محطة الانطلاق : مدينة الدمام
زمن الانطلاق : السادسة مساء
المحطة الاولى في الرحلة :-
مخرج (( 5 )) لف يمين بعدين يمين في شمال وشمال في شمال زح من الحفرة خش يمين وتاني يمين شايف الفولفو (( طبعا ده ياسر ابوريلان بوصف لي في البيت بالتلفون )) الشهادة لله انا الفولفو شفتها بس ما قدرت اعرف وين مصدر الصوت البجيني وبقول لي اخيرا يا ابوروان وبعد تعب شديد فكرتا اعاين لي تحت شوية اشوف الصوت ده يمكن يكون نابع من جوف الارض وفعلا فوجئت بانو مصدر الصوت كان من ياسر ابوريلان لانو طلع ربع متر ومن الصعب رؤيته بالعين المجردة طبعا االشعور لا يوصف وانت تلتقى باخ وصديق عزيز لاول مرة من تاريخ التعارف وحقيقة قضيت معه ومع اسرته وقت جميل جدا لا يمكن ان تصفه الحروف ولا الكلمات فلك التحية ايها العزيز الغالي
المحطة الثانية في الرحلة :-
المرة دي ما كان فيها وصف ولا حاجة لانو كان معاي اخوي ياسر ابوريلان والاسرة (( بماانو زوول اتجاه واحد في الرياض لكن الحمد لله وصلنا للبيت عدل والبركة في انو كان بعرف البيت J )) ووصلنا لبيت عمنا الغالي ابوشوارب واستمتعنا جدا بالحديث والجلسه التي تخللتها بعض التعليقات الطريفة حول المنتدى الذي نشكر له هذا التعارف الذي تم فيه وكانت تخلل الجلسه بعض الاتصالات من بعض الاعضاء في المنتدى مما زاد للجلسة متعتها وكان ختام الجلسه عشوة كاااااربة من يدين الخالة ام شوارب سلمت يداها والتحية من هنا للعم ابوشوارب وكل الاسرة
المحطة الثالثة في الرحلة :-
يمين يسار اتعدى الاشارة بجيك الدوار شقو النص اخد يمين من الاشارة يسار بتجيك محطة اخد يمين وتاني يمين بتلقاني واقف هناك (( طبعا ده امير عبدالباقي بوصف في البيت )) ومشيت حسب الوصف لما وصلت المكان الهو منتظرني فيه بقيت اعاين في رؤوس الناس عشان اشوف العلامة المميزة
امير طبعا الشخصية الوحيدة من المنتدى الانا شفتها قبل كده ومشيت معاهو على البيت واستمتعنا جدا بحديثنا وتقريباً 99% من ونستنا كانت عن المنتدى وعلاقات المنتدى
بعد اتعشينا وضربنا الكوارع تسلم لينا يدينك يا ام ريان اخدنا لينا نومة كاربة في بيت امير الله يديه العافية وله مني كل التحية له ولاسرته الكريمة .
المحطة الرابعة في الرحلة :-
اها شايف طريق الميناء بس تعال لي هناك (( ده خالد هاشم طبعا )) ووصلنا ليه وسلمنا عليه بس الحر كان مطلع روحنا مع رطوبة جدة الغريبة دي طبعا الراجل كان منتظر باخرة اخوهو جاي من السودان بعد سلمنا عليه استاذناهو عشان نمشي لانو مشوارينا في جدة كتيرة وعايزين نخلص منها سريع لكن الراجل حلف طلاق الا نتغدى معاهو قلنا خلاص خير وبكره نمشي نقابل الريس وبعدها نشوف موضوع الغداء وبعدو شتات انشاء الله .
المهم مشى معاي ابو هاشم وطبعا بحكم اني ما بعرف حاجة في جدة ركبتا مع خالد هاشم وماشاء الله الراجل ما قصر معاي فسحة تمام ما خلا ليه شارع في جدة ما وراني ليه وانا مبسوط في الاخر اكتشفتا انو اخونا كان رايح وما عارفين مقر عمل بكري وين غايتو بعد روحنا طلعت وصلنا وقبلها كان في تنسيق مع الاخ عماد الصادق على اساس كلنا نتقابل في مكتب بكري الريس وفعلا تم اللقاء وكان لقاء جميل جدا .
بعد كده مشينا بيت خالد هاشم للغداء وضربنا الغداء من يدين الدكتورة تسلم اليدين وكانت جلسه لطيفة جدا
في طريق العودة الا ديار الغالية ام روان قررت زيارة الصديق ابومرام وقد قمت بالاتصال عليه لكن لم اجد رداً على مكالمتي ويبدو انو الراجل كان نايم لانو الوقت كان متاخر جدا جدا وانشاء الله نقدر نشوفو في القريب العاجل باذن الله اذا الله مد في العمر
ودائما اللحظات الجميلة لا تدوم وحان وقت الشتات وحان وقت الرجعة لكن الواحد كان مشحون بكمية من الافراح بي شوفة كل الحبايب ديل في رحلة لا استطيع ان اسميها الا باسم رحلة عمر لانها فعلا كان رحلة ولا في الاحلام
لكم احبائي جميعاً كل التحايا والحب والاحترام
رد مع اقتباس
المفضلات