هلا بالحبان ، سلامات حباب ، كيفكم يا حلوين يا بكائيين ، وأحلى حاجة تكون بكائي ومكسر وحبيبك عامل تقيل ،
الليلة صحيت من النوم الصباح زى الساعة 6 عصر كدا صليت المغرب وشربت شاى المغرب بالطريقة الصاح ، وقلت كدى الليلة أشوف الحاصل فى الدنيا شنو ومشيت على الدولاب وشلت ليك قميصي الأحمر الكاروهات داك بتاع الأعياد وشكيتو ليك مع بنطونى بتاع الجنز الفريد، وطباعاً انتو لأنو ماعارفنو فريد بتقول هو زى بناطلين الجنز الفى السوق لأنكم ما عارفين انو البنطلون دا صنع كيف أول حاجة قماشو كان نمرة بتاعت جيش فى معسكر الخدمة الوطنية ونمرة لى الماعارفنها هي عبارة عن مرتبة (فرش ، لحاف ) للمستجد فى المعسكر بعد ما الواحد قدا بيهو سلك ، وداهاو الترزي طوالى وعملو ليهو بنطلون بوقي أحسن من ادوين، المهم بعد ما قشرت قشره بالطريقة الصاح مشيت لى عشة شمارات وسلامات حباب ، وين يا فردة ، مشتاقين
قلت ليها الأخبار شنو ، قالت لى أنت طبعا عارف الدولار زايد والتقشف جاى والبلد ما معروف الحاصل فيها شنو ، عشان كدى نحن قررنا يا مهترش انو من الليلة مافى شمار ساى
لو داير شمار حلة أو فريق بالحمرة (فئة العشرين جنية) للرطل لو داير شمار خاص لى البيوت العرسوها والطلقوها والشاكل مرتو والمكسر البكاى الكيلو بالخدرة(فئة الخمسين جنية ) ولو داير الشمارات التقيلة والخطير دى يا مهترش الوقية بى مية دولار ، انتى لكن يا عشة اسعارك دا موافقة المواصفات والمقاييس ولا ساى ، نحن لينا أسبوع نعمل فى اجتماعاتنا وبعد موافقة كل الشماراتية حددنا الأسعار دى بعد دراسة كافية راعينا فيها حقوق المستهلك ونظرية العرض والطلب والندرة وتوازن السوق ، والله كان كدا الواحد تانى ما عندو كلام ، لكن انتى عارفة الحاصل والأيام دى السوق واقف والفلس حاصل وود المطامير ما عاوز يطلع لينا السلفية من البنك ، قايتو هاك دى عشرة جنية ادينى نص كيلو شمار من المكسر البكاى والباقى اكتبيهو على الحساب
ما مشكلة بس أنا خايفاك تعمل فينى عملية أبو الثعالب مع أبو العلاعل وتنكرني بالطريقة الصاح ، انت قايل شنو الزول البكاى دا حسب الشمار الوصلنى انو مكسر فى واحدة زى ما قال وردى
الصغيرون الما كبير ، الرقيبة قزازة عصير ، العيون متل الفناجين ، ما بتشيل جردل على الزير ،...، انت ما بدوكى لى زول مسكين ، الا نخلو مقرون فى البساتين ، سواقيهو تصحى الكانو نايمين ،وانت عارف هناي البكاى حفتان وحبيب ويقول ليك الحب لا يقدر بثمن والحب ما بعرف مستويات مادية وحالات اجتماعية ويتفلسف ليك تقول هناى المنظراتى وكل يوم تشوف لابس زى المغترب
تشوفو لابس كل نيق والمكوة سيف لكنو منفوخ بالكضب قشرة تبن ما فيها لب
والقريشات المعاهو بعد عزومة الصغيرونة العيونا متل الفناجين يجى راجع البيت كدارى من عدم حق المواصلات زى المغتربين يجو السودان الواحدة تقول ليهو إجازتك كم يقول ليك 3 شهور ويرجع بعد شهر وتسمع الجماعة شيالين الحال يقولو ليك هناى المغترب الليلة ما جانى ادين من حق الضرائب قال ماشى يدفعها فى المغتربين وقال برجعا لى أول ما يصل هناك والمغتربين المفتحين يقول ليك سيبك بى سفر بلا بطيخ هدايا ساى شغل السنة الفاتت يروح ،
انت طبعا عارف يا مهترش بيع الدين ما زى الحاضر وانا ما قصرت معاك وهاك دى زيادة منى ود نقد أم عمر قبضتو هو بكتب فى مذكراتو وفرضت عليه عقوبة الهروب من المسؤليات حسب البند 512 الوارد فى لائحة العقوبات المنزلية ومنعتو من كتابة المذكرات واستخدام النت بعد ان تم سحب الاشتراك من شركة الاتصال الموفرة للخدمة النت واحالت الكمبيوتر الى عمر والاولاد الصغار لاستخدامه فى الألعاب بدل البلى استيشن الغطس حجرو شلاقة .
رد مع اقتباس
المشاركة الأصلية كتبت بواسطة mahagoub
المفضلات