قابلتها وهي تلبس قفازات في يديها ... قابلتها مساءا وهي تتحاشا لهيب حر الصيف نهارا ... قابلتها في سوق الذهب وهي تخلع قفازها لتقيس ذلك الخاتم اللازوردي الجميل ... تمعنت في يدها "عيني باردة" فلفت إنتباهي ذلك اللون القرمزي الجميل الذي يخضب يديها ... ولاني ود فتك و أفهمها طايرة ... طوالي نقشتو ... و دخلت فيها شمال سريع ... أها العرس متين ... ظاهر أنو قرب شديد ... و بي شلاقتي ديك نسيت أنو الواقف جنبها ده بطل الفليم ... أداني حدره كدة من نوع ... شتت يا شخص ... ما فهمتها لانو أخوكم بعيد عنكم فهمو بجي بعد الساعة إتناشر ...و شغال في حركات الظرافة ديل ... أها يا سرو نجهز بنطلون الجنز ... نحجز عند الحلاق أبو ساونة داك الجني الشانزليزي ... زولك أداني ليك عفصة بي جزمتو ... أكلتها في حناني ... وشغال شلاقة ... أها عليك الله جايبين منو في الحفلة ... أها شهر العسل أسمرا ولا ماليزيا ... زولك وكت شافني ما بحس راح كافتني ليك كف ... لامن عرفت حاجة ... و بعد ده قال لي ... اقول ليك قولة ... حنة النسوان يوم 1/6/2011 و العرس حفلتو في نادي ضباط الشرطة يوم 3/6/2011 ... مشيت عديل ما إتلفت جاي ولا جاي ... آمن بالله من كفو الحار ... و سجم خشم سروية ...
رد مع اقتباس
المشاركة الأصلية كتبت بواسطة خالد أحمد الصول
المفضلات