[align=justify]يوصف الرجل عند أهل الشام (بالزلمة) . . و تعني بي لغتنا نحنا السودانيين (زول). . المؤنث منها (زولة) . . بإضافة تاء التأنيث لي كلمة (زول) . . و نحنا السودانيين الله يحفظنا و يغطي علينا . . من عامنا شفوت . . و نافخنها و قادنها . . لينا باع طويل في مسألة التذكير و التأنيث . . في لمحة بصر . . ممكن نحول (الزول) لي (زولة) . . بي مزاجنا . . و بي كيفنا . . و بدون أي تعب أو عناء . . كلها تأء صغيرونية . . نتشة نلصقها في نهاية الكلمة . . و يصبح (الزول) (زولة) . . و (الزولة) (زول) . . الحكاية دي ذكرتني بي الفنانة فلانة كباشي . . قالوا زمااااان كانت راجل . . راجل ليهو ضل . . أسمو (ود كباشي) . . كانت كلمتو زي السيف . . ما بترجع و ما بتتكسر . . و انقلب مرأة . . لكن أنا لسة ما لقيت لي دليل علي صدق الرواية . . عشان كدي اعتبرت كل الظيطة و الظمبريطة في (بت كباشي) دي . . عبارة عن كلام سودانيين . . على وزن كلام جرايد . . و كل البعرفو أنو (بت كباشي) دي هي (مرأة) . . و الدليل على صدق كلامي أنو بجيبوها في التلفزيون عياناً بياناً . . الناس دي تاني بتغالط و بتتفاصح فوق أم كم؟؟؟!!! . . السودانيين من عامن قاعدين لي كشف الحال . . كشفو حال (الزولة) المسيكينة . . شالو تاء التأنيث من كلمة (زولة) و خلوها (زول) . . و بقت كلمة (زول) قاعدة في الصقيعة . . بدون تاء تأنيث تستر حالها . . (و بت كباشي) راحت في حق الله و أخدت مقلب . . و قلبوها (راجل) علي صمت خشمها . . و بعد ما كانت (زولة) بقت (زول) . . وبقوا يقولوا ليها (بت كباشي) الراجل . . تستاهل هو الوداها تغني شنو؟؟؟ . . هسي كان قعدت في بطن بيتها و عاست و فركت ما كان أحسن ليها من نقة السودانيين ديل؟؟؟
نرجع تاني لي (الزلمة) . . و أخوانا (الزلمات) من العرب الشوام . . زمان كنت كلمة (الزلمة) دي مفتكر معناها . . أبو كوكة و الا أبو طرطور و الا أبو قمبور . . و كنت بحاول جاهداً عشان أشوف ليها مؤنث . . لكن المحيرني . . مؤنث (زلمة) شنو؟؟؟ . . هسي كان سألتكم . . (الزلمة) دي كان دايرين نأنثها . . نقول شنو؟؟؟ . . محن و الله!!! . . كان كدي نحنا السودانيين أحسن من الشوام . . كلمة (زلمة) ما بتستحمل تاء تأنيث زي كلمة (زول). . عشان فيها تاء جاهزة في النهاية . . و الشوام زااااتم مو متأكدين من أصل التاء التي تقبع في نهاية كلمة (زلمة) . . يا ربي تكون تاء تأنيث ذي حقتنا ؟؟؟ . . و الا هي تاء بتاعت شيتاً تاني!!! . . كل المتأكد منو و خابرو تماماً . . أنو (الزلمة) في لغة الشوام . . بتعني (راجل) . . و ما ليها مؤنث . . يعني كان كنت ماشي مع (الجو) بتاعك . . و جاكم واحد بي ضهركم و ناغمكم بي (يا زلمة) . . ما تنطط عيونك . . و ما تنخلع . . و ما تشك في (الجو) بتاعك انو عند دريبات . . أكيد يكون (الشامي) دا قاصدك انت(الراجل) مو قاصد (الجو) بتاعك . . لكن كان كنت ماشي تتقدل و تتبختر مع (الجو) بتاعك . . و مبسوط و تقرقر . . و انت مشروح الصدر . . و تحكي في بطولاتك و مغامراتك . . و جاكم واحد بي ضهركم و قال . . (يا زولة) . . أكيد ما حا يكون قاصدك أنت (الراجل) . . و أحسن حاجة تشيل برطوشك و تمسك (الجو) من الفاخورة و اقع فيها لبع.
بالنسبة لي . . كلمة (زلمة) دي قاعدة تذكرني بي كلمة (دلمة) السودانية . . الفرق بين كلمة (زلمة) و (دلمة) . . أنو الأولى بتعني في لغة الشوام (الراجل) . . و (الدلمة) في لغتنا نحن السودانيين بتعني معنى (دلاهة) . . أو (تُجم) . . أو (غتيت) . . أو (أبودماً تقيل) . . و بما أنوأهل الشام معروفين بدمائهم التقيلة . . مثلما نحن السودانيين مشهورين بالكسل المستفحل . . فقد قررت أن أجيد استخدام كلمة (دلمة السودانية) ضد هؤلاء (الزلمات الشوام) المفترين . . بقيت كل ما أشوف لي (شامي) يمشي الهوينى . . أسلم عليه و أنا رافعاً عقيرتي بلفظ السلام . . السلااااااام عليكم يا (دلمة) . . و أنا أكون في غاية السرور و الإنبساط . . للنيل من ذلك (الزلمة).
مديرنا (السوري) راجل عوير . . و إضنينو كبار . . و يستاهل أن يطلق عليه لفظ (دلمة) . . أنا كنت ماسك ليهو دفتر . . و حاسب ليهو أني لحدي الآن قلت ليهو يا (دلمة) تلاتة و تمنين مرة . . و هو ما جايب خبر . . المسيكين قايلني قاعد أقول ليهو (يا زلمة) . . و الحمد لله كان بحترمني شديد . . لكن أنا ناوي أقول ليهو (يا دلمة) ألف مرة . . عشان بعدين ألملم أصحابي و أعزمن عشاء احتفالاً بمناسبة هذه الألفية الدلمية . . أمس و بعد ما ألقيت السلام علي احد (البنانيين الزلمات) رامياً عليه لفظ (الدلمة الغليظ) . . رد علي . . ( و عليكم السلام يا زلمة) . . زعلت منو . . بعد ما كتل لي نشوة الفوز في يدي . . و قلت حسع كان لبعتو بي قالب طوب في نص ضهرو بحصل شنو؟؟؟ . . بس نعلت إبليس و قلت باخد حقي من غيرو . . و أكلت الموضوع في حناني.
أول يوم عمل لي في السعودية . . مشيت أعمل معاينة في محل شغلي الحالي . . دخلت المكتب . . لقيت واحد (زلمة) (فلسطيني) . . (الحالة الزلمية) ظاهرة في نخرتو الكبيرة دي . . أديتو أوراقي و شهاداتي . . عاين لي كويس . . و قعد يعاين لي هدومي . . بع شوية رفع التلفون . . و اتصل بي واحد(مصري) . . قال ليهو . . معاي (زلمة سوداني) هنا و بدي منك تعمل ليهو معاينة . . أنا زعلت . . و حسيتو زيل القال (معاي طرطور سوداني هنا) و الا (معاي سوداني عندو كوكة) . . و كنت داير أشيل أوراقي و أكسّح قبل ما يطق لي عرق . . و أروح في حق الله.
الانقليز كمان عندهم كلمة (ديليما Dilemma) . . يعني معضلة أو مشكلة . . أو بلية . . يعني في تشابه قريب في المعنى بي (دلمتنا) السودانية و (دلمة) الانقليز . . الإنقليز ديل شكلهم . . من زمان كانوا مستقصدننا نحنا السودانيين . . و ورثونا كلمة (دلمة) دي . . لنشر الشقاق و النفاق بيننا . . أنا خايف بكرة يعملوا لينا منها قضية سياسية . . و يركّبوا فينا خازوف بي سبب كلمة (الدلمة) دي . . باقي الانقليز ديل خازوقهم بودي في ستين داهية .
اللهم لا تجعلنا (دلمات) أو من أصحاب الدم التقيل . . اللهم أظهر حقيقة بت كباشي للكل حتى تخرس الألسنة . . اللهم أفتح الطريق واسعاً لعلماء اللغة لمعرفة مؤنث كلمة (زلمة) . . اللهم أزل الكسل عنا حتى لا يسخر منا العرب العاربة و المستعربة . . اللهم أجعلنا مسلمين لك و من زريتنا أمة مسلمة لك و نجنا من الزلمات . . الله أحلل عقدة من لساننا كي يفقهوا ماذا نعني بلفظ (الدلمة). الله صغّر خشيم مديرنا (السوري) . . الله أشغله في إضنينو . . اللهم رد كيد الانقليز إلى نحرهم . . اللهم أمسح كلمة (ديليما Dilemma) من قاموس اللغة الانقليزية . . آآآآآمين.[/align]
رد مع اقتباس
المفضلات