يا هناى وهناية سلامات ومشتاقين لعزوماتكم ، آه أنا جيتكم تانى والهترشات البترمى فى الشوك وأنا ما لابس سفنجة ، لكن هو ما قال "جنك فات جنى وحنى على أنا ياتتى"، العين ما بتعلى على الحاجب وعزيز الروح ما بتعالا ومنكم نستفيد وانتو أساتذتنا الاجلاء ، الليلة الهترشه خلو ساى جيت ماشى بى جمب الرفزيون ولقيت لقاء مع عادل إمام فى برنامج أسمو دارك ويا حليل دارنا البقو لحم الرأس يتكلمو فيها واتحكرت قعدت اعمل شنو وعادل امام والمذيع نق نقنق ويسرد فى قصة حياته وقال جيت السودان عشان امسل مسرحية شاهد ما شافش حاجة ونق نق نققق وسأل عن لما لم تذاع " تبث تلفزيونيا" مدرسة المشاغبين فكانت الإجابة أن وزير الثقافة السودانية قام بمنعها قال إنها تفسد الطلاب ، ومدرسة المشاغبين من أجمل المسرحيات التى شاهدتها وما زلت اشاهدها كل فترة واضحك كأنها أول مرة اشاهدها لكن كلام وزير الثقافة اعجبنى وخلانى اعيد الذكريات ، آآآآآآآه الواحد كان فين وبقى فين واذكر ونحن شفع ومسلسلات الحروب والفتوحات الإسلامية ونحن فى المدرسة الابتدائية واى واحد شايل قناية ولا حصيرة وخالف معاها واحدة صغيرة وعاملها سيف وهاك يا حرب وهاك يا ضرب ولسة مازالت علامات تلك الحروب على أجسادنا وأجساد أصحابنا الى الان فكنا نحاكى ما نشاهده أو نراه فى الرفزيون "يا بليد اسمه التلفزيون ما الرفزيون ، يا اخى اسكت أنا ما قلت ليك انت ما ناقش حاجة ، الرفزيون دى زى التلفزيون بس بالإضافة الى انه تلفزيون أعلاه عبارة عن رف نضع فيه الاشياء المحببة الينا من تمباك او سجائر او نظارة او ساعة وهسة كدى ادخل اى بيت سودانى شوف كما لقيت الرفزيون بدل التلفزيون لانه نحن دولة متطورة طرونا التلفزيون للرفزيون هسى ما شايف اى سلعة او جهاز يقوموا يطوروه ويعمل معاه جهاز تانى ويقول ليك أتنين فى واحد يعنى يعملو ليك نظارة ويكون معاها راديو، ويعملو ليك ساعة ومعاها رمودكنترول هسى نحن عملنا تلفزيون ومعاه رف " .
اه خلونا من الكلام دا نرجع لى موضوعنا ، ولو كنا شاهدنا مدرسة المشاغبين فى تلك الفترة لكان عملنا كما قال بهجت الابصيرى "عادل امام"عندما قالت له أستاذته لما تتكلم مع المدرسة بتاعتك احتراما لها تقوم تقف ، قال المدارس باظت يا جدعان بعد اربعتطاشر سنه خدمة فى ثانوى بتولى اقف ، الاحترام يا حليل أيام المدارس كانت تربية وتعليم واحمد شوقى امير الشعراء يقول
وعلموا النشء علما يستبان به سبل الحياة وقبل العلم اخلاقا
الحمد لله نحن ما زى هسة ولا حصلنا جيل الصفوة لكن على اقل حصلنا الزمن الكان فيه الواحد بحترم اى يزول كبير فى الشارع سوى كان من الاسرة أو من الفريق أو عابر سبيل لكن هسة .. احسن اسكت .
هسة يا عمى محجوب أنت عارف انو مدارسنا باظت وانو بدل كانت تربية وتعليم بقت تلتله وتأليم ، الاساتذه كلهم الفرة فرة والمافرة بارة العيادات " والعيادات للناس الما بعرفوها هى عبارة عن الدروس الخاصة يعنى درس خصوصى مدفوع القيمة لى أولاد المصارين البيوض " ولما تقول يا أستاذ الحصة يقول ليك بنشتغل ليهم قدر قروشم وانت عارف يا مهترش انو قروشم كل أربعة شهور يدونا حق شهر ونحن ما بنقدر نقول البغلة فى الابريق نعيش كيف نحن لازم نعمل عيادات من اجل ابنائى وانتو الغلط دا كلوا خليتو وجيتو تتكلموا بس فينا دعونا نعيش ، والله يا أستاذ نحن ما عند مشكلة طالما فى ناس لسه بتعلمو بغض النظر مصارين بيوض ولا خضر لكن برضوا لازم تشوفوا أولاد الترابلة نظرة يا ابو هاشم ، يا مهترش ديل زاتم بقو ما عاوزين يتعلمو عاوزين يغالطو ويتمردو على اساتذتم هسه قبيل كنت بدرس فى حصة لى سنة اولى وقلت ليهم عاوز طالب شاطر يقول لى حيوان بطير ، قام هيثم قال فيل ، قلت ليه صاح ، قام العوض قال لا يا استاذ الفيل ما بطير ، هسه زى دا اعلمو كيف عاوز يورينى انو الفيل بطير ولا ما بطير ، داير يغالط ، لكن يا استاذ الفيل ما بطير، حتى انت يا مهترش ، دا هيثم حى المطار يا الفيل يطير يا نطير نحن .
اه انتو رايكم شنو يطير الفيل ولا نطير نحن
رد مع اقتباس
المشاركة الأصلية كتبت بواسطة mahagoub
المفضلات