النتائج 1 إلى 25 من 48

الموضوع: قصة طه الشكري مع حمد ود دكين - قصيدة مقتل حمد ود دكين

أدوات الموضوع
- مشاهدة صفحة طباعة الموضوع


	29-06-2007 10:53 PM #1 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 قصة طه الشكري مع حمد ود دكين - قصيدة مقتل حمد ود دكين تروي الروايات ان هذه القصة وقعت حوالي عام 1818 ميلادية وكانت الواقعة الشهيرة بقتل أحد فرسان البطاحين حمد ود دكين زعيم الشكرية واحتمي البطاحين بابناء عمومتهم الجعلين وعلي رأسهم المك نمر وكادت الحرب تقع بينهم ولكنها انتهت الي الصلح . وصور الشاعر الكبير إبراهيم العبادي هذه الواقعه مع إضافات أدبيه جمه ومحسنات أفضت بها إلي مسرحية شعريه بقت أثر عظيم لتلك الواقعة التي تناسي التاريخ سببها الأصلي وبقيت أبيات الشعر وألحان القوافي . فالبرغم من الإختلاف حول اصل هذه الحكاية و مدي صدقيتها فما يهمنا هنا الجانب الأدبي في هذه القصة و الإبداع التراثي الذي صوره لنا شاعرنا الكبير إبراهيم العبادي و سوف اقوم بإذن الله بكتابة هذه الملحمة التراثية الأدبية الإبداعية على عدة حلقات متتالية سائل الله التوفيق في نقلها و كتابتها كاملة بقدر الإمكان حسب ما متوفر لدي في شريط كاسيت ( يعرف بشريط ريا ) و سوف اكتب هذه الملحمة التراثية باللهجة السودانية العامية حتى لا نفقد هذا النوع الأدبي حلاوته و مغزاه ، و إن كان هناك تقصير أو نسيان لبعض الأبيات ارجو من الأخوة الذين لديهم معرفة بهذا الفن الثراتي تصحيحي و المشاركة في توثيق هذا الإبداع الفني النادر و لكم خالص مودتي أولاً نتعرف على أهم شخصيات القصة : حمد ود دكين ( شيخ العرب ) شيخ قبيلة الشكرية طه ود حسين ( شيخ قبيلة البطاحين ) ريا بت عم طه و خطيبته الملك نمر ملك ملوك الجعليين شمة زوجة المك نمر و بنت اخو حمد ود دكين محمد ود دكين ( شيخ العرب و والد شمة زوجة الملك نمر ) ود النعيسان ( داهية الجعليين – سفير النوايا الحسنة و وزير الخارجية ) تبدأ القصة في ديار البطاحين طه نائم في العنقريب و جبمو ريا بنت عمه يستيقظ طه مفجوعاً ليجد ريا بجواره فيقول أخوك يا ريا أخوك وكت الخيول بدبكن أخوك يا ريا أخوك وكت الرماح يتشبكن اخوكي جبل الثبات لما القواسي بحبكن كم بكيت وكم قشيت دموع الببكن قالت ريا وراك أسود علي ما نمت اسع طيب قل طه بسم الله قولي اخوك طيب نصيح وشديد حاضر قلبي ماهو مغيب إلا الشفتو في النوم من هوايله يشيب الزول في الصحي مخدوم عليه شقاهو وإن غمض شويه تجي الهموم لاحقاهو الصف أب لبوس انا ما بخافو لقاهو ياليت الحلم في صحيا كان بلقاهو كان خيرولا شر بلقاهو ما بهم بالى وحارسنى السبات من الكبار قبالى وكت هسع صحيت وشفتك سالمه قاعده قبالى إن اتلخبت الكون تانى مانى مبالى قالت ريا كعب نوم النهار أمس العصير كنت نايمه رأيت قدام فريقنا أشوف صقوراً حايمه كبيرن غار علي من نومي تبيت قايمه صحيت مهجومه لا مفصل ولا في القايمه شعر طه ان حلمه يطابق حلم بنت عمه فقال ليها وانتي كمان رأيتي صقور عبارة غريبة علامتا كافية ظنيت الحكايه قريبة هاك مني الصحيح الما بتدخلو الريبة هادي الحله بي عيني أشوف تخريبة قالت ريا تٌف الشينه ليه فاجعني ليه يا طه انت الدغري وانت الكاشفه ياك غطاها كان الدنيا هادي العقبة تتخطاها ما بضلل سماها وما بتشيلني وطاها وقعدت ريا تبكي رد عليها طه وقال ما بفيد البكاء وكلامي أحسن تنسي قالت ليه ريا كيف ما ابكي وكيف افوت مراتع انسي افقد كل شي عزي ورجالي وانسي تطلق فوقي نار عقبان تقول لي انسي .. قال طه : فال الخير أخير ما شفنا شيتاً جدت كل الشفنا أحلام في طريقها إتعدت قبل الليلة إيد لي حمان قطْ ما اتمدت ما بنهد شرفنا لو السماء إنهدت قالت ريا : خير إن شاء الله خير والخير مساك وصباحك والفال السمح فالك يضوي مراحك بالضيفان أشوف عامر تملي مراحك شينك ما أشوف وأشوف هناك و أفراحك قال طه : خير الزول يقول مهما الامر يتهول قالوا الناس علي فالو الحلم يتأول غاية الحي فناه إن كان قرب إن طول يترك ذكرو والناس الورا بتتقول نـــــواصـــــــــــــل و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	30-06-2007 04:38 AM #2 ابوشوتال الملف الشخصي مشاهدة المشاركات عضو مميز Array تاريخ التسجيل Dec 2006 المشاركات 454 والله قصة جميلة انا لاقتني اكتر من مرة وشي جميل انك تكون حافظها لكن كان تختها في النفاج الناس البفهموها هناك اكتر وسلمت بسال عليك نور الصباح الم العيون بعد السهاد شمس الشروق وكتين تشع تحمي الرقاد واسرق خطاي رغم الظروف والقاك سراب وقت الميعاد رد مع اقتباس


	30-06-2007 05:38 AM #3 احمد النور الملف الشخصي مشاهدة المشاركات عضو جديد Array تاريخ التسجيل Mar 2007 المشاركات 3 اولا ياخي هذا الامر برمته كذب وافتراء ثم ثانيا من اين اتيت انت بهذا التاريخ اولا لم يوجد في تاريخ الشكرية شيخ باسم حمد ودكين وحقيقة هذه القصة مختلقة وياخ ولافخر انا اعرف العبادي واعرفك بتاريخ الشكرية والذى استطيع ان اعرفه لك من العام 1551 عندما رفضت قبيلة الشكرية دون غيرها من القبائل الانصياع للدولة السنارية والتى سماها المؤرخون بثورات قبائل الشكرية ثم ثانيا هل تعرف بمن احتمى المك نمر بعدما حرق اسماعيل احتمى بقبيلة الشكرية والى الان المنطقة التى استقر فيها موجودة بارض الشكرية بالبطانة مرنا عشان نديك الزيادة ونعرفك اكثر بالشكرية نحنا اولاد شكير نحنا السمح معروفنا مابنرمي الحجل من العشيرة ضيوفنا الفونج والهمج ضاقت ملاقي سيوفنا تتباشر صقور الجو قدر ماتشوفنا لقد ذكرت والرماح نواهل مني وبيض الهند تقطر من دمي فوددت تقبيل السيوف لانها لمعت كبارق ثغرك المتبسم رد مع اقتباس


	30-06-2007 06:33 AM #4 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 المشاركة الأصلية كتبت بواسطة ابوشوتال والله قصة جميلة انا لاقتني اكتر من مرة وشي جميل انك تكون حافظها لكن كان تختها في النفاج الناس البفهموها هناك اكتر وسلمت الرائع أبو شوتال تحياتي أيها المملؤ عشقاُ بهذا التراث كما تعلم اخي لكل مقام مقال بس العشم تجيب لينا ناس النفاج بي جاي تحياتي و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	30-06-2007 06:53 AM #5 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 المشاركة الأصلية كتبت بواسطة احمد النور اولا ياخي هذا الامر برمته كذب وافتراء ثم ثانيا من اين اتيت انت بهذا التاريخ اولا لم يوجد في تاريخ الشكرية شيخ باسم حمد ودكين وحقيقة هذه القصة مختلقة وياخ ولافخر انا اعرف العبادي واعرفك بتاريخ الشكرية والذى استطيع ان اعرفه لك من العام 1551 عندما رفضت قبيلة الشكرية دون غيرها من القبائل الانصياع للدولة السنارية والتى سماها المؤرخون بثورات قبائل الشكرية ثم ثانيا هل تعرف بمن احتمى المك نمر بعدما حرق اسماعيل احتمى بقبيلة الشكرية والى الان المنطقة التى استقر فيها موجودة بارض الشكرية بالبطانة مرنا عشان نديك الزيادة ونعرفك اكثر بالشكرية نحنا اولاد شكير نحنا السمح معروفنا مابنرمي الحجل من العشيرة ضيوفنا الفونج والهمج ضاقت ملاقي سيوفنا تتباشر صقور الجو قدر ماتشوفنا اخي الشكري أحمد النور مرحباً بك بيننا قلماً مبدعاً و مؤرخاً موثقاً لتاريخنا و ثقافتنا و مورثاتنا الأدبية و الثقافية ، و يسعدني جداً أن يكون بيننا شخصاً في قامتك يعرف الأنساب و يحفظ تاريخ القبائل و ينظم الشعر و يحب الأدب و التراث و يسعى للحفاظ على موروثنا التقافي و الفني أستاذي اسمح لي ان اقول لك أن القصة منتشرة منذ زمان بعيد و قد تناقلتها الألسن و رواها الشعراء و تغنو بما فيها من ادبيات رائعة و هناك شريط ( كاسيت ) منتشر منذ عشرات السنين فيه هذه القصيدة او الملحمة التراثة ،، فإذا تأملت ما كتبته في مقدمة حديثي و سوف انقله لك نصاُ تجدني قلت ( فالبرغم من الإختلاف حول اصل هذه الحكاية و مدي صدقيتها فما يهمنا هنا الجانب الأدبي في هذه القصة و الإبداع التراثي الذي صوره لنا شاعرنا الكبير إبراهيم العبادي ) و كل ما يهمنا هنا هو توثيق هذا التراث الأدبي الذي صاغه شاعرنا إبراهيم العبادي و ليس ما أهدف اليه هو طعن أو قدح في قبيلة او شخص ما ، معاذ الله ان أكون قد اردت ذلك و كل ما يهمني في الأمر هو الجانب الأدبي و الشعري في المقام الأول و لك العتبي حتى ترضي و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	30-06-2007 08:36 PM #6 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 نواصل ما انقطع من حديث فقد كنا نتحدث عن المنام الذي شاهده طه قالت ريا : وريني الحلم التورك مزهول قال طه : أصبري لي أروق حبل الفكر مبهول احكيلك شنو الشفتو والله مهول شفت الوحده شفت النار وشفت الهول أحكيلك تمام الشفتو ما بتغابه جايين العصير أنا وإنتي من الغابه سايقه ليك بهم قدامي بي رقابه بينا والفريق إتولعت تقابه قدر ما نشوف بعيد قدامنا نلقي حريق وقت النار علت ما شفنا تاني فريق باصرنا المروق ما لقينا لينا طريق تشكي من عطش واخوك يابس ريق فترتي قعدتي ,انا محتار جلست وراكى حاقبه الدرقة ختيت سيفي فوق أوراكى وكت بعد البهم لى قسعو قمتى براكى كسعتي وجيتي ومعاك كور صقور تبراكى تبيت بي عجل شافنى جفلن و طارن غابن من عيوني وفي اللعوت اتضارن ما غابن كتير جن يقدلن يتبارن قدامن كبيرن عينني وغارن سل السيف ولاقاهن أخوك يالضامره تور عنز أم هشيم الفي المجامع دامره سيل تلوى اندفق فوقو السحائب هامره حجر الصاقعه فرتاك الصفوف العامره بادرني الكبير ديك إستعدن وقفن ما مهلتو طار راسو وجناحي يرفن طارن ديك وقت بي ريشو رقد اتكفن قالت له ريا : عارض ومات خلاص لي الليلة يمكن عفن .. طه قال ليها : نحمد ربنا الليلة مات عارِضنا وان كان عمروا طال يا ريا كان قارضنا يلحقوا بي عجل ديش همنا المارضنا نبدا زواجنا بكرة منو البيجي يعارضنا بطال البعيش في الدنيا اصلوا غناه ان كان مالو راح غير اهله مين يدناه سمح الفوق اساس ابواتو تمه بناه والزول دون قبيله غناه شن معناه ما بنفرح بي مال ونقول كفانا ورثنا نفخر بالرجال في الحارة يبقوا ترسنا نجمع ناسنا هيلنا من الكبار حارسنا يحضروا اهلنا فرحانين يباركوا عرسنا كل بطحاني يفرح بي عرسنا مناه ساعة جمعتن بيتنا يتم بناه عذاب عيش العزب يا ريا مر ضقناه سمح الزول صبي يلد ويربي جناه طبعاً ريا ما قبلت الكلام ده لانو ابوها عبد الله المعروف بابو كبس ما تم سنه من وفاته والناس في حالة حداد فقالت دا الاعوج تراه ووالشين نهايه حدو إن شاع ده الخبر يملا الفريق لي حدوا يقولوا ابكبس من دخل ود احدو فرحوا وعرسو لا موجعن لا حدو إن كان في الفريق ماتت مريه ذليله لي الحول يرفعوا العرس الدخلتوا الليله خليه اب كبس راجل الرجال ودليله إن كان بي قبيلة تعدوا تبقي قليلة خليه الكلام وعرسنا في ده الحال من بالك أمرقو محال والف محال علي ميتت ابوي لي الليله حول ما حال نصبح بكره ونسه ونشوف بشاتن حال رد عليها طه وقال ليها الموت ما شمت غاية البخود والببروا والموت والحزن ما جابو زول من قبرو الزول في الشدايد أولي يلزم صبروا يترجي الكريم مولاه كسره يجبروا بنخاتر منو الوجعه هيلنا برانا نحن أهل المصاب والناس عزا مجابرانا في أخر المراح دايماً تجي الفترانا عادة الحد ندوسها والناس عقب تبرانا ... بعدين ريا شافت تحسم موضوع العرس ده مع طه وانه لازم يتم السنة كالعادة المتعارف عليها في الحداد فقالت الناس بالمكارم والفعال بتباهو زي الفطرة ينشا الزول حسب مرباهو عادة جدو عادتو ونحل ابوه نباهو يلبس ثوب قبيلته ان داره ولا اباهو من الليلة حول مضيهوه تاني اتكلم الدايروا بيتم رب العباد ان سلم رد عليها طه تاني امضي حول وانا بالحسار اتالم علي حكمك صعب انا قابلو ما بظلم نستني السنة قاسية وصعيبه علينا ردت عليه ريا تم الاتفاق من الكلام خلينا زي عادة البلد لا زدنا لا قلينا إن شاء الله السنة بي خيرة عايده علينا يا طه البهم قرب رجوع سراحو بنات واولاد ديك ناس فريقنا الراحو نصيحة سمعتها من الكبار الراحو قالو العربي ما بنعز كان ما مراحو وتقوم ريا ماشة علي الفريق وطه يعاين فيها وهي ماشه ويقول آه السعادة ان كان بقت بيديه كنت اعيش هني في الدنيا بالزنديه علي حكموا ناسي الفى اخذوا الديه اموت بالعطش والمويه بين ايديا ريا على جايرة وزايده فى التفنين اه يا رب ارحم صبري امس ضنين يمحق ديه السنه ربي الحليم وحنين يخصمه من حياتي رضيت بعشرة سنين كيف أتهن واعيش وانا صبرى ولاّ مودع وسببي الرخرخ المن قام صغير متفدّع جنيت وجنى جنّ وحالى اصلُ مبدّع اهج شقيش اهج فاضلى تانى أجدع نــــواصــل و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	01-07-2007 06:27 AM #7 ابوشوتال الملف الشخصي مشاهدة المشاركات عضو مميز Array تاريخ التسجيل Dec 2006 المشاركات 454 والله كلام جميل ونحنا منتظرين اديك الف عافية بسال عليك نور الصباح الم العيون بعد السهاد شمس الشروق وكتين تشع تحمي الرقاد واسرق خطاي رغم الظروف والقاك سراب وقت الميعاد رد مع اقتباس


	01-07-2007 04:17 PM #8 اميمه عشريه الملف الشخصي مشاهدة المشاركات زيارة الصفحة الرئيسية فخر المنتديات Array تاريخ التسجيل Jun 2005 الدولة من مدني فكل مدني دياري المشاركات 1,486 ابو علا هذا انقلاب ادبي ابيض وناصع البياض هنا في الثقافي اولا اطلالتك ابهرتنا ثانيا موضوعك المختار زادنا بهاءا وجمالا .. تراث جميل وكلمات جزله ... شكرا ابوعلا انت من زمان وين ..لابد في النفافيج ما بتبين ولو عارفين جيتك كنا مسحنا شوارعنا من الطين وفرشنا لك الورد مضمخ بالياسمين لولا هذا الجـــدار لما عرفنا قيمة الضؤ الطلـــــيق اميمه صلاح الدين عشريه رد مع اقتباس


	01-07-2007 10:43 PM #9 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 المشاركة الأصلية كتبت بواسطة ابوشوتال والله كلام جميل ونحنا منتظرين اديك الف عافية الحبيب أبو شوتال تحياتي و أحتراماتي خليك قريب ما تبعد ... بعد شوية الحكاية بتجيب ليها حرب و قتال و ممكن نحتاج لي شوتاك دا و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	01-07-2007 10:46 PM #10 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 المشاركة الأصلية كتبت بواسطة اميمه عشريه ابو علا هذا انقلاب ادبي ابيض وناصع البياض هنا في الثقافي اولا اطلالتك ابهرتنا ثانيا موضوعك المختار زادنا بهاءا وجمالا .. تراث جميل وكلمات جزله ... شكرا ابوعلا انت من زمان وين ..لابد في النفافيج ما بتبين ولو عارفين جيتك كنا مسحنا شوارعنا من الطين وفرشنا لك الورد مضمخ بالياسمين الأديبة بت عشرية تحياتي و احتراماتي و انتي تعطرين المكان بعبق الحروف و دفء المعني و صدق الإحساس و رجائي ألا تمسحو الطين من شوارعكم فهو أصل الإنسان و مسكنة و هو الجالوص النفاجو فاتح على جالوص اخر جار و منه استمد أدبائنا حيطة الجالوص في الدراما و شهيق الأرض البكر . ما اروع ان نتلطخ بطين الثقافي و نغتسل بنهر عشرية البارد علنا تتاح لنا فرصة الغوص في اعماق الاعماق لنصطاد درر الكلام ، دعينا نتعلم نظم القوافي على شاطئيك ايتها الأديبة المبدعة و نصنع قارب الأدب لنبحر في هذا البحر التراثي الزخار لنوثق لمن ياتوا بعدنا ما كاد ان تجرفه أمواج العولمة العاتية و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	01-07-2007 10:54 PM #11 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 وهنا ريا داخله علي الفريق لاقوها خمسة عرب راكبين زواملهم " وده بداية الحلم الشافتو ريا وشافو طه " بعدين وقت ريا قربت من العرب قام واحد من العربان المع ود دكين شيخ العرب نادي ريا وقال بالضيفان تمري لا سلام لا كلام صدقوا اهل المثل توب العرب صح لام ردت عليه ريا حبابكم عشرة ومن دون كشرة والف سلام يا وجوه العرب المتلي ما بتلام انا بت الرجال اهل الدرق والسيف بت الما بهموا بي حساب الخريف والصيف بت البحجو لى المرقوب بكرموا الضيف انا ريا كان شفتكم افوتكم كيف قام العربي قال ليها من وين في الاهل كفاك فخر يا بنية ردت عليه ريا انا بت البيوت المن بعيد معنيه بى فوق السما نفوسنا وبيوتنا حنيه ريا بت اب كبس في النسبه بطحانيه بعد هذا التعريف من ريا لنفسها .. عرف شيخ العرب حمد ودكين انو دي ريا البنت التي يرغب بالزواج منها عبد الله ابكبس عز البطانه وفخري في راس العرب بنعد ماهو الوخري كريم وهميم كان للقبائل دخري بت شيخ العرب هيلك صحيح تفتخري توقد ناره ديمه الما بكوس الجمره وفي الضيفان يهوش سكينو دايماً حمره بي كاس ما عبر لبنو بيجيك بالعمره هيلو الشكرة هيلو الرئاسه هيلو الامره المرحوم ابوك كان للقبيله غطاها عزك من قديم عمك حسين ابو طه ان شاء الله اخوك ديه السكه ما تخطاها بقصد بيها ود عمها طه يعني هل هو في مكانه ابواتوا (دايره تديه كلمه ناقصه فى ودعمها) فردت عليه ريا قايله كما يسد مكانن قدموا ليش يوطاها ( يعني إذا ما كان متل أبواتو فلماذا يطأ الأرض التي وطتها أقدامهم ) لا يفوت ولا يموت الساحتو يوم مغشيه تقابة الفريق يوقد صباح وعشيه زايد في الرجال طالق قفاي ووشيه ضيوف الليل بعد الهجعة يكفيهم مرارة وشيه رد عليها و دكين ما دخل التراب البركه في الذريه والخلاك وراه ما بقولوا مات يا ريه دايما في القبائل سيرة ابوك مطريه بيكي وبي اخوك تزيد ودى المحريه قام واحد من العرب داير يعرفا انه ده شيخ العرب ود دكين فقال : ما بتسألي لامن وين ولا وين ترسو قالتلوا ريا كيف العربي يسأل ضيفو كيفن تنسوا أول بكرموا و يخاوو ساعة أنسو من مقلب حديث تعرف أبوه وجنسو فرد عليه العربي عملتي حسابو ضيفك وكرموا وجبتيه يخجل كان سألتي وإسمو ما عرفتيهو إسم شيخ العرب سامعابو ما شفتيه (داير يوريها بان حمد ودكين دا راجل غنى وراجل كذا وكذا..عشان تقبل بيه) ده خريف البطانه الفيها مالوا مشارك هيلوا السارحه هيلوا الصاهله هيلوا البارك ما وقع لك كلامي ساكته لي شنو خبارك فخرك ود دكين جاك في فريقك زارك ردت عليه ريا مرحب حبابو العزو ماهو لفايه اب ناراً تولع للضيوف دفايه بي شيخ العرب الإفتخار ما كفايه تابعو إنت جانا نفخربو ونخدموا حفايه رد عليها ود دكين بارك ربي فيك عقلك يدوم يا ريا كرمك ماهو كلفه ديه طبعتك فطريه إياك بت التلوب والسمته فيك محريه قديم فوت البطاحين عزه للشكريه - نـــواصـــل - و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	02-07-2007 06:31 AM #12 ابوشوتال الملف الشخصي مشاهدة المشاركات عضو مميز Array تاريخ التسجيل Dec 2006 المشاركات 454 القصحة بدت تحلو وابشر بالخير الشوتال جاهز ومسنن ومطرق ومنتظرين البقية وسلمت بسال عليك نور الصباح الم العيون بعد السهاد شمس الشروق وكتين تشع تحمي الرقاد واسرق خطاي رغم الظروف والقاك سراب وقت الميعاد رد مع اقتباس


	02-07-2007 04:04 PM #13 اميمه عشريه الملف الشخصي مشاهدة المشاركات زيارة الصفحة الرئيسية فخر المنتديات Array تاريخ التسجيل Jun 2005 الدولة من مدني فكل مدني دياري المشاركات 1,486 *اها وبعدين........؟؟؟...* لولا هذا الجـــدار لما عرفنا قيمة الضؤ الطلـــــيق اميمه صلاح الدين عشريه رد مع اقتباس


	02-07-2007 08:49 PM #14 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 في الوقت داك جاء طه ووجدتهم واقفين فقال : حباب شيخ العرب مرحب خريفنا الزارنا مرحبتين حبابو و اتشرفنبوا ديارنا حباب راس العرب البيهو كل مدارنا تنزلوا في الدرب مالنا ماتت نارنا رد عليه شيخ العرب حباب طه الضرس والفي الصهيباب راس الجود والكرم هيلك قديم ميراس نارك ما بتموت با ولده الفراس قاصدين ام شديده ومعانا عوجه راس رد عليه طه لعدوك العوج يا الفي الكبس سراي راسك ما بدوس مليان رجاله وراي باكر لي ام شديده بركب معاك براي يا شيخ العرب لاكن تختوا كراى طبعاً شيخ العرب ما فهم كلمة كراى ديه فقال لي طه هادي الشورة يا طه الغلبني دليله كل اللبزمه القاهو فيك قليله رد عليه طه شارح ليه كلمة كراي كراي الدايروا تبقوا ضيوفنا انتو الليلة ترقدوا في الفريق حتي ان عشانا بليله رد عليه ود دكين مسكنا الدرب أسرع قوام ما تلعب دارك ديمه عامره والسمح ما بكعب يكفينا الوصف لاتشد جمل لا تتعب وهدنا الطريق عقب الوصول ما بصعب رد عليه طه يمين تغشوا الفريق بتفوتوا نحنا مقابر رد عليه شيخ العرب عامر انشاء الله ديمه اياك مرسى العابر مشطوطين خلاص مسكنا في دريب جابر نخاف عوج الطريق منو لي المقدر خابر رد عليه طه دريب جابر مزم والسكه سالكه ورايقه فرقان ما بتلاقيك ما بتعوقك عايقه اخذ خاترنا نحنا قالوا واصله السايقه بتراوح ام شديده باكر زواملك فايقه رد عليه ود دكين الزول ان وعد شين ميعادو يخلفو في ربط اللسان يسخابو دمو يتلفو سفري الليله فيه زولين ما بختلفو ضروري اصل ام شديده علي وعد بي حلفو ما بعرف ازوق من نشيت تبيت فريقكم لي فريق وبيتكم يمين لي بيت اجيك ديناً علي حتي إن بقيت حبيت هاك وعداُ نجيض ارجانا بكره مبيت شوفتي للفريق ايام بكي ابواتك مو غابيني حالو وسمعت بي نخواتك فريقك بكره ضيفوا وما بفوتوا وحاتك إلا أحققك وبراي اشوف نفحاتك يا ود الهميم النفسوا ما معارضاه كرم الضيف عليك مكانه ابوك فارضاه جاييك في امر ان تابه وان ترضاه غيرك ما بكوس واملي بس تقضاه رد عليه طه غرضك مقضي كان احتاج لخيل وجمال والضان والابل سارح يمين وشمال ردعليه ود دكين فوق القولتو انا لي فيك آمال رد عليه طه بي دمي الغرض اقضاهو خلي المال المهم طه زي فهم شيخ العرب وده ماشيلوا جاي وطه ماشيلوا علي المال فرد عليه شيخ العرب دي المأموله فيك وين الدرب خترنا رد عليه طه دربكم في السلم قال شيخ العرب والله تب ما ودرنا بكره نجيك ان قلينا ولا كترنا وهنا ودعهم شيخ العرب وسار بي جماعته قاصد ام شديده وعلي اساس في اليوم التاني ينزل ضيف علي طه وقبيلة البطاحين - نـــــواصــــل - و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	03-07-2007 05:59 AM #15 ابوشوتال الملف الشخصي مشاهدة المشاركات عضو مميز Array تاريخ التسجيل Dec 2006 المشاركات 454 ما لك قرصتها كبرها شوية ترا بقت زي قهوة الظهرية ومنتظرين البقية واقعد عافية بسال عليك نور الصباح الم العيون بعد السهاد شمس الشروق وكتين تشع تحمي الرقاد واسرق خطاي رغم الظروف والقاك سراب وقت الميعاد رد مع اقتباس


	03-07-2007 06:31 AM #16 nezar الملف الشخصي مشاهدة المشاركات عضو مميز Array تاريخ التسجيل Feb 2006 المشاركات 433 حاجة جميلة جدا وفي انتظار الباقييييييييييييييييييي رد مع اقتباس


	03-07-2007 06:43 AM #17 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 المشاركة الأصلية كتبت بواسطة ابوشوتال ما لك قرصتها كبرها شوية ترا بقت زي قهوة الظهرية ومنتظرين البقية واقعد عافية الغالي ابو شوتال تحياتي و انت مستمتع بهذه القهوة و سوف نزيدها شوية و نملأ ليك الفنجان و كان داير بالكباية ما عندنا مانع و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	03-07-2007 06:44 AM #18 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 المشاركة الأصلية كتبت بواسطة nezar حاجة جميلة جدا وفي انتظار الباقييييييييييييييييييي اهلا بك اخي نــزار في هذا البحر التراثي الزخار نتمني لك طيب المتابعة و إذا قصرنا و لا فطينا سطر ابقي كلمنا يا غالي و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	03-07-2007 09:34 PM #19 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 [COLOR="Blue"]وفي اليوم التالي طلع طه مع ريا منتظرين ود دكين حسب موعده معاهم وفي الحديث قال لي ريا في البال لي ضمير شيخ العرب متعوب قايم نفسه يختف في الكلام مرعوب الزول زمان كان ضحوك و لعوب ما خاتيلوا شئ ما شوفتي كيف مرعوب حمد ود دكين مرتع دياروا و ربع ده الشئ السمعتوا من الاباء والتبع الراجل فاعيلوا يبين لك طبعوا انا ود الخلا البعرف اسوده وضبعو ردت عليه ريا اعوج كان يخلف الليله ميعاد جيتو رجال وحريم كل اهل الفريق في رجيتو قطعوا السارحه كل زول في مراحو سعيتو كبار وصغار و حتي الراعي خلا رعيتو قال ليها طه محال يخلف محال قال جايبو غرضاً عندي ردت عليه ريا كــان غـرضاُ صـعـب ؟؟؟؟؟ رد عليها طه كان رأس نمر في شندي اوعدتوا أقضاه وابذل كل جهدي العندي كان بالمال وكان بالراى وكان بي زندي قالت ريا : هيلك من قديم انت البجيك تحجالوا لاكين ود دكين عامر بدين برجالو قال ليها طه : يا ريا الكلام ده اخير تقفلي مجالو وكت اوعدته بقضالو غرضو الجالو وفي وقفه طه وريا يجوهم ثلاثه من ابناء البطاحين عبدالله وخلف الله واحمد قال عبد الله سلام يا طه قال طه : مرحب بي كبار قبيلتي وعزي مرحب بالاسود البقبعوا المستهزي ريا جات قبيلتك فوقه انكعى هزي وإن زحينا يوم الحارة قرنك جزي ردت عليه ريا : اولاد بطحان تعيشوا ويزيد مراحكم ناير وناركم في سرات الوادي تهدي الحاير بتحلو المضيق وتصدوا غارات الغاير ما هيلم تزحوا إن كان يزح الداير قام خلف الله لما سمع الكلام ده خاف وارتجف واصابته خوفه كده فناداه عبدالله قال خلف الله ولدي اقعد قبال ود عمك كلام ريا هادا بشوفه غير دمك من زمن بعيد أتمني أسمع نمك فرج همنا مولاي يفرج همك دوبينا ......قول ... دوبينا قال خلف الله الولد البخاف من القبيلة تلومو بخلف ساقوا فوق تيساً رقيق قدوموا اما يجيب رضوه البهم البينقر فومو وإما أتكاتحن قدح الرماد حرومو سنابك حضر الطافه و جرايدك نوا كورك سال و مزيقا و رطانه و عوا الخلاني فوق نار أم لهيب أتلوي النوم شفتو يا قرد القلوع شن سوا أكل الشلخه لامن كمل المنسية شمخ الحورى لبعصه عريب بت ريه أكان ما أسكت الباكيات و أخلف الكيه قوله أبو فاطنه يا الصادق خساره عليا خرير دوماتو فوق عاجن رسن متلاقيه يا الغول النقيب سويلو سوق الساقيه بت معز الخلا الفوق الكجر متاقيه عكرناها يا أمروبه النشوف الباقيه[/COLOR وبعدين ظهر ود دكين في جماعته جايين علي الفريق فقال طه : هداك ود دكين بي زمله بان شفناه دار اليوم يروح خلف الوعد خفناه الراجل في الاصول ما خاتي لي معناه يا ريه استعدي الزول جمعنا عناه ... شيخ العرب قال: ولاد بطحان سلام اهل النبا و الشكره سلام عز العرب اهل الفحل والبكره سلام يا طه يا راس الكرم والضكره جيت لي غرضي يا طيب الاصل والذكره رد عليه طه مرحبتين حباب مرحب خريفنا الرازه حباب شيخ العرب البيه القبائل عازه حباب سيف النصر البيه هاشه وهازه في يمينك قبيلتاً ما بتقبل فازه قام عبد الله قال : هيا جايهو الزمل رد شيخ العرب خليه يا عبد الله غرضي إن كان ما أنقضى أنا زملي ما بتدله رد عيه طه الناس في رجاك من الصباح في مله كدي شوف الطعام شيخ العرب بسم الله رد شيخ العرب ما باكل طعام كان ما حسابى اتضرب وقضيان الغرض فيكم حقيقه مجرب الامر العنيتووجيتو كما اتدرب ما بنفعني اكل وما بيرويني مهما اشرب فقام عبدالله وقال ياشيخ العرب امرك خلاص همانا قول غرضك عديل خصصنا او عمانا عسع نقضى ليك في محلنا اللمانا كان بي مالنا كان بي بالنا كان بى دمانا رد ود دكين " شيخ العرب " عندكم الغرض لا بدور قلم لا ورقه ماغرضاً تسافرولو وتقيسوا الفرقه يقضي ان قولتوا خير مابدورلو سيف لا درقه وان قلتوا لا يروح شمار في مرقه ما مقبوض وما جيتكم لاجي فوقي جنيه بي خيري ومراحي وتاني نفسي غنيه جاييكم نسيب تدوني بطحانيه رد عليه عبدالله خير سميــها رد ود دكين في بت ابكبس لي نيه قام عبد الله رد عليه يفتخروا البطاحين ساحتم راحبالك لكن ريا امرها مقضي من قبالك فات فيها الفوات لي طه هاد قبالك من دون ريا قول الدايروا في بالك ده فريق الصهيباب مافيهو واحده حقيره مال ورجال وعز في الحله مافي فقيره كثير الزي ريا مليان البلد من غيره ان درت الكبار وان كان قصدت صغيره قام شيخ العرب قال إن مال الشجر ما بكسرن فراعو وقمحان الطلب لي المابجيبه ضراعو ليه يا أهلنا البيناتنا ما بتراعوا القال راسو موجو يربطولوا كراعو قام عبد الله قال حبل المهله يربط انت ارتاح بيت بكره نمر سوي ونلفي البيوت بيت بيت سمي الدايره ولوم البقولك ابيت رد عليه شيخ العرب يمين بالله غير الغايه مالي مبيت هنا طه حز الكلام في نفسه لانه شيخ العرب بينوا ليهو انه ريا مخطوبه وبعد ده هو بصر وبجادل فقام طه وقف وقال يا شيخ العرب أمرك بشوفو حقاره وما جايباك مره الجابتك بس غارة وقرناك كثير ونفسك ابيتا وقاره خبرك هادا ما دايرلو دق نقاره قام واحد من اعوان شيخ العرب اسمه علي ووجه الكلام لي طه وقال : قبلك في اللجج يا طه راحو الهدو تتجاسر علي شيخ العرب بتهدو زولكم ماعقل يا كبار كما تهدو بعنادوا الفريق خايف يسبب هدو هنا جو المجلس توتر وقام طه قال انا المالح الكارب خريفي وصيفي المثلك تبيع ما بطول فوق قيفي كما الليله في بيتي وبعدك ضيفي في الشي السمعتو برد عليك بي سيفي هنا قال شيخ العرب كفي يا بطاحين فيكم اتغشينا كرمكم جانا طامح رخصه اتعشينا بعد الشى السمعنا كان ما مشينا خايف في اجتماعنا تقع وقايعاً شينه في وداعة الله عقب بيناتنا ما في علاقه وات يا طه اتشفيت شبعت شلاقه عمرت الشر سعيت دليته بي معلاقه نحن وانتو بعد الليله يوم نتلاقه قام عبد الله عاوز يرضي شيخ العرب ود دكين فقال من ولدك زعل كل البلد بتكاورو ارحكم بيتنا بيتو ونحن زولنا نداورو نتدابر نشوف نحزم جمعنا نشاورو رد عليه شيخ العرب ضيف الغابه حالف ده الفريق ما أجاورو قام عبدالله قال سمح ارجانا يمكن طه نحنا نجبروا رد عليه شيخ العرب الزول في الرقاد شقو البريحو بخبرو والزول البليد بي ايدو يحفر قبرو عاد بنسوي عوسنا وطه يلزم صبروا رد طه علي شيخ العرب و قال سوي الدايره وكتر الكلام خليهو والشر القصدتو معاي ابقي عليهو طير اصل السما حتي القمر دليهو يوم نتلاقه كل واحد بعرف الليهو هنا خرج شيخ العرب ود دكين وعيونه يقدح منها الشرار وكبر الشر في نفوس الفريقين - نــــواصـــل - و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	04-07-2007 06:11 AM #20 ابوشوتال الملف الشخصي مشاهدة المشاركات عضو مميز Array تاريخ التسجيل Dec 2006 المشاركات 454 والله صحيح ان مال الشجر ما بنكسرن فراعوا وانا المالح الكارب خريفي وصيفي والزول في الرقاد شقو البريحو بخبروا ويوم نتلاقي كل واحد بعرف الليهو الحكاية سخنت والجماعة ناويين اتكتلوا اديك العافية الغالي ابو علا علي مجهودك الرائع بسال عليك نور الصباح الم العيون بعد السهاد شمس الشروق وكتين تشع تحمي الرقاد واسرق خطاي رغم الظروف والقاك سراب وقت الميعاد رد مع اقتباس


	04-07-2007 10:18 PM #21 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 المشاركة الأصلية كتبت بواسطة ابوشوتال والله صحيح ان مال الشجر ما بنكسرن فراعوا وانا المالح الكارب خريفي وصيفي والزول في الرقاد شقو البريحو بخبروا ويوم نتلاقي كل واحد بعرف الليهو الحكاية سخنت والجماعة ناويين اتكتلوا اديك العافية الغالي ابو علا علي مجهودك الرائع الغالي أبو شوتال صباحك خير الحكاية سخنت بي الجد عشان كده يا الحبيب طرق الشوتال و سن سكينك و هز ضراعك و نزل الحجبات لي تحت و أتحزم و ابقي جاهر الناس ديل ممكن يحتاجوا ضراعك يا الخزين التعديل الأخير تم بواسطة abu_ola ; 04-07-2007 الساعة 10:23 PM و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	04-07-2007 10:32 PM #22 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 وقام طه جاري في ضهر شيخ العرب ...... قام واحد من البطاحين اسمه احمد مسك طه وقال :- أقيف يا طه عندي نصيحه ليك ابداها العقدة الصعيبه العاقل بتعداها الشكريه كتره نحن ما نلداها انا عندى العرب بريّه اخير نفداها طه: خلاص يا احمد تراك بفكرك روح لود دكين وريه يسمع شكرك يديك مال كتير وقبيلتو ترفع ذكرك تصبح عمدة فوق روسنا تخلف حكرك (جأ عبد الله برضو قال لطه غايتُ اتعبو خالص) عبد الله: ليه احمد تهينو ، نصيحتو موضاراك موحق النقص إنت بتعرفو براك وكت بتسوى عوسك وما بتشوف بوراك نشاور ريّا امكن ريا مودايراك طه : صدق اللقالو خربانا البلد بكباره هديك ريّا اسألوها واعرفوا اخباره من غير السفر ما عندى تانى دباره نحن وانتو بيدى الحاله ما بنتباره احمد: يا طه المصاعب للقبيله تقودا مسافر وين مخلى النار وراك موقودا طه: انا السمتان جليس الردفولا عقوده حد السيف بقطع عقدتو المعقوده ما ولعت ناراً انتو تقعو فيها شن دايرين براى وانا نارى مدفيها أحلف ليك يمين دى الحله متقفيها باكر من صباحى قبل يحس الفيها عبدالله: نحن كبار اخيرلك ترضى بعرفتنا مع الشكريه احسن نشترى الفتنا ندى ود دكين ريه ونكتل الفتنا ما من خوف ملاقات الرجال حرفتنا طه: من الفيها ما بزح ان تزحزح مره وان حيين نعود ان طال زمنا ومره عيش الدنيا ان كان يحلى وان كان مرة الزين ما بدوم والزول بموت فت مره عبدالله: وقت صممت ما ترجع وتسمع قولنا وسفرك دا محال ما بقبلنو عقولنا الموت ما بنخافو الخوف يمين مو هولنا بنعاين بعيد بنخاف بهادل عونا الشكرية بي سيوفن صغيرنا معتق ما بنابا القتال ونقول جرحنا اتفتق مرحبتين حباب الشر محل ما بتق تنقد الرهيفه إنشاء الله ما تدلتق طه: الشكريه غوش واكتر علينا حساب وضيف ليهم جميع ما بتربطو الأنساب أنا لغارتم حسبت الف حساب لو تتعدوا رأى يمين عذابكم ساب بجيكم حمد ومعاهو الرجال تابعاهو قولولو طه طفش وريه معاهو كيف نرضى السفيه الادبه ما برعاه يرفض طلبك ات ونحن كيف نسعاهو ابقوا قصادى وحدى القبيله محايدة عقبال من رجع فوق الخسائر عايدة وان كان دارنى انا ما بترجع جموع الزايده وان حصلنى قط ما اظن يعود بفايدة عبد الله: ما بقيف ودكين واصل السرج ملعوق وفى دربك بسوق واياك يا طه ملحوق وات صنديد تصد الميه ما ممحوق بنخاف كترتم ويد الرجال بتحوق طه: ليه خايفين علىّ الدنيا عيشا مخاطر الواجب نسوى ونرجى ستر الساتر فى وداعة الكريم الليله فى نيتى خاطر يا دار ريّه ما كان الفراق بالخاطر كفايه مع السلامه انتهيت خلاص غير الشوره دى مالينا تانى خلاص فى نيتى حرير الدكب القصاص ما بخاف ودكين ان جانى بالرصاص قام مارق منهم وساق بت عمه ماشى بيها طبعاً لارض الجعلين..ماشى للملك نمر يوريه على ان نسيبك دا جاى يقلع منى بت عمى -قام مارق- بعدين احمد قال لعبد الله أحمد: عم عبد الله خبرك هذا شيتن فاجع كيف بنطاوعه من بيناتنا يطفش ناجع عبد الله: سمعتو كلامو من الفيها ما متراجع وفى الشىء الشايفو غط ب هينة ما بيعود راجع أحمد: نركب نلحقو نخليهو يمشى براهو ؟؟ عبد الله: شورة القال اخير ما نلحقو ونبراهو العاقل بحسب للتجى متافراهو بنفكر على القدامو والبواراهو أحمد: فوق السقوط قط فى ظنى ما يخلوهو كيف موقفنا ساعة يلحقو يكتلوهو عبدالله: ان وقع القدر ما بتقدرو تصدوهو ود وقتو الكلام اسع اخير خلوهو بعدين ساق بت عمه و قاموا ماشين لي شندي وفى الطريق كان بحجى في بت عمو و بقول ليها درقى يكركب كمه رُكبى يشيل دى الهمه أصلى بطرز لمه منى تحود الأمه جملى يكسر الغرقه سيف يحل من كربة قلبى سنين تربة ما بتدمانى الغربة يا ريّه الحلم ما شفتى كيف اتهول واتفسر براهو وبالشين علينا اتأول داخل راسى فكراً منو ما بتحول بكتلو ود دكين ان كان قرب وإن طول ريه: اسود ود دكين باسمو ما تحجيبنا هو الفرقنا قمنا من البلد هجينا عقب فى دار جعل تانى الخراب ما بجينا ما بسوى الرماد المك نمر بحجينا يسكتو شويه قامت ريا قال لى طه ريا : ماك شايف الدرب طه: ما شيهو بكرعىّ تلات ايام وضحى وكان معاى سعيه كيف يلحقنا زول شندى ومعاه معيه قبيلة دار جعل محميه فيها اسودا تقدل بالكارم ديمه وحاقدا حسودا رأس المك نمر كل القبيله اسودا ركازة القبائل فى السنين السودا بكره نجيه وسيفاً يجيك بولادو العز والكرم من الكبار تيلادو ما أظن ود دكين بشينه يوطا بلادو ما خد بت اخوه شمه ام اولادو ان ودعتك المك ما بخاف المتلو اهون من شراب المويه عندى اكتلو وارجع للبطاحين تانى وراينا نفتلو والشكريه تقيو غير حرب ما بتلو يا ريّه البطاحين أصبحت محقورة على الشكريه دايما سارحتم معقورة ما بتقال عز وتعيد مكان وقورة إلا تعربد الغاره وتقضى صقورة ريّا: فى داب الشديدة ابقالنا قوم دربنا بوصفك دحين من شندى نحن قربنا ما بنفتق عشنا بالفتقه دى نفرقنا ما بنوم الرجال امكن يمسكوا دربنا طه: يسمع حركه ريّا: شد ديل يبقى رعاويه طه: حركه صُهب دا ركوب سروج مو رعويه وقربن مننا وفى ظنى ناسها شويه وكان ناس فزع ما بجيبوا حتى ضويه ريّا: يا هم ناسنا خمسه عقاب رجال'' وينو بتشوف ودكين برز براهو هوينو طه: الشىء البينا نحن سعينا لتهويلو وضايقنا الصعج ما أظنو يعود لعويلو الناس المعاهو عرب صعيد يا ريّه ما اولاد عم ديل والله ما شكريه معروفين تمام فى كل بلد وجريه كان حفرولو بير ولقوه شجره ضريه عارفين ود دكين ما بهم بخيل وجمال بكتلنى وبسوقك وهم بسوقوا المال وبكتلو ود دكين ودى الطانها فى فكرى بتشوفى الفضائح المابجيك من شكرى الشكريه فرسان ومستحقين شكرى دا الصح قلتو ليك انا لا بخاف لا مكرى ريّا: يا طه استعد الناس عنونا عديل طه: وين شفتى القطاع بتسوى هم قُديل بضاير العوقه اخوك الما بهم من ديل براك بتشوفى ياما اشبعهم من بهديل و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	06-07-2007 07:54 AM #23 ابوشوتال الملف الشخصي مشاهدة المشاركات عضو مميز Array تاريخ التسجيل Dec 2006 المشاركات 454 صدق القال خربانة البلد بكبارة وانا السمتان جليست الردفولا عقودا تنقد الرهيفة انشاء الله ما تتلتق ( انشاء الله ما تتلتق) الشوتال مطرق وجاهز يمين اعدل الصف محل ما يميل واقعد عافية التعديل الأخير تم بواسطة ابوشوتال ; 06-07-2007 الساعة 10:42 PM بسال عليك نور الصباح الم العيون بعد السهاد شمس الشروق وكتين تشع تحمي الرقاد واسرق خطاي رغم الظروف والقاك سراب وقت الميعاد رد مع اقتباس


	06-07-2007 10:33 PM #24 abu_ola الملف الشخصي مشاهدة المشاركات عضو فضي Array تاريخ التسجيل Jul 2006 المشاركات 2,236 هنا شيخ العرب وصل جنب طه و قال ليهو أتعبت الزمل حفيت وراك مستبقا احسن ليك تفوت ريّا وتحل الرفقا طه كان كل القبايل جات علىّ منطبقا أفوت من ريّا يا شيخ العرب ما بتبقا شيخ العرب البلاقي القبايل ما بسوى سواتك خربت قبيلتك يا طه وين داواتك تانى بعد جريك البشهدنو اخواتك فاقت الثبات فارق درب ابواتك ابواتك تلوباً كانوا باعون طايل ايدن للرقاب تحجا وتعدل المايل سيف باعك كراعك ما بتخاف قول قايل أفو يا ود حسين فيك الشُراد مو خايل أبقى لى نسيب أحجاك وآمن روعك وقول الدايرو فى المال اجيك فى طوعك من هذا الغرور يا ولدى اولى رجوعك طه يا شيخ العرب جربت لحسة كوعك كل ما اوغرك فى الشينه اراك تتقدم اتعرميت خلاص ان صبرى حصنه اتهدم اصلو البينا ما بتنفك من غير دم الكاينه تكون بوراك مافى ندم واحد عربي جاي مع شيخ العرب قال لي طه أصلو الخملا ما بسمع نصيحة الهادى اول خفنا ليك من البهادى الهادى يا طه البهدّد الما بضرب الوادى يمشو على الرجال يجرى مقبل غادي طه هسع تشوفو ان كان صح وان كان تهديد هسه وصلت الميس دحين حديد يلاقى حديد ينبرش الطرور ويثبت الصنديد خليه المضا لاقى البجيك جديد واحد برضو مع شيخ العرب قال لطه نافز فيك قدر يا طه انت عميت وفى المروق وقعت عترت ما سميت من الجاى قضيت وبقيت خلاص زول ميت فى تركتك كفاى انا بركب اب سوميت اب سوميت دا جمل طه طه الداير الغنى يعمل حساب لفقرو وكعب الزله وين المتلى تكابرو اب سوميت خلى الليله سيدكم اعقرو وين تانى الملاج وكت يتلب صبرو شيخ العرب لم باقى الكلام ياطه بهمك سرّب جيتك استعد طه مرحب حبابك اقرب من قومت الجهل انا للقاك مدرب يا شيخ العرب الليله نجمك غرب وهنا وقع القتال ها ها ها ها..طه ضرب شيخ العرب جدعو والتفت على جماعتو قال ليهم طه: ترا شيخ العرب قبض الربح من تجرو واتوسد تقيله ان شاء الله ما بتصبروا انتو الشورة كيف عند الزمل بتحجرو صنقعوا دا السماء بطول والله بتجرو أحمد أدني يا عمر الروح فى ايد الخالق بجيها الضرب فى الدرقه ساسك غالب عمر عاين دا الخشيم دايما تنط متشالق ما تنزل عليه ات ماك بالغ طه ضربى على وصف البوصف عايز وفى قلب التلوب انا نايبي دايما غارز اسمعو يا طقش كما بجينى مبارز واحد منكم بضرب طرف ما فارز ترا اب سوميت اركب يا عمر سافرت قبيل وقت الكلام زىالأسد طفرت مالو دمك بهت متل التقول جفرت عمر من القلتو ليك انا تبت واستغفرت طه انا على حلف ان كان بقيتو سريه منكم انتهى قبال تجى العصريه جيتكم استعدو تانى مافيش رِيه وكلهم قالوا ليها هادى السيوف واقعين وراك يا ريه قام ريا قالت لي طه خلاص اعفاهم طه يا خضرة المفرهد فوق جروفه نديه على الواقع وراك انا كيف اشيل يديه حتى ان كان كتلنى اعفى ليه الديه دمى ومالى هيلك واقبليه هديه ريا رجال التابه انتو الستره تب ما فالكم اتأمنتم قوموا سوقوا جمالكم حتى مال ود دكين سوقوه يتبع مالكم نمشى فى حالنا واتو امشو فى حالكم الجماعه قاموا صوف اتلفت طه على ود دكين قال لريا طه زايله رقد دكين اسد القبيله الراعى كما ضايقنى هو ما كنت قطتو ضراعى ريّا تتأسفلو ليه كان داير يجزبو الراعى والنعلات حرام ما تضوقا تانى كراعى يعنى ان مات ود عمها دا للقيامه ما تلبس نعال طه موت المتلو نقصان للعرب فى الجمله كان رأس الجرارى وهو البقود الحمله اطرف فعايلو جسمي يقيف بعد ما يمله كما شويه كان داير يعمل العمله - نـــــواصـــل - التعديل الأخير تم بواسطة abu_ola ; 06-07-2007 الساعة 10:39 PM و ما من كاتب إلا سيفني* * * * و يبقي الدهر ما كتبت يداه فلا تكتب بكفك غير شئ * * * * يسرك في القيامة أن تراه رد مع اقتباس


	06-07-2007 10:59 PM #25 ابوشوتال الملف الشخصي مشاهدة المشاركات عضو مميز Array تاريخ التسجيل Dec 2006 المشاركات 454 اتوسد تقيل انشاء الله ثابت اجروا صنقعوا دا السماء بتطيروا ولا بتجروا الداير الغنا بعمل حساب لي فقروا شيخ العرب جربت لحسة كوعك حديد الاقي حديد انبرش الطرور واثبت الصنديد ( ياخوي الحكاية شنو مافي حجاز) رجال التابة بسال عليك نور الصباح الم العيون بعد السهاد شمس الشروق وكتين تشع تحمي الرقاد واسرق خطاي رغم الظروف والقاك سراب وقت الميعاد رد مع اقتباس

الإنتقال السريع المنتدى الثقافي الأعلى

« الموضوع السابق | الموضوع التالي »

المفضلات

المفضلات

ضوابط المشاركة

لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

أكواد المنتدى متاحة
الابتسامات متاحة
كود [IMG]متاحة
[VIDEO] الكود هو متاحة
كود HTML معطلة

قوانين المنتدى

الساعة الآن 09:44 PM

Powered by vBulletin® Version 4.2.5
Copyright © 2025 vBulletin Solutions, Inc. All rights reserved.
Translate By Almuhajir

ودمدني