الدكتورة ام هاشم على الكرسي الساخن

[aborawan]

ضيفتنا المرة دي ضيفة من طراز خاص سجلت في المنتديات واختفت في ظروف غامضة نعلم اسبابها تمام والسبب الرئيسي في الاختفاء هو العضو خالد هاشم لانو قال ما عايز رقابة عليه وعايز ياخد راحتو اكيد عرفتو ضيفتنا بعد كده







معانا المرة دي الدكتورة ام هاشم واتمنى ليها كرسي ساخن بارد انشاء الله


وكا العادة البطاقة الشخصية


ملحوظة ::
ايااااااااااااااااااااااااااااااااااااااااااااك يا خالد تحاول ترد بدل الدكتورة انا بعرف خطك كويس :d لو حاولتا انك ترد ليك رد بدلها بففففففففففضحك قدام الخلق

[خالد هاشم علي]

احبتي في المنتديات...
تحية واشواق..
ياخوانا انا عايز اشتكي ليكم من امير عبد الباقي وابوروان لانهم قاعدين يحرشوا المدام علي..
من كم يوم كده ابو روان قال ليها ليه زوجك مابساعدك في المطبخ؟؟.. اناعن نفسي ح اساعد المدام وادخل معاها المطبخ..
ومن ديك وعيك الولية كان قلت ليها اديني موية تسمعني ليك موال طويل عريض.. انت ماقاعد تساعدني وانت ليه مازي الناس ولا زي الرجال المتعاونين مع حريمهم.. زي محمد وامير لانهم قاعدين يساعدوا نسوانهم.
يعني بالواضح كده عملوا لي تمرد داخلي.. لكن اخوكم صنديد وحيقوم باأخماد الثورة في مهدها بس ربنا يكفينا شر المحرضين.

بالمناسبة يامحمد انا طبعا مدي الدكتورة العين الحمراء وضابح ليها الكديسة من اول يوم ( اها رايك شنو؟؟).. وماتقدر تقعد في الكرسي الساخن لو ماانا اديتها الإذن.. اخوك صعب ماتشوفو كده..

عشان كده وماعشان خاطرك لكن عشان خاطر عيون ناس المنتدي احبائي الحلوين فاانا اديت ام هاشم تصريح بالجلوس في الكرسي الساخن عشان ذاتو ناس المنتدي ديل يشوفو اخوهم خالد متحمل ليهو بلا قدر شنو؟؟هههههههههههههههههه


يلا ياام هاشم اظهري وباني عليك الأمان..
وانشاء الله ابراهيم يديك كم سؤال كده من النوع ابو كديس وماتحاولي تستنجدي بي لاني ماح اشتغل بيك الشغلة.. غايتو شوفي ابوروان ولا امير عشان انتي عملتي معاهم حلف ضدي..
يلا يابرهوتة اديها في المليان ولا تاخذك بها رأفة.

[صالح ابوشوارب]

مرحب ام هاشم

ونتمني ليك اسئلة مريحة وخاصة اسئلة ابو شوارب

[أبوريلان]

أم هاشم

سلالالالامااااااااااااااااات

وينك منتظرنك ولا حلتك فى النار وبعدين شمار السمك بالشطة كلمينا عنو شوية والعزم أمير منو ؟

والتقل ورأ . بس تعالى .

[ابو المهتــدي]

بسم الله الرحمن الرحيم
الاحبة الكرام ودهاشم وام هاشم 0 ربنا يباك لكم فية ةيجعلةزرية صالحة
بيني وبينك ياودهاشم ضبح الكديس براه لا يكفي 0 اوع تورق الخدرة لانك لو ورقتها سوف تحشها لان هنا لا توجد فرامات اسمع نصيحة اخوك 0
لكم التحية نتوقع بعض الخواضر منكم بعد قدوم الفارس

[الزمن المريح]

سلامات ام هاشم و ابو هاشم

و هاشم ذاتو ،،،
مرحبا بك ام هاشم فى الكرسى الساخن ، و نتمنى ان يكون بردا و سلاما عليك ،،
و الشكر موصول للأخ خالد ،، لسماحه بإستضافة المدام على الكرسى الساخن ،،

و الظاهر ان المسألة اعلام ،، لان المدام حتى الان لم تظهر ،، و نحن ما حا نسأل عن مطبخ و حركات ،، عندنا اسئلة للمدام نفسها بشكل انها لها شخصيتها الذاتية ،،

1 اولا ،، لماذا كان اختيارك كلية الطب ،، هل هى رغبة ام انها امنية الاهل ،،

2 كثير من الناس يقول ان الطب مهنة ،، و العلم فى العلوم و الادب ،، فمارائك بهذه المقولة ،،،

3 صراحة كثير من الاطباء السودانيين الذين تخرجو بعد 93 غير مؤهلين و اعتقد انهم لا يعرفون من المهنة الا اسمها و السماعة الموضوعة على رقابهم ،، ما تعليقك على هذا الرأى ،،

4 ما هو الوجه الاخر الذى تحبينه ،، ادب عربى ،، انجليذى ،، ام اهتمام آخر ،،،،،،،،،،،،

اكتفى بهذا القدر ،، فى المرحلة أ ،، و اتمنى حضورك لاجابة على الاسئيلة ،، و التوفيق من عند الله ،،،،،،،،،،،،،،،،،

[ابومرام]

اولاً لك التحية اخي ابو هشام الحكاية شنو الظاهر عليك حرضت المدام من الجلوس ولا شنو معليش عشان خاطر المنتدى رد انت بدلا منها ولا خايف برضو انت من ابرهومة ماعليك ابرهومة دا انا بكمله ليك 000 ام هشام لكي التحية الحكاية شنو اظهري والله نحن منتظرنك باسئلة خليها سااااااااااااااااااي بس استعدي وتعالي وربنا يقدرك عليها بس الاستعانة بصديق مافي خي ابو هشام يوعدنا بعدم المساعدة ولينا عودة والاسئلة لمن تظهري ،،،،،،،،

[ام هاشم 4]

بسم الله الرحمن الرحيم
والصلاة والسلام علي اشرف المرسلين سيدنا محمد وعلي آله وصحبه اجمعين..
السلام عليكم ورحمة الله تعالي وبركاته..
اهل المنتدي الكرام... كيف حالكم .. معليش للتاخير لكن ابو هاشم قال لازم يكون معاي عشان يشوف الاسئلة ونرد مع بعض عشان هو ( ضابح لي الكديسة)..
الاسم بالكامل: د/ اتصار احمد محمد احمد من مواليد مدينة ودمدني الوريفة الشاربة من النيل طيبة.. في 23/3/1972 .
من سكان مدني حي النصر جنوب ( مايو نص) محطة البنا الأمين عباس.
ترعرعت بمدني ودرست كل مراحلي التعليمية بها ماعدا الجامعة..
وتفاصيل مراحلي التعليمية كالتالي:
الابتدائية: بمدرسة الشرقية النموذجية بنات
المتوسط:حي النصر المتوسطة
الثانوي: مدني الثانوية بنات
الجامعة : امدرمان الأسلامية كلية الطب ( عزابة).
ومراحل العمل بكل من النساء والتوليد والاطفال والباطنية والعظام والعيون بمستشفي ودمدني التعليمي والجراحة بمستشفي ام درمان كطيبيب امتياز.
ثم العمل كطبيبة عمومية بودمدني بمستشفي النساء والتوليد...
حاليا عاطلة..
لكن حاانزل الشغل بمستوصف الواحة بجدة في غضون الايام القادمة..

ترتيبي وسط اسرتي..
انا البنت الكبيرة والوحيدة وسط ثلاثة اشقاء هم
غاندي احمد ( استاذ بمدرسة حي النصر الثانوية)
شريف احمد ( مغترب بنجران بالمملكة العربية السعودية)
زاهر احمد ( طالب بجامعة النيلين كلية التجارة)

الوالد يحترف التجارة وهو من موظفي مشروع الجزيرة السابقين.. والوالدة زائرة صحية بمستشفي مدني وحاليا تعمل كقابلة بمستوصف البقيع الطبي.

[ابومرام]

الف حمد لله على السلامة ام هاشم بس الكديسة دي والله الواحد اصبح بخاف منها خايفين لمن ننزل الجماعة يضبحوها لنا بد مانضبحها لهم (بقولوا الغربة تخلي الشخص مسكين )0
ام هشام لكي التحية 00رغم انك احتوتك مدنيةودمدني بكل جوانبها النشاء التعليم مياء النيل ممكن نقول مدناوية باصل الاصالة واكيد خوفك عليها بقدر خوف كل واحد منا على اسرتة وهي اسرتنا بلا شك مستشفى ودمدني انتي تتولين منصب مديرة لتلك المؤسسة دورك واول يوم تجلسين على الكرسي بكل تفاصيل ليس عبر الخط فقط وانما احساس وجداني وخوفا عليها وهذه من اساسيات التنمية (الصحة والتعليم ) ونحن في مرحلة قادمة نشهد فيها الكثير من التحولات 00ولنا عودة 0

[ام هاشم 4]

ابوروان...
الف الف مبروك العقد الميمون وبالرفاء والبنون لك شكرى الجزيل لهذة الاستضافة لشخصى الضعيف ولك تحياتى والمدام

[ام هاشم 4]

ابوهاشم العزيز الغالى لك حبى وتقديرى واحترامى وكل الاشياء الحلوة واللحظات الجميلة اشكرك على ترحيبك وحسن كرمك بسماحك لى بالاطلالة على ناس المنتدى الكرام ودمت لى تاج راسى

[ام هاشم 4]

ابوشوارب لك التحية والتجلة اتمنى ان اكون ضيفة خفيفة الظل على اهل المنتدى

[ام هاشم 4]

الاخ ياسر سلامات الف انت عارف المشاغل بالذات لما تكون الواحدة متزوجة من راجل سى السيد فى عصرة واونة العزم امير اكيد ماانا لانى ماكنت بعرفة والسمك خالد بحب السمك وانا كمان فبعرف اعمل الشطة السال لعابك معاها دى وهى سر المهنة المطبخية ما الطبية واشكرك على حسن الضيافة وبالمناسبة دى انت والمدام معزومين على اكلة سمك بالشطة شنو ليك بعد اذن سى السيد ابوهاشم

[ام هاشم 4]

ابوالمهتدى كيف الحال واشكرك على الاستضافة وسطكم وانت بدل تشجع خالد على مساعدتى تقول لية اوعى تورق الخدرة الحمدللة خالد مابحب الخدرة ومرات كتيرة عندة مزاج يدخل المطبخ يعمل حاجة بمزاجة بس والغريبة بتكون اجمل مليون مرة واحلى من الانا بعملة اية راااااااااااااااااااااااايك

[الزبير محمد عبدالفضيل]

بسم الله الرحمن الرحيم


والسلام علي من اتبع الهدي


الدكتوره ام هشام لك التحيه والتقدير واهلن بيك في كرسي الاسئله

انشاء الله يكون برد وسلاما عليك


1- مدينة ودمدني اصبحت وأكبر المدن السودانيه مساحة ماهي وجهة نظرك

في التوسع العمراني وماهي الاضافات الحضاريه الجديده بالمدينه


2- توجد شائعه بمستشفي مدني يقولوا ان غرفة التوليد بها فايرس التتانوس

هل هذا صحيح وكيف تتم تعقيم غرف العمليات بالمستشفي


3- ماهي هواياتك المفضله وانتي خارج نطاق عملك


4- كيف تصفي مدينة ودمدني بين المدن السودانيه


حاليا اكتفي بهذه الاسئله


ؤبي زدني علما وانفعني بما علمتني

[أبوريلان]

أم هاشم

سلالالالالالامااااااااااااااااااات

أولا أشكرك على الدعوة وإنشاء الله قريبا نلبيها .

سؤالى :

القابلة الصحية خبرتها فى النساء والتوليد أكبر من خبرة طبيب أو طبيبة النساء والتوليد ؟ هل توافقين ، إذا كانت إجابتك موجبه أو سالبه أرجو التعليل ؟

ولكى شكرى وتقديرى

[ام هاشم 4]

مرحب بيك اخى الزمن المريح المسالة ليست اعلام ولاحاجة بس كنت مشغولة حبتين والانا معكم تفضلوا على المائدة المستديرة .
وبخصوص الاسئلة مافى اى مشكلة لوكان مطبخى اوطبى على اتم الاستعداد.
بالنسبة لسؤالك الاول كلية الطب كانت حلم حياتى لان الطبيب انسان وفى يدة الشفاء وراحة المريض وبالذات عندما يتعافى ويشفى على يدة مريض كان يعانى ويتالم اويولد طفل على يدة والفرحة تملىء وجة الام والاب والاهل ياسلام على روعة المشهد.
بالنسبة لانها مهنة اعتقد الرد وصل من خلال السؤال الاول وايضا هو العلم كلة ومحيط من المعرفة والانسان مهما تعلم وبحث فى هذا المجال لايجد نهاية وكل يوم جديد وجديد . بخصوص السؤال الثالث ممكن يكون حقيقة لكثرة الذين يدخلون كليات الطب التى ملئت البلاد شتت الجهود المبذولة التى كانت تقتصر على كمية بسيطة من الطلبة الخريجين بدل 500 طالب مستوعبين ومركزين يكونوا 50000طالب لايعرفون شئ.
احب تصفح المجلات الثقافية والسباحة وترتيب ونظافة المنزل وعمل المطبخ.
اتمنى ان اكون اجبت على كل الاسئلة وشكرى الجزيل لك اخى الزمن التعب .

[ام هاشم 4]

السلام عليكم الاخ ابومرام وشكرى كلة للاستضافة واتمنى ان ارد على كل الاسئلة بشكل وافى .
يسمع منك ربنا ان اكون مدير مستشفى ودمدنى التعليمى .اولاً سوف اعمل على تغيير مكانها واوفر سبل الانتقال السريع والمريح .
ثانياً اغير كل الاجهزة والمعدات داخل العملية واماكن الغيارات والكشف .
ثالثاً اوفر كل سبل الراحة للعاملين والاطباء لكى يقوموا باعمالهم على اتم وجة .
عندى اراء ومقترحات وخطط كثيرة فى مخيلتى بس لوتم تعينى .

[ام هاشم 4]

بسم اللة الرحمن الرحيم
السلام عليكم ورحمة اللة تعالى وبركاتة
شكراً على الاستضافة اخى السفير
مدينة ودمدنى من اكبر واعظم المدن السودانية واعرقها فلاضير بان تتوسع عمرانياً
ويزيد البنيان والعمران وحتى السكان لانها المدينة الاجمل والارقى وهى ام الحضارة والعمران وكل يوم حضارة جديدة.
فايرس التتانوس ليس بغرفة العمليات بل تاتى بة المريضة من الخارج بالذات فى حالة العمليات المستعجلة ونساء الريف والقرى ومن ثم تتلوث الادوات الجراحية التى تستعمل فى كل العمليات الاخرى بعد تعقيم بسيط وبدائى لانة يوجد جهاز واحد بالعملية .
بالنسبة للغرفة يتم غسلها وبعد ذلك تعبئتها بمادة تسمى الفورمالين للتعقيم لمدة 24ساعة كاملة ولاتفتح الغرفة .
ومن غير زعل تم ردى على الهوايات الاخرى عند الاخ ابومرام.

[ام هاشم 4]

اخى ياسر .
القابلة خبرتها كبيرة وهى ادرى بالتوليد وفن الولادة ونحن كاطباء نتعلم منها الكثير ولكن امراض النساء والولادة لاتعرف عنها شئ وياتي هنا دورالطبيب اوالاختصاصى لذلك كل من القابلة اوالطبيب لة وظيفتة الخاصة جداً بة يعنى الطبيب يمكن ان يولد طبيعى وفى نفس الوقت قيصرى لكن القابلة لاتسطيع القيصرى اى فتح البطن .

[صالح ابوشوارب]

الأخت الدكتورة / أم هاشم 4

بعد التحية والترحاب والتهنئة بالعمل ندخل في الجد

السؤال الأول :ــ لماذا الكنية بأم هاشم4 هل أنت فعلا رقم 4

يعني مثني وثلاث ورباع ؟

السؤال الثاني :ـــ سؤال طبي بما انك تنقلت بين العيون والباطنية

ما هي علاقة قاع العين بالطب الباطني ؟ وامثلة لذلك ؟

والأسئلة تأتى تباعا

[Jamal Elmahi]

واكديستاه....واكديستاه....واكديستاه
من ضبح الكديسه؟؟؟؟

الاخت الدكتوره ام هاشم...

1- ما قولك في أنك أنتي التي ضبحتي الكديسه مع سبق الاصرار والترصد ( كورس جراحه وضبح مستشفي ود مدني)

2- عندما تجتازين مرحلة العطاله وتصبحين إمرأه عامله ..هل سيحتاج أبو هاشم لضبح كديسه أو كدايس لزوم تقليم الاظافر التي تنمو بسرعة البرق عندما تجري الريالات في يدك؟؟؟؟

3-الكديسه التي إدّعي ابو هاشم ضبحها هل هي من كدايس بورتسودان المشهوره ب ( كديسي ود الحرام ضبحتو الليله باكر قام )..أم هي كديسه عاديه؟؟؟؟

4- من فاته ضبح الكديسه هل يمكن أن يضبحها بأثر رجعي أم يسردب للمدام ويرضي بقول الشاعر
الشرسه شرسه ولو ضبحت كديستها
والعوير عوير ولو ترك الغسيل ( غسيل العدّه )

واوصيكم ونفسي بالكدايس خيراً...

مع تحياتي للعزيز أبو هاشم..

جمال الماحي

[اميمه عشريه]

تحياتي ام هاشم

انا وانت زميلات جامعه واحده وزميلات تاريخ ميلاد مشترك ايضا وقد نكون تخرجنا في نفس السنه الدراسيه 99 كم سعدت جدا بيك يا دفعه
عندي سؤال واحد اطلب تعليقا عليه
خطأ الطيب يكلف روح واحده بينما خطأ المهندس يكلف ارواحا كثيره تروح ضحاياه
اريد ان اسألك سؤالا مباشرا من الذي انتزع صفة الانسانيه من معظم الاطباء بمعني اخر كثير من الاطباء بتعاملون بمنطق الربح والخساره والتجاره هي حتما تلك الاجساد العليله ما تفسيرك لهذه الظاهره السالبه ؟
دايما نسمع عباره ( التب اطور ) اين نحن السودان ومدني من هذه العباره ؟
مستشفي مدني التعليمي اسمع بقطارات الموت لافه هناك ما عندها اي محطه السبب شنو بالضط كده ؟
بشكرك كتير وياريت تتوثق علاقتنا ببعض ونعرف بعض بشكل اسري
دمتي ابدا

[الزبير محمد عبدالفضيل]

وين اجوبة الاسئله يادكتوره



في انتظار ردك

[ابومرام]

لكي التحية اختي ام هاشم والله سعدنا كثيرا بوجودك على الكرسي لعلنا نستفيد من بعض خبراتك في ذلك المجال ولو لا وجودك كابنة مدني بالتحديد وتهمنا تلك المدينة وانتي ايضا بكل تاكيد حبا فيها وشوقا لها ولهفة لوريتا وخوفا عليها كل صفيرة وكبيرة 00بس اوعدينا ما تزعلي منا في طرح بعض الاسئلة قد تكون جارحة بعض الشي لانها تمس تخصصك ولكن كابنة تلك المدينة لا نضع حواجز في ذلك 00
تعقيبا واضافة على كلام الاخت اميمة عشرية مايدور في تلك المؤسسة التعليمة مستشفى ودمدني شي اصبح ملفت للنظر رغم بعدنا عن مدني لسنوات ولكن قطارات الموت تجول يمينا ويسارا نعم نقول كل شي بارادة الله ولكن الاسباب تختتلف 0نتكر ليك التعقيب 00ثانيا نعلم تماما ان مهنة الطب تطورت بصورة ماشاء الله عليها ولكن ندع السلبيبات حسب التقنيات ممن الممكن ان نتاكد ان الجنين ذكر ام انثى 00وصلنا لهذا المرحلة فاذا كانت توجد اعاقة او اضافة عضو او جسم على جلد المولو لا يلاحظ بعد متابعة (9) شهور ماهو تقيميك لذلك ولنا عودة 0
ومعذرة لكثرة الاسئلة 00