صحيفة اسبوعية سياسية اجتماعية تهتم بأخبار اعضاء المنتدى، وسياسة المنتدىالعدد الخامس ـ الخميس تمانية فبراير الفين وسبعة ميلادية
رئيس التحرير + المدير + الغفير )كلو) شبارقة
مساعد غفير التحرير : أبورجاء
كلمة العدد:
الأخوة أعضاء منتديات ودمدني ، السادة الضيوف الكرام ، السلام عليكم ورحمة الله وبركاته، تشرق عليكم صحيفتكم الغراء بعددها الخامس نأمل أن ينال رضاكم، ونشكر كل الذين ساهموا وسدوا الفرقه في غياب الغفير العام وعلى رأسهم نائبه أبورجاء.
غفير التحرير ..
أخبار البوستات:
أبو علاء كوفي شوب :
بوست مما قمنا معلق في حتتو دي ، ويا ناس الحيكومة ما تفكوها شوية ..
كورة المنتدى (زواج جماعي للأعضاء) :
ما جاب نتيجة .. وتيتي تيتي مشيتي وما جيتي ..
وكل الجكس قال (مادايرين ما دايرين *** شوفو غيرنا نحن ما بايرين)
وبكره بتندم يا ابو جاكومه ...
عاجل جداً جداً جداً جداً :
تسنيم خالد عايزة تطق من الزعل .. والناس كلها ما فاهمة الرماد ...
ونحن نقول : أختنا (سيما) اللي يرشك بالموية نكشح فيهو برميل ... ولا يهمك.
صورة وتعليق وجائزة:
دي البوستات ولا بلاش ...
ومدنية الله يخليها لي بنياتها .. وشاحدين ليها الله يهنيها ويمنيها (ما عشان الموبايل)!!
الصورة : صورة مقلوبة
التعليق : ..................
الجائزة: شلناها.
الرجل الطيب والكلب:
كلام مجانين ..
هل تحضر زواج من كنت تحب :
كشف هذا الموضوع انو كتير من الشباب ماخد شاكوش على دماغو ....
وممكونين وصابرين!!
الصفحة الإجتماعية:
مزوني: جاي السودان بعد غياب طويل في الهند ، مستف كرتونتين هنديات، Madanawi وصاهو وقال ليهو : (جيبن خضر عشان يصلن تمام)!!
أبو دجانة العباس و ودالمطامير اتلاقو في السوق الكبير ، ابو دجانة يبيع في القرع ، وجنا المطامير عندو غنماية مواليد 2006م ، ابيض على شوية سواد، وداها الدلالة ما جابت ليهو حاجة ..جابها وقعد يبيع مع ودالعباس في القرع ، الغنماية غفلتو وراحت ، ومازال البحث جارياً.
Thola يعني بالعربي (زولة) لبعت واحد أخونا شاكوش مؤسس ، بس ندمت ندم ام بلينا ، ودايره الصلح .... بس منو البقول (البغلة في الابريق).
د. نور العيون توزع في قطرات للعشى الليلي ، وأخونا ابورجاء ما صدق لقى واحدة، كب منها في فتة الفول ،، وهاك يا مغص و .......
أخونا المسافر مسجل غياب تام بعد أن زرتو المرة وهو يجكس مع واحدة عن طريق الماسنجر،، وشالو منو وصلات الكمبيوتر .. وحرمو المسكين من النت، بقى يخلي المرة تهبر ... وما يصدق يلقى دقيقتين تلاتة يخش فيها المنتدى.
الصفحة السياسية:
فترت فورة جبهة الشرق بعد البداية القوية التي بدأت بها المعارضة ، ويبدو أن الحيكومة أغرت بعض القواد بقزازات البتسي كوليا وشوية حاجات بي جاي وبي جاي ..
خصوصاً في ظل ترقية البعض منهم والاغراءات التي عرضتها الحيكومة.
الصفحة الأدبية:
لم يعجبني الشاعر حين قال:
قرميش الفجل هش المعيدة هشاشه
في المجلس بشوف كل الخلق تتحاشى
كشرو للوشيش وأنا فوق وشيشي بشاشة
***
أعجبني الشاعر حين قال:
غايب السنين الليلة مالو
غنا العصافير غلبو
طرّاهو زولاً كان ولوف
كم رضى خاطروا وطيبو
سمّع قليبو كلام حنين
هدهد مشاعرو وذوبو
الناس سعيدهم في الحياة
ولا ضاق فراق ولا جربو
وانا حالي في بعد الوطن
دفعني ضي العين تمن
ليه؟؟؟؟؟؟؟؟؟؟
***
لكم خالص الود
رد مع اقتباس
المشاركة الأصلية كتبت بواسطة سواااح
المفضلات