بسم الله الرحمن الرحيم
يوميات سائق أمجاد
عبدالغني خلف الله
) 1 )
أصبحنا وأصبح الملك لله ..خلاص راحت علينا ..الشارع كلو حافلات ورقشات أشكال وألوان ..والناس من شدة الفلس بطلت تركب مشاوير لذلك قلت سيبك يا بوي من الجنصصه وافتعال الأهميه وخليك مع بقية خلق الله واشتغل ( طرحه ) ..لازم يعني مشوار يا بلاش ؟ .. شوف ليك كم ساعه طالع نازل زي كلب الرماضه ولا واحد عبّرك بطلب ..عملت حركات المجانين إياها ..زي ما بعملوا مساعدين الحافلات ..ومعناها أني ماشي الخرطوم ..اشروا لي إتنين بنفس الحركات وقفت ..ركبوا ومن قولة تيت شبكوها رطانه ..ما تفهم غير ( والله ) مره مره بينات الكلام ..اشروا لي إتنين تانين و (سمير ماشي ) ..أربعه ركاب يطلّعوا حق الغاز براحه ..جماعتك برضوا شبكوها رطانه وما تفهم غير ( آ .. يا شيخ ) ) مره مره بينات الكلام مشيت شويه أشر لي خواجه والناقصه كملت ..ركب معاي بالمقعد الأمامي ..( سلامو أليكم ..ممكن كرتوم ؟ ) ..قلت ليهو مرحب بيك .. ثانك يو ..كرتوم ييس ..جماعتك الورا يتراطنو وأنا أدقش بالإنقليزي مع الخواجه والخواجه مصمم اتكلم بالعربي ..الزول الوحيد البتكلم عربي داخل الأمجاد .. سألني عن الخرطوم ليه سموها الخرطوم .. حاولت أفهموا المقرن والأليفانت توقيزر .. والرطانه مسخنه في المقاعد الخلفيه ..واحد فيهم طلب مني أقيف عشان ينزل في نص الكوبري بنتره قويه ..أقيف يا معلم ..قلت ليك أقيف ..وقفت ..أخوه اترجاه يركب مره تاني وأنو الموضوع بسيط لكن زولك فرتق ..وصلنا السوق العربي نزل الفرده ..وكذلك الخواجه أخدت حقي من الرطاني بالرغم من كونو سوداني و رفضت آخد من الخواجه ..عقدة الخواجه ما مخليانا .. فأصر ود جون ياخد مني صوره مع عربيتي .. العاجبو شنو في الأمجاد ما عارف .. يجوز اللون التركوازي ..لون عيون الخواجات ..مش الفنان قال لا بخاف ولا بتر قدام أبعينينن خدر ..أكيد بقصد الخواجات لأنو كل عيون السودانيين عسليه واللون أسمر .. والطول سته أقدام وتمانيه بوصات وتاريخ الميلاد واحد واحد والمهنه عامل تربية مواشي ..الجماعه الاتنين قالوا لي اتصور بسرعه خلصنا عاوزنك في مشوار ..الخواجه أخد لي عشرين صوره وآخر فرفشه وانبساط .. من حقك يا عمي .. لا عندكم عطاله ولا بطاله ولا ملاريات كهربتكم 24 ساعه والمويه بالهبل ..أكلكم بالشوكه والسكين وشرابكم كلو فتامين ونحن لينا الله وعيشة السوق ..قلت للخواجه ( قودباي ماي فرند ) قال لي مع السلامه يا سوداني يا طيب ..أها يا أخوانا علي وين كان الله أراد الخير قالوا لي انت أمشي بس بنوريك السكه وما بنختلف في المشوار ..اتخارجت من السوق العربي ياالله وآمين وما نسيت أدردش وأنا ماشي مع( بريش ) بتاع الحركه والله زول ظريف خلاص مخفف علينا زحمة أبو جنزير ..مشينا ومشينا وأخيراً الواطه مغربت ..وقفنا صلينا المغرب مع جماعه في الشارع .. ناس الدكان حلفوا أصلي بيهم لكن ربك رب الخير جاب واحد هيبه كده وقف عربيتو وكان متوضي ..صلي بينا صلاه صاح ..الحمد لله ما اتقدمت واستعجلت في الصلاه ..شايف جماعتي مستعجلين بلحيل ..ما براهم .. زمن كلو استعجال في استعجال لو غفلت ثانيه تجيك عربيه ليها خاويه تجلي منك بسنتميتر ..الحاصل شنو ما عارف ..الناس دي لاحقه شنو ؟!..وصلنا عياده خصوصيه..أدوني مبلغ محترم وقالوا لي لو سمحت نقابل الدكتور ده ونجيك عشان ترجعنا وخلي الشنطه دي معاك لغاية ما نرجع .. انتظرت وانتظرت الساعه جات عشره وحداشر أخيراً اتحركت لأقرب نقطة شرطه عشان اسلم الشنطه إياها ..لما فتحناها وجدنا فيها مبلغ كبير من المال وشوية ملابس ..لكن لحسن الحظ لقينا بطاقه وناس البوليس قالوا لي حنعلن في الجرايد وعندك عشره في الميه تعمل ليها زي مليون ونص ..بعد يومين رجعت الشرطه لقيت واحد من أسياد الشنطه واقف ..سألتو عن الحصل شنو قال لي نمرتنا كانت تلاته وخمسين ولما قابلنا الدكتور قرر لأخوي عمليه مستعجله .. رجعنا عشان نجيب القروش لقيناك مافي ..بصراحه ظنينا فيك ظن بطال ..لكنك طلعت زول ود حلال ..بعد المليون ونص نفحني بخمسمية ألف ..البوليس قال لي ..إنت يا معلم نور الدين أي زول يمسكك شنطه توافق ليهو طوالي .. هسه كان
الشنطه دي كان فيها مخدرات بتتصرف كيف ؟ .. قلت ليهو ما في مشكله .. لكن بيني وبينك الشرطه عندها حق .. مفروض أي زول بتاع أمجاد .. ركشه أو دكان مفروض يعمل حسابو ..لكن أتنين مليون حلوين وما ساهلين في الزمن العلينا ده ..يا ما أنت كريم يا رب .
رد مع اقتباس
المشاركة الأصلية كتبت بواسطة عبدالغني خلف الله
المفضلات