قِراءة ...حُرة

[الملكة اسماء ( ام محمد )]

صلوا على الحبيب

ماعارفة اقول شنو لكن ...
عين ماصلت على النبي ... صابتكم

فجاءة حسيت اننا في نص عاصفة وبحر عاتي وين ماموجه مودينا ماشين !!!
اها وبعدين ؟؟

صراحة استغربت جدا جدا جدا جدا
وماعارفة هل هي صُدفة ام شي مقصود وممكن جدا تبداء خيوطه بسيطة ونتعمد نحن نسج شبكة كبيرة من ابسط خيوطها ونكون مع الاسف الشديد اول فرائس عنكبوت عملاق نحن البنربيه لحد مايبقى اكبر مننا وبحتاج لتغذية مضاعفة فيقوم ياكلنا نحن بدووووون مانشعر
عارفين العنكبوت دا شنو ؟؟
الخلافات
وقالوا ويكفينا الله شر القوالات
اختلاف الراي لايفسد للود قضية

ااااي نعم لسه الناس رابطة احزمة الامان وماسكة اعصابه ومتفاهمة وعارفين هم بقولوا في شنو ؟
لكـــــــــــــــــن ....

هل ياترى في زول سال نفسه : نهايتها شنو ؟؟

احتمال كبير جدا نكون ماعارفين ابعاد موضوع بديناه
واحتمال كبير برضو نكون متوقعين اسوا الفروض

لكن غالبا
وبدون مانشعر
بنلاقي روحنا ..ضيعنا شي جميل جدا
وهو سبب لمتنا وونساتنا الحلوة وكلماتنا الحنينة الطالعة من القلب
والشي دا هو ..دم نقي جدا جمعنا كلنا تحت مظلة وطن واحد
اتعودنا مانخلي زول من برا يجي يعكر صفو دمائنا الحُرة النقية
والغلط الكبير نكون نحن برانا الساعين لاراقة تلك الدماء

ممكن تقولوا انا مكبرة الموضوع
لكن لو عرفتوا السبب ممكن تعذروني

السبب اننا ومن مدة ماقصيرة ابدا ..البنقوله بنعيده
وبنزرع في شوك في سكة المفروض تكون خضراء

ليه بنتسرع في احكامنا ؟
ليه بنسعى للبحث عن اجابة كل اسالتنا في اسرع وقت ممكن ؟
ليه مابنعذر زولنا قبل نتفاجاء بانه فعلا معذور ؟

حبوباتنا علمونا ان الكلمة المرة بتقعد وطعمها زي العلقم بكون عالق بذاكرة حاسة تذوقنا

ح يحصل شنو لو قعدنا نتآمل بهدوء تااااااام ودرسنا ابعاد كل المواضيع ووضعنا نفسنا محل الطرف التاني ؟

فجوة
تتسع
دون ان نشعر
والغرباء يتفرجون ويضحكون على ابناء المدينة الواحدة حين يختلفون

منتدى ود مدني يعاني
واخاف ان اقول ( يحتضر )

هو بالنسبة لنا
بيتنا الكبير
ملاذ جراحات الغربة
ومهون اوجاع البعاد والهجر الاليم

ولانه بيتنا نحبه دائما واجهة
نسعى لتطويره
ترتيبة بهيئة تدل على ترتيبنا الداخلي الدقيق
( قليل من الجوطة لايضير )
ولكن بشرط
الا تطول مدتها
وللاسف طالت
طالت جدا جدا جدا

وخفت ضوء بيتنا الدافئ
ملتقى الاحباء في الله
مكان استكان روح المشتاق لارض المحنة

واخافنا الظلام في شوارعه المهجورة
الى متى ؟؟؟
الى متى ؟؟

تعبنا ونحن نتظر هطول غيث الفرح فجاءة
دون موعد
في غير اوانه
ليسعف ارواح ظامئة

ولا ندري الى متى ؟؟

[الملكة اسماء ( ام محمد )]

يلا يااجدادي ( سمعنا ان المنتدى فيه اجداد )
ويااعمامي
وياخيلاني
ويااخواني
وياكل الناس الجد بفتخر بانتسابي ليهم

تعالوا نلعن الشيطان ونتصالح
وننسى ولو لساعات معدودة ماقيل وقلنا
ونفكر في الساعات دي فيما قلنا اولا ( عشان نشوف هل حسبناها صح قبل نقول القلناه ؟)

وبعدها نخت نقطة
ونبداء سطر جديد

يبداء ببسم الله الرحمن الرحيم
ولاينتهي ابدا مداده البهجة فيه

التوقيع
انسانة يسكنها الحزن والسبب غيمة مُعتمة تغطي سماء منتدانا
امنية ورجاء خاص
اعيدوا لنا ابتسامة انتم السبب فيها

[أبوبكرحامد]

يلا يااجدادي ( سمعنا ان المنتدى فيه اجداد )
ويااعمامي
وياخيلاني
ويااخواني
وياكل الناس الجد بفتخر بانتسابي ليهم

تعالوا نلعن الشيطان ونتصالح
وننسى ولو لساعات معدودة ماقيل وقلنا
ونفكر في الساعات دي فيما قلنا اولا ( عشان نشوف هل حسبناها صح قبل نقول القلناه ؟)

وبعدها نخت نقطة
ونبداء سطر جديد

يبداء ببسم الله الرحمن الرحيم
ولاينتهي ابدا مداده البهجة فيه

التوقيع
انسانة يسكنها الحزن والسبب غيمة مُعتمة تغطي سماء منتدانا
امنية ورجاء خاص
اعيدوا لنا ابتسامة انتم السبب فيها

إبشرى يا أسماء ياهبة السماء للأرض تمنحها الضياء ، كل الخلافات إلى زوال ويمكث فى الأرض ماينفع الناس ، وبأيدينا لمدنى سلامٌ آتٍ

[فراس]

الف صلاة وسلام عليك ياحبيب الله

اختي اسماء

والله من سماك اسماء فهو علي حق

فانتي سامية في كل شي حفظك الله

وتاكدي ان ابناء ودمدني بخير مهما حدث

وكل مايحدث سحابة صيف عابرة وستعود

ادراجها ويبقي الوداد والاخوة وكل الحب

الذي جمع ابناء الوطن الواحد

دمتي بكل الخير

[التيمان]

سومه يا عثل انت زى الفل كلامك ينقط عثل

والله انا لو كنت المدير كلمه منك واحده من ديل اقفل ليك المنتدى

ولا اغيرو اعملو سومه دوت كوم

صلا ه النبى احسسسسسسسسسن

ممكن يا سومه توعدينى وعد انك تخلى بالك من نفسك

تيك كير

سيو ليتر

[moh_alnour]

حبوباتنا علمونا أن الكلمة المرة بتقعد وطعمها زي العلقم بكون عالق بذاكرة حاسة تذوقنا
ح يحصل شنو لو قعدنا نتآمل بهدوء تااااااام ودرسنا أبعاد كل المواضيع ووضعنا نفسنا محل الطرف التاني ؟

* أسئلة مشروعة و تحتاج إلى قراءة متأنية قبل الأجابة عليها
* جرح اللسان أشد و أنكأ من جرح السِنان ( الرماح )
* حاسبوا أنفسكم قبل أن تُحاسبوا ؟ و جد لأخيك سبعين عُذر فإن لم تجد فقل ربما له عُذر لا أعرفه
* عندما يمدح الناس شخصا ً قليلون يصدقون ذلك و عندما يذمونه فالجميع يصدقون
بوح شجي : أختلاف الناس رحمة و أتفاقهم على شيء واحد أمر مستحيل و لكني أكره جدا ً الإمعان في الخصومة و التمادي في الخطأ
همسة إعجاب : أختي أسماء ( ملكة القلوب ) ستظلين ملكة متوجة في قلوب أعضاء هذا المنتدى
ربنا يهدي سر النفوس فقد تعودنا أن تصفو الليالي بعد كُدرتها في منتديات ود مدني

[أشرف صلاح السعيد]

سلام تعظيم أسماء..
صلاتى وسلامى على الحبيب عدد ما أقدر ولا أقدر وما يقدر الله..
كلام المحنة سمح وبيدخل القلوب توش بلا إستئذان وحتى كثيرا بلا منطق غير تشبعه بالحب وكثيرا من الحب فى بعض الأحيان ما يقتل..
دعوتى أن نفرق الكيمان..كوم الخاص وكوم العام..بالخاص أى ما يؤثر على وحدى هين الامر والتسامح مطلوب وبلا حدود..اما بالاشياء العامة وابجديات نظم إحترام الآخر عقيدة وفكرا وحرية وفهما لا مساس بهم بل نقاش..ولعل النقاش إن لم يقود الى النهايات المرجوة بنتعلم منو كيفية ما ينبغى أن يكون عليه الحوار ونؤد بيننا "حوار الطرشان" الكل يتحدث ولا يسمع غير ما يقول والشهود يسمعون فقط الضوضاء..
"وأمرهم بينهم شورى" مبدأ لا يقبل المهادنات والعواطف لتخفيف دعواه ومحتواه..الشورى ترياق لكل إنقسام وتشرزم وإستعلاء وإستبداد..
وحتى الشورى يجب أن تقودها الكلمة الطيبة بأصلها الثابت وفرعها الذى بالسماء..يجب علينا ألا نعول على العواطف كثيرا فيما نعتقده ونؤمن بأنه ثوابت كالحريات والحلال والحرام ..وعلينا التحكم بأنفسنا وإنفعالاتنا "ولكم كثيرا ما تهزمنى" والتريث قبل التحدث " ومن أُوتى الحكمة فقد أوتى خيرا كثيرا" وعلينا نصر أخانا ظالما أو مظلوما باللتى هى أحسن وبروية حتى لا تسير الخلافات إلى مساحات الشخصنة والأجندات والنيات الغير سوية أو الخفية..
اللهم صلى على المبعوث رحمة للعالمين صلاة وتسليما تبلغه بها الوسيلة والفضيلة..
اللهم أجمعنا لما تحب وترضى وألا تجعل الدنيا أكبر همنا ولا مبلغ علمنا..

[الملكة اسماء ( ام محمد )]

وبأيدينا لمدنى سلامٌ آتٍ

السلام
ذاك ماننشد ونسعى له كثيرا

استاذي القامة
كم اسعدتني عودتك ونقاء قلبك
وصدقني كل مشكلة وليها حل
والمهم دائما لما تنتهي المشكلة مانكتشف اننا بنينا جبل من احساس الاهانة بداخل انفسنا

وبما ان الناس قلوبها نظيفة وطيبة وصافية زي اللبن وفي الاخر ح ترجع وتتراجع فنتمنى دائما تعود بذات النقاء والصفاء

اسعدني جدا مرورك المبكر على صفحتي التي اشرقت انوارها بمرورك الانيق

همسة : طبعا يا (جدو - عمو - خالو - اخوي الكبير ) اختار منها غايتو
لقيت ليك الناس دي بتحبك حب غريب وخوفتهم جدا بقرار انسحابك ( عندي معاك مؤامرة ) ماتجي تهددهم تنسحب تاني لو ماقفلوا كل المواضيع العليها الجدل حتى اشعار اخر بعد صفاء الاجواء المشحونة دي
على الاقل حتى نعطي الطرف الاخر فرصة يعيد قراءة كل المجريات ويرتب فكرته عن رد يعيد المياه لمجاريها

[الملكة اسماء ( ام محمد )]

وتاكدي ان ابناء ودمدني بخير مهما حدث

وكل مايحدث سحابة صيف عابرة وستعود

ادراجها ويبقي الوداد والاخوة وكل الحب

الذي جمع ابناء الوطن الواحد

تعرف مشكلة سحابة الصيف المرة دي شنو ؟
مشكلتها كتمت انفاس الابتسامات العفوية
وعكرت صفاء جو المكان في وقت فيه نحن احوج مايكون لوقفة صادقة وقوية امام كل التيارات الممكن تفكك صف طال بنائه

ممكن جدا نكون ماحاسين بالحاجة دي
لكن بلا ادنى شك ..هي موجودة ولو بمستوى بسيط

اخي فراس
اسعدني مرورك الانيق جدا
ومعك اتمنى ان تزول هذه السحابة بسرعة

[الملكة اسماء ( ام محمد )]

والله انا لو كنت المدير كلمه منك واحده من ديل اقفل ليك المنتدى

سامع يا admin

ولا اغيرو اعملو سومه دوت كوم

لا دي كبيرة والله , انت عايز تعمل لينا مشاكل والا شنو ...
طبعا فاتك ان الوالد العزيز admin زول بالوا طويل جدا وحكيم جدا ومابسهولة يتخذ قراراته بدون دراسة
اما انا فالله لايوريك ( بيني وبينك كان عملت بلوك لاي عضو عامل شنكبة عنكبة )

صلا ه النبى احسسسسسسسسسن

عليه الصلاة والسلام

ممكن يا سومه توعدينى وعد انك تخلى بالك من نفسك

عيوني رقرقن وقربت ابكي والله
طبعا خلي بالك من نفسك دي اجمل جملة يسمعها زول من شخص في العالم
ربنا يخليك ويبارك ليك في عمر احبابك ياراقي ( قول يااااامين )

تيك كير

ok

سيو ليتر

ان شاااء الرحمن
مشكورين على المرور

[أبوبكرحامد]

السلام
ذاك ماننشد ونسعى له كثيرا

استاذي القامة
كم اسعدتني عودتك ونقاء قلبك
وصدقني كل مشكلة وليها حل
والمهم دائما لما تنتهي المشكلة مانكتشف اننا بنينا جبل من احساس الاهانة بداخل انفسنا

وبما ان الناس قلوبها نظيفة وطيبة وصافية زي اللبن وفي الاخر ح ترجع وتتراجع فنتمنى دائما تعود بذات النقاء والصفاء

اسعدني جدا مرورك المبكر على صفحتي التي اشرقت انوارها بمرورك الانيق

همسة : طبعا يا (جدو - عمو - خالو - اخوي الكبير ) اختار منها غايتو
لقيت ليك الناس دي بتحبك حب غريب وخوفتهم جدا بقرار انسحابك ( عندي معاك مؤامرة ) ماتجي تهددهم تنسحب تاني لو ماقفلوا كل المواضيع العليها الجدل حتى اشعار اخر بعد صفاء الاجواء المشحونة دي
على الاقل حتى نعطي الطرف الاخر فرصة يعيد قراءة كل المجريات ويرتب فكرته عن رد يعيد المياه لمجاريها

ها ها هاى على قول عوض الكريم الخوّاض ، وكان قاموا فتحوا لى وماهببوهو لى أقبل وين وأحكى الوجعة وياتو خديد بيشيل الدمعه ، بعدين يا أسماء أنا ضهرى إنكسر وأنا برد على المداخلات لأنى أكره إجمال الرد لكل المتداخلين ، فمررت عليهم واحد تلو الآخر وأطلع للصفحة الأولى وأنزل على الثانية ، يادوب عرفتا عدم تشجعى على كتابة بوست والإكتفاء بالمرور على بوستات الآخرين.

جال فى خاطرى أن أسأل عن ملكة القلوب وسبب غيابها ، إلى أن علمت من مداخلة ود الجاك أن ملكة القلوب هى أسماء (بعدالتعديل - مش توولوا )

[الملكة اسماء ( ام محمد )]

* عندما يمدح الناس شخصا ً قليلون يصدقون ذلك و عندما يذمونه فالجميع يصدقون
مش بقولوا الخير يخص والشر يُعم
تصدق مصيبتنا في لحظات الغضب بننسى كل حسنات الطرف الثاني
بوح شجي : أختلاف الناس رحمة و أتفاقهم على شيء واحد أمر مستحيل و لكني أكره جدا ً الإمعان في الخصومة و التمادي في الخطأ
اها شفت الجملة دي ( كفيت ووفيت بيها جدا)

ربنا يهدي سر النفوس فقد تعودنا أن تصفو الليالي بعد كُدرتها في منتديات ود مدني

اللهم اااااااامين
اخي الغالي محمد النور

كن بالف خير

[ابوخالد]

أختى أسماء ...

لك كل الحق ... فلندع الخلافات جانبآ ..

ولنبدأ الحياة ...

أختى ...

لن يموت حقٌ ومن وراءه مُطالب ...

فعمل الخير حقٌ علينا ... ودينٌ

فى رقابنا ...

إذا لم ندافع عنه ... فعن ماذا نُدافع ...؟؟؟؟؟

كل ماصار عبارة عن تجارب وعِبر ...

نستقى منهاالصالح ... ونتجنب الطالح منها ...

ودعوتك مُرحبٌ بها ...

وقابلة للنقاش الجاد ...

فقد تعلمنا منك كيف يكون الدفاع عن الحق ...

تعلمنا منك كيف تكون الإستماتة فى عمل الخير ...

تعلمنا منك كيف تهون النفس لتسمو الغايات ...

تعلمنا منك أن من لا يُحب صعود الجبال

يعيش أبد الدهرِ بين الحفر ...

دعوتك للخير ولم الشمل ونبز الخلافات ..

وعودة الإلفة والتوادد ...

دعوة نبيلة من شخص نبيل ...

ولكن أُختى فى النفوس بقايا لومٍ وعِتاب ...

وبعضٌ من عذابات الضمير ...

فهلا سمحت لنا بالقليل من الزمن حتى نستطيع

لملمت أشلائنا المتبعثرة .. فوق صفحات الحروف ...


ولك الود كل الود أجزله

[الملكة اسماء ( ام محمد )]

"وأمرهم بينهم شورى" مبدأ لا يقبل المهادنات والعواطف لتخفيف دعواه ومحتواه..الشورى ترياق لكل إنقسام وتشرزم وإستعلاء وإستبداد..
وحتى الشورى يجب أن تقودها الكلمة الطيبة بأصلها الثابت وفرعها الذى بالسماء..

خلال متابعتي لمايحدث
قراءت مداخلة للسيد الadmin في بيان مجلس الادارة الاول
قال فيه الكثير , واستوقفتني منه جملة

.. قال رسولنا الكريم صلى الله عليه وسلم فيما معناه انصر اخاك ظالما او مظلوما فقيل له وكيف ننصر ان كان ظالما قال برده عن ظلمه.

وبعد ( جرجرة مواضيع وكلام كتيييييييير وتسالات جاء رد الاخت مدنية عن سؤال دار براسنا جميعا ..)...متاخرا بعض الشي

الموضوع ببساطه شديدة .. لو تم ادراج جمعية أبناء ودمدني الخيرية بالرياض باللوحة الرئيسية للمنتدى .. فسنفعل ذلك مع كل جمعية خيرية تطلب إدارج اسمها في اللوحة الرئيسية .. وسيصبح من الصعب فعل غير ذلك "لكي لا تتهم الادارة بان لديها خيار وفقوس" ..

هنا همسة خاصة جدا للادارة وعلى راسهم السيد الوالد الغالي ابو بكر ال admin
( ماكنتوا تقولوا كدا من الاول )

اللهم أجمعنا لما تحب وترضى وألا تجعل الدنيا أكبر همنا ولا مبلغ علمنا..

اللهم ااااااامين

استاذي الذي افخر جدا بوجود كلماته في دفاتري دائما
سؤال دار براسنا جميعا : هل عمل الخير يحتاج لاحداث ضجة اثناء تواجده ؟

انا معاكم في ان الادارة ردها اتاخر واستجابتها لتسالات الاعضاء طال انتظاره
ولكن : لايزال النقاش في هذه المشكلة قائم
سؤالي كان : الى متى ؟؟

كل مااتمناه في هذه المساحة ان ( نخت الكورة في الواطة ) ونعيد حسابها بجانب ايجابي اكبر .. ونشوف ابسط الكلمات الممكن تداوي جرح طال نزفه

استاذي :
لك في كلماتك الاف الرسائل
فهيا بنا نعيد صياغة كلماتنا لتكون رسالتها اشمل واعم
دعوة صادقة للتصالح مع النفس اولا ومع من دار بيننا وبينهم الكلام
ودعوة اخرى لكل عابر سبيل لمنتدانا ليعرف ان في هذه البقعة جمع الله اطيب خلقه
شعب اجتمع على قول كلمة الحق والاتفاق على مافيه خير البلاد والعباد

كن كما اتمنى لك دائما

همسة ركنية : بالله نسيتونا الركشة ونجومية الشهر
هسي انا ناوية اخش المنافسة بالبوست دا ( فاكر في كلام ببلاش )
تعظيم سلام ياقامة

[الملكة اسماء ( ام محمد )]

ها ها هاى على قول عوض الكريم الخوّاض ،

لكن هي ماكدا ياااااخ
كدا ( ههههههاااااااي ) تقريبا
لحد مايجوا اهل الاختصاص (عوض الكريم الخواض او العاقب او ود مدثر ) ويعملوا تعديل

وكان قاموا فتحوا لى وماهببوهو لى أقبل وين وأحكى الوجعة وياتو خديد بيشيل الدمعه ،

يفتحوا لمنو ؟
انت قايل نفسك هين
غايتو انا بضمن ليك انه وبما انه التيمان عملوا مظاهرات بسببك فاكيد المنتدى ممكن يحصل فيه انقلاب المرة الجاية

بعدين يا أسماء أنا ضهرى إنكسر وأنا برد على المداخلات لأنى أكره إجمال الرد لكل المتداخلين ، فمررت عليهم واحد تلو الآخر وأطلع للصفحة الأولى وأنزل على الثانية ، يادوب عرفتا عدم تشجعى على كتابة بوست والإكتفاء بالمرور على بوستات الآخرين.

اقول ليك الصراحة ( في ناس بخجلونا بكلامهم وتحتار ترد عليهم كيف اصلا )
وبصراحة برضو انا بطلت اعمل بوستات لاني كتير بحس باني مقصرة في الرد على المتداخلين خصوصا لما اكون مشغولة ويكون الرد على البوستات في اوقات بسيطة

جال فى خاطرى أن أسأل عن ملكة القلوب وسبب غيابها ، إلى أن علمت من مداخلة ود الجاك أن ملكة القلوب هى أسماء (بعدالتعديل - مش توولوا )

ههههههههههه
والله انا لامتاكدة ان تلات ارباع الناس ماعارفين اني الملكة وكان المفروض يعملوا لي ( سماية ) لكن تقول شنو ؟
قالوا البت عجزت عندنا وعملت عضو ماسي ( سماية شنو تاني ؟)

همسة : سوا كنت ملكة القلوب ( اسماء ) انا فخورة جدا بوجودي بين هذا الكم من الدفئ والالفة
فرجاء لاتحرموني منهما ولامن طلتكم الغالية

[الملكة اسماء ( ام محمد )]

لن يموت حقٌ ومن وراءه مُطالب ...

فعمل الخير حقٌ علينا ... ودينٌ

فى رقابنا ...
وفي هذه لن يختلف اثنان

فقد تعلمنا
تعلمنا منك
تعلمنا منك
تعلمنا منك أن من لا يُحب صعود الجبال

يعيش أبد الدهرِ بين الحفر ...

لحظة :
من تعلم من من ؟
ماهذا التواضع استاذي القدير ؟

ولكن أُختى فى النفوس بقايا لومٍ وعِتاب ...

وبعضٌ من عذابات الضمير ...

فهلا سمحت لنا بالقليل من الزمن حتى نستطيع

لملمت أشلائنا المتبعثرة .. فوق صفحات الحروف ...

ولهذا قررت الخروج من صمتي امام حوارات تدور في الجوار بينكم

استاذي
عودة لعذابات الضمير
كم اعجبتني هذه الجملة
وهي بداية ممتازة لمااسعى اليه واتمناه
فكم جميل ان نحاسب انفسنا اولا
لعلنا نجد فيما فعلنا وقلنا ماجعل العوالق بداخل الطرف الاخر اكبر واكثر مما بداخلنا

استاذي
( اجمل شي في الدنيا النقاش من اجل التصافي )
وبقولوا الما دارك ما لامك

ولكن .. كتر الطق في الحجر ....
وكلنا بشر سوا
ومنا من لايحب ان يناقش المواضيع وهي ( مسخنة )
يعني بحب يدرس القضية وابعادها بروية ويجينا برد ممكن جدا يكون هو مانتمنى وننتظر

لهذا اقول التماس العذر للاخر يحسب لنا ولايحسب علينا

وياسيدي ( اتناقشوا ..واتصافوا .. والعتاب محنة )
لكن رجاء :
ماتطولوا ( جلسات التصافي) وتطلعوا منها ولسه في القلب شي من حزن

وبصراحة كدا
وبدون مكابرة
انتوا من اطيب خلق الله
ناس ماشاء الله تبارك الله
تتشاكلوا وتتصالحوا براكم
(لكن ساعات بتطولوها وهي قصيرة)
وبصراحة كدا بتزعلونا منكم لاننا بنكون محتاجين نجي عندكم نفضفض ونريح اعصابنا ونحكي ليكم عن امانينا الطفولية
( معقووولة نجي نلاقيكم مافاضين لينا)
اها نقبل وين ؟
نمشي لمنو ؟
اذا كان بيتنا الكبير مااحتوانا في لحظات زي دي , البلمنا منو ؟
يااااخ ابكي ليكم يعني ؟؟

ولك الود كل الود أجزله

استاذي واخي الغالي : يوسف ( مش برضو دا اسمك )
عهدناك
حساس الكلمة
انيق الدواخل
فعد بنا وبصحبتك بقية الاصدقاء
لديارنا الحنينة
واكتب لنا بعض من شجي احساسك شعر ونثرا
يجعل لاستكان الروح معنى اخر
ولك من الود اضعاف مضاعفة

[الملكة اسماء ( ام محمد )]

استاذي القدير :
ابو خالد

الجمتنى صمتا

http://www.wadmadani.com/vb/showthread.php?t=29677

[درديري كباشي]

صدق من قال

ما اجمل غضبك يا شعبي

وما اجمل حبك يا شعبي

انا اليومين ديل لابساني حالة اكتوبرية ,, ولماذا في هذا الشهر تحديدا تحدث الثورات هل لها علاقة بالتحول المناخي من قمة الصيف الى برد الشتاء

على كل حال يا اسماء بوستاتك بلسم منذ ان كنت ملكة ولازلتي رغما عن الاستقالة ...

حقيقة ان الجو تكهرب خلال اليومين لكن كان مكهرب بالحرير كهربة لا تؤذي ولا تحرق لانها ناتجة من قليل سوء فهم بين اطراف يجمعهم الحب ويظلهم المنتدى وتحتضنهم مدينة تجمع الناس على حبها بمختلف اعراقهم وتوجهاتهم ..

وانا شخص جربتني الظروف لاكون شاهدا على الصرحين .
جمعية ودمدني بعراقتها واصولها وانجازاتها في الظلام

ومنتدى ودمدني بلونه الاخضر واياديه الخضراء وبصدره الواسع وحضنه الدافئ كما تفضلتي .

الاثنان لايقلان فضلا او برا بامهما ود مدني ..

الخلاف كل واحد منهما مستصغر مكانته عند الاخر .. لكن هذه المعضلة السابقة ورغم سخونتها الا ان سخونتها كانت رحمة لانها اذابت الحواجز وصهرت الكياينين ليكتشف الجميع بانهم واحد .. وان ظل الدوحة الوارف يسع الجميع .. بكل حب ورحابة صدر .

فالحمدلله نبذ الخلاف بعد ان عرف الجميع بان الراجيهم اعظم

وان القبيل راجنه نحن

يوم تبشر بيه غيمة

الفرح يملا المدينة

والبويتات الحزينة ...


يعاني بعض الناس في مدني معاناة لو عرفناها لتنازلنا عن كل شئ حتى نستطيع ان على الاقل نكفكف دمعة يتيم نصيبه في اليوم وجبة واحدة قوامها كسرة بموية.

[أشرف صلاح السعيد]

اللهم ااااااامين

استاذي الذي افخر جدا بوجود كلماته في دفاتري دائما
سؤال دار براسنا جميعا : هل عمل الخير يحتاج لاحداث ضجة اثناء تواجده ؟

انا معاكم في ان الادارة ردها اتاخر واستجابتها لتسالات الاعضاء طال انتظاره
ولكن : لايزال النقاش في هذه المشكلة قائم
سؤالي كان : الى متى ؟؟

كل مااتمناه في هذه المساحة ان ( نخت الكورة في الواطة ) ونعيد حسابها بجانب ايجابي اكبر .. ونشوف ابسط الكلمات الممكن تداوي جرح طال نزفه

استاذي :
لك في كلماتك الاف الرسائل
فهيا بنا نعيد صياغة كلماتنا لتكون رسالتها اشمل واعم
دعوة صادقة للتصالح مع النفس اولا ومع من دار بيننا وبينهم الكلام
ودعوة اخرى لكل عابر سبيل لمنتدانا ليعرف ان في هذه البقعة جمع الله اطيب خلقه
شعب اجتمع على قول كلمة الحق والاتفاق على مافيه خير البلاد والعباد

كن كما اتمنى لك دائما

همسة ركنية : بالله نسيتونا الركشة ونجومية الشهر
هسي انا ناوية اخش المنافسة بالبوست دا ( فاكر في كلام ببلاش )
تعظيم سلام ياقامة

الاخت الاستاذة أسماء تحياتى..
لم أكن أريد الاستدلال بما حدث بالمنتدى حتى يكون النقاش اوسع وأعم..ومشكلة المنتدى فى تقديرى بسيطة ولا تخرج عن ايطار "المصارين المتخانقة" وكل ما دار فيه لا ارى فيه ندم بل امتحان وتجربة للجميع ودروس نتعلم منها الكثير سلبا كانت ام ايجابا فى تقييم نتائجها ..ولعمرى ما حدث رغم بعض مراراته من هنا او من هناك ظاهرة صحية وفطرة طال الزمان او قصر ستكون ماكثة "الاختلاف والاتفاق بوجهات النظر"..

اما بالنسبة لسؤالك " هل عمل الخير يحتاج لاحداث ضجة اثناء تواجده ؟"..عمل الخير والدعوة له لا تحتاج الى التهويل والى قشريات أمور إنما عمل..فالعمل هو الأساس والدعوة الكبرى..وما حدث وإن كان مسببه "ايجاد موضع مناسب للجمعية" الا الأمر ليس كما يتصوره البعض "الموضع هو سبب الخلاف" وانما كان الخلاف الاكبر فى ترسيخ مفهوم "وامرهم بينهم شورى"..لأن ببساطة عمل منتدى خاص بالجمعية أمر هين لدرجة كبيرة ومتاح للجميع به حل المشكلة وبسهولة كبيرة.."موضع الجمعية" كان المسبب لظهور الاشكالية الكبرى "ترسيخ مبدأ الشورى والعدالة" وليس كما يعتقد الكثيرين كانت الاشكالية دعوة الخير وان استغلت لتدعيم الفكرة الاكبر وهى مسألة الحريات..

أرجو أن اكون قد وفقت فى عكس الصورة الصحيحة ..
الرحمة والتراحم والعواطف النبيلة فى ظل العدل لهم مذاق ألذ وأعمق وأكثر فائدةمن وجودهم وهناك أساسيات مغيبة أو ملتهين عنها ومنها "وامرهم بينهم شورى"..
بالشورى حتى القوانين الوضعية يمكن أن تُغيّر لأنها يفترض بأنها أتت بالشورى أيضا ولأنها ليست بنصوص إلهية غير قابلة للتطوير والتغيير..
ولا أحسبنى بغياب الوعى تجدى العاطفة ولترى تلك الأم التى حملت صغيرها برأسها محبة ورحمة وما وعيت بأنها تقربه الى الشمس الحارقة أكثر وتعرض نفسها وعمودها الفقرى للخطر الذى قد يعيقها من منحه مزيدا من العاطفة والرحمة....

[مدنيّة]

الملكة وان غيرت الاسماء

كل يوم مكانتك بتكبر وبتزيد

رغما عن مشغلوياتي الليلة الا اني دخلت البوست دا وقراته من اوله لاخره

وعن نفسي اوعدك " من خلال هذا البوست" اني ما ح ادخل في اي نقاش
لسبب بسيط جدا وهو انه الرؤية اتضحت واتحسمت
عشان كدا مافي داااعي للنقاش في نقطة محسومة لاننا ح ندور في فلك لا نهائي

واعتبري مداخلتي دي استجابك لطلبك الانيق المطروح من خلال هذا البوست

تقبلي مروري بصدرك الرحب

[التيمان]

ان شاااء الرحمن
مشكورين على المرور

الله عليك ياراقيه
























ممكن رقمك:d

[الملكة اسماء ( ام محمد )]

الثورات هل لها علاقة بالتحول المناخي من قمة الصيف الى برد الشتاء

ماتستبعد الفكرة دي
انا عن نفسي ( بكتئب ) مع بداية الشتاء عادة
وفعلا تغيرات المناخ ممكن تغير في نفسياتنا
لكن دائما ممكن نسيطر عليها لو كنا ملاحظين لموعد تغيرها والاسباب العامة

حقيقة ان الجو تكهرب خلال اليومين لكن كان مكهرب بالحرير كهربة لا تؤذي ولا تحرق لانها ناتجة من قليل سوء فهم بين اطراف يجمعهم الحب ويظلهم المنتدى وتحتضنهم مدينة تجمع الناس على حبها بمختلف اعراقهم وتوجهاتهم ..

ومانرجوه استاذي ان تتطايب هذه النفوس وتكون صافية نقيه كما عهدناها

الاثنان لايقلان فضلا او برا بامهما ود مدني ..

وفي هذه لايختلف شخصان
وكلنا امل في ان تستمر مسيرة عطاء الجمعية واحتضان المنتدى لها ولكل منتسبيها

سخونتها كانت رحمة لانها اذابت الحواجز وصهرت الكياينين ليكتشف الجميع بانهم واحد .. وان ظل الدوحة الوارف يسع الجميع .. بكل حب ورحابة صدر .
وهذه مانرجوه

وذات اسباب صهر الحواجز هي التي جعلتنا نعرف معادن من حولنا ونحمد الله بان الجميع ( دهب خالص )

فالحمدلله نبذ الخلاف بعد ان عرف الجميع بان الراجيهم اعظم

ونسال الله الاجر والثواب لكل من يسعى للخير او يدل عليه

يعاني بعض الناس في مدني معاناة لو عرفناها لتنازلنا عن كل شئ حتى نستطيع ان على الاقل نكفكف دمعة يتيم نصيبه في اليوم وجبة واحدة قوامها كسرة بموية.

وهذه دعوة منك استاذي للالتفات لما بداءه الجميع
فان كان فينا من ينتظر فهناك من لن يسعفه الوقت لينتظر مد يد العون اليه
فهيا بنا احبائي لطريق يتسع كل مازاد عدد السائرين فيه


استاذي : ابو الدُر
انحني احتراما وتقديرا لكلماتك التي عادة مااجدها تغيث جفاف عباراتي
فلك مني الود والاحترام

[الملكة اسماء ( ام محمد )]

وما حدث وإن كان مسببه "ايجاد موضع مناسب للجمعية" الا الأمر ليس كما يتصوره البعض "الموضع هو سبب الخلاف" وانما كان الخلاف الاكبر فى ترسيخ مفهوم "وامرهم بينهم شورى"..لأن ببساطة عمل منتدى خاص بالجمعية أمر هين لدرجة كبيرة ومتاح للجميع به حل المشكلة وبسهولة كبيرة.."موضع الجمعية" كان المسبب لظهور الاشكالية الكبرى "ترسيخ مبدأ الشورى والعدالة" وليس كما يعتقد الكثيرين كانت الاشكالية دعوة الخير وان استغلت لتدعيم الفكرة الاكبر وهى مسألة الحريات..

في دي انا معاك ومستحيل اختلف معاك فيها .. والحق يتقال لو في عين الحاكم
المفروض تسود روح الديمقراطية المبنية على الشورى وايلاء الطرف الثاني اهتمام وسماع اراء الغالبية
وحقيقة دي ممكن تكون من المشكلات القائمة ولا اعتقد انها ممكن تتحل بسهولة في منتدانا حاليا يمكن لان مفهوم الديمقراطية محصور وحدوده مجهولة للاعضاء
لكن اكيد بتاكيد اهميتها قد تستجيب الادارة ويتسع صدرها اكثر لاراء الاعضاء بدون اي تحيز او تعصب

ولا أحسبنى بغياب الوعى تجدى العاطفة ولترى تلك الأم التى حملت صغيرها برأسها محبة ورحمة وما وعيت بأنها تقربه الى الشمس الحارقة أكثر وتعرض نفسها وعمودها الفقرى للخطر الذى قد يعيقها من منحه مزيدا من العاطفة والرحمة....

مرة اخرى استاذي استنشق وراء حروفك كلمات
ورسائل وكلي امل في ان تكون قد وصلت لاتجاها الصحيح

وبعد عكسك للصورة الصحيحة وبعد تاكيدك لاهمية الشورى
اتمنى وارجو ان تكون هي فعلا تجربة علمتنا ان اختلاف الراي لايفسد للود قضية
فحتما سيشرق يوم تسود فيه روح الحريات المباحة في التعبير عن الاراء
وحتما الشورى التي انشدتموها بين اسطر صفحات طالت سوف تجي
مادامت روح الاخاء والحب في الله هي السائدة

[الملكة اسماء ( ام محمد )]

لسبب بسيط جدا وهو انه الرؤية اتضحت واتحسمت
عشان كدا مافي داااعي للنقاش في نقطة محسومة لاننا ح ندور في فلك لا نهائي

تقبلي مروري بصدرك الرحب

بجملة كفيتي واقتصرتي مشوار طويل

الغالية : مدنية
حضورك يدل على انك ممن لايحبون التخاصم
وبمررك الانيق شعرنا بانك فعلا تسعين لايقاف نزف


كوني دائما باسقة الكلمة واسعة الافق
ودي واحتراماتي

[الملكة اسماء ( ام محمد )]

الله عليك ياراقيه
ممكن رقمك:d

421763