كلمات للبفكر يوم يسيبنا

[ابورجاء]

ما عارف لقيت نفسي بكتب وفجأة جات على بالي الاغنية دي
قلت ليه ما تكون اعلان للمحبة والألفة والترابط عشان مافي
زول يفكر يسيبنا في يوم من الايام
ويطلع مننا ونحن محتاجين ليهو
يطور معانا المنتدى ونكون منارة
بين الاهلة والنجوم..
انت مافي .
اي حاجة بتبقى مافي
الشمس تلقاها مافي
والبحر من غير مرافي
والمدن بتكون منافي
والحبيب يبقى جافي
العسل ما ببقى صافي
وانت مافي
انت مافي الروح تفارق
ويبقى موج النيل مفارق
الشروق ينسى المشارق
والنسيم لي الروض يشاهق
والصباح ما ببقى شارق
وانت مافي
انت مافي منو البسالم
ويبقى من الامو سالم
الزمن يصبح مظالم
والحنين يبقى ظالم
وتمسح الأحزان عوالم
تفتح الاحزان عوالم
وانت مافي
انت مافي الناس تغيب
والحبيب ينسى الحبيب
الدمع يصبح قريب
والطبيب ما ببقى طيب
كيف يكون في الدنيا طيب
وانت مافي
عشان كده ما تبقى مافي كل يوم طل علينا
لو بهمسة لو بلمسة او بكلمة من خلف
السكون او اي شئ المهم بس هنا تكون.
ودوما في رعاية الله وحفظه...
مع كل الود باقة ورد....

[امير عبدالباقي]

الاخ ابورجاء
مشكور علي الروعه دي يديك العافيه

[ود المطامير]

واللّة كلامك صاح واللّة فراقكم نار
حمرا , وطبعاً أخوك جربها .

[ابورجاء]

الغالي أمير ود عم عبدالباقي الحبيب
تسلم علي المرور وعلى السرور
وتلقى الحبور وتحلق حولك فراشات
الزهور لانك كلك نور..
ونتمنى اي واحد يفكر يسيبنا يشوف
دموعنا الكبيناها هنا ويغير رأيو لانو
بالجد زي المنتدى ده ما حيلقي لو لف
الشبكة العنكبوتيه دي كلها لانو فعلا
بيتنا الكبير وملجأنا وقت تضيق بينا
السبل في الغربة الصعبة دي..
ودوما في رعاية الله وحفظه...
مع كل الود باقة ورد...

[ابورجاء]

الغالي حبة الفؤاد ومنية النفس
حبيبنا ونور عيونا عمدتنا ود المطامير
تسلم يا الحبيب على مرورك الذي يشبه
النسيم على صفح الزهر في صباح خريفي
بديع كروعتك وجمال روحك .
يا اخوي ما تقوم تكتب لينا عن تجربتك القاسية
عند الهروب الى الغروب والحصل شنو
قدرت تنوم بالليل مرتاح ما مسكتك الاكولة
لمسك الفارة وخبيت الكيبورد والجري
والمساككه في دروب المنتدى مع الاحبة
والنجوم الخيرة والنيرة عليك الله كانت
كيف كلمنا .كلمني يا حلو العيون
كلمني والكاين يكون كلمني حاول حس بي
عاتبني وارم اللوم علي..
ودوما في رعاية الله وحفظه...
مع كل الود باقة ورد...

[وليد عمر سعيد]

تسلم حبيبنا ابو رجاء

وانشاء الله تاني ماف زول يسيبنا

[الفارس البنفسجي]

دا منو البقدر يسيب وطنو ؟؟؟؟؟؟ انا الآن منذ إشتراكي بالمنتدى تغير برنامجي كلو ... وبالي كلو اصل الكمبيوتر دا وافتح المنتدى ... المسألة بقت إدمااااااااااااااااااااااااااااااااااااااااااااان عديل

متشكرين يا أبورجاء على هذه اللفتة ودمت متدفقاً بالحنين

[ابورجاء]

الغالي ولي يا ود ابو قرط يا عزيز
تسلم على المرور الجميل كجمال روحك
وروعتك وبسمتك (التقول شفتو)
بس عندي سؤال ليك مالك مقبل لا ورا
ما يكون في زول زعلك والا حصل ليك
متل الحصل لي شبارقة الوليدات ديل
مالم ما عندهم خبرة في الحكاية دي والاشنو
انت رويساتكم ديل غطوهن بي خوزة عشان
الضربة ما تالمكم كويس خلاص كويس ..
ودوما في رعاية الله وحفظه..
مع كل الود باقةة ورد....

[ابورجاء]

الغالي الفارس البنفسجي يا روعة
تسلم يا حبيبنا على مرورك الجميل
وكلمات الراقيات وتعابيرك الروائع
واحساسك النبيل تجاه بيتنا الكبير
وكمبيوترك ختو تحت سريرك عشان
كل يوم تفتح عويناتك على الحديقة
الرونقة دي وكل الورود الموجوده فيها
بتزين ليك صدرك الصافي ونيتك السمحة.
تخريمة من الشاحنة القدام دي :ـ
حصانك الجديد وين لسه ما نزلتو السبق
خلينا نتشرف بيهو هنا عليك الله.
بعدين حكاية الادمااان دي ابعدنا منها معانا
جنابوهات هنا بيودونا في ستين داهية ...
ودوما في رعاية الله وحفظه...
مع كل الود باقة ورد..

[راسكال]

انت مافي الناس تغيب
والحبيب ينسى الحبيب
الدمع يصبح قريب
والطبيب ما ببقى طيب
كيف يكون في الدنيا طيب
وانت مافي


يسلمو يا ابو رجا

[سواااح]

الرائع ابو رجاء ..

ها هي تطل من دواخلك
كل كلمات الجمال
كل الالفة الصادقة
كلنا يرحل به الزمان يوما
وكلنا عشق القمر يوما
لكن كلنا
وان اختلفت اذواقنا
وتعددت اتجاهات المسير
فهناك عشق ابدي واحد ..
وانت ادري به .. " مدني "

دمـــــــــــــــــــــت ،،

[العابر الوفي]

الرائع ابو رجاء

تسلم والله يا رائع وصدقني فراقكم حار وانتو بالجد ما بتتخلو

[mnoma]

ينصـــر دينك ... والله مـــاقصرت معاي تب
من زمــــــان كنت بفتش علي القصيدة دي كاملة

وطبعاً كاتباها بالخط العريض في الكمبيوتر والنقال
.... انت مـــــــــافي ... أي حـــــاجة بتبقى مـــــافي

وتسلم ياذوق

[ابورجاء]

انت مافي الناس تغيب
والحبيب ينسى الحبيب
الدمع يصبح قريب
والطبيب ما ببقى طيب
كيف يكون في الدنيا طيب
وانت مافي


يسلمو يا ابو رجا

تسلم علي المرور الجميل جمال روحك الطيبة
وهكذا نحن دوما ألفة ومحبة وترابط وشوق
اليكم وتمسك بكم لانكم روحنا وعشقنا وسلوانا
عند المضائق والمحن وشدائد الغربة والشجن..
ودوما في رعاية الله وحفظه...
مع كل الود باقة ورد...

[ابورجاء]

الرائع سواااح
تسلم على المرور والكلمات الطيبات
انها فعلا ود مدني ارض المحنة
وقلب الجزيرة وقلب السودان النابض
بالخير والمحبة والابتسامة ...
ولك اهل مدني هم هكذا دوما طيبة
ومحنة وألفة ....
ودوما في رعاية الله وحفظه...
مع كل الود باقة ورد...

[ابورجاء]

الغالي الحبيب العابر الوفي
تسلم على مرورك الغير عابر
لكنه وفي ودوما كن هكذا وفيا
غير عابر ومار بل مشاركا وبانيا
لهذا الصرح الشامخ بكم ومني لك
كل التحايا العطرة والمشاعر السامية..
ودوما في رعاية الله وحفظه...
مع كل الود باقة ورد...

[ابورجاء]

ينصـــر دينك ... والله مـــاقصرت معاي تب
من زمــــــان كنت بفتش علي القصيدة دي كاملة

وطبعاً كاتباها بالخط العريض في الكمبيوتر والنقال
.... انت مـــــــــافي ... أي حـــــاجة بتبقى مـــــافي

وتسلم ياذوق

الغالي صاحب الاقتباس ده الحبيب
معليش غلبني اقرأ اسمك عشان انا ساقط
انجليزي مرتين المهم اسمك حلو لكن ما قدرت انطقو
خشمي وجعني من كتر ما نطقتو ..
وتسلم على مرورك الجميل كجمال روحة النبيلة
وانت الذوق منك بناخدو يا سليم الذوق والكل
حلو دوما هنا كن ولو ما شالتك الصفحات تعال
ادخل قوبنا واتحرك وخت رجل فوق رجل كمان
واطلب القهوة والشاي تلقى روحك في عيونا
موجود وبين الخلجات متوفر شوقك وحنينك...
ودوما في رعاية الله وحفظه...
مع كل الود باقة ورد....

[سواااح]

ابو رجاء ..

التوقيع بتاعك ده
يا كافي لا الولد بقيف
ولا النعامة بتتعب
كلااام يا دكااام

دمــــــــــــــت ،،

[ابورجاء]

ابو رجاء ..

التوقيع بتاعك ده
يا كافي لا الولد بقيف
ولا النعامة بتتعب
كلااام يا دكااام

دمــــــــــــــت ،،

الغالي سواااح الحبيب
يا اخوي الولد الجاري ده ما انا
والساكاني دي ام رجاء عشان يوم
لساني المتبري منو ده كان بيغني في
هييييييييي مغرزة راجل المره ده حلو حلا
ومن ديل وهي وراي وانا كابي الشتات.
يعني لوأنا وقفته الرماد كال حماد وكان
النعامة وقفت ياني المدبل حلونا يا عااالم.
ودوما في رعاية الله وحفظه...
مع كل الود باقة ورد...

[سواااح]

الغالي ابو رجاء ..

لكن يعني ما نفكر ندبل ولا شنو

دمــــــــــــــــــت ،،

[المسافر]

انت مافي
اي حاجة بتبقى مافي
الشمس تلقاها مافي

تسلم إيدك يا ابو رجاء ونفس الشعور وأكثر من محبة

[ابورجاء]

الغالي سواااح حبيبنا
ما مشكلة دبل لكن ما تغني جمب
الاولى يا حبيبي نحن اتلاقينا مره
في شعوري وفي خيالي الف مره
كده بتعتبرك عايز تتلت وده ما من مصلحتك
بتتسكه وانت شكلك كلك كرش وقصيروني الجري
ده ما حقي حقي المشنقة والمدفع اب سكلي
وووووووووووووووووووووووووووووب الحقونا
الجنا هجمنا..اها نبقي لي زي ده...
ودوما في رعاية الله وحفظه..
مع كل الود باقة ورد....

[ابورجاء]

انت مافي
اي حاجة بتبقى مافي
الشمس تلقاها مافي

تسلم إيدك يا ابو رجاء ونفس الشعور وأكثر من محبة

الغالي حبة التسالي وحبة العيون
انت مافي اي حاجة بتبقى مافي
والمراكب ما بتلقي المرافي وانت مافي
الحبيب يصبح مجافي وانت مافي
العسل ما بيكون اصلو صافي وانت مافي
يا المسافر اوعك يوم تبقى مافي ...
ودوما في رعاية الله وحفظه...
مع كل الود باقة ورد....