خصوصية مدني

[Azhari Abdien]

لست أنا الوحيد من مدني ولكني عندما أعلن ذلك الانتساب الي تلك المدينه في حالة تعارف عامه ( خارج السودان) لبعض الاخوة السودانيين الذين اتقابل معهم في مختلف المناسبات، تبدأ معي سلسله من ألأسئله الموجه وكأنني من كوكب اّخر منقلق علي أسراره . فتنهال عليك الاسئله التاليه وكأنك في مؤتمر صحفي.
أنت من مدني ذاتها؟
من وين في مدني؟
وينبري اّخر !
والله مدني دي عندي فيها ذكريات عمري مابنساها، لكن ماقلت لي لسه شارع النيل فيه الشجر الكبار داك؟ وجامع الحكومة لسع زي ماهو؟ سبحان اللة..!
ويأتيك صوت اّحر..
تعرف أنا زمان جيت لمدني دي في سيرة عرس من كوستي وبدل نرجع تاني يوم رجعنا بعد اسبوع زمن الدنيا بخيرها.. ويستطرد قائلاً . يأخي زي ناس مدني ديل أنا اصلي ماشفت.. طيبه وكرم وكأنك بتعرفهم من زمان!
وثالث مقاطعاً .. انت قلت لي.. انت من ودأزرق ذاتها؟ويستطرد... يأخي ودأزرق دي مش الحي الجنب السكه حديد أم أنا غلطان؟ غايتو أنا مره جيت مع جماعه لمناسبه كانت في الشارع الرئيسي لكن اسمه غايتو يشبه اسم منطقه علي جيهة بورسودان... ( شارع سنكات ).
واّخر يذكر بعض أسماء أهل الفن والرياضه.. يأخي وين حموري ؟وين الدحيش ؟وابو زعبل ؟ومدني الفنان؟ وابو التاج لاعب الأهلي، وسنطه وطارق بادي؟ ... أهلي +اتحاد + محمد الامين = ( مدني ) + ناس مدني = البيت بيتكم ومدني للجميع والجميع للسودان.وأقول للدنيا أنا سوداني....

أزهري الرجوبه - مدني - ودأزرق

[الجندي المجهول]

والله يا ابو الزهور ياها دي مدني ونفس البتتعرض ليهو دا اتعرضنا ليهو انحنا وان دل هذا انما يدل علي اصالة مدني وكرم ناسا الحنان اللطاف واديك الصحة والعافية يا ود ود ازرق يا احلي ناس

[خالد هاشم علي]

مليوووووووووووون مراحب بيك أخوي أزهري وبي مشاركاتك وماشاء الله بداية موفقة وفي الصميم... فعندما يكون الحديث عن مدني نصمت نحن وتتحدث هي.... من قلب الجزيرة ومن أرض المحنة بنقول للكل مرحب بيكم وحبابكم ألف

[نزار حسن محمد]

الاخ ازهرى الكاشف قال شنوه .. قال خليهم يقولو.. ذى ماناس بقولو حالت الجمعه يوما وحلو بركات مقيلو .. ولا ماكدى..

[مهيرة]

الأخ أزهري عابدين

والله موضوعك شيق للغاية

وفيه اعجاب في عيون الناس لمدينة الغيم

وغايتو انتو ياناس مدني ؟
ما سمعت بي دي ولا شنو

[nasirib]

اظنك يا ازهري انت اخو حيدر عابدين صاحب النكتة الحاضرة مش كدي
ومدني عشق وتفاخر وتباهي مدني وفاء مدني عطاء مدني انتماء
وانا من مدني صديق شخصي لحيدر والتقينا سوا ايام وفاة الوالدة رحمها الله

[أبوبكرحامد]

لمدنى ولإنسان مدنى مكانة خاصة لدى أهلنا بالسودان ، فالجميع يرى فى انسان مدنى عنوان للذوق والرقى وحلاوة الحديث والطرفة التى تميز مدينة مدنى بحكم التواصل الحميم بين ساكنيها .

[خالد عبدالماجد]

ربما يكون الحديث عن هذا الأمر من غير أهل مدني به التأكيد على صدق كلماتكم فالكلمات تقف عاجزة عن وصف سحر هذه المعشوقة .
منذ أن تخطو قدماك هذه الأرض الطيبة الوديعة بإناسها تتملكك كل أحاسيس الإنتشاء
فماتجده من أولئك النفر من وداعة وإلفة يجعلك تشعر بأنك عشت في هذا المكان سنيناً وهؤلاء النفر الفوك زماناً .....
مدني رائعة بإناسها رائعة بحبهم لبعضهم رائعة بتآلفهم وتواددهم ومزاحهم اللذيذ ....
لكم تمنيت أن أكون أبناً من أبناء هذه المدينة حتى أنعم بأفضل صحبة مع أحلى أناس ألتقيتهم يوماً ..
رغم أن الزمان وهبني سنيناً خمس عشتهم في ربوع مدني إلا أننى أطمع أن يهبني مثلهم ومثلهم ..
لكم وهبكم الله من نعم يااهل مدني أن اسكنكم هذه البقعة فتشكلت بكم وتشكلتم بها وصرت كما أحب أن أردد دائما ( صفوة أهالي السودان ) ........