قبل كم يوم كدا وبالليل ذى الساعه واحده
نعست وقمت قفلت كا شئ وجريت بطانيتى وإدمدمت ونمت
بس يا دوب ختيت نمره تلاته للنومه أكان أسمع ليك صوت مطره قويه
ومع العرش حق الزنكى تِترِب صحيت وقعدت فى نص السرير
وبقيت بدردم لى فى سفه بالله بس مطيت شلوفتى الفوق كدا وقبلما أحكرها
تسمع ليك رعده تللللللللل وحات الله يدى دقت فى سنيناتى وسفتى بقت جوه خشمى ذى
البعره الهرسوها ، أهاا .. تفتفتها وأنا أشوف مودم النت ولّع نور أبيااااض
وقلت قطع شك دا إتلحس
الصباح وكعادتى من نزلت من سريرى ضغطت زر تشغيل الكمبيوتر أكان لقيتو كاضم
والمودم كاضم والكمبيوتر كاضم والريسيفر كاضم والتلفزيون كاضم والتلاجه كاضمه
بشتنه بالطريقه الصاح والحمد ليك يا رب فى حكمتك وحكمك ، طلعت بره قلت أجيب واحد من عمالى عامل لينا فيها معلم كل حاجه
أكان لقيت ناس معسكرنا كلهم يحكوا عن خسائرهم الإلكترونيه
أنا سكت سااااى وقلت الموت مع الجماعه عرس وكنت فاكر الرعده دى وقعت فى غرفتى أنا بس لكن قاالوا
وقعت فى البحر جمب الجزيره وأرجعت ناس الجزيره لحياة العصور الوسطى
وبابو الهندى بتاع تصليح الكمبيوترات قبيل قال لى كمبيوترك دا إلا تعملوا قفص للعصافير
وهسى داخل من لاب توب أم عمرو .. وحات الله اللاب توب لا بيردو
ولا بعرف ليهو مؤشر الماوس تلقاهو فى جيهه وأنا ساكيهو بأصبعى
وهو يزوغ أبوالضبضوب بس
وعلشان كدا عاوزكم تعملوا لى كشف ، اللى ما عندو يستلف واللى ما عندها تبيع دهبها .
رد مع اقتباس
المشاركة الأصلية كتبت بواسطة ود المطامير
المفضلات