يوميات ذوي احتياجات خاصة

[آلاء عبد الرحمن]

تختلف الاسامي
ونلتقي في الاخر
ذوي احتياجات زوي اعاقة سواء كانت حركية او سمعية او بصرية او ذهنية فالكل يلتقي عند نفس النقاط ونفس الهموم
محاولة لطرح يوميات يعايشها كل فرد من افراد ذوي الاعاقة
تحمل في طياتها
هموم
ومشاكل
وآلام يعايشها الكثير

وزي مابقولو اسأل مجرب ولا تسال طبيب
من خلال التعامل مع مختلف ذوي الاعاقة وماالاقية سوف احاول عكس بعض الاشياء

الموضوع ليس له علاقة بالاشراف او باسم الاتحاد
من شخصي فقط

[مولانا جلال]

شكرا الاء وبعكس هذه المواقف تجعلينا نعائش هذه الشريحه المهمة ونحس ببعض همومها ، وبدورنا نحكى

[مولانا جلال]

من احرج المواقف التى مرت على مع هذه الشريحة وكلما اتذكرها احس بالندم والالم ، واذكر حينها ونحن فى الجامعة والرابطة تقيم كورس سنوى لطلاب الاساس واول حصة لى بالفصل وقف احد الطلبة وهو يرفع احد رجليه المعوقة على الكنبة ولم انتبه لااعاقته وكل تفكيرى كان فى فرض الانضباط فصرخت فيه بان يقف اولا بصوره كويسه وبعد داك يسال فما كان منه الا ان اشار لى الى رجله المعوقه والله فى تلك اللحظه تمنيت ان تنشق الارض وتبتلعنى ولكن اصبح هذا الموقف درس لى

[آلاء عبد الرحمن]

تسلم يامولانا

مرات من غير قصد ممكن نجرح ونضايق
بس في النهاية الزول بتعلم

[آلاء عبد الرحمن]

في راسي في حاجتين مرتبطين ببعض
فهم الناس عن الايام الثقافية او الترفيهية
ونفسية ذوي الاحتياجات وخاصة في بداية تعاملهم مع اعاقتهم

[آلاء عبد الرحمن]

الحاجات كلها مرتبطة مع بعض فاعزوروني اذا حصلت لخبطة وجوطة

[آلاء عبد الرحمن]

في موضوع نفسيلت زوي الاحتياجات
امس بالصدفة لقيت برنامج مستضيف واحدة حضرت وعملت بحث عن الدعم لمرضي السرطان وهي نفسها كان عندها عشان كده فكرت بالموضوع
ولقت الناس محتاجة دعم نفسي ومعنوي من الناس

نفس الموضوع لزوي الاحتياجات وبالذات اذا الاعاقة جات فيما بعد يعني بعد عاش فترة بدون اعاقة فبتبقي صعبة يتاقلم مع الوضع وكيف نظرت المجتمع حتكون ليو ومستقبلو حيكون كيف وحيقدر يعيش باقي حياتو عادي وله كيف

بتزكر مرة كان في ندوة وطالبنا انو يكون في باحثة اجتماعة اوشئ من هذا القبيل في الاتحاد فتعجبكم الجرجرة وانتو مفروض تكتبو لي ناس الرعاية ومنها للصحة ويحلك
اها
لما يكون في اجتماع ويوم ثقافي وكده الناس بتتلمة وبتحس انو عادي ولو في زول نفسياتو شوية تعبانة الناس بترفعها ليو وهو بقدر يحكي اكتر من برة

[آلاء عبد الرحمن]

انحنا فين وهمه فين؟؟

[آلاء عبد الرحمن]

بتزكر مرة كان في سمنارت بواسطة الاتحادات كلها ذوي اعاقة حركية الصم والبكم والمكفوفين

ومن ضمن الحاجات الكانت انوتعامل المجتمع عموما ونظرت الاهل بالذات كيف

زكرو حاجات الزول مابتخيلة

في كمية مابعترفو بانو عندهم حد ذوي احتياجات خاصة ومن ضمن القصص انو في اسرة ونظام هاي كلاس وعندهم فرد من اصحاب الاعاقات فكانو بختوهو في قفص بتاع الكلاب لو جاهم حد عشان مايتعرف انو في فرد كده
وبرضو المكفوفين قالو كانوبحنسو في اسرة عشان عندهم واحده مكفوفة وهم صدوهم وقالو ماعندهم حد كده

سبحان الله اذا كان في اسر كده كيف الناس تتعامل معاها
وده كلو جاي من نظرة المجتمع وتعامل وفهم المجتمع
وانا شخصيا اقتنعته انو زي مابقول القلم مابزيل بلم لانو مواقفي "هم 2 " كانو من اشخاص متعلمين والمفروض فاهمين

لمتين حيكون الفهم بالشكل ده
ومتين المجتمع يغير النظرة الغريبة دي
وفي النهاية الزول بقول لو بس ادونا حقوقنا مااكتر حنتقدم

[mohd saeed magazoub]

اكيد ذوي الإحتياجات الخاصة هم الأقوى وليس الأضعف كما يراهم البعض

فهم يحيطون بنا ونشعر بالفخر في مصاحبتهم والتفكر في جمال أرواحهم

متابعين ...

[آلاء عبد الرحمن]

اكيد ذوي الإحتياجات الخاصة هم الأقوى وليس الأضعف كما يراهم البعض

فهم يحيطون بنا ونشعر بالفخر في مصاحبتهم والتفكر في جمال أرواحهم

متابعين ...

تسلم علي المرور استاذ محمد

[آلاء عبد الرحمن]

عايز تعمل حاجة في بلدنا دي
يايكون عندك واسطة
ياروحك تطلع
ياتقنع وتسيبه
طبعا في دي بنشترك كلنا
المشكلنا انحنا تكون عايز تعتمد علي نفسك يعكسوها عليك
طبعا من ضمن الحاجات في اجهزه جايانا من برة
فقلنا بما انو المفروض نتعفي من الجمارك كاتحاد قلنا ومالو نجرب
وهاك ياجرجرة الكلام ده ليو مااقل من شهرين اظن
وفي النهاية قالو وزارة المالية لسه ماوقعت اتفاقية السنة دي
ياربي انحنا في شهر كم والاتفاقية دي كل سنة يوقعوها وبتتوقع متيني اربي انا شاكة يوقعوها السنه الجاية

[ريمون]

الويه .. متابعين ..

[آلاء عبد الرحمن]

الويه .. متابعين ..

نورتي الحته ياريمون

[آلاء عبد الرحمن]

بمناسبة عايز تعمل حاجة
اها يوم اختي عايزة تطلع البطاقة الشخصية
فقلنا بالمرة انا اطلع كمان
من الصباح مشينا محل البطاقات
المهم سبحان الله ربنا سخر لينا واحد كده منهم ولا بنعرفو
امشو واعملو كده وسو كده وحتي الحاج كان طلع يجيب ورقة نسيناها
زولنا ده قام قال لي ياخ انتي المفروض تتعفي من الرسوم مامفروض تدفعي امشي خشي للمدير يصدقها ليك
قلته مالو ياجماعه النجرب
مشيت علي المدير
عاين في الورق كده
قام قال لي المفروض تجيبي لينا ورقة من الاتحاد
ويهز في راسو واعمل شنو ومااعمل شنو
قلته لي اعمل البريحك انا اساسا ماجاية علي اساس اتعفي
"ده بعد حرق لي روحي وطلع بعرف ابوي واها شغال لسة بهناك وقالو جاو سكري وبقي الموضوع شخصي واحساس انتي لو دفعتي مابيفرق"
في النهاية مااتكلم شخبط في الورق
طلعته قالو لي ماصدق ليك ادفعي دفعت ومشيت
اول شي طيب ليه مايعتمدو البطاقة بتاعت الاتحاد وليه امشي اجيب ورقة مالبطاقة دي زاته طالعة من الاتحاد وله هو بس امشي وتعال
ياجماعة طيب انا بقدر اتحرك ومامشكلة
لو جاك زول ومقعد اها تاني ترجعو الاتحاد عشان ورق
مالمفروض انت تريحو بدل تعزبو امشي وتعال هو طلعتو من البيت مابساهل عشان تجي تمشورو
طبعا في تعليق تاني بس مافي داعي ليو لانو انا مقتنعة انو في ناس كده ربنا يهديهم بس ومايستخدمو نفوزهم في حاجات زي دي

[بنت الرفاعي]

الله المستعان به.

متابعين عزيزتنا آلاء.

[آلاء عبد الرحمن]

الله المستعان به.

متابعين عزيزتنا آلاء.

منورة الحته كلها
دعواتك

[آلاء عبد الرحمن]

قبل فترة حضرتة ورشة وقعده مع الناس
المشاكل شنو والحاصل شنو
لاقيت واحدة مكفوفة كانت مصرة علي انو ذو الاحتياجات كلهم يتعلمو
ولما قعدته معاها عرفته انو هي اتولدت مكفوفة وقرت الاساس والثانوي وحلمها وامله في الدنيا تتم تعليمه بس القروش والاحتياجات وقفت في طريقة!!!!!!!
سبحان الله الناس بتحلم ببيت بعربية
ودي حلمها تتم تعليمه
مين يسمع ومين يشوف
طال انتظارنا ليوم بكرة

[آلاء عبد الرحمن]

طولته

بس مامعناها مشاكلنا وقضايانا اتحلت

مشاغل الدنيا تنسى الهموم مرات

[آلاء عبد الرحمن]

عايز تعمل حاجة في بلدنا دي
يايكون عندك واسطة
ياروحك تطلع
ياتقنع وتسيبه
طبعا في دي بنشترك كلنا
المشكلنا انحنا تكون عايز تعتمد علي نفسك يعكسوها عليك
طبعا من ضمن الحاجات في اجهزه جايانا من برة
فقلنا بما انو المفروض نتعفي من الجمارك كاتحاد قلنا ومالو نجرب
وهاك ياجرجرة الكلام ده ليو مااقل من شهرين اظن
وفي النهاية قالو وزارة المالية لسه ماوقعت اتفاقية السنة دي
ياربي انحنا في شهر كم والاتفاقية دي كل سنة يوقعوها وبتتوقع متيني اربي انا شاكة يوقعوها السنه الجاية

الحاجات طلعت بعد سنة

وناقصة

وفي حاجات غريبة

بث نقول نحن فى السودان

[بت النعمة]

عزيزتي آلاء
ذوي الإحتياجات الخاصة للأسف مامقبولين أبدا ودا واقع بصراحة نحنا بنعيشه كمعاقين
والمعاق مرفوض وفي كتير من المواقف بتمر علي الزول بتثبت ليه الكلام دا ونادرين جدا من يتقبلوه
بتمني المجتمع يتفهم ويوعي لأنه المعاق وبغض النظر عن نوع اعاقته هو قادر علي أن يعتمد علي نفسه في اي شئ
وممكن يساعد الأصحاء (يعتمد عليه) ..

[آلاء عبد الرحمن]

عزيزتي آلاء
ذوي الإحتياجات الخاصة للأسف مامقبولين أبدا ودا واقع بصراحة نحنا بنعيشه كمعاقين
والمعاق مرفوض وفي كتير من المواقف بتمر علي الزول بتثبت ليه الكلام دا ونادرين جدا من يتقبلوه
بتمني المجتمع يتفهم ويوعي لأنه المعاق وبغض النظر عن نوع اعاقته هو قادر علي أن يعتمد علي نفسه في اي شئ
وممكن يساعد الأصحاء (يعتمد عليه) ..

مافى زول بحس بالشئ الا يمر بيو


ومابنتمني حد يمر بالمرينا بيو

[بت النعمة]

مافى زول بحس بالشئ الا يمر بيو


ومابنتمني حد يمر بالمرينا بيو

أكيد يا ألوية بنتمني العافيه لكل الناس

[آلاء عبد الرحمن]

أكيد يا ألوية بنتمني العافيه لكل الناس

يديك معاي نعكس بعض مايمسنا





نتمنى الصحة والعافية للجميع

[بت النعمة]

قبل فترة حضرتة ورشة وقعده مع الناس
المشاكل شنو والحاصل شنو
لاقيت واحدة مكفوفة كانت مصرة علي انو ذو الاحتياجات كلهم يتعلمو
ولما قعدته معاها عرفته انو هي اتولدت مكفوفة وقرت الاساس والثانوي وحلمها وامله في الدنيا تتم تعليمه بس القروش والاحتياجات وقفت في طريقة!!!!!!!
سبحان الله الناس بتحلم ببيت بعربية
ودي حلمها تتم تعليمه
مين يسمع ومين يشوف
طال انتظارنا ليوم بكرة

الآن يا الوية جنب مدرسة أبوزيد مقر المكفوفين في حفرة كبيرة يعني الواحد يطلع اول مايلف عشان يمشي بشارع التراب كم خطوه يلقاها( والغريبة ناس المحلية ممكن يبنوا طوابق في شهرين وحاجات تانيه خليها ساي..) وطبعا ممكن الناس تشوفا عادية ممكن تنطها وانتهي الامر