ضيف جديد لنج على الكرسي يلا نتعرف عليه

[aborawan]

ضيفنا الجديد ضيف من طراز خاص صاحب قلم ينقط عسلاً وصاحب احساس مرهف وله العديد من المشاركات الخاصة في المنتدى الثقافي فلك مني كل الود والتحية الغالي العزيز ضياء الدين احمد



يلا كا العادة تعريف كامل بالطاقة الشخصية ونتمني الكرسي يكون برداً وسلاماً عليك



حبي وودي لشخصك الغالي

[ضياء الدين احمد]

شكري وامتناني للاخ ابوروان علي هذه التقدمه
وارجو ان أفلح في الجلوس على هذا الكرسي ذو المناخ الاستوائي

الاسم : ضياء الدين أحمد وداعه
السكن : الدرجه
تاريخ الميلاد: صغير وجاهل 1972
المراحل التعليميه :
الابتدائي الدرجه
المتوسط الدرجه
الثانوي مدني الثانويه
الجامعه : كلية ودمدني الاهليه ادارة أعمال وجامعة الجزيره كلية التربيه قسم اللغة الانجليزيه درست لمدة عام وانقطعت عنها لظروف خاصه ( كنت ادرس في الاثنين معا في آن واحد)
اقيم الان في مدينة ابوظبي

[ابومرام]

اخي ضياء الدين لك التحية واتمنى ان يكون الكرسي بردا وسلام
وانا شايف الناس اليومين دي شكلها مشغولها شوية عموما تنمنى ليك اقامة سعيدة 0
اولا كل الاسئلة احب ان اتركها في ثاني مشاركة ومابعدها ولكن لدى سؤال صغيروووووووووووون 0
ماهو وجه الشبة ما بين الدرجة وابو ظبي من الناحية الثقافية والابداعية وترابط الافراد على وجه الخصوص 0 ولينا لقاء انشاء لله لو ربنا مده في الايام

[ضياء الدين احمد]

اولا مشكور يا ابو مرام
بس جد السؤال غريب شويه يعني انت خليت السودان وخليت مدني وعاوز وجه الشبه بين الدرجه وابوظبي لكن انا برضو حا اجوابك احتمال اكون بس في المسأله بتاعت النظام والتخطيط يعني بصراحه في احياء ممكن تعتبر ارقى من الدرجه لكن مافي حي في مدني مخطط ومنظم زيها ابسط شئ اي بيت بتلقى قدامو في شارع والكلام ده في الخرطوم امكن اكون في حي او اتنين بس
اما الناحيه الثقافيه عموما ابوظبي افضل من السودان من ناحية الامكانيات او المواعين الثقافيه اما من ناحية التعاطي مع الثقافه فالسودان قد يتفوق علي كل الدول العربيه ونحن نتلمس ذلك من خلال الجاليات المختلفه التي لاتعرف حتى اعظم ادبائها وشعرائها.
وانا في انتظارك مرة اخرى اخي ابو مرام

[بابكر]

وين الصوره ياضياءالدين وبعدين الاسئله

[ضياء الدين احمد]

حتصل انشاء الله اخي بابكر
خلي بالك انت عاوز تبني سؤالك علي حسب الصوره ههههههههه

[أبوبكرحامد]

وين الصوره ياضياءالدين وبعدين الاسئله

[rasheed]

العزيز ضياء الدين ،، لك مني كل الود والشوق مع أنو نسيت صورتك عشان كده لازم الصورة عشان نرجع لوراء ،، طبعاً سؤالي واضح من عنوانو 00 عاوز أعرف ذكرياتك عن الطلائع وبعض الذين تعرفهم ،، وتاني عاوز أقول ياخي إنت درجاوي من الدرجة الدارجة - سوري الأولى - يعني إبتدائي ومتوسط وثانوي وكمان الجامعة يعني مراحلك التعليمية كلها زي الصحون في صينية الغداء بالله عاوزين ذكريات دافوري الدرجة بتاع ناس محيسي وناس مردة والنقر ود0 سفيان خضر وأولاد سلمان وهلم جرا ،، وما تزعل مننا لأني مشتاق أسمع عنك كتير ،،

[ضياء الدين احمد]

شنو ياابوبكر حاكيها كده ماقلنا كويس

**** اخونا رشيد خليك ظريف سؤال واحد كفايه معقوله عشره اسئله
ذكريات الطلائع كانت جميله جدا وخصوصا كان تدريبنا في المدرسه الجنوبيه
وكان بدربنا واحد اسمو جمعه واول ماندخل بالعصر تسمع الاناشيد الوطنيه بصوت الفنان الراحل عثمان الشفيع ( وطن النجوم ) والعطبراوي ( انا سوداني )
ولحدي الان قدر ما اغنوهم بتذكر الطلائع
اما مراحلي التعليميه كلها في الدرجه لحدي الثانوي الاهليه حي المطار
اما الدافوري فنحنا بالفريق الجنب الليثي ميدان الجمهوريه ناس معاويه صديق فارس وعمر فارس والساحر( المريخ) ومحمد طه ومحمد تنقا وياسر عريس واخوي الحوت وعثمان محمود ( الشديد) الاهلي وبجي علينا من المزاد الجديد جهاد الطاهر اما ناس مرده احيانا بجونا وبنمش ليهم بعدين انا صغير يارشيد ناس مرده ديل لو قالوا بسم الله بلدوني براحه
واخيرا لك ودي رشيد ونتمني حقيقة انو الواحد الاقيك واتونس معاك لانك شكلك حبوبه في الونسه

[al zeer]

السلام عليكم
الاخ العزيز العزيز ضياء الدين ،، لكى منى كل الود و الاحترام
يعنى انت كنت قدامنا فى مدنى الثانويه كان فى زمنا صلاح كيمياء و قرفه و معهد ابن حيان و ابن خلدون و الاستاز و ايام الشهادة اليومين ديل مدوره و الواحد بقارن ايام الشهاده و المزاكره و شباب الزمن ده ما علينا
قول لينا موقف ظريف من مدنى السانويه
و زكريات الشهاده السودانيه

[ضياء الدين احمد]

الاخ العزيز الزير مشكور علي الطله
اولا انا كنت آخر دفعه تمتحن بنظام البوكسن وبعدها اتغير النظام وياحليل عمرو بن كلثوم و( كراي ذا بلفد كنتري)
ومن المواقف الظريفه انو كنت بقلد في استاذ عادل بتاع التاريخ وهو واقف في الشباك وانا ماشايفو وناس الفصل اضحكو وانا مفتكر ضحكهم علي التقليد ولمان شفتو عايز ارجع مكاني قال لي علي الطلاق تكمل العولاق البتعمل فيهو ده ‘ وتسلم يا مهلهل

[ابو المهتــدي]

بسم الله الرحمن الرحيم
الحبيب ضياء لك التحية 0 وين الصورة مطلب الاخوه 0 انت داير تصور في استديو الشواف ولا شنو 00 ماازال الطلب قائم 00

[أبوبكرحامد]

حبيبنا ضياء ................ مازلنا فى انتظار الصورة لى تساؤل عن الظرف النفسى والمكانى والزمانى الذى تنظم فيه قصائدك وهل يستلزم ذلك توافر عناصر محددة ؟؟ وبمن تأثرت فى تجربتك الشعرية؟؟؟وماذا أضاف الشعر الحر للقصيدة وماذا انتقص منها ؟؟

[ابومرام]

اخونا ضياء مرحبا بيك ثانيا وثالثا لكن وين الصورة طال الانتظار يظهر انها صارت غالية شوية مامشكلة المقابل ليها روحنا وياريت تشرفنا بالحضور وستلم الواحد بتمنى يشوفك حتى يربط مابين الشكل والحديث ياريت ما تحرمنا ولك التحية لمان نشوفك

[ضياء الدين احمد]

شكري ازجيه للاخ ابو المهتدى
والله الصوره ياجماعه اسالوا منها حمدتو لانو شالها مني وماعارف ليه اتأخر

**** الاخ ابوبكر ردا على سؤالك فانا من وجهة نظري ان القصيده يمكن ان تولد في كل المناخات وانا دائما ما اقول انها تأتي مثل الموت حيث لاتخبرك عن زمانها ولامكانها وكثيرا ما كتبت قصائد وانا في الدافوري واخرى في شارع الجمهوريه والدنيا حر وسخانه وانا ضد المقوله التي تقول ان الشعر يحتاج لمكان جميل وجو رائع وكم مرت علي مثل هذه الاجواء ولم اخرج منها ببيت شعر واحد فالشعر حاله وتجربه وموقف والشعر حمي بمجرد ان كتبته ذهبت عنك فالكتابه شأنها شأن المكمّدات.
وقد تأثرت بالشاعر الدبلوماسي محمد المكي ابراهيم والاستاذ الشاعر الذي اوده كثيرا مصطفى سند وايضا قرأت كثيرا للشاعر الناضل محمود درويش اما عن سؤالك الاخير فانا لا ارى ان الشعر الحر قد انتقص شيئا من القصيده اللهم الا للذين تستهويهم القافيه بل قد اضاف اليها الكثير فهو يتيح لك امكانيات كبيره للتعبير دون التقيد بقالب يحصر افكارك في نطاق معين
اما عن مسألة القافيه فهو يعوضها بجرس موسيقي هائل للالفاظ اذا كانت لك المقدره في استخدام ادواتك التعبيريه بصورة جيده وايضا يتيح لك عملية الاختزال الشعري حيث لا يستقيم تماما مع الشعر الفصيح
واخيرا اخي ابوبكر كل هذه الاجابات تمثل رؤيتي الخاصه

[ضياء الدين احمد]

الصوره ما تغلي عليكم يا حبيبنا ابومرام واشكرك جزيل الشكر علي رسالتك الشفيفه وقد ملئت حبورا بها واكون ممتنا ايضا ان اضفت ايميلي لديك
فقليلا جدا ما يجد المرء الاشخاص الرائعون
widaa72@hotmail.com

[نيازى كشك]

استازى ضياء الدين
لكل الود كلة ولك الايام الحلوة
لك حبى وامنياتى بدوام الصحة والعافية
واتمنى لك عودا حميدا واقامة سعيدة اينما كنت

ممكن اسال فى الفترة التى درست فيها فى مدرسة مدنى الثانوية
من كان المدير فى زلك الوقت وبالمناسبة حتى انا درست مدنى الثانوية

وايام الدراسة الدراسة بكلية مدنى الاهلية هل درس معك واحد يدعى راشد عبد المتعال من اولاد دار ام بلال صراحة هو الزى طلب منى اسالك هذا السؤال

وعندى اهلة فى الدرجة فتحى الدسوقى كشك ومجموعة من اسرة ال كشك


مع تحياتى

[ضياء الدين احمد]

مشكور يا اعز صديق ‘في مدني كان مديري فضل السيد ثم استاذ مامون بتاع الاوبل (نادي الاهلي) ودرس معاي السني صالح دشين وهو قريب الكشكاب
اما راشد فبلغه تحياتي فهو كان الدفعه القدامي في الاهليه
اما ناس فيصل وفتحي ورياض ونجيب فهم جيران قريبين جدا لينا وعلاقتنا معاهم علاقة زي الاهل وربنا ارحم الوالدة حياة وعمنا الدسوقي طبعا وفاته ما حضرتها ‘ ومعانا هنا في ابوظبي الاخ وليد كشك وكثيرا ما يزورنا
لك التحيه نيازي ولكل الكشكاب فهم عائله معروفه وكبيره سوى من ناحية العدد او الاصل

[مهيرة]

عزيزنا ضياء الدين

مرحب بيك وأنت تتقبل إستفسارات أهلك الطيبين !

ماذا يعني لك صوت القطار وعلامة ( قف ) في السكة حديد وأنت ذاهب للسوق آتي من الدرجة ؟

ماذا تعني لك ( الطاحونة 00 وهل أنت مشارك في أعمال المنزل ) ؟

هؤلاء في كلمات :

كبري حنتوب
جامعة الجزيرة
غابة أمبارونا
سوق الملجة
بركات

السوريبة 00 أم سنط 00 في أي الاتجاهات تقع من مدني اذا وضعنا قي الاعتبار أنهما امتداد للمدينة ؟

مذا تقول للأخ أبو روان وهذا البوست الرائع باستضافة الأعضاء ليتم التعارف بين الجمبع ؟

مع شكري


أختك مهيرة

[HAMADTO]

بسم الله الرحمن الرحيم
السلام عليكم ورحمة الله تعالى وبركاته
يا ضياء الدين شايف الناس مصرين شديد على شوفتك عشان كده متأخر في تنزيل صورتك ...... ياشباب صورة ضياء الدين معاي وانشاء الله بكره ترقبوا المفاجأة واستعدوا للصوره .....
ضياء الدين : أشياء من الذاكره .. حدثنا عن منتدى كنار

[ضياء الدين احمد]

الاخت العزيزه مهيره اكان ما من الدرجه كان عملتي شنو معقوله تهريني كده يابت فريقنا بالاسئله؟
للاحقاق صوت القطار دائما ما يزكرني بالدمازين وانا في الرابعه من العمر حينما كان الوالد موظف حيكومه وكان ينقل من مكان لآخر لذا ارتبط القطار عندي بمدينة الدمازين اكثر / اما الطاحونه فهي تعني لي الخير الوفير فقد كانت لجدي وداعة الله رحمه الله في مربع 11 طاحونه وكانت شهيره بطاحونة عبد المنعم كما ان للطحين رائحه جميله بس الشئ الكنت بكرهو حكاية ( ياولد امشي دقق) / اما اعمال المنزل فأنا شخص كسوووووووووول للغاية واكره ملي التلاجه والازيار وسقاية الشجر ودائما ما اترك فرشتي عند الصبح اما غرفتي فقد اسمتها الوالده ( اوضة المجانين) نسبه لبشتنتها
** كبري حنتوب يذكرني بجامعة الجزيره
** جامعة الجزيره مناره للتعليم واصدقاء كثر وذكريات لاتنسى
** ام بارونه دخلتها في حياتي مرة واحده وذلك قبل 21 عاما وكانت هي المتنزه الوحيد لسان مدني
*** الملجه من العام 96 حتي 2001 كنت المكلف باحضار الخضروات ومنهاحقيقة تعلمت كيف افاصل في الشراء مع البائع
*** بركات دائما ماتذكرني بصديقي الرائع والشاعر محمد برعي ( الاديب)
ولك ودي اخت مهيره

[ضياء الدين احمد]

اها ياحمدتو براك شفت العصر ده في الصوره التقول صورة نانسي عجرم
اها اشبعوا بيها يا ناس ..................................

[ابراهيم]

الأخ الفاضل ضياء الدين

سلام من الحنايا وشوق يجل عن الوصف

من مميزات كرسي اخونا ابوروان انه بيعرفنا اكتر علي ناس نفسنا نعمق معرفتنا بيهم ...

أحييك وانت في الكرسي ... الباااااااااااااااارد اقصد الساخن

انا غياتو ما عندي اسئلة جاهزة ودي حاجات كدا مشاتر على الطائر لغاية ما الاسئلة تجهز ... بعد الصورة

1/ شباب السودان اليوم ما هي الاشياء التي يفتقدونها وبالمقابل ما الذي يمتلكونه دون شباب العالم من حيث المناشط والحركة والسكون؟

2/اذا ملكت مال قارون مصباح علاء الدين تري الي اين تتجه وماذا ستفعل بكل منهما؟

3/المرأة

اليوم ..والامس ..منو فيهم اجمل ..من حيث المعنى

4/ أكلة مفضلة تحبها كثيراً (غير كبدة الابل)

ولك تحياتي ومودتي اخى ضياء ولنا عودة إن شاء الله

[ابومرام]

اخي ضياء لك التحية وانت تتحمل كل الهتافات بعودة الصورة عموما قول ليهم اتيه اتيه انشاء الله بس انا خايف على الناس ما يغمى عليها عارفه شينة بتشبهني كدا عموما خلينا نشوفها معاي سؤال صغير؟؟؟؟؟ اذا اعتبرنا الغاية والهدف من فكرة قيام منتدى ودمدني قد تكون اقل الافكار من اجل ربط اجيال ودمدني ببعضها البعض في الداخل والخارج والتعرف على كل ثقافات وجوانب المدنية ( نبده صغرية ) ؟ وجهه نظرك ماهو الشي الذي تحقق وماهو الشي الذي ترجوة في المستقبل وان كانت لك رسالة ان توجهها للجميع من ادري ومسئولين وكل جهات الاختصاص نرجو عبرك ان تعكس كل الجوانب ولك التحة !

[ضياء الدين احمد]

مشكور كتير حبيبنا ابراهيم
*** شباب السودان تنقصهم الامكانيات المهوله التي يتمتع بها غيرهم وتنقصهم الحريه الحريه بمعناها الفضفاض الحريه التي يتمتع فيها الفرد بمناخ سياسي وديموقراطي معافي اذا توافرت هذه العناصر فنحن بصدق سنكون خير امة اخرجت للناس
*** اذا ملكت مال قارون ربما اطغي واتجبر وربما ابني المدارس والمشافي واساعد في اعمال البر وانا اجبت بهاتين الاجابتين لأن ايماني لم يُختبر بعد
والمال الكثير فتنه يحتاج الي رجل صالح بدرجه كبيره جدا ورجل ورع كامل الايمان وانا بعيد جدا من ذالك لذا اسأل الستر وكفى
*** دون تحرج اقول المراه بالامس كانت افضل من نواحي اذ يتوافر فيها الصدق والسلوك القويم والعفه وهذا ليس معناها ان المراه اليوم منحله انما آخذ بالاغلبيه وفي كل جيل نجد الصالح والطالح اما فتاة اليوم فنجد هنالك نوع من الفهم العالي والوعي والمعرفه الجيده بامور الدين ونجد في نفس جيلهم اخريات مبتذلات لا يقمن وزنا للمجتمع ولا للاعراف والتقاليد والموضوع في هذا طويل جدا يا ابراهيم
*** اما اكلتي المفضله فانا احب البطاطس بالقيمه والنعيميه الملايقه بالدقيق مش بالويكه ( ياود هاشم خلي الدكتوره تعملها ليك)