ التسجيل
    Oct 2006
    الدولة
    من أرض المحنة
    المشاركات
    2,252

    رحمة الله تتنزل على أمنا بت أبودية
    وانا لله وانا اليه راجعون
    بس قبل مانرجع للوطن
    نتمنى رجوع الوطن فينا

    و انتمى إليكَ ......
    ياوطناً تفردَ بالجمالِ وبالبهاء
    ياأرضَ مهيرة وبنونة ......
    ياديوانَ الرجالِ وبيتَ العوينِ ....
    يامرتعَ الأطفالِ عندَ الرواكيبِ مساء
  44.  
  45. #23
    اللجنة الاستشارية
    Array
    تاريخ التسجيل
    Aug 2006
    الدولة
    ودمدني / بانت
    المشاركات
    1,705

    ربي يرحم أم طارق جبريل ..
    بإذنه تعالى أن تكون بين الصديقين والشهداء وحسن أولئك رفيقا في جنات النعيم

  46.  
  47. #24
    اللجنة الاستشارية
    Array
    تاريخ التسجيل
    Jul 2009
    الدولة
    الدرجة الأولي
    المشاركات
    3,426

    حنية وروعة مبالغة ..
    بس مدنيه ما تخش البوست ده الا بي مترجم ..

    لا تقف كثيرا عند أخطــــــاء ماضيك ..
    لأنها ستحيل حاضرك جحيمــا ومستقبلك حطامــا ..
    يكفيك منها وقفة اعتبـــار تعطيك دفعة جديــدة
    في طريــــق الحق والصواب ..

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
by boussaid