هل نحن محدودي الطموح

[طلال الصول]

الى ماذا تطمح عربية بيت زوجة وبعد كدا شنو
هل طموحاتنا مادية وبس ما عارف لكن كل الدلائل بتدل
على كدا
في سؤال دايماً بنطرحو و نجاوب عليو نفس الاجابات على الرغم من
انو اعتقد احنا ما مقتنعين بيو وهو هل انو المادة اهم حاجة
الاجابات كتيرة جداً طبعا بتقول لأ وليس بالخبز وحده يحي الانسان
ومابعرف شنو كلام وشعارات جميلة ورنانة لكن ما مطبقة
حتى لو احنا ما اعترفنا بيها
والا رايكم شنو يا اهل الخير
نرجع ونقول هل طموحاتنا مادية وبس ؟؟؟؟؟؟؟؟؟؟؟؟؟؟؟؟؟؟؟؟

[ابوشوتال]

يا اخوي طلال
الناس همها الاكبر القرش والقريشات اهم شي
عشان كدي الناس الاتغربو ديل همهم شنوالمال
انو الواحد اعرس + عربية+بيت+ مصدر رزق وبس راجع
امان يالقرش ما عندك طبيعتنا شينا
وتسلم علي الطرح

[طلال الصول]

لكن يا ابو شوتال الكلام دا كدا غلط
وبيأكد انو احنا محدودين
وتسلم على المرور

[شبارقاوية]

والله شوف ولا كلمات رنانة ولا موسيقية
نحن طموحاتنا مادية 100%
والبيت والعربية ومصدر الدخل عايز قرش واكتر من كدة ما قاعدين نفكر
بمعنى اصح لو مافى قرش مافى طموح ولا شنو ؟

[طلال الصول]

احيي فيك الصراحة والكلمات الجميلة دي
ونشاء يكون طموحك اتحقق وبزيادة كمان
يارب

[magdi]

الأخ طلال .....
أغلب الناس في هذه الدنيا يجعلون المال هدفهم الاكبر في الحياة..
ولاشك ان المال هو اساس الحياة وانه ضروري لتحقيق كثير من الأحلام والطموحات..
ولكن يجب ان نعلم ان المال هو وسيلة وليس غاية ....!!!
فالانسان الذي يجعل همه الاكبر في الحياة هو جمع المال غالبا ما يكون مهموما ..
وتكون حياته مليئة بالتعقيد والمشاكل .... وفي بعض الأحيان لا يكترث لطريقة جمع المال فيكون هدفه هو جمع المال وبأي وسيلة .. وهذا مايؤدي لكثير من المشاكل .
فخير الأمور أوسطها ... فإذا حقق لك المال الزوجة الصالحة والإستقرار وكفاك شر سؤال الناس فالحمد لله على هذا ... وفي الآخر فإنك تجري في هذه الدنيا جري الوحوش ولن تنال إلا ما قسمه الله لك من مال ....

وفي كثير من الأحيان قد يكون هذا المال نغمة وقد يسبب التكبر وهذا هو ماحدث مع قارون كما أخبرنا الله عز وجل:
{إِنَّ قَارُونَ كَانَ مِن قَوْمِ مُوسَى فَبَغَى عَلَيْهِمْ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ إِذْ قَالَ لَهُ قَوْمُهُ لَا تَفْرَحْ إِنَّ اللَّهَ لَا يُحِبُّ الْفَرِحِينَ }
فنعوذ بالله من المال الذي يقودنا للهلاك ....!!!
أنا شخصياً أطمح في جمع المال ولكن ليس هو همي الأكبر ... وغاية مطلبي .

[مشاعر هاشم احمد]

والله بيني وبينك كدا ياود الصول كل العالم اللافي دا بيبحث عن المال لأن المثل الذكرته انت دا اتقلب للضدً وبقي (بالخبز وحده يحيا الإنسان ) بالأخص عندنا هنا في السودان يعني بالواضح كدا لو ماعندك قروش أمك وابوك مابدوروك .........

[طلال الصول]

العزيز مجدي اولا شكراً على المرور والمشاركة الحلوة بس
برضو هل احنا محدودي الطموح

[طلال الصول]

والله يا مشاعر شكلو كلامك صاح
وانا قاعد اسأل عن حاجة خلاص
بقت في حكم المصدقات بهم
المادة ولاشئ غير المادة

[جلناره]

نحنا طموحين شدييييييييييييييييييييييييييييييد واحتمال طموحاتنا تصل لدرجه نعجز عن تحقيقها ولو حاولنا نعرف السبب نلقي الماده السبب الرئيسي نبقي طلعنا بمعادله ..الانجاز=الطموح+الماده..يعني بالنسبه لي بيتساوي الطرفين في الاهميه...ولا شنو؟؟؟.........

[طلال الصول]

تعرف يا جلنارة ما اظن انو في حاجة اسمها
طموح اكبر من الواحد
الواحد لوكان بيطمح بجد حيحقق طموحو لو كان ايش
وتسلم على المشاركة

[meshanshow]

الطموحات الماديه لابد منها في الحياه الدنيا عشان الواحد اميز نفسو ذي مابقولو لكن ماتنسي طموحاتك للآخره و تحاول تحققها

[طلال الصول]

المشكله يا تجتوج الواحد يطلع منهن الاتنين ميطي
تسلم يا غالي

[meshanshow]

هههههه و الله دي مشكله ياطله لكن انته اعمل العليك و الباقي علي الله

[مختار بازى]

الطموح الطموح..الهدف..الغاية...الحلم...الأمل.. يعتقد البعض انها مسمى لمعنى واحد ولكنها تختلف كل الاختلاف فالطموح:ماتهفو النفس لتحقيقة بدافع من العقل الباطني غالبا بعد وضوحه في العقل الظاهر والهدف:هو نقطة توضع امام العين بحيث لاترى الاهو حتى تصل اليه الغاية:هي مطلب النفس في امور مختلفة الحلم:مايرسم بالتخيل واغلبه غير واقعي حتى يتحقق بعكس الطموح والهدف والغاية حيث يتسمون بالواقعية الأمل.
وبصراحة نعم بدلالة الاحصائيات للشباب خارج السودان .

[طلال الصول]

مختار بالراحة شوية شوية

[الفارس البنفسجي]

أعتقد مسألة حصر الطموح في الزواج
والعربية والبيت ومصدر رزق هي
طموح غالبية الشباب في مجتمعنا
السوداني ، ليه ؟

أولاً : لأن الطموح بكون للحاجات
التي تنقصنا وبالمقارنة البسيطة
تجد أنه ينقصنا ذلك.

ثانياً : بالرجوع لنظرية إشباع
الحاجات ، نجد أنه سيظل هذا
هو طموح غالبية الشباب إلا
أن تزدهر الدولة ويحصل إزدهار
وبالتالي يصلون لمرحلة الإشباع،
وفي هذه الحالة سيتغير الطموح.

شكراً على هذا الموضوع الحيوي

[ابوشوتال]

حبيبي ود الصول طموحك انت شنو

غير الحاجات القلتها دي

دي امكن طموح اي واحد مغترب

تصليح الوضع المادي

واهم شي مصدر رزق جامد

وقدر ما نشتل الافراح تجي الاقدار تمد ايدا

قدر ما نلمم القريشات
تجيك طامة تشيلا
ونبدا من جديد
وراها وراها

[طلال الصول]

الفارس البنفسجي اول حاجة ربنا يديك العافية
وايوة انا برضو معاك بعتقد انو الوضع الاقتصادي
وشكل وتيرة الحياة بالاضافة الى نظرية الحاجات
هي البتجبرنا نكون محدوين الطموح

[طلال الصول]

والله يا ابو شوتال كلام جواو كلام كتتتتتتتتتتتتتتتتتتير
يلمها النمل وياطا الفيل
ربنا يعين الجميع
وبالنسبة لي طموحي انا
سبت الحكاية بتاعة الطموح دي من زمان
يعني بقت معاي زي ما تجي تجي

[Madanawi]

الطموح عنوان كبير لكتاب جميل يتخلل فصوله الأمل .. والعمل ،

بالأمل نطمح الى تحقيق أمنيات نحسبها بعيدة المنال وصعبة المراس والطريق اليها غاية في الوعورة .. أما حين يبدأ العمل تنقشع الضبابات .. ويتخذ الضوء شكلا وردياً وتقترب المسافة مابيننا وبين تحقيق تلك الامنيات التي أصلا بدأت صغيرة في شكل طموحات ،،

[طلال الصول]

الطموح عنوان كبير لكتاب جميل يتخلل فصوله الأمل .. والعمل ،

بالأمل نطمح الى تحقيق أمنيات نحسبها بعيدة المنال وصعبة المراس والطريق اليها غاية في الوعورة .. أما حين يبدأ العمل تنقشع الضبابات .. ويتخذ الضوء شكلا وردياً وتقترب المسافة مابيننا وبين تحقيق تلك الامنيات التي أصلا بدأت صغيرة في شكل طموحات ،،

تعريفك للطموح جميل يامدناوي