بسم الله:
مدخل:
ودعت دنياك من زمان ودعت ريد الامنيات
عودت قلبى على الصبر عودتو ينسى الزكريات
مهما بكيتى بقولا ليك ريدك خلاص جوايا مات
الحنك:
طيب ياجماعه ...الزول يكون منتشى وفرحان ومبسوط وشايف حبيبتو قدام عيونو وسعيد بى انو قريب منها وهو مبسووووووط شديد بيها والدنيا ربيع وزهور وتلفونات وتصبحى على خير يا احلى زوله فى دنيتى ...ويصحى الصباح يجلاى على تلفونو وهو متاكد ميه ميه انو حتكون ضربت لى ولا رسلت رساله صبحت على ....يفتح التلفونمايلقى ابو النوم ...يكون راسكل ولا زول سابى لى دين رد ياحيوان ولا رساله تقفل نفسك وانت نايم منتشى ومبسوط واخر سوط سمعتو صوت حبيبتك ...والرصيد طبعا يكون كمل بى الليل ...تجرى اول شى لاصباح الخير ياحاج ولا ياامى ولا فى شنو الدكان اسكراتش ياعمك وتنزلو وتييييييييييييييييييييييييييييييت جرس للمزه ياعسل صباح الخير ترد ليك كيف انت !!! لاحظو الرد الله يقطع الحريم..
وانت شغال وحشتينى من امس لليله وانا حلمان بيك وكان حلم جميل وانت جايه وجايبه لى ورده يازول ولا كفر مهند ونور ...وتقفل على كده حتى بعد كده تجى تصبح على ناس البيت وتشوف باقى حنكك شنو...اها الحنك الله خلقو داك كلو تعارف ساى وبدايات ..تخش فى الغريغ..
ياخ والله انا بحبك من زمان وانت القمر وانا من غيرك ما اسوى بصله وانا وانا وانا وانا..بموت فيك...!!!! اسن حنك وكميه حنان مدفقه؟؟
الشاكوووووووووووش:
والله ياهناى انا مابقدر ارتبط لانو فى زول متكلم فينى وقال جايي اتقدم وكلم امى وهو ود اهلنا مع حبه بكى مع حبه حاجات كده ...وياريت ماتتغير منى وماتسيبنى وانا اتعودت عليك وانت اقرب زول لى بقيت ..وانت اخوى وصديقى وانت وانت...
ياخ بلا صديقك بلا بطيخ بلا اقرب زول معاك انت من البدايه مخليانى اقرب منك لى كان تحسمينى قبل ما اتعلق بيك ياخ قلبى زنبو شنو وانا اشيل واتكيف بى كلمه حلوه منك واخر اهتمام واخر دلع فيك من الاول احسمى ماتخلينى اقرب واتشعلق ياخ ..طيب ابقى جمبك تانى كيف يعنى انا اكون فى الرف احتمال تتشاكلى مع الزول الاتقدم ليك داك وتجينى راجعه لى انا .؟ ولا حنكك شنو بالظبط اسئله كتيه ماتلقا ليها جوووواب..؟
يوم من يوميات الشاكوش:
بى الليل هى طبعا تديك رساله ولا تلفون ..كيفك وماتكون زعلان منى ولا حاجه وانشاء الله نسيت الموضوع وانت طبعا زول مسكين ساى نسيتو وحصل خير ..,انت بى جوه لاحصل خير ولا بتاع وكاتم للدين ..يالله تقابض فى النوم بى الليل ومافى نوم وسهر شديد وبكى وجرس لو زول فى جمبك تقعد تحكى لى عنها والغريبه شوف طيبتنا بتقعد تحكى بى الحاجات الحلوه بس ومابتقول حاجه شينه عنها ما عارف لى والزول الجمبك لو زول ثغيل زى تومى ده بقوم يثب ليك دين يقول ليك ما لجكس راقد فى تلفونك خش حنك مع اى زول ولا هاك دى رقم مزه ولا يقول ليك ياسيد بكره فى الجامعه بعزك بى مزه ...ده كلام اقول لى الريد وروميو يقول ليك فى شنو ..ده حسانيتو فى شنو وانا حسانيتى فى شنو...المهم الحولينك كلهم ينومو وانت بتسمع فى ودعت دنياك وبتسمع فى انت وانا واخر بكى وووجع وتقول لى صابر المسكين موجع انا الوجع اكتر منك...تساهر لى 6 ونص وتصحى سبعه وبتكون نشيط ماعارف لى ...ماممكون وموجع نشاط فل...تصحى من الصباح ولا تسلم على زول وتشاكل اختك ولا اخوك الصغير ..وتطلع فى الشارع تنبز والبقول ليك سلام عليكم تقطعو معاو..تمشى الشغل زهجان وماطايق زول وتنتهى منو ولا تزوق منو وتجى البيت وتقعد تمرق وتدخل وتتبكى وتحاول للبسعدك ويجى الليل تانى وتتبكى ويستمر الحال الى ان ربنا يقول ليها كونى فتكون فتاتيك سعاده ما بعدها سعاده وتكون البت دى بقت ليك بالنسبه ليك عاديه ....وتكون مبسوط وتحاول تسعد الناس المعاك الزعلتهم انت ...
وبختم:
دع الوقوف علـــى الأطلال والدمـــنِ ..... فليس ينفع مســــــكونٍ بلا ســــــكـنِ
أمـــــا ترانـــــي لا أثنـــي على حبٍ ..... بعــــد الفــــراق ولا آوي إلى وطنــــي
وكيف يأنـــــس قلبي بالديـــــــار وقد ..... أصاب فيها الفراق من كان يؤنســـ...ــني
إن الذيـــــن أذاقونـــي فراقهــــــــم ..... أفنيتُ من بعدهم دمعـــــي من الحـزنِ
عذراً حبيبتى لم اكن اعلم انك تحبين عذراً يا
حُلمى..عذراً يا قلبى عذراً يا عينى ..لا تبكين حبيبتى لا تحزنى فما لى
سوى بسمتك وذاكَ اللحن الحزين لا تقتليني على مسارح قصتى فسبقَ ان متُ
امام المُشاهدين دعينى وحدى وارحلى وتذكرى انك تُحبين نعم
ماعارف اكمل والله مازول مشوكش
طبعا الموضوع ده بالجد..
والذ حاجه شجعتنى اكتب الموضوع ده انو خاشى بى التيمان مامعروف منو فينا
ياخى وانا داسى لى الشاكوش عمرو ماكان عيب
انا هناى
يلا ياجماعه
التيمان
رد مع اقتباس
المشاركة الأصلية كتبت بواسطة سروية
المفضلات