ود المطامير ... ضيف ساخن على الكرسي الساخن

[مدنيّة]

ودالمتامير كما يحلو للبعض القول لك الف تحية وتقدير واهلا ومرحبا بك رافدا من روافد منتدانا.. عايز تقلب الحكومة قلتا لي .. طيب هاك شوية الاسئلة دي:-
1- نسبة للورث الاغترابي في العائلة اضافة الى البوكس الذي سبق ذكره في احدى بنطونات رفاعة .. هل من الممكن ان تعني ودالمطامير هذه انك تكنز الكثير من خيرات الاغتراب في مطامير .. اي انك استعرت استعارة مكنية كلمة مطمورة وانتا تعني بها بنكا او اي حوافظ استثمارية؟ وكم كنزت حتى الان؟
2- رغما عن الصفة الهزلية لانقلابكم المزعوم الذي احبطته قواتنا الباسلة .. الا ان هنالك سؤال يطرح نفسه .. ماهي الاشياء الايجابية التى يمكن ان تقوم بها لو -لاقدر الله ههههههههه- استلمت المنتدي لتحسينه؟
3- قلت تؤكلني وانتا تقصد تأكلني .. ودائما تقول اللة وانت تقصد الله .. لا اقصد ان احرجك بالغلطات الاملائية التى ارتكبتها فكلنا يرتكبها من حين الى آخر .. كما اننا علمنا ماهي علاقتك بالمدرسة سابقاً ههههههههه .. لكن السؤال ماهي افضل واسهل طريقة لمعرفة اذا كان الحرف اخر الكلمة ها ام تاء مربوطه؟ وكذلك بالنسبة للهمزة؟
4- تعلم ان الاخ/ حمدتو في صدد عمل تعديلات على مشرفي المنتديات .. اذكر خمسة من الاعضاء تعتقد انهم سيقدمون الافضل للمنتدي كمشرفين؟
5- تحليلا لموضوع غسيل العدة ايام الخميس والجمعة احسست انك تدخل الانترنت من العمل .. فهل انت مستعد لكي تدخل من مقهي انترنت؟ بصراحة اقصد هل انت مستعد لدفع المال يوميا للدخول لمنتديات ودمدني والمشاركة فيها؟ وكم مستعد انت تدفع يوميا لاجل هذا الغرض؟
6- ما سر جلسة ابوقرط تلك ؟ ولماذا لما تدعونا لحضورها؟ هل ستكون هنالك جلسات مستقبلا؟

ودالمطامير لقد اكتسبت محبة الجميع بجدارة اتمني لك المزيد وربنا يوفقك

والله يا ادمن انا فرحت بجيتك دي لود المتامير ياربي هو يكون كيف هسي تلقوه فقد الوعي والاسعاف شغال بصفارته والدربات ما تديك الدرب غايتو الله يقومك بالسلامة

مشاشقة ياقول ود امي
والله يا ادمن ماخليت لود المتامير دا حاجة وفي توريطات ظاااااااااهرة خصوصاً حتة الاشراف دي يكون ياربي ما رسل لحمدتو في الخاص

[magdi]

بصراحة ياود المطامير .... أجمل كرسي ساخن على المنتدي ...
وبعدين يازول مشكور على الصراحة دي (((( حسب إعتقادي مافي إنسان ممكن يفت حياته الخاصة بالصراحة دي وللملاْ عامة ولإناس لا يعرفهم من قبل سوى خلف شاشات الكمبيوتر .. على يقين تماماً بأن كل كلمة طلعت منك كانت صادقة جداً .ولا تخلو من الدبلوماسية .. وهذا يدل على معدنك الطيب والجميل كما عرف به أهل شرقنا الحبيب ... ))) وحقيقة أحببناك جميعاً ،،، وشخصياً أتمنى لك التوفيق في حياتك عامة ... وربنا يسترغربتك وغربتنا ... وغربة أخوانا كمان الفي المنتدي ... وتسلم ياغالي على هذه الصراحة .. والدعابة .. والجدية ... التي أتحفتنا بها.
وتشكر كثير جداً على رحابة صدرك وتحملك لهذا الكم الهائل من الأسئلة ((( الخاصة ، والعامة ، والمحرجة في بعض الأحيان )))
وأقترح على الـ admin - وعلى أخونا حمدتو / أن يتم ترشيحك لتولي أحد مشرفي المنتديات .

[ود المطامير]

ود المطامير .. مشاءالله عليك منور والكرسى اخر همبريب ... كدى النتعدل لك كويس..
عارفك زول صراحه ...
1/ كم كان ترتيبك فى مراحل الابتدائ والمتوسطه والعالى..
2/ عند حضورك لشارع اتجاه واحد بمدنى كنت بتكشر بشنوه بمعنى لابس جلابيه ولا عطلون
3/ اول حب فى حياتك .. اول رساله عاطفيه تصلك ...اول مقابله غراميه..اوصف شعورك
4/ ما هو الشى الذى احببته فى منتدى ودمدنى وماهو الشى الذى لم تحبه
5/ ماهو الفرق بين ابورجاء وشبارقه وتسنيم خالد..
بمشى وبجيك ...

مرحب بعمى ومن زمان أنا بقول مالو عمى نزار فاتح لى كدا ؟
1 .. ترتيبى فى الإبتدائى والله حلو شديد من الصف الأول لحد الصف السادس ما طلعت من الخمسة الأوائل إلا مرتين , مرة من الصف الثالث للرابع جيت الأربعين ومفروض أكون الرابع وكان خطأ مطبعى والتلاميز وصلونى بالهتاف لحد البيت , الأربعين كانت تانى الطيش وأمى لفحت توبها وعمى سيد الدكان شال عكازو ومشوا للمدير فى بيتو ولمّوا ليك فيهو
_ كيف الجنا دا يجى الأربعين ؟ وهو من أولى لتانية جا التالت ومن تانية لتالتة جا التانى وهسى من تالتة لرابعة كيفن إجى اللربعين آلمدير ؟
وبعد مراجعات تقيلة عرفو الغلط وين وقال ليهم خلاص لما تفتح المدرسة بنبقيهو الرابع ولكن بعد إية ؟ بعد ما أصحابى سيرونى لحد البيت .. الطيش منو ؟ إياهو دا .. وطيشنا إياهة دا ..
هذة الواقعة خلتنى أكرة المدرسة والمدرسين لحد آخر يوم لى فى الدراسة ومديرنا دا كان حاقر بينا فى الإجازات كل يوم يجى ميدان الكورة ويقطع لينا التمرين ويسوقنا البلدات ويدينا كل واحد (( ملود )) ويقول لينا يلا حشوا القش بين سرابات العيش وأخوك والله والله شغال جز فى أى حاجة خدرة قدامى قش ولأ عيش ولأ بامية قال الأربعين قال ..
فى المرحلة المتوسطة الترتيب برضو حلو بس النضمى حق الخواجات دا أبى كلو كلو يركب لى فى راسى يعنى اللنقليزى اللى عندى لو ملى ليهو فنجان قهوة يكون ماقصر ..
وفى المرحلة الثانوية العليا .. المستوى إدهور شوية عشان جابوا لينا ( الجكس ) لحد عندنا وأخوك (( ريّاد بالحيل )) وبقيت بزاكر فى السمحات نثر وشعر ودوبيت أدوبى ليك آعمّى نزار ؟
قلت كدى ؟ خلاص بعدين بعدين , , ودى إختصار لدنا المدارس ..
2 .. لمّا كنت بجى مدنى وبصراحة كنت طوالى بجى بالجلابية والسديرى والطاقية وأول ما ننزل فى موقفنا فى الشدرة الجمب الزاوية بتاعة مسرح الجزيرة ( مش إياهو ؟ ) طوالى بمشى الأكشاك وهاك يا مساككة بالعيون لى بنات عربنا من الحلال التانية , وأنتقل للمرحلة التانية بعد الفطور وين ؟ المستشفى وهناك برضو ( جكس ) العيانين بالكوم , والمرحلة التالتة والأخيرة الأسواق وبعد داك أقعد أتزكر أمى قالت لى دايرة شنو من مدنى وأشتريهو وأرجع الشرفة وأنوم من المغرب من فتر الحوامة ورا السمحات .. أها مرة كنت واقف جمب كارو قامت واحدة قالت لى
_ زح كاروك دى شوية عليك الله ومن اليوم داك بقيت أجى مدنى بالعنطلون والقميص ..
3 .. الشئ الذى أحببتة فى منتدى مدنى هو سماحة روح الجميع والمحبة فى الله بين الجميع
والشئ اللى لم يعجبنى بل ويضايقنى كمان هو ... فى بعض الحبايب تلقى الواحد منهم يردم فى اليوم الواحد أربعة أو خمسة مواضيع دفعة واحدة ومش كدا وبس تجده لا يرد على اللى يردون علية بل يجى بكرة بخمسة مواضيع جديدة وأعزرونى فى صراحتى لأن هذا طبعى ولحبى لكم .
4 .. الفرق بين أبو رجاء وشبارقة وتسنيم خالد , ولله يا عمى ضحكتنى جنس ضحك لمّا وقعت
عليك الله يا عمى الجاب ملاح أم تكشو مع الآيس كريم شنو ؟ شكيت محنك تلقى البنية جاتها صدمة ,, والجاب مشية كوشك كوشك والغبار ورا يلوى مع تنقش تنقش تنقش شنو؟ عليك الله يا عمى ( القمرية ) دى بقارنوها بالسمبر ؟
5 .. أها نجى لمسك الختام واللى خليتو آخر شئ مخصوص .
أول حب فى حياتى ...
بت جيرانا ( دا تخصصى ) وأخوك ساكن وسط حقل من الزهور .. جميلة جمال يفتل القلب من أول شوفة , رائعة روعة مدهشة ويازول سمحة سماح لما تشوفها تقعد تسبح سااااى ,, 17 سنة ودا برضو ( تخصصى ) مفرهدة يانعة تدير الأعناق أينما ذهبت ,, أوصفها ليك ؟ لشنو لا لا ؟ والمنافسة بين الشباب لنيل قلبها حامية الوطيس وهى فى برجها العالى بعيدة المنال وقلوب الشباب تحت تخفق ذى الفريخات لمّا أمهم تجيهم فى العش شايلة قبورة , وكان يوم .. جات بيتنا تحضر معانا المسلسل وحوشنا زحمة جد وأنا كنت كاتب ليها رسالة حب مدنكلة ومسبّكة تمام وعاينت ليها بطرف الباب حق الغرفة ووضعت لها الرسالة فى مكان معين وهى متابعانى بالعيون الواسعة ومشيت قعدت مع العطالة فى دكان عمى , لمّا إنتهى المسلسل وفاتو جيت راجع البيت وعلى الطول لمكان الرسالة ولقيتها شالتها واليوم داك مانمت وأتخيل وأتخيل وأتخيل خيالات جد , وفى الصباح كنت راقد وباب الغرفة فتح وأطل الوجه الملائكى الساحر وإبتسامتها الأخاذه تذوب القلب ورمت لى رسالة سبحان(( الله )) (( تلميزك آلعمدة .. الآدمن )) بس وقعت على صدرى ومعطراها بعطر لحد هسى ماسك فى خياشيمى , وقفلت الباب ومشت ومسكت الرسالة وأبيت أفتحها بعذب وأشوق فى نفسى ساااى وقرأتها والله العظيم قعدت أرجف ذى زول الملاريا وقريتها ألف مرة ومرة و.. كانت إنطلاقة لقصة حب عنيفة عاش أحداثها الكثيرين وفى يوم جا واحد مغترب وخمشها منى وخلى خشمى ملح ملح ولما جيت أتزوج سألت المدام هووووى مرتبطة ولأ أتقدم عشان ما أخلى لى زول خشمو ملح ملح أصلو مرارة الملح ضقناها ..

[ود المطامير]

أخونا الحبيب .. ودالمطامير

في البداية .. نقريك السلام
وبعدين بنسألك عن أحوال
العقاب ؟؟ ..
وعندي ليك شوية أسئلة لشخصك
** موقف طريف حدث لك مؤخراً ؟؟
** لحظة حزن بكيت فيها بحرقة ؟؟
** أنسب الأوقات وتجد فيها نفسك ؟؟
وغــــــــــــــــداً نعود

،،،

ود البطــــــــــانة

وعليكم السلام يا عزيز ويا غالى
1 ..فى سباق الخيل فى دبى وأنا ساكن بعد أبوظبى بأربعمية كيلو , واليوم داك شحت عربية صديقى كوريلا قديمة تمشى وتقحقح , وفى نص السباق البرد قرّصنى شديد وطلعت والعربات مرصوصة ذى الطوب اللخدر الضاربنو هسى , جيت مكان العربية ودورتها وكسحت وعلى مشارف مدينة أبوظبى وقفونى ناس شرطة المرور ووضعوا الكلبشات فى يدينى وقالوا لى العربية دى عليها بلاغ من ساعة من شرطة دبى إنها مسروقة والكبكبة حصلت وإتضح فى النهايه إنو أنا سُقت عربية سودانى بدل سيارتى تقول شنو عربات السودانيين هِنى بالعود بدوّر وعدّت على خير
2 .. بكيت بحرقة شديدة لمّا ضمتنى أمى بعد فراق دام ثمانية أعوام .
3 .. أنسب الأوقات واللى بلقى نفسى فيها هى يوم الخميس والجمعة والسبت يعنى مع الوليدات وأنسب وقت بحساب الزمن هو وقت العصر والشمس هادئة .
وتعال تانى سريع عليك الله ,
وفى أمان الله .

[ود المطامير]

ودالمتامير كما يحلو للبعض القول لك الف تحية وتقدير واهلا ومرحبا بك رافدا من روافد منتدانا.. عايز تقلب الحكومة قلتا لي .. طيب هاك شوية الاسئلة دي:-

1- نسبة للورث الاغترابي في العائلة اضافة الى البوكس الذي سبق ذكره في احدى بنطونات رفاعة .. هل من الممكن ان تعني ودالمطامير هذه انك تكنز الكثير من خيرات الاغتراب في مطامير .. اي انك استعرت استعارة مكنية كلمة مطمورة وانتا تعني بها بنكا او اي حوافظ استثمارية؟ وكم كنزت حتى الان؟
2- رغما عن الصفة الهزلية لانقلابكم المزعوم الذي احبطته قواتنا الباسلة .. الا ان هنالك سؤال يطرح نفسه .. ماهي الاشياء الايجابية التى يمكن ان تقوم بها لو -لاقدر الله ههههههههه- استلمت المنتدي لتحسينه؟
3- قلت تؤكلني وانتا تقصد تأكلني .. ودائما تقول اللة وانت تقصد الله .. لا اقصد ان احرجك بالغلطات الاملائية التى ارتكبتها فكلنا يرتكبها من حين الى آخر .. كما اننا علمنا ماهي علاقتك بالمدرسة سابقاً ههههههههه .. لكن السؤال ماهي افضل واسهل طريقة لمعرفة اذا كان الحرف اخر الكلمة ها ام تاء مربوطه؟ وكذلك بالنسبة للهمزة؟
4- تعلم ان الاخ/ حمدتو في صدد عمل تعديلات على مشرفي المنتديات .. اذكر خمسة من الاعضاء تعتقد انهم سيقدمون الافضل للمنتدي كمشرفين؟
5- تحليلا لموضوع غسيل العدة ايام الخميس والجمعة احسست انك تدخل الانترنت من العمل .. فهل انت مستعد لكي تدخل من مقهي انترنت؟ بصراحة اقصد هل انت مستعد لدفع المال يوميا للدخول لمنتديات ودمدني والمشاركة فيها؟ وكم مستعد انت تدفع يوميا لاجل هذا الغرض؟
6- ما سر جلسة ابوقرط تلك ؟ ولماذا لما تدعونا لحضورها؟ هل ستكون هنالك جلسات مستقبلا؟

ودالمطامير لقد اكتسبت محبة الجميع بجدارة اتمني لك المزيد وربنا يوفقك

عمدتنا زاتو فى بيتنا ؟ آنسوان المطامير وين الزغاريد ويا ود الشفيقان قوم على الزريبة وأضبح من طرف دا عمدة أبوك العمدة زاتو ,, ولأ أقول ليك أقيف إمكن تطلع دى الكاميرا الخفية والخرفان تروح إشت ,, ها زول حرّم إياهو زاتو أجر أجر وأقع الخرفان السمان ...
((والله )) ( تلميزك ) دا شرف عظيم لى وزيارتك لى وسام على صدرى أبد الدهر .. لك .. شكرى وتقديرى وإمتنانى الشديد .
1 _ تعرف يا ( عمدتنا ) أنا عاوز أألف كتاب فى حال السودانيين اللى معانا هِنى فى الإمارات , جيوبهم ذى غربال أمى النعيمة حق العيش , فى آخر الشهر تلقى الواحد مهموم كيف يغطى النقص فى الميزانية ( للديّانة ) علشان الراتب يوم واحد ببقى خروف وأكبر جزار ما بقدر يقطعو ويكومو قدر عدد الديّانة ,, وعن نفسى راتبى والحمد لله كامل الأوصاف ومع ذلك ما مليت حِفيرة كانت مقّيلة فيها جدادة ,,
2 ... لو لا قدر الله إستلمت المنتدى لتحسينة .. ح أعمل بمقولة سمعتها من الحبيب ( أبوروان ) وعجبتنى جداً وهى سياسة ( الواضح ما فاضح ) مثلاً أقول لود المطامير يا ود شرق الله البارد يرجى عدم تنزيل أكثر من موضوعين فى الإسبوع وبصراحة عمى ( نزار ) نشيط فى الحتة دى ولكن الحال فى حالة ويا (عمدتنا ) ود المطامير شن خبرو بالتحسينات فى المنتديات ؟ لوعندك حيطه واقعة بصلحها ولأ زريبة مشلّعة بساويها .
3 .. تعرف يا ( عمدتنا ) ؟ أنا كنت بكتب إسم الجلالة كدا .. اللة .. وفى أحد غرف ال paltak السودانية وأعوذ بالله من تلك الغرف .. نبهنى واحد لتصحيح كتابة إسم الجلاله وسجّيت فيها وغلبنى ولمّا هسى إنت زنقتنى بيها شلت الداهى دا ومشيت لصديق وورانى الطريقة الصحيحه (( الله )) عِلا ياكن لو بعرف الها وأختها المربوطه كانت دى حالتى ؟ والله الداهى دا كونى بعرف أدخل بيهو مدنى وأطلع بيهو منها دى براها نعمه.
4 ... والله يا ( عمدتنا ) حكاية أرشح ليك أربعة مشرفين من الهوج ديل , دى صعبة لأنهم كل واحد فيهم أحلى من التانى والتانى أحلى من الأول وفى ذمتك أعفينى ..
5 .. نعم أنا بدخل النيت من مكان العمل أما لو كنت مستعد أدخل النيت من مقاهى الإنترنيت وأدفع من جيبى علشان أدخل منتدى مدنى ؟ صدقنى أنا الحين بدفع من نظرى لمنتدى مدنى ولأ شنو رأيك فى 14 ساعة نيت يومياً فى مدنى أولاً وثانياً وثالثاً وأخيراً .. يعنى لو لا قدر الله ويوم عميت إبقى منتدى مدنى هو السبب ولما قلت قبل كدا( شكيت محنكم يا ناس مدنى .. خربتوا طبعى ) كنت صادق فى كل كلمة وكل همسة وكل إشارة منى .. لمنتدى مدنى أدفع الغالى والنفيس بكل رضا . ولكن للأسف أنا أسكن فى مدينة صغيرة وليس فيها مقاهى إنترنيت .
6 .. جلسة حبيب القلب أبوقراط لها وقع خاص فى قلبى وكلما أدخل المنتدى ,, ودا لو طلعت منو ,, لازم أشوفها وأقول ليهو يا خوووى فكّها والله ما بتستاهل ومن هسى معزوم معانا القدة اللى جايّة ووقتها بوريك سرها ,,
ومحبة الجميع لى هى أكسجين أتنفسة يوماتى وحبى لكم هو خفقان ونبض الفؤاد ..
ولك منى كل الشكر والتقدير .
ود المطامير .

[ود المطامير]

اجمل كرسى حتى الان مع احترامى للجميع
ود المطامير ممكن اعرف عنك اسم الحى والدراسه
ولك الاحترام

مرحب بيك ياغالى والله فرحان بجيتك
والكرسى جميل بجيتكم الجميلة واللى سبقونى هم كانوا
رائعين وكل منهم كان بدر فى سمائة ولهم الشكر ,
والله يالحبيب حيّنا فى الشرفة الشريف بركات إسمو حى الفادنية
وهم مشهورين فى المنطقة بالحنك السنين يعنى نضامين نضمى صاح
لدرجة قالوا لو لقيت الشيطان والفادنى مشكلين !! طوالى تعرف إنو الفادنى
غلطان عليهو .. ديل راضعين النِقّة رضاعة ..
الدراسة يا الغالى لحد الشهادة الثانوية بس والله الجامعة ولا زيارة ساااى
ما حصل مشيت وشهادتى الثانوية زاتها مجموعها شدِّة ما شوية لدرجة
ممكن تقول .. أمّك جلّ من الرسوب ..
وتعال تانى عليك الله
وشكراً

[ابوالنور]

ها جني ها دحين انت لسه مصنقر في الداهيه دي كدي نشمي اجيب لي حسكنيت واجيك

[ود المطامير]

والله يا ادمن انا فرحت بجيتك دي لود المتامير ياربي هو يكون كيف هسي تلقوه فقد الوعي والاسعاف شغال بصفارته والدربات ما تديك الدرب غايتو الله يقومك بالسلامة

مشاشقة ياقول ود امي
والله يا ادمن ماخليت لود المتامير دا حاجة وفي توريطات ظاااااااااهرة خصوصاً حتة الاشراف دي يكون ياربي ما رسل لحمدتو في الخاص

والله صدقتى يا مدنية زيارة ( عمدتنا ) لى كهربتنى عديل كدا من الفرح
أما حكاية الإشراف ,, فى زول قال على أبو الدقيق ,,

[ود المطامير]

بصراحة ياود المطامير .... أجمل كرسي ساخن على المنتدي ...
وبعدين يازول مشكور على الصراحة دي (((( حسب إعتقادي مافي إنسان ممكن يفت حياته الخاصة بالصراحة دي وللملاْ عامة ولإناس لا يعرفهم من قبل سوى خلف شاشات الكمبيوتر .. على يقين تماماً بأن كل كلمة طلعت منك كانت صادقة جداً .ولا تخلو من الدبلوماسية .. وهذا يدل على معدنك الطيب والجميل كما عرف به أهل شرقنا الحبيب ... ))) وحقيقة أحببناك جميعاً ،،، وشخصياً أتمنى لك التوفيق في حياتك عامة ... وربنا يسترغربتك وغربتنا ... وغربة أخوانا كمان الفي المنتدي ... وتسلم ياغالي على هذه الصراحة .. والدعابة .. والجدية ... التي أتحفتنا بها.
وتشكر كثير جداً على رحابة صدرك وتحملك لهذا الكم الهائل من الأسئلة ((( الخاصة ، والعامة ، والمحرجة في بعض الأحيان )))
وأقترح على الـ admin - وعلى أخونا حمدتو / أن يتم ترشيحك لتولي أحد مشرفي المنتديات .

تسلم لى يا غالى وربى ما يحرمنى منك
وشكراً جزيلاً على كلامك اللى هو بالنسبة لى أوسمة غالية على صدرى
ويا عزيزى منذ أول لحظة لدخولى منتديات ود مدنى وأنا رافع شعار ,, الصراحة المطلقة والشفافية التامة , وما دام أنا الحين على الكرسى الساخن إذاً أنا مِلككم وعلية لكم الحق أن تعرفوا عنى كل شئ وأى شئ ودى يسعدنى غاية السعادة .
بس أعفينى من حكاية الإشراف دى تعرف لية ؟ لأنى لو بقيت مشرف ما راح أكون ود المطامير اللى بتعرفوهوا دا لأنى راح أكون مقيّد بحاجات كتيرة تحتم علىّ قص أجنحتى اللى بحلق بها الحين فى سماء المنتديات وأنا زول بحب الحرية شديد وأحسن أكون ود المطامير بس علشان أفنجط فى منتديات ود مدنى ذى الدحيش الفرحان بقش الخريف .
وتسلم لى يا غالى .
ونشوفك تانى .

[ود المطامير]

ها جني ها دحين انت لسه مصنقر في الداهيه دي كدي نشمي اجيب لي حسكنيت واجيك

عليك الله يا أبوالنور يا حبيبى ما تقول لى الحاكل فيهو يديك دا شنو
هو الوليد صاحبى ما قال ليك كلمو ساااى الزول دا عِكليتة ؟
أنكرب سااى جيب الحسكنيت وتعال
راجيك .

[سواااح]

ود المتامير ..

السؤال الاول :
ما رايك في العلاقات الانفتاحية الانسدادية التجاهلية ؟

السؤال الثاني :
ما هو التخصص المحبب الي قلبك .. اختر اجابة
1/ اصطياد بنات الجيران
2/ تخزين الدراهم
3/ هد سوق الدهب

السؤال الثالث :
ده خليهو فاضي

السؤال الرابع :
حركة التمرد التي قمتم بها
لم تحقق اي هدف من اهدافها الي الان
رغم المغريات وتشجيع النسوان علي الخيانة
ومنح الوعود باعطائهن سوق الدهب
ماذا تبقي لكم رغم الهزائم المتتالية ؟؟


السؤال الخامس :
جاوب عشان اجيك راجع

[ود المطامير]

ود المتامير ..

السؤال الاول :
ما رايك في العلاقات الانفتاحية الانسدادية التجاهلية ؟

السؤال الثاني :
ما هو التخصص المحبب الي قلبك .. اختر اجابة
1/ اصطياد بنات الجيران
2/ تخزين الدراهم
3/ هد سوق الدهب

السؤال الثالث :
ده خليهو فاضي

السؤال الرابع :
حركة التمرد التي قمتم بها
لم تحقق اي هدف من اهدافها الي الان
رغم المغريات وتشجيع النسوان علي الخيانة
ومنح الوعود باعطائهن سوق الدهب
ماذا تبقي لكم رغم الهزائم المتتالية ؟؟


السؤال الخامس :
جاوب عشان اجيك راجع

مرحب بزميل الحرب العزيز سواااح
1 .. العلاقات الإنفتاحية لازم تكون فيها سدادات إنسدادية هِنىوهناك علشان لوبعدين إتجاهلوك ما تجى واقع هردلوووب .
2 .. التخصص المحبب لقلبى هو إصطياد البنات ما هو أخوك ( ريّّاد بالحيل )
3 .. آاااى بغسل العدة آاااى بدقونى بالشدة
4 .. أكان دا المنطق ؟ كان الإسلام توقف فى أحد .
6 .. أها جاوبت ومنتظرك .

[مدنيّة]

2 .. التخصص المحبب لقلبى هو إصطياد البنات ما هو أخوك ( ريّّاد بالحيل )

غايتو ياود المتامير ماظنك بالحالة دي ح تجيب المدام

[مدنيّة]

أما حكاية الإشراف ,, فى زول قال على أبو الدقيق ,,

دا منو الحاقد دا

[مدنيّة]

الأخت الغالية (( مدنية ))
بسم اللّة إنتى بالعة رادى ؟ والحالة دى لجنا ؟ وخليتى شنو عشان تجى تانى ؟
أهلاً بيك فى بيتك وسعدت كتير بجيتك المشرقة .
ذى ما ذكرت فى شكلة الكبرى إنو أنا كنت قبل الجيّة لمدنى هامل سااى فى فضاء النيت ويوم سألت نفسى .... معقول ناس مدنى الراقيين ديل ما عندهم منتدى ؟؟ مش ممكن ,, وعلى الطول كتبت فى خانة البحث ((( منتديات ود مدنى ))) أكان ألقى ليك نفسى فى نصكم , ناس راقيين وحلوين ويشرحوا الصدر ,, جميلين فى كل شئ , خلقة وأخلاق , ونضمى دقاق , غايتو آخر روعة
ولقيت منتدى مدنى رائع بروعة اللى فيهو والقائمين عليهو , آسر .. أخاذ .. وجذاب لدرجة لو دخلت فيهو تانى طلعة مافى أبداً , أكثر شئ عجبنى التنوع فى المواضيع والناس أحبّة وأهل .
الحركات اللى عملتها الصراحة ورتنى مكانتى عندكم من غير ما أقصد .. وضحكتينى شديد بوصفك لى (( أبو الدقيق )) لأنك ذكرتينى بإسم قديم كانوا بنادونى بيهو .. واللّة .. فى يوم من الأيام لو قلتى وين بيت ناس أبوالدقيق طوالى يجيبوك بيتنا .. تلك الأيام ح تظل عالقة بالذاكرة أبد الدهر إذ فيها حسيت بالمودة تغمرنى فى أجمل الصور وبأحلى المشاعر الصادقة ..
واللّة العظيم يا أختى (( مدنية ) أم عمرو )) بتدخل المنتدى كزائرة ومتابعة الحاصل كلو من بعيد لبعيد فى بيت صديقتها .. طبعا أنا فاصل منهم النيت علشان الأولاد بقعدوا بالساعات أمام الجهاز و( أم عمرو ) إنشاء اللّة ح تسجل فى المنتدى الإسبوع القادم وهى للعلم ( مهندسة كمبيوتر ) وأخوك هندسة شلاقة ساااى ,, واللّة بتعرفكم واحد واحد فى المنتدى ..
وحكاياتنا مع السحارين واللّة فعلا التقول وراثة والحالة دى ما حكيت التقال .
وفى حكاية العمر واللّة العظيم لوشفتينى وشفتى شهادة ميلادى ح تقولى فى حاجة غلط وح تقولى
معقووووووول الشافع دا مولود سنة 66 ؟
ولك تحياتى العطرة وتعالى تانى وأملى شنطة يدك أسئلة .
مرحب بيك .
معزرة ,, نسيت أوريك طبيعة شغلى
أخوك شغال عمدة هِنى ,, عندى خمسة عمال هنود
وبنراقب الأسواق ( المواد المنتهية الصلاحية )
وأى حد يرمى ورقة ساى نخالفو وأى مرة تشر الغسيل
فى البلكونة نخالفها وهسى هِنى فى الجزيرة وهى فيها
قصور الشيوخ مسؤلين عن سلامة البيئة من التلوث .
ومرحب بك مرة تانى .

ياود المتامير مستغربة لية قمت في الاجابة بنمرة اربعة
والله اتخيل طريقة معرفتك للمنتدي زي طريقتي ومدني بتنادي براها عشان كدا الناس بتجيها غايتو ح نشوف ليك بيت في مدني زي ماقلت في بوست الفارس البنفسجي انك عايز ليك بيت فيها

والله شفت ابو الدقيق دي ظااااااااااااااااااهرة فك ظهورية خليها ساااااااااااااااي الله يعين ام عمرو كدي سؤال علي خفيف بالله لما تقوم عليك الحالة دي هي بتتفاداها كيف ؟؟

طب اعمل حسابك قلت ام عمرو بتدخل المنتدي مخير البتسوي فيه دا واوراقك الكاشفها دي ح تندمك عليها ماتقولي الحكاية ثقة عشان دي عندها نكتة بحكيها ليك في جيتي التانية هسي شوية مستعجلة

والله يادو المتامير انا في شوق عظيم اني اتعرف علي الاانسان الرائعة دي بجمالها المحسوس قبل الملموس ومن هسي منتظرة الاسبوع الجاي بس عليك الله في بدايته عشان لو انتظرت لنهايته الا ااجر لي رقشة واجيكم في ابوظبي وتاني يحلكم الحلا بلة

غايتو موضوع 66 دا مامقتنع بيه انا الا تجيب شهادة الميلاد بس اوع تكون تسنين زي معظم السودانين
يلا انا هسي بمشي وبجيك بكرة لو بقي في العمر بقية وامانة سلامي لام عمرو

[ود المطامير]

غايتو ياود المتامير ماظنك بالحالة دي ح تجيب المدام

أنا أخوك يا أم شلوخ ,, كيفن الكلام دا ؟

[ود البطــــانة]

حبيب الكل .. والرجل الواحة
أخي ( ود المطامير )
صباحك زي العجب .. ومساءك
جميل زي ساري الليل .. !!
ما تمشي بعيد .. أخوك مريخابي
بدرجة مشير .. !!
وها نحن نعود لكي نبحر في عالمك
الخاص .. ونجدك بسم الله ماشاءالله
جالس في الكرسي مثل الوزير .. !!
وبسألك عن :
** أنسب نظام سياسي يصلح كحكم
دائم للبلد .. ؟؟
** وبسألك لو كنت :
** رئيساً لجمهورية الســـودان ؟؟
** رئيس الإتحاد العام لكرة القدم ؟؟
** رئيس ديوان الضرائب ؟؟
ونتقابل ..

،،،

ود البطـــــانة

[ود المطامير]

دا منو الحاقد دا

هو عارف دا كلام منوووووووووووووووو ؟

[ود المطامير]

ياود المتامير مستغربة لية قمت في الاجابة بنمرة اربعة

والله اتخيل طريقة معرفتك للمنتدي زي طريقتي ومدني بتنادي براها عشان كدا الناس بتجيها غايتو ح نشوف ليك بيت في مدني زي ماقلت في بوست الفارس البنفسجي انك عايز ليك بيت فيها

والله شفت ابو الدقيق دي ظااااااااااااااااااهرة فك ظهورية خليها ساااااااااااااااي الله يعين ام عمرو كدي سؤال علي خفيف بالله لما تقوم عليك الحالة دي هي بتتفاداها كيف ؟؟

طب اعمل حسابك قلت ام عمرو بتدخل المنتدي مخير البتسوي فيه دا واوراقك الكاشفها دي ح تندمك عليها ماتقولي الحكاية ثقة عشان دي عندها نكتة بحكيها ليك في جيتي التانية هسي شوية مستعجلة

والله يادو المتامير انا في شوق عظيم اني اتعرف علي الاانسان الرائعة دي بجمالها المحسوس قبل الملموس ومن هسي منتظرة الاسبوع الجاي بس عليك الله في بدايته عشان لو انتظرت لنهايته الا ااجر لي رقشة واجيكم في ابوظبي وتاني يحلكم الحلا بلة

غايتو موضوع 66 دا مامقتنع بيه انا الا تجيب شهادة الميلاد بس اوع تكون تسنين زي معظم السودانين
يلا انا هسي بمشي وبجيك بكرة لو بقي في العمر بقية وامانة سلامي لام عمرو

والله يا مدنية نفسى فى بيت فى مدنى وأبوى الله يديهو العافية كلما أرسل ليهو حق البيت يقوم يبلعو بالهناء لحد ما إتزوجت وجبت العيال وتانى حق البيت إشت .
لما تقوم على حالة أبو الدقيق طوالى بتطفى النور .
وحكاية جية المدام وأوراقى المكشوفة بوريك بغطيها كيف بعدما تقولى لى النكتة .
وشكرا جزيلا لشعورك ناحيتها ولو عدم دخولها المنتدى بجيبك لينا خلاص إبقى تعالى لينا .
وحكاية ال 66 دى أنا ذاتى مامقتنع بيها وقلت لأبوى إنتوا كبرتوا عمرى لشنو ؟
ومنتظرك بكرة وما تتأخرى وإلا نمرة أربعة جاهزة .

[Jamal Elmahi]

الحبيب ود المتامير حبابك

أحيي فيك التلقائيه والاصاله ...إستمتعته جداَ بردودك وضحكت حتي ظهرت نواجزي...حلوه نواجزي دي...وقلته أدخل وأسلم عليك ...القحّه ولا صمّت الخشم...
أنا أؤمن بأنه في بعض الاحيان القلم ما بزيل بلم...وهذا ما نلمسه في بعض المتعلمين الما إستفادوا شئ من تعليمهم ...وبفطرتك وذكائك تفوقته علي كتير من حملة الشهادات العليا...وإن لم تتواضع وتكشف عن مستواك التعليمي لتخيلت أنك بروفسير في إحدي جامعات الخليج ...حقيقةَ ليس لديّ سؤال وإنما رجاء أخوي وهو أن تواصل مسيرة التعليم الجامعي حتي ولو بالانتساب أو علي الانترنت وما حيتعارض مع شغلك وزمن أسرتك ولك ماشاء الله من المؤهلات والامكانيات ما يجعلك تتفوق في الدراسه التي تختارها ...وأوعي تقول لي بعد ما شاب دخلو الكتاب ...فما شاء الله عليك وعيني بارده ودقر العين زين الشباب...فالتعليم ليست له سن معينه...فكر في الموضوع وتوكل علي الله وستجدنا كلنا بجانبك ....

مشاققه...
حنكك السنين نجّاضه دا كان قرأ قانون الشافك محامي قدر الضربه تب ماكضّب...وجامعة الحياة لما تضيف ليها جامعة الحيكومه تاني البلحقك منو!!؟
كلامي دا ما ترميهو البحر أأأأعشاي...


ود الماحي

[Madanawi]

ود المطامير - سهم الشرق - صياد النجوم . باعتبار انك زول قلبك رهيف زي ود أبرك وصدرك واسع من ناحية الجكس زي بحر أبيض فما هو رأيك في مقولة الشاعر السوداني:

عذارى الحي وبنات أفكاري.


وما هو رأيك في القول الاتي:

المغترب السوداني بالنسبة الى اهله في السودان زي الجنريتر في الحفلة ، الناس تسكسك وهو شغال زول جايب خبرو مافي و ما يفقدوه الا لمن يقطع المدد.

[امير عبدالباقي]

الاخ الحبيب عروه
لك الف تحيه وانت تبحر في الكرسي الساخن الذي جعلته باردا وعليلا باجاباتك الجميله السلسه الممتعه
عندي ليك كم سعال
اولا من اين استوحيت اسم شجن لبتك ؟
متي اول مره زرت فيها مدني وماهي كانت انطباعاتك عنها بعد الزياره وقبل الزياره ؟
ماهي الاشياء التي تراها محتاجه لها الشرفه بركات من بنيات تحتيه ؟ ولم تقم بها الحكومه ؟ وماذا فهل ابنائها المقتربين لها ؟
قالو احن الولد ولد الولد هل رائت امك احفادها جميعا ؟ اذا كانت الاجابه بلا فلاتري هذا اجحاف في حقها ؟
لقد سالك (الادمن سوال عن اختيارك مشرفين للمنتدي وعملت زغبير ؟ نرجو الاجابه بشجاعه بدون زوغان
لك لك التحايا ووالود
برجع ليك تاني بعد ترجع من غسيل العده والكوي

[ود المطامير]

حبيب الكل .. والرجل الواحة

أخي ( ود المطامير )
صباحك زي العجب .. ومساءك
جميل زي ساري الليل .. !!
ما تمشي بعيد .. أخوك مريخابي
بدرجة مشير .. !!
وها نحن نعود لكي نبحر في عالمك
الخاص .. ونجدك بسم الله ماشاءالله
جالس في الكرسي مثل الوزير .. !!
وبسألك عن :
** أنسب نظام سياسي يصلح كحكم
دائم للبلد .. ؟؟
** وبسألك لو كنت :
** رئيساً لجمهورية الســـودان ؟؟
** رئيس الإتحاد العام لكرة القدم ؟؟
** رئيس ديوان الضرائب ؟؟
ونتقابل ..

،،،

ود البطـــــانة

أهلا بود البطانة عِزى وفخرى
مرحبتين حباب اللقبايل دخرى
1 .. تعرف يا ود عمى أنسب نظام سياسى ينفع لحكم البلد شنو ؟
هو نظام سِِِِِِِِِِفّوا وناولونا الكيس
2 .. لو كنت رئيس للسودان هلاّ هلاّ أمانه آلقصر الجمهورى ما جاك زول
على الطول ح أقلب الحكم ملكى وعمرو يكون ولى العهد وأحكم السودان
ومن بعدى زريتى ويظل أهل شرق الله البارد يحكمون السودان مئات السنين
ماهم مهمشين فى كل شئ ولا نميرى واحد ما طلع منهم .
3 .. لوكنت رئيس إتحاد كرة القدم لهدمت دُور الرياضة والميادين والأندية
وعملتها مخابز وأسواق خضار ولحم وسمك لحدما يجى حد يقنعنى وعملى كدا
إنو خلاص لقينا شباب ح يعيدوا لنا أمجادنا الكرويه .
4 .. لو كنت رئيس ديوان الضرائب لجعلتة ديوان كتشينه للعطالة علشان
هم بشيلوا الضرائب من الفقراء وبودوها للأغنياء
ولك كل الود والشكر وراجيك .

[ود المطامير]

الحبيب ود المتامير حبابك

أحيي فيك التلقائيه والاصاله ...إستمتعته جداَ بردودك وضحكت حتي ظهرت نواجزي...حلوه نواجزي دي...وقلته أدخل وأسلم عليك ...القحّه ولا صمّت الخشم...
أنا أؤمن بأنه في بعض الاحيان القلم ما بزيل بلم...وهذا ما نلمسه في بعض المتعلمين الما إستفادوا شئ من تعليمهم ...وبفطرتك وذكائك تفوقته علي كتير من حملة الشهادات العليا...وإن لم تتواضع وتكشف عن مستواك التعليمي لتخيلت أنك بروفسير في إحدي جامعات الخليج ...حقيقةَ ليس لديّ سؤال وإنما رجاء أخوي وهو أن تواصل مسيرة التعليم الجامعي حتي ولو بالانتساب أو علي الانترنت وما حيتعارض مع شغلك وزمن أسرتك ولك ماشاء الله من المؤهلات والامكانيات ما يجعلك تتفوق في الدراسه التي تختارها ...وأوعي تقول لي بعد ما شاب دخلو الكتاب ...فما شاء الله عليك وعيني بارده ودقر العين زين الشباب...فالتعليم ليست له سن معينه...فكر في الموضوع وتوكل علي الله وستجدنا كلنا بجانبك ....

مشاققه...
حنكك السنين نجّاضه دا كان قرأ قانون الشافك محامي قدر الضربه تب ماكضّب...وجامعة الحياة لما تضيف ليها جامعة الحيكومه تاني البلحقك منو!!؟
كلامي دا ما ترميهو البحر أأأأعشاي...


ود الماحي

حبيبى ود الماحى
وكلامك هذا هو عندى أغلى من شهادات أعرق الجامعات العالمية وشهادة الجامعة صحيح رايحه تنفعنى فى جوانب أخرى فى الحياة مال وجاه ولكنى أحببت الدراسه فى جامعة حب الناس وشهادتك أعلاة عندى أغلى مليار ومليار مرة ومرة من شهادة إكسفورد وأعتز وأفتخر بها جداً وراح صدقنى ح أزيّن بها مجلسى فى البيت وصدقنى لو نلت شهاده جامعيه مش ح أفرح بها كفرحتى بشهادتك الغالية لى .. فلك منى كل الشكر والتقدير والإمتنان على مشاعرك الفياضة بالإلفه نحوى .. تسلم ..
وإنشاء الله ح أعمل بوصيتك لأن الكثيرين بشجعونى على الدراسة الجامعيه من على البعد ..
مشاققه ..
حكاية المحامى والمحاميين .. عندنا مشكلة مع جارنا فى شارع ووصلت المحاكم وجارنا زول مروق لوارى وعيش الضهارى وربنا يزيدو أها هو عندو محامى ونحنا كمان وأنا كنت صغير خامسة إبتدائى تقريباً أها فى المحكمة كلما القاضى يسأل سؤال أنا كنت بنط وأتكلم قبل المحامى بتاعنا قام القاضى قال لعمى .. مادام عندكم الجنا دا منزلين محامى لشنو ؟ وتعال شوف الناس ماتوا بالضحك ..
وأخيراً أقول لك .. كلامك لى بلل عيونى بالدموع ..
أهلاً بيك فى أيّة لحظة .

[ود المطامير]

ود المطامير - سهم الشرق - صياد النجوم . باعتبار انك زول قلبك رهيف زي ود أبرك وصدرك واسع من ناحية الجكس زي بحر أبيض فما هو رأيك في مقولة الشاعر السوداني:

عذارى الحي وبنات أفكاري.


وما هو رأيك في القول الاتي:

المغترب السوداني بالنسبة الى اهله في السودان زي الجنريتر في الحفلة ، الناس تسكسك وهو شغال زول جايب خبرو مافي و ما يفقدوه الا لمن يقطع المدد.

والله يا حبيب قلبى ( مدناوينا ) إفتتاحية كلامك دائماً بتموتنى بالضحك
طوالى بتخش ليفت .
والله يا الحبيب كلام الشاعر دا عجبنى شديد ,, لأنى ( كنت ) بموت فى عزارى الحى والله يا ( مدناوى ) ريدى لعزارى الحى تغلغل فينى لحد النخاع وعلشان كدا كانت ( بنات أفكارى ) حايمات فوقهن ليل نهار ..
الله عليك يا الحبيب والله أصفق ليك بحرارة فى هذا الوصف الذى هو طبق الأصل لحال المغترب السودانى, والله شكيت محنك .. ضحكتنى لمن دمعت .. وصف بليغ ومعبر ويختزل كل آلامنا وهمومنا
والمشكلة يال الحبيب .. ندفع دم القلب وفى الآخر نسمع ... هو إنت عملت لينا شنو ؟
الله يجازى محنك يا حبيبنا .. عليك الله كتر .. كتر .. كتر .. الجيّه .
ودمت لى .