المابهمك وصي علي راجل امك

[الشمشار]

سلامات
الموضوع اسمو غريب برضو كالعاده
المابهمك وصي علي راجل امك هو مثل شعبي انطبق هذا المثل تمام الانطباق علي الموضوع الحا اطرحو عليكم ان شاء الله واتمني مواضيعي تكون مثمره ومفيده وانها تكون ساهمت ولو بالقدر اليسير في اصلاح اعوجاج او تسليط ضوء علي مشاكل كتيره نعاني منها كمجتمع
انتظروني ان شاء الله كان الله مد في العمر جااااااااااااااااااااااااااي

[الشمشار]

سلام من الله عليكم

قلنا المثل الشعبي المابهمك وصي علي راجل امك وهو مثل يضرب عندما تستهين بشئ لايخصك (وماعندك في مصلحه ) وتترك امره لشخص انت لابتهمو ولابدور ليك الخير وهو زوج الام

هكذا هو الحال في التعليم بشقيه العام والجامعي

هي جوله في مدارسنا وجامعاتنا نبحث من خلالها عن اجابه لسؤال واحد تنبثق منه مجموعه اسئله لماذا تدهور التعليم في بلادنا ؟؟؟

نقطه سطر جديد

خليكم قراب بعد فاصل نواصل

[الشمشار]

نواصل
التعليم في بلادي ماله وماعليه هو مانبتغي ان نبحثه فالناظر الي تعليم اليوم (حليل زمن ناظر المدرسه ) يجد انه تدهور والله تدهور دي ذاته بسيطه رقد في الانعاش عديييييييييل كده لكل شئ سبب وسبب تطرقي لموضوع التعليم تحت المثل المابهمك وصي علي راجل امك انو كنت في زياره للمدرسه الدرست فيها الابتدائي وللاسف هذه المدرسه ايله للسقوط وطلابها اكملو العام الدراسي الفات والقبلو كمان رحاله في كل مدرسه حصه وفي حلوقهم اكتر من غصه وغصه مشيت المدرسه عشان استرجع بعض الذكريات فهاهنا استاذ فلان جلدنا وهناك حاجه خديجه الله يرحمه كانت بتبيع لينا الدوم والقنقليز وشطه وعجور وتلك المزيره العتيقه كنت بقعد فيها وادك حصه الجغرافيا انا وعبد المنعم صديقي (انا من سنه خامسه ابتدائي ماحضرت حصه جغرافيا لاني لابحبها ولابتتفهم لي )
داك مكتب استاذه ساميه ام فصلنا وداك المحل الدفنت فيهو الكنز (ده حدي كان مع الجغرافيا خريطه الكنز والسلام عليكم ) انا خرمت كتير لكن الذكريات الانا كنت بسترجع فيها كانت مضمخه بحصه المطالعه وطه القرشي مريض وبمريم الشجاعه وبشرف والاسد والاملاء المنظوره والاملاء والادب وبيض الحمائم وهيهات هيهيات لاجن ولاسحره وانتظار استاذ فلان يدينا العلوم والسرحان الجميل مع محمد قول ومنقو زنبيري والسفر عبر الخيال الي الجفيل وريره والقولد
استرجعت كل تلك الذكريات عندما وجدت كراسه احد طلاب اليوم وللغرابه انو في الصف السابع ومابعرف يكتب كلمه (كثيرا ) كتبها هكذا (كسيرا ) كسيرا هو التعليم وكسيرا هو الطالب وكسيرا هو قلبي علي مجد قبر وتعليم راح في حق الله وانا جاااااااااااااي

[الشمشار]

عدنا

السلم التعليمي في السودان مر بعده مراحل تغيير فمن نظام اربعه اربعه اربعه
وهو نظام الابتدائي اربع سنين والمتوسط او الاعدادي اربع سنين والثانوي العالي 4 سنين الي النظام الاخر الابتدائي ست سنين والمتوسط ثلاث سنين ثم الثانوي العالي ثلاث سنين وجاء زمن التدهور والانحدار التعليمي الاساس ثماني سنوات والثانوي العالي 3 ثلاثه سنوات وقبرت المرحله المتوسطه بكل جمالها وحصص الliterature
او الادب الانجليزي جانير jane eyre وكتناب Kidnappوتريشا ايلند
Treasure Island

وكما يقول اخوتنا الخليجين وصلت بنا المواصيل للانسان والكون وملبسنا ومسكننا وغيرها من الحشو الفارغ ده كلو كوم وكتاب الاسباين spineبتاع الانجليزي كوم براهو بعد ان تم بفعل فاعل اعدام كتب nile course
مما افرز جيل لايعرف العربي ولاحتي الانجليزي الموضوع طويل وانا جاااااااااي بس الصبر

[الشمشار]

في بدايه البوست كتبت انو البوست عن التعليم بشقيه العام والعالي وقبل مانمشي لي ناس التعليم العالي خلونا في العام المشاكلو كتيره وحالو للاسف ما تمام
التعليم بقي قروش عندك قروش ولدك يتعلم ماعندك قروش ولدك يطلع بتاع اورنيش يطلع شماسي يورق لي امو الخضره ناس المدارس ووزاره التربيه ماهماهم ولادي شغلتهم
(ماقلت ليكم المابهمك وصي علي راجل امك ) واثر هذه السياسه الماديه انتشرت مدارس خاصه بي ترحيل ولوازمو وخلوني اخرم ليكم شويه عندي ود اختي ذو الست سنوات بدرس في مدرسه خاصه قبل مده من الزمن قال لي ياخالو نحن الليله مشينا اكلنا ايسكريم من دعبل ودعبل ده مكان ايسكريم يبعد عن مدرسته مسافه خمسه دقائق بالعربيه قلت لي مشيت مع منو ؟ قال لي ودانا عمو فلان (ده بتاع الترحيل اتاريهو حضرتو متفق مع ناس محل الايسكريم يجيب ليهم الاطفال وههههههههه يأخد حقو ايسكريم ولاقروش الله اعلم المهم هو يستفيد وصحه الاطفال في ستين مليون داهيه ) مشيت المدرسه واحتجيت لي مدير المدرسه وغيرنا لي الترحيل لكن برضو مافي ضمان مع ملاحظه اني لامن حكيت الحصل للمدير بتاع المدرسه ما اتفاجا كأنو عارف برضو قلت كدي امشي محل الايسكريم وهناك شفت العجب العجاب تراحيل (دي جمع ترحيل ماعارفو صح ولاغلط ) كتييييره وطلبه من كل الاعمار ومن الجنسين بيتوافدو علي محل الايسكريم وكبابي الايسكريم البلاستيكيه تتطاقش
نواصل بعد الفاصل

[الشمشار]

وقفنا لامن انا وصلت محل الايسكريم ولقيت معظم المدارس القريبه لي محل الايسكريم طلابها في محل الايسكريم( تاني بعد ده اسألو الاولاد والبنات مالهم ما بنجحو الا بالدروس الخصوصيه وبدعه المعسكرات ) وقفت وبقيت اعا ين كميه من الطلبه والطالبات يقيف الترحيل ينزل بتاع الترحيل ويشتغل مراسله ما بين المحل والعربه ((عمو فلان جيب لي ايسكريم بنكهه الشكولاته ونانسي قالت دايره منقه وريم بالاناناس ))
((عمو فلان وائل قال داير ايسكريم كاسات هاك ياعمو دي القروش بتاعه هاني )) هكذا هو الحال وعمو فلان وعموعلان شغالين جري بين الحافله والمحل ((هههههه يقولو ليك اكل العيش صعب ))
مشيت علي ولدين تقريبا ما جايين بي ترحيل بي كرعينهم ساي اكنت شايل لي جريده رياضيه وجريده سياسيه واخري اجتماعيه انتهزت الفرصه وبقيت اتونس معاهم ولقيت موضوع مشترك ((الفيس بوك )) كا نو بتكلمو عن الفيس بوك طوالي خشيت فيهم شمال
انا
والله فيس بوك كويس وبرضو نت لوق وتويتر ما كعبات
احدهم
يا ابو الشباب فيس بوك ده بالعربي لكن تويتر ده مافيهو عربي وانا جني جن الانجليزي
انا
محلوله يمكنك ترجمه اي موقع الي اي لغه تتحدثها من خلال موقع قوقل
الاخر
اي والله عمك قوقل ده الله يخلي لينا
فتحت احدي الصحف طوالي واحد من الشابين شال الجريده الرياضيه وبدا يقرا لامن وصل الصفحه العالميه قال لي صاحبو انا من اصل الصفحه العالميه دي بعمل تكس يرجع [(وتكس يرجع هو مصطلح في لعبه البلي التي قبرت ايضا بايدي البلي استيشن والعاب باي سيتي والعاب الكمبيوتر ((التي لا اجيد منها الا الكوتشينه ههههه ماتقولو الزول ده متخلف وحات الله حاولت العب بلي استيشن كوره مع ود اختي عمرو تسعه سنه غلبني عشره صفر )) وتكس يرجع المضراب بتاع البلي لامن ترمي ويصطدم باحد الاشخاص بتكورك تكس يرجع عشان تكرر المحاوله مره اخري )
قلت لي ليه ؟؟؟
قال لي
اساميهم الزي الاسبيرات دي ما بتتقري لي ((ملاحظه الطالب ده بدرس في الثانوي العالي )) قلت لي
استهجي
قعد يضحك وشافها كبيره عليهو انو يستهجي الكلمات

كدي راجع ليكم بعد الفاصل خليكم قراب

[الشمشار]

نواصل
قلت للشاب بتدرسو كم لغه مع الانجليزي
احتار شاويشي كما تقول الصديقه مني سلمان في صحيفه حكايات عندما رد لي الشاب
انجليزي شنو ياعمك والله الانجليزي ده انا ماعارف الناس بتنجح فيهو كيف ؟
ثم غير دفه الحديث
شوف يا معلم انت جايي تجكس(لاحظ لسوقيه اللغه) ولا جايي تاكل ايسكريم ولاجاي تسال ولا..............
قلت لي اهو نحن بنتونس
قال لي لو سمحت افتح اي ونسه غير القرايه ونحن معاك لكن القرايه دي نحن من المدرسه هاربين منها
((تاني ما تقولو لي التعليم اتدهور ليه ؟))استأذنت الشابين بعد ان ضاقا ذرعا من حديثي لكرههم لكل مايرتبط بالدراسه
قررت ان اذهب الي منزلي ومعاوده الكره في اليوم التالي للاجابه علي نفس السؤال لماذا تدهور التعليم
نقطه سطر تاني
حنواصل بس الصبر [/color]

[الشمشار]

نواصل
في تلك الايام ظهرت نتيجه مرحله الاساس بولايه الخرطوم واليكم النتيجه
وكالعاده فتحت تلفزيون السودان في المرات النادره التي اشاهده فيها فالتلفزيون واعني تلفزيون السودان يا اما تشاهد في كوره ولا اخبار ولامسلسل المهم ده ما موضوعنا هسي تلفزيون السودان من بدري تكلنا علي راجل الجيران خليكم من راجل الام نرجع مرجوعنا طافت بي ذكري اعلان شهاده الاساس عام 2009 عندما بلغت نسبه النجاح 63% وثارت حينها ثائره الصحافه الا ان الوزير الهمام وقتها عرف كيف يخرج من هذا المطب الصحفي عندما قام بمنح صحفيين بعينهم فرص طرح الاسئله ((يعني الشغلانه مطبوخه )) وتحاشي تماما الصحفيين الذين يقولون للاعور انت اعور
خلونا من المواجع بتاعه سنه 2009 كدي النشوف الفين وعشره
مع ملاحظه الاتي في نتيجه 2009
نسبه النجاح الكلي كانت 63%
نسبه النجاح في المواد الاساسيه كان كالاتي
التربيه الاسلاميه 65%
اللغه العربيه 52%
الرياضيات 69%
وماتسنغربو لو قلت ليكم نسبه النجاح في الانجليزي كانت 26%
صديقي القارئ انت قريت صح ما 62 % دي 26%اي والله 26 في الميه يعني ربع الميه تقريبا
والشئ البغيظ كان الوزير يبتسم وكأنه ........ خلوها دي بتجيب المشاكل
قعدت في انتظار المؤتمر الصحفي ((بضم الصاد)) وليس الصحفي كما يقول ناس الاعلام في بلادي بفتح الصاد ((ودي واحده تانيه من بلاوينا )) خلونا منها هسي
كانت تفاصيل هذا المؤتمر كالاتي نسبه النجاح 83% ((اكيد زايدنها مويه ))
نسبه النجاح في المواد الاساسيه كالاتي
التربيه الاسلاميه 68%
اللغه الانجليزيه 45% ((هههههههه شئ احسن من لاشئ ))اللغه العربيه 73%
الرياضيات 51%
معظم المؤتمر كان استعراض عضلات من تيم الوزاره التي كانت تسمي وزاره التربيه والتعليم واصبح اسمها وزاره الفشل والتأليم وكيف ان النتيجه ارتفعت نسبتها مقارنه بالعام الماضي ذلك العام الذي لم تكلف الوزاره نفسها لبحث موضع الخلل فيه وخلتها علي الله والله كرييييييييييم
انا لحدي هنا بطني طمت من الكتابه في الموضوع ده
التعليم شكلو ما بهمنا عشان كده تكلنا علي راجل امنا
والمصيبه انو السجم حيخمنا
اللهم قد بلغت اللهم فاشهد
فتكم بي عافيه

[محب]

وكالعاده فتحت تلفزيون السودان في المرات النادره التي اشاهده فيها فالتلفزيون واعني تلفزيون السودان يا اما تشاهد في كوره ولا اخبار ولامسلسل المهم ده ما موضوعنا هسي تلفزيون السودان من بدري تكلنا علي راجل الجيران خليكم من راجل الام

مدارس الاساس مهجورة وتكاد ان تقع على رؤس الطلاب ولجامعت عربوها يعني نسبة 26% دي زاتها ما مهمة
الكلام في التلفزيون دا احلوها كيف ........ الله استر

[moh_alnour]

الأخ : الشمشار
مليار مراحب بك في منتدى ود مدني و نتمنى أن يطيب لك المقام بيننا لتفيد و تستفيد
و الأمنيات بأن نجد حروفك النيرة في حضور دائم في هذا الملتقى

هكذا هو الحال في التعليم بشقيه العام والجامعي
هي جوله في مدارسنا وجامعاتنا نبحث من خلالها عن اجابه لسؤال واحد تنبثق منه مجموعه اسئله
لماذا تدهور التعليم في بلادنا ؟؟؟

الأخ : الشمشار
هذه مشاركة سابقة كُنت قد سطرتها في بوست لأستاذنا النور محمد يوسف و الذي تحدث فيه
عن التعليم في بلادي من زاوية أخرى تتطرق فيها لحياة أحد رموز التعليم الذين أفنوا زهرة شبابهم
خدمة للتعليم في بلادي أرجو أن تتقبلها ( كما هي ) لأنها ربما صبت في ذات الإتجاه الذي طرحته في هذا البوست

أستاذنا النور محمد يوسف ( نجم كل الشهور )
مرحب بطلتك البهية في يوم من أيام الله الذاخرة بنفحات الرحمة و المودة و القُرب من الله
و التي تجمع قلوبهم في قلب رجل واحد في صعيد عرفات الطاهر في هذا الشهر الحرام
عودتكم يا أستاذنا عودة الطيور المهاجرة لأوكارها و عودة العافية للمنتدى الذي يفتقدكم كثيرا
دائما ً ما تطرُق موضوعات تجعل الفرد منا يتحسر على أيام و شخوص خالدة في حياة كل منا
عبر رحلة الحياة القصيرة في هذه الفانية
دائما ً نترحم على من جعلهم أمير الشعراء أشباه الرُسل لأنهم حملوا على عاتقهم رسالة أخرى غير سماوية
هي رسالة التعليم في بلادي و في البلاد الأخرى كاليمن و الخليج
نترحم على أيام بخت الرضا و إدارة المناهج فيها
نترحم على المنارات السامقة التي أضحت بقرار غير مدروس جامعات و كليات إفتقدت للبنية التحتية
و إفتقدت للكوادر المؤهلة التي تُديرها بعد هجرة العقول للخليج و غيره من بلاد الدنيا
نترحم على حال المعلم الذي كانت تتغنى له الحِسان قائلة
( يا ماشي لباريس جيب لي معاك عريس يكون لِبيس و شرطا ً من هيئة التدريس )
نترحم على هيبة المعلم الذي أراقت الظروف الأقتصادية ماء وجهه فآثر المدارس الخاصة على مدارس الحكومة
نترحم على مناهج كانت وقود و زاد للطالب في رحلته المهنية و كانت ديباجة في صدور المتفوقين و كنز من المعلومات العامة
نترحم على زمن كان فيه المعلم القدوة و صاحب الرأي و المشورة و المقدم في الصوات و منابر الخطابة
نترحم على زمن أصبح فيه الطالب الجامعي لا يعرف الزعيم الأزهري بل يظُنه مالك الجامعة كما سمعنا
أخيرا ً نترحم على روح الأستاذ عيسى و كل معلمينا الذين رحلوا عن هذه الفانية و نسأل الله لهم الرحمة و المغفرة
بقدر ما قدموا لهذا البلد و أبنائه من تضحيات و خدمات جليلة

[آلاء عبد الرحمن]

موضوع يفتح دائما وذلك لاهميته الكبيره

طبعا نفس المثل يقال علي الصحة

يعني اهم القطاعات منسيه

التعليم هو اساس كل شئ

وصراحة المشكلة متشعبة بدايه من البيت والمدرسة والمسئولين

والله البلد دي مامعروفه ماشه لي وين هم فالحين يصرحو بحاجات ونسه في الفاضي والمليان والشعب ساكت

بقولو الشعب يريد تغيير النظام لكن صراحة في بلدنا دي الا اول تبدل الشعب حتي تتجه للنظام

[ريمون]

مرحب بيك تاني ..
شكلك حتكون اضافة حقيقية ..
غايتو الله يكون في العون ..
وبجيك راجعة ..

[mahagoub]

التعليم بقى راكوبه بدون سقف
مع انو هو الاساس لكل حركة فى الحياه
يحلنا الحل بله
وقيس على كده

[الشمشار]

مدارس الاساس مهجورة وتكاد ان تقع على رؤس الطلاب ولجامعت عربوها يعني نسبة 26% دي زاتها ما مهمة
الكلام في التلفزيون دا احلوها كيف ........ الله استر

ههههههههههه اخي محب المصيبه ان احدي وظائف التلفزيون او وظائف الاعلام ان شئت التحديد (التعليم ) فا الاعلام له 4 وظائف اساسيه (الاخبار(الاعلام بالشئ) - التعليم - التثقيف - الترفيه)
ونحمد الله تلفزيونا ساقط في المواد الاربعه اللهم زيد وباااارك
شكرا لمرورك الجميل

[الشمشار]

الأخ : الشمشار
مليار مراحب بك في منتدى ود مدني و نتمنى أن يطيب لك المقام بيننا لتفيد و تستفيد
و الأمنيات بأن نجد حروفك النيرة في حضور دائم في هذا الملتقى
تسلم كتيييير اخوي


الأخ : الشمشار
هذه مشاركة سابقة كُنت قد سطرتها في بوست لأستاذنا النور محمد يوسف و الذي تحدث فيه
عن التعليم في بلادي من زاوية أخرى تتطرق فيها لحياة أحد رموز التعليم الذين أفنوا زهرة شبابهم
خدمة للتعليم في بلادي أرجو أن تتقبلها ( كما هي ) لأنها ربما صبت في ذات الإتجاه الذي طرحته في هذا البوست

شاكر لك الاضافه الجميله وعندي عوده لماكتبت بس اعقب علي الاخوه الشرفوني في البوست واجيك راجع

[الشمشار]

موضوع يفتح دائما وذلك لاهميته الكبيره

طبعا نفس المثل يقال علي الصحة

يعني اهم القطاعات منسيه

التعليم هو اساس كل شئ

وصراحة المشكلة متشعبة بدايه من البيت والمدرسة والمسئولين

والله البلد دي مامعروفه ماشه لي وين هم فالحين يصرحو بحاجات ونسه في الفاضي والمليان والشعب ساكت

بقولو الشعب يريد تغيير النظام لكن صراحة في بلدنا دي الا اول تبدل الشعب حتي تتجه للنظام

هههههههههههه الفليق شنو يا الاء بي طريقتك دي البوست ده بمشي الخور
ههههههههه
عذرا بهظر
لاخير فينا ان لم نقلها
نحن امه فقدت كل شئ والمبكي عليه كتيييييييييييييير

[الشمشار]

مرحب بيك تاني ..
شكلك حتكون اضافة حقيقية ..
غايتو الله يكون في العون ..
وبجيك راجعة ..

تسلمي اختي
بس ماوريتيني الله يكون في عون منو ؟
في عونكم انتو مني هههههههههههه
ولافي عون راجل امنا التكلنا علي التعليم وفات خلاهو وبقي التأليم

[الشمشار]

التعليم بقى راكوبه بدون سقف
مع انو هو الاساس لكل حركة فى الحياه
يحلنا الحل بله
وقيس على كده

هو ماقلت اخي محجوب راكوبه ومافيها سقف ومدقره بي قعر عشره كمان
الله يلهمنا الصبر

[بابكر]

ياخوى الشمشار , تعليم شنو ؟؟وقراية شنو؟؟ إنت من زمن القريه والتعليم ,, ؟؟ أسه فى شئ أسمه نجوم الغد ,, وأغانى وأغانى ,, يعنى بعد كم شهر تركب همر ,, وتكون مشهور ومروق , يعنى لاقرايه ولا وجع رأس ,,, أسه شايف السودان ده مابقى كله غنايين ,, وكمان مروقين ,, وواحدين عندهم بودى غارد كمان !!بالله عليك يا الشمشار أفتح أى قناة سودانيه , لازم تلقى واحد بيغنى , غناى جديد لنج ,, كل القنوات السودانيه أغانى بس وهجيج .. شئ بالدلوكه ,, وشئ بالاورغن , والحكايه ماشه تمام تقول لى تعليم ؟؟؟ التعليم طاير ,, وفى مثل قريب لى بتاعك ده ,, بيقول ++
الكايس جمل نسيبته ,, لو لقاه يغنى ولوما لقاه يغنى !! فهمت ؟؟؟ حبى لك ياروعه !!

[الشمشار]

ياخوى الشمشار , تعليم شنو ؟؟وقراية شنو؟؟ إنت من زمن القريه والتعليم ,, ؟؟ أسه فى شئ أسمه نجوم الغد ,, وأغانى وأغانى ,, يعنى بعد كم شهر تركب همر ,, وتكون مشهور ومروق , يعنى لاقرايه ولا وجع رأس ,,, أسه شايف السودان ده مابقى كله غنايين ,, وكمان مروقين ,, وواحدين عندهم بودى غارد كمان !!بالله عليك يا الشمشار أفتح أى قناة سودانيه , لازم تلقى واحد بيغنى , غناى جديد لنج ,, كل القنوات السودانيه أغانى بس وهجيج .. شئ بالدلوكه ,, وشئ بالاورغن , والحكايه ماشه تمام تقول لى تعليم ؟؟؟ التعليم طاير ,, وفى مثل قريب لى بتاعك ده ,, بيقول ++
الكايس جمل نسيبته ,, لو لقاه يغنى ولوما لقاه يغنى !! فهمت ؟؟؟ حبى لك ياروعه !!

هههههههههههههه حلوه دي كمان برضو ماتنسي الكوره اللاعب بقو يشترو بالشئ الفلاني
بالمناسبه عجبني المثل شديد
والعجبني اكتر انك نورتني

[مصطفى هاتريك]

معاوية ...

أول التبادي ... حبابك ألف


في ما يبدو لي أن التدهور الذي وصل إليه حال التعليم في بلادنا _ أمر مقصود و مدبر مع سبق

الإصرار و الترصد ,, ألم تلاحظ أخي الكريم أن أول ما فعلته الإنقاذ ... كان تحطيم رموز التعليم في

البلد .. أين حنتوب الثانوية ... أين خورطقت ... حتى وادي سيدنا أغتصبت بليل ..................

وكان لخصصة التعليم دور البطل في تحطيم عملية التربية و التعليم ............................

الله المستعان .................................................. ..........................

[الشمشار]

معاوية ...

أول التبادي ... حبابك ألف


في ما يبدو لي أن التدهور الذي وصل إليه حال التعليم في بلادنا _ أمر مقصود و مدبر مع سبق

الإصرار و الترصد ,, ألم تلاحظ أخي الكريم أن أول ما فعلته الإنقاذ ... كان تحطيم رموز التعليم في

البلد .. أين حنتوب الثانوية ... أين خورطقت ... حتى وادي سيدنا أغتصبت بليل ..................

وكان لخصصة التعليم دور البطل في تحطيم عملية التربية و التعليم ............................

الله المستعان .................................................. ..........................

والله يامصطفي ماقلت الا الحق
هدم مؤسسات التعليم العريقه مع ذاك المنهج العقيم والمواد الجديده ناس زراعيه وعسكريه وهلمجرا ده الودانا تحت سابع ارض
بمناسبه سابع ارض شكرا لترحيبك الوداني سابع سماء يافخيم