ست الشاي
وقف في الصف لاكمال اجراءاته صف طويل وممل يشعر بانه لا يتحرك بعد ان مضت ساعات وصل الشباك
المواطن : السلام عليكم والله يا خوي واقفين لينا ثلاثة ساعات ركبينا ساحت عشان نصل لي الحجر الاسود شباكك ده من بعيد شايفنوا صعب المنال لاكن التنظيم مريح احسن شيء عجبني في شغلكم كلوا بي الدور. الموظف: يمسك ملف الأوراق بعدم اهتمام ويقول : عامل فيها دمك خفيف والله ضحكتني ، مالك مستعجل العجلة من الشيطان والتاكسي من الرحمن عشان فيهو مهلة قعاد وصبر. والله مع الصابرين.
المواطن : مستعجلين كده شويه يا ابو الشباب انت عارف مشاغل الدنيا الواحد عايز اخلص كم مشوار كده ،
الموظف : طيب وأنت دفعت المصاريف المطلوبة ؟
المواطن : أيوه يا أستاذ ، دفعتهم في الخزنة وده الإيصال.
الموظف يهمل الإيصال ويقول : بس انت لسه ما دفعته للاستاذه رشيده ... معاها ابتسامه(رشويه)!
المواطن : رشويه دي شنو يا اخوي مكتبا وين وأنا امشي اكمل المصاريف ؟
الموظف : يا الاخو اسمع ما تاخر الناس ديل وراك وما ترفع صوتك انت جديد اول مره تجينا شيل ورقك ده امشي خلص المصاريف بعدين تعال لي اسال بره من استاذه رشيده بقولوا ليك يلا خلينا نشوف مصالح الناس الثانيه ؟
....حاول اسأل الجماعه الخلفوا في الصف لم يجد اجابه كل ما اسأل واحد اقول ليهوا وراء فضل متابع وراء دي لما وصل اخر الصف بره المكتب عاين يمين عاين شمال شاف ست شاي تحت ضل الحيطه قال امشي اسألا عن مكتب رشيده .... ست الشاي ما اهتمت بيهوا قابلتوا بي برود تنفخ في الرماد من المنقد وفي يدها قطعة قماش وكبايه تجلي فيها.
المواطن : معلش ، أصلي لسه اول مره اجي هنا ما عارف الإجراءات .. ممكن تقولي لي الاستاذه رشيده مكتبا وين.
ست الشاي تلز ليهوا بنبر بي كراعا وتقول: في واحد ما بعرف رشيده دي اهم زول في المصلحه دي والله تمام انت جديد.
المواطن : والله حاجه عجيبه انا دفعت الرسوم كلها ادوني الايصالات ... تاني ادفع شنو ما عارف والبدفعوا ده بي ايصال ولا ادفع وين ... بعدين الجماعه قالوا الرسوم كلها عشره الف وانا دفعتها كلها في شنو تاني. .. كدي كبي لينا كباية شاي بعدين نشوف رشيده .
ست الشاي: ايواااااااا كده يا دوب عرفته الخط الصاح انا قلته انت زول بتفهما هي طايره بعدين كباية الشاي بصلح ليك راسك تخليك تخلص بي سرعه. .... بعد ارتشف كباية الشاي دخل يدوا في جيبوا طلع قروش كباية الشاي اداها لي ست الشاي.
ست الشاي : أنت عبيط يا استاذ ولا بتستعبط ولا دمك خفيف ده شنو ؟
المواطن : انا عملت شنو عشان تقولي لي كده ؟ يعني عشان اول مره جيت تهزئوني كده القاها منك ولا من الحمار الجوه داك ؟
ست الشاي: أنت شكلك أول مرة تيجي هنا ما فاهم حاجه زي بتاع اصدقاء الشرطه خالي زمان وسواق اللوري.
المواطن : ليه بس ؟ يا اخت والله انا فاهم كل حاجه والفايل بتاعي مظبط ميه ميه والرسوم دافعا... بعدين تعالي اصدقاء الشرطه دي شنو... انتوا بتقولوا كلام غريب الشرطه كمان عندها اصدقاء.
ست الشاي: اصدقاء الشرطه ديل زمان كانو الطلبه في الاجازات بتاعين الثانوي بدربوهم يعني زي الكديك تدريب عسكري... كان ما فهمت زي الدفاع الشعبي ... بخلوهم اساعدوا ناس الشرطه في الاعمال البسيطه زي ناس شرطة المرور.... خالي انا كان مع اصدقاء الشرطه موقفنوا في صينيه مرور ميته كدي جاء واحد من ناس القري شايل ليهوا مريض في لوري طوب والمريض تعبان لاحقين بيهوا المستشفي وقف اللوري نزل السواق قال ليهوا لوريك ده كلوا مخالفات.... شغل الاشارات القدام صاحب اللوري قال ليهوا ما شغاله..... قال ليهوا طيب شغل الوراء قال ليهوا ما شغاله بعدين اعمل العايز تعملوا بس بي سرعه الراجل فوق ده عايز اموت هي مخالفه ولا قطع رقبه.... خال قال ليهوا طيب جرب خطرات الفرامل قاليهوا ما شغاله.... طيب تعال معاي سايقوا بعيد من اللوري.... سواق اللوري زهج من خالي اصدقاء الشرطه قعد اكورك يا جماعه حلوني من الزول ده .... خالي قال ليهوا والله الليلة تكورك للصباح مافي زول احلك مني كان احلك جيبك الكبير ده.
المواطن : والله خالك ده زول ما بفهم الرشوه بشيلوها كدي .
ست الشاي : ايواااااه ، كويس انت كده جيت في القاطر ، كل سنة وأنت طيب ، دق جيبك للراجل الجوه داك خلي امشي ليك امورك بدل تضيع يومك ساكت .
المواطن : اه ، يعني عايزه اديهوا رشوه طيب اديها ليهوا كيف مع الزحمه دي الزول ده ما بخاف ولا شنو زي اصدقاء الشرطه خالك انا كده فهمت.
اثناء النقاش جاء المراسله لي ست الشاي قال ليها رشيده قالوا ليك اليوم كيف الشاي سكرك حلو ولا مسيخ..
المواطن: بالله .... انتي استاذه رشيده وبدلعوك بي رشويه طيب ما تقولي من الاول يا رشويه كده فهمت الموضوع خلاص.... بس سؤال رشويه ده اسم الدلع ليك انتي و لا اسم الدلع للرشوه..
رد مع اقتباس
المشاركة الأصلية كتبت بواسطة عباس الدسيس
المفضلات