نورة والحلم المدردح00

[الفخيييم]

احدي روائع الرائع جدا محمد الحسن سالم حميد00


هي00اقيفن00نورة فيكن
نورة نقاحة الجروف00
نورة حلابة اللبيني00للصغيرين والضيوف
نورة ساعة الحر يولع00تتقلب نسمة وتطوف
تدي للجيعان لقيمة
وتدي للعطشان جغيمة
والمخلي الحال مصنقر00
في تقاة الليل تدنقر00تدي لي باكر بسيمة
تكسي للماشين عرايا وفوقا انقطع هديما
ماعرفتن نورة أنتن00قولن أنتن شن عرفتن
نورة بت الواطة أخيتي00نورة اخت كل الغلابة
نورة حاحاية الشقاوة00نورة هداية الضهابة
الاراضي الياما ادت00نورة بقت من ترابا
وماشي في الاعماق سحابا
مشتهنها00والله جابا
للجنوب طبلا يهدهد00لي مشاعر ناس تعابة
وللشمال طنبور يسكت00دمعة الميتين كآبة
ماعرفتن نورة أنتن00قولن أنتن شن عرفتن
نورة عايز تقرأ قالت00فوقا حيطة الدنيا مالت
ختت الكراس وشالت00منجلا صالت به جالت
لامن انجرحت به شالت00للتراب فوق ايدا كالت
ومرة يوم في الدونكا لدغت
جاء الفقير بالليل حواها
ويوم ملاها الهم قطايع00جاء البصير بالنار كواها
ونورة ماقدرت تمانع تقنع الناس المعاها
ومرة شافت في رؤاها طيرة تاكل في جناها
حيطة تمنعني وتفلع00في قفا الزول البناها
في جنينة سيدي سمعت00تمرة تصقع للوراها
الارض لابد ترجع للتعب فوقا ورعاها
شافت النيل موجو لاها
الخليقة بقت ألاها
الشمس طبقت ضحاها
نار عقاب انسان مكسر00فوق تكيلات متاها
وضو من الله00رهاب مكتف في وتيد الليل معاها
بين حضر بلدا وخلاها00فسرت للناس رؤاها
وقالو جنت ومو براها
ونورة زادت فوق شقاها
وصدت الايام تخش
تبني لي عصفورة عش
في السواقي تشوف عزاها
لما شوقا يسوي وش
تسقي تزرع00تسعي تصنع
للنهار في الليل تخش
عرفت الشقا والشقاوةالا ما عرفت تغش
شايلة طولة البال من الله00ومن اراضينا الاثارة
وماشي تكدح طول نهارا
وترجي لما الليل يفلل
تسرق المي عشان خدارا
عشان صغارا
ولما ترجع لي ديارا00تنزف احلام الفقاري
من عوينات الحياري
لي غبار الحال تقش00فوقو للآمال ترش
نورة تقعد صاحي تحلم00بي بيوت بي نور ودش
وبالمحبة تشق دروبا00ولي قلوب الكل تخش
نورة تحلم بي وجود
ما مشت بينو القيود
أفضل أفضل بي كتير00بي وطن من غير حدود
نورة تحلم بي عوالم00زي رؤي الاطفال حوالم
لا درادر لا عساكر00لا مظاليم لا مظالم
نورة تحلم00ولما تحلم نورة ترجف
ولما ترجف00نورة تحلم00
ولما ريح الواقع المر00لي عشيش احلاما ينسف
نورة تنزف
ولما تنزف بالا يهتف00يوم حا تنصف يوم حا تنصف
وتبدأ تحلم00ولما تحلم نورة ترجف
ولما ترجف نورة تحلم
صاحي تحلم00وصاح بتحلم
صاح بتحلم

[أشرف صلاح السعيد]

اخى الفخييم عوافى..
بلا مبالغة غدوت بلا تفكير الج نوافذك واعرف سلفا أن كنزا ينتظرنى بها..
يالك من منقب للدرر بعصر العولمة والركشة والقرد..
سلم ذوقك وسلمت منفاضا لروائع الزمن الجميل..
شكرا لك..

[ابومدين]

رائع يا فخيم روعة مبدعنا محمد الحسن حميد

[الفخيييم]

اخى الفخييم عوافى..
بلا مبالغة غدوت بلا تفكير الج نوافذك واعرف سلفا أن كنزا ينتظرنى بها..
يالك من منقب للدرر بعصر العولمة والركشة والقرد..
سلم ذوقك وسلمت منفاضا لروائع الزمن الجميل..
شكرا لك..

بصراحة كده ده شرف عظيم لي
اشادة من رجل قامة مثلك يا ودالسعيد
عاجز عن شكرك00

[الفخيييم]

رائع يا فخيم روعة مبدعنا محمد الحسن حميد

الروعة مستمده منكم يا ابو مدين
لك خالص الود والتقدير00

[الطريفى]

انها لدرة من درر الرائع دوما محمد الحسن سالم حميد وروعتها جات منك يافخييم سلمت والله ورجا لاتحرمنا الروائع 00ودمت

[الفخيييم]

انها لدرة من درر الرائع دوما محمد الحسن سالم حميد وروعتها جات منك يافخييم سلمت والله ورجا لاتحرمنا الروائع 00ودمت

الطريفي زول نصيحة00
الروعة منك انت يا الطريفي
لانها استوقفتك والروائع تستوقف الرائعون امثالك
لك شكري وتقديري علي مرورك00

[فراس]

اخي الفخيم
والله من سماك الفخيم لم يكذب قط لك كل الود وانت تتحفنا
في كل يوم بماهو جميل واصل في نثر هذه الدرر والروائع
تسلم