سؤال عن أراضي المغتربين

[أبوربا]

قبل سنتين استلمت قطعة سكنية بأراضي المغتربين بس والله ما أدري مكانها وين عاوز واحد يدلني عليها والقطعة درجة أولى مربع94قطعة201
اخوكم مجد برير

[nehroo]

الاخ ابو ربا ..
لك التحية ..

قطعتك دي إحتسبها في سبيل الله ..
شالا السيل ..
ده ملف عافرنا فيه مافهمنا فيه حاجة
بعد تم نزع أراضي المغتربين من بعد تسليمهم مستندات الملكية
ومن ضمن هذه الاراضي الضائعة قطعتك
التي تتحدث عنها الآن .. ومعها الكثير .

[خالد أحمد الصول]

البركة فيكم و الجاتك في قطعتك سامحتك و المليون الدفعتها في ميزان حسناتك

[نخيل طيبة]

غايتو لكن !!!
ده يسموه شنو؟
الحقوق الضائعة والا نشوف اسم انسب؟

[أبوربا]

أشكرك على ردك بس فهمني الموضوع ابش حصل
الاراضي غيرت رأيها ول أصحابها مو راضين يعطوها ول حاصل شنو
وأنا صراحة ماتهمني كثير حتى اذا كانت حقيقة لانها يبغالها 100سنة عشان تصير ارض صالحة للسكن بس بالله وريني القصة من اولها لاننا بالطريقه هذه نكوت استلمنا قطعة في خطة اسكانية في الورق بس خطة اسكانية ولايمكن لنا الدخول في اي خطة اسكانية وده حق شرعي لابد الجري وراه
بس الغريب السنة الفاتت طلعت شهادة بحث عادي لها وحاولت ابيعها بس سعرها كان في التراب

[mabbas]

الاخوه الاعزاء
ممكن توضحو اكتر وين هذه الاراضي هل هي منطقه العوده (الاستثمارية) التي تم بيعها للمغتربين وتقع شرق النيل على جهة ابوحراز .
ام اراضي الخطه الاسكانية للمغتربين والتى تم سحب القرعه بجهاز المغتربيين بمدني وتقع ايضا بالشرق(اقصد شرق حنتوب).

لانو الواحد خارج مدينتنا ومتغربين ولاندري عن الاموال التي ندفعها.

الرجاء الافاده بخصوص هذا الموضوع

[بورتبيل]

قال اراضي مغتربين قال

يا ابوي انسى الموضوع ما تقلب علينا المواجع

[منتهى]

طيب انا بسال عن اراضى فى مايو

فى جنينه اتباعت اراضى فى المنطقه

دى الكلام دا حقيقى اوعى اكون مقلب

وكم تساوى الاراضى هناك.

[mabbas]

مع كل الاحترام والتقدير - كيف ننسى لو كل واحد يا اخوي بورتبيل
قال ينسى حتضيع حقوق الناس جميعها . لازم الواحد يعرف الحاصل ويتكلم ويدافع عن حقوقه.
كلنا موجوعين ومكوين بنيران من كل النواحي . ( من الداخل ومن الخارج)
والسكوت في حد ذاته جريمه.
اسف على التعليق . ويجب علينا ان نعرف الحاصل والبركه من الاخوان الطيبين الهم بفيدونى من داخل السودان على البيحصل هناك

[أبوربا]

ياولد 114 والمنيرة حالياً
أشكرك علىالاهتمام بس سؤالي كل أراضي المغتربين بمدني ضاعت ول جزء معين ول ايه الحكاية نورنا شوي..
على الرغم من انني سجلتها بالأراضي وطلعت شهادة بحث بذلك ..على العموم أنا مسافر يوم الأربعاء مدني أحضر عيد الأضحية مع الأهل وراح أشوف الحاصل شنو وافيدكم..وعندي زميل دراسة يعمل بكمتب وزير التخطيط العمراني بمدني وراح أساله واجيبلكم المفيد...
أبوربا /مدني/مايو أربعين

[esmat]

بوست مبهم جداً
مرارة في الحلوق بسب اراضى وحقوق ضائعة
واصحابها لا يعلمون الحقيقة ويطلبوا تنويرهم وتفسيرات
من اصحاب اراضي يعلمون كل الحقيقة
اكتفوا بكتابات المرارة دون تفسيرها
كنت ارجو الوضيح فكثير منهم لا يعلم
وهذا كان السؤال الاول في البوست

محاولة تقليد نجرات العقاد وكدا

[nehroo]

إخوتي الأعزاء ...‏
سبق وأن تناولنا هذا الموضوع في هذا المنتدى
وفتحت عن ما جرى فيه بوستات أدلى الكثير من الأخوان بدلوهم فيه‏
‏( أعتقد انها من ضمن مفقودات السيل )‏

فقد تحركت شخصياً ما بين الولاية والوزارة المعنية والأراضي
وتأكد لي تماماً أن هناك أراضي قد تم نزعها بعد أن خصصت للمغتربين
وأستلموا عقوداتهم وشهادات البحث أيضاً. منها هذا المربع الذي تحدثت عنه 94 شرق‏

أخي السائل هذا المربع منزوع وأنا شخصياً أحمل شهادة بحث ملكية قطعة فيه
وقد قضيت جل إجازتي السنوية بين أضابير هذه المكاتب وقابلت مسئولين‏
وتحدثت معهم عن حل لكل أراضي الإخوة ( المغربين ) المنزوعة
وخرجت منهم بالوعود والطبطبة ( معليش بسيطة بتتحل ) ‏
هناك ضرب قوي تحت الأحزمة في هذه المسائل

نصيحتي لكل الأخوة المغتربون ... أعملوا حسابكم ...‏

[esmat]

مشكور أخي نهرو للإهتمام
جزاك الله خير الجزاء
رغم مرارة الكلمات

[أبوعبدالرحمن العباسي]

ياولد 114 والمنيرة حالياً
أشكرك علىالاهتمام بس سؤالي كل أراضي المغتربين بمدني ضاعت ول جزء معين ول ايه الحكاية نورنا شوي..
على الرغم من انني سجلتها بالأراضي وطلعت شهادة بحث بذلك ..على العموم أنا مسافر يوم الأربعاء مدني أحضر عيد الأضحية مع الأهل وراح أشوف الحاصل شنو وافيدكم..وعندي زميل دراسة يعمل بكمتب وزير التخطيط العمراني بمدني وراح أساله واجيبلكم المفيد...
أبوربا /مدني/مايو أربعين

يا أستاذ : مجد الدين يا ود ميرغني برير

ما ضاع حق وراءه مطالب

وفقك الله

[أبوربا]

أبوعبدالرحمن مشكور لكن أنا ماعرفتك ممكن تذكرني عشان التواصل يكون أفضل وخاصة إنك تعرفني معرفة شخصية ..
في انتظار ردك

[أبوعبدالرحمن العباسي]

أبوعبدالرحمن مشكور لكن أنا ماعرفتك ممكن تذكرني عشان التواصل يكون أفضل وخاصة إنك تعرفني معرفة شخصية ..
في انتظار ردك

حياك الله يا مجد الدين

أول المعرفة أخوك تاج الدين دفعتي في جامعة الجزيرة كلية الإقتصاد .

وتاني المعرفة قريبك محمد الحسن برير ومن بعده قريبك عوض بلة كانا رفيقي درب وصديقي عمر وزميلي عمل لوالدي رحمه الله في وزارة المالية مدني .

وتالت العلاقة زوجتك الكريمة خالة زوجتي .

وإسمي بيبدأ بالحا عرفتني ولا لسع ؟!!

[أبوربا]

أشكرك ياحاتم على التوضيح والرسالة الخاصة ونسيت أهنئك والجميع بعيد الأضحى وأنا كنت بالسودان هذا العيد

[أبوربا]

الأخ نهرو
زي ما وعدتكم نزلت في العيد وحصلت اي واحد تم نزع ارضه عوض في مربع85 او قول معظمهم اما قطعتي لم تنزع لان المشروع لم يشملها يمكنك مراجعة ماكتبته عن هذا الموضوع بعنوان اراضي المغتربين المنزوعة

[أبوعبدالرحمن العباسي]

أشكرك ياحاتم على التوضيح والرسالة الخاصة ونسيت أهنئك والجميع بعيد الأضحى وأنا كنت بالسودان هذا العيد

حمد لله على سلامة العودة وكل عام وأنتم بخير .