حكمت المحكمة حضوريا ......

[عثمان جلالة]

انتهكت سيارات الشرطه في صباح ذلكم اليوم قرية (الغلابه) ... وسط ذهول ... ودهشة قاطنيها ... بعضها توقف في تحفز واضح أمام منزل العمده بينما ... ذهبت الاخرى وحاصرت بيت عبد الرحيم (التربالي) ... لم يذهب الأطفال للروضه في صباح ذلك اليوم ... لم يسمع أهل القريه الطيبين (نشيد العلم) الصباحي ..من المدرسة الوحيده ولم يذهب المزارعين إلى مزارعهم ... ولا أوقدت النسوه .. نارا لعمل الشاي .. الكل في حيره ودهشه وخوف.... وتعود تفاصيل الأحداث إلى التالي:ــــ

يمه .. يمه ... يمه .. صاح محمد ود عبد الرحيم التربالي ... بأمه التي كانت مشغوله في الترحاب بمريم ... ست الودع .. أجابته في غضب .. مالك يا محمد ما كنت نايم في امان الله .. الجاك شنو؟ أجاب محمد .. والله شفت لي حلم عجيب .. خير ان شاء الله خير .. عالجته في لهفة مريم (ست الودع) .. أحكي لينا .. شفت شنو؟؟؟؟
شفت يا أمي .. أنا راكب عربيه سمحه ... سماح .. وقدامي عربات كتيره .. ومواتر .. وصورتي معلقه في اليافطات .. والشوارع .. والناس كلها ... تقول .. انت القايد يا محمد انت القايد .. ضحكت أمه ... أجي ... جد لينا .. بتدور تبقى .. ريس ...يا ولدي ... ان شاء الله تبقى ريس .. كدى أسي .. ألبس هدومك .. امش على مدرستك .. والشاي فوق .. التربيزه .. بركة من صلى وقال يا الله .. تلقى الفي مرادك .. يا ولدي .

أبوي العمده .. ابوي العمده ... مالك يا مريم .. جايبالك خبرا شين .. أجابها العمده في انزعاج ردت مريم .. كان ما شفت محمد ود عبد الرحيم التربالي ... بدور ابقى رئيس .. نهرها العمده كيفن كلامك ده .. انت مسدوده .. ود عبد الرحيم التربالي .. بدور يبقى رئيس ويحكمنا .. والله يا هو آخرالزمن .. أجر آآجنا ... بسراع نادي عبد الرحيم التربالي ..

العمده : عبد الرحيم العدمان ... صحي ولدك بدور ابقى رئيس
عبد الرحيم : أبوي العمده .. الجنا .. حلم... بس .. بدورو تسرقوا أحلامنا كمان...

العمده : سمح كلامك ده بتشوفو .. داير تعارضني وتعارض الحيكومه .. أنا كان ما سجنتك انت وعقابك كلو ما أكون أنا العمده .. شيخ البلد

المكان : محكمة المدينة ... في محلية قرية الغلابه
الحضور : قاضى المحكمة .. العمده .. عبد الرحيم التربالي .. واسرته في قفص الاتهام

القاضي : عبد الرحيم أحمد (التربالي) .. حكمت عليك المحكمه .. بالجلد .. 50 جلده والغرامة 500 جنيه.
القاضي : محمد ود عبد الرحيم ... حكمت عليك المحكمة .. بمصادرة حلمك .. وكل احلامك حتى اشعار آخر ..... رفعت الجلسه.

(يابا ... يابا .. صاح ... محمد .. شنو ياولدي ؟ ... المعنى يا أبوي أنا ما أنوم ... أجاب عبد الرحيم وقد خنقته العبره .. لا يا ولدي..... نوم ... لكن ما تحلم.........)

[خالد النور]

حتى الحلم دايرين إضايقونا فيه والله دى مشكلة كبيرة.....

[عوض صقير]

أخى
جلالة

الكراسى مغرية
والعمدة فى سبيل حفاظه على هذا الكرسى ممكن يعمل كل شىء
وزى ماقالوا
الغاية تبرر الوسيلة

[مدنيّة]

فعلا الا الواحد ما ينوم
عشان ما بنقدر ننوم وما نحلم
!!
وربنا يصلح الحال

[معتز الريح]

جلالة المبدع ..
نقول شنو بس ؟ ..
العمدة بسببو ذي ما ذكر مولانا عوض صقير ..
القاضي سببو شنو؟ ..
يعني تاني ما يشوف الحلم ..
والله إلا يشفروا ..

تخريمة : قالوا عايز تغير اسمك للحقيقي ..
ما تنسانا في السماية ..

[مدنيّة]

تخريمة : قالوا عايز تغير اسمك للحقيقي ..
ما تنسانا في السماية ..

انت الموضوع دا عندك فيه عمولة يامعتز !!

شايفاك شغال اعلانات سااااااااي

[هيثم عبدالعال]

أيها الرائع جلاله أسعد كثيراً عند معانقة كتاباتك
هناك أحلام مجانيه لمحمد أن يحلم بها كيفما شاء بشرط أن لا يتعدى بحلمه حدود واقع المكنكشين وإلا حوكم بالتعدي الجنائي .

[naz_imam]

العزيز الغالى جلاله
شكرا على ابداعاتك والمشكلة فى ناس بطلوا النوم علشان مايحلموا عارف الحصل شنو بقوا احلموا صاحين فما الحل؟؟؟؟؟؟؟؟؟؟؟؟؟

[محمد الفاضل]

رائع يا جلالة

[mahagoub]

القصة لها عدة جوانب تعالجها وليس الحلم فقط يديك العافيه ( وحمدوا فى بطنه )

[عثمان جلالة]

حتى الحلم دايرين إضايقونا فيه والله دى مشكلة كبيرة.....

أبقى عشره على حلمك يا خالد أخوي .. خليهو مشفر ... بأرقام سريه .. يقومو يصادروهو منك كدي اتخيل نفسك بدون احلام !!!!!!!

[عثمان جلالة]

أخى
جلالة

الكراسى مغرية
والعمدة فى سبيل حفاظه على هذا الكرسى ممكن يعمل كل شىء
وزى ماقالوا
الغاية تبرر الوسيلة

أستاذنا عوض صقير ... السلطة تفسد النفوس .. وبالذات بطانة السوء .. لكن هل تنفع الميكافيليه في ديننا الحنيف ؟؟؟

[عمر البشير]

ده البخوف عديل، والله انا مرات صاحي يا جلاله بحلم عندي عربية وكده....... الباقي ما بتموا بعدين تقوم تدور المحكمة....

همسة:
يا جلاله يكون العمده ده ابو ود المطامير.

[ابوندى]

الرائع جلالة
ما اروع القصة وما اروع رمزيتها وزى ما قال عمنا محجوب حمدوا في بطنه
وتسلم

[مرتضى يوسف العركي]

الرائع جلالة
لا احلام لدي .... ولا نوم حتى فلربما لونمت ولم احلم بعد لعالجتني بالموت محكمة وخلي الكلام ده في سرك .

[صابرحسين]

مبدع ياجلالة ، وهي في روعتها تمثل لوحة تشكيلية كل منا يراها ويفسرها بطريقته الخاصة ، وهذا ما جعلها رائعة ، بس المشكلة في مريم الجابت الخبر الشين للعمدة ، والله يكفينا شر الناس البيجيبوا الخبر الشين ؟ 0

[مختار بازى]

الروعـــــــــــــــــــــــــة فــــــــــي انك بعيد والناس دوام تتشابـــــــــي ليك...

الرائع جلالـــــــــــــــــــــة امتعنا ... فنحن لا نشبع من كل ماهو رائع وجميل...

سلمت يداك,,

[ابوزيد محمد نور]

اسعد الله ايامك ياجلاله والله مافى اجمل من كده قصة جميله وارجو المتابعه على هذا النهج
لك التحية والود لشخصك الغالى

[صديق بلال]

تسلم يا أخ جلالة... على هذه القصة الهادفة والتي تصور مدى جشاعة البعض الذين يتسلطون على خلق الله حتى في أحلامهم... وأيضا يعتقدون أنه لايحق لأحد سواهم أن يتقلد المناصب... أي هم علية القوم والآخرين أراذل القوم... حتى لايحق لهم إبداء الرأي... فعليهم السكوت والصمت والتبعية للآخرين...
فتشكر يا جلالة على هذه القصة القصيرة في حدود كلماتها... والعميقة في معانيها

[عثمان جلالة]

فعلا الا الواحد ما ينوم
عشان ما بنقدر ننوم وما نحلم
!!
وربنا يصلح الحال

الرائعة .. بحدود الوطن .. ام آيه .. ليك الحق تنومي وتحلمي قدر ما هو متاح من الاحلام .. لكن استعيني على قضاء أحلامك بالكتمان

[عثمان جلالة]

جلالة المبدع ..
نقول شنو بس ؟ ..
العمدة بسببو ذي ما ذكر مولانا عوض صقير ..
القاضي سببو شنو؟ ..
يعني تاني ما يشوف الحلم ..
والله إلا يشفروا ..

تخريمة : قالوا عايز تغير اسمك للحقيقي ..
ما تنسانا في السماية ..

الحبيب ود الريح ... نقول .. دعوا الاحلام تنمو ... والعمده والقاضي دايرين في فلك واحد .. زي ما قال ليك أستاذنا عوض .. الغايه تبرر الوسيلة في سبيل الحفاظ على الكرسي .. وخدمات تشفير الاحلام .. جديده .. لكن أصبحت ضروريه .. مع العولمه دي

تخريمتين

السمايه ح نعملها عندكم في جده ... لأنو جده ... غير

[عثمان جلالة]

انت الموضوع دا عندك فيه عمولة يامعتز !!

شايفاك شغال اعلانات سااااااااي

والله الظاهر كده يا أم آيه .. ده مستنفر كل البوستات والتلفونات .. غيرو الاسماء .. غيرو الأسماء .. ده كلو هين لكن .. برضو السمايه .. علينا .. يعني خساره .. مرتين

[عثمان جلالة]

أيها الرائع جلاله أسعد كثيراً عند معانقة كتاباتك
هناك أحلام مجانيه لمحمد أن يحلم بها كيفما شاء بشرط أن لا يتعدى بحلمه حدود واقع المكنكشين وإلا حوكم بالتعدي الجنائي .

الغالي .. مستشارنا .. الروعه .. تفوتكم وين .. والمكنكشين ديل يا هيثم ... الظاهر نسوا ... لو دامت لغيرك ... لما آلت إليك .. وكلو في الهجايص .. على قولة أخوانا المصريين

[عثمان جلالة]

العزيز الغالى جلاله
شكرا على ابداعاتك والمشكلة فى ناس بطلوا النوم علشان مايحلموا عارف الحصل شنو بقوا احلموا صاحين فما الحل؟؟؟؟؟؟؟؟؟؟؟؟؟

سعيد أنا للغاية .. بشوفتك لى أحلامنا .. أبو ريم .. وربنا يكتر احلامك .. ويجعلها قابلة للتطبيق .. تعرف بقولو دايما بتكثر الاحلام .. عند الفقرا والغلابة ... لأنو في رغبه للتغيير .. ولا عشان شنو؟؟؟؟

[عثمان جلالة]

رائع يا جلالة

أيها العشق المتوهج .. لمدني ... السودان عموم .. انشاء الله دايما أحلامك .. بعيده .. عن أصحاب الكراسي .. ومليانه .. محبه وخير للناس .. وأظنك عارف إنو العشق .. أول ... طريق للأحلام .. وفي يوم يصبح الحلم حقيقة