بت التايه ام عبايه

[الشمشار]

سلامات
الليله القصه من حلتنا
حلتنا البتضم كثير من الشخصيات العجيبه والغريبه الاطوار
ومنهم منال بت حاجه التايه انا عارفكم جهزتو بنابركم وفتحتو خشومكم راجني اكمل القصه انتظرو بعد الفاصل انا جاااااااااااااااااي

[الشمشار]

يكاد لايمر يوم الا وتجد منال بت حاجه التايه لافحه عبايته وياالسوق جاك زول تلف ليك السوق تغربلو ليك غربله هههههههههه جنها اسواق والغريبه انها بتمشي السوق من الصباح وتلف في لحدي العصر عشان تشتري ليها طرحه وغير انها لايعجبه العجب ولاوارغو ذاتو كمان منال دي عندها عاده بايخه خلاص المفاصله في الاسعار بي صوره مستفزه يعني تكرهك الحياه ياخ في زول بفاصل في تمن الاسكراتشات ؟؟؟منال بتفاصل
بوم من الايام الشمار كتلني البت دي بتمشي السوق تعمل شنو ؟قلت خلاص امشي معاها طبعا الشغلانه مادايره اجتهاد منال حوالي الساعه عشره صباحا بتطلع من بيتهم علي السوق رجيته في المحطه ما اتاخرت علي مواعيده جات ودار بينا الحوار التالي :-
انا
صباح الخير يامنو
(ده اسمها بتاع الدلع )
هي
صباح النور ياشاب ازيك انت كويس ؟
انا
الحمد لله في نعمه
هي
علي وين من اصبحت ؟
انا
علي السوق ماشي اشتري هدوم
هي
كويس اللاقيتك عشان ناس السوق ديل مايغشوك والله ناس السوق ديل اصلهم مابخافو الله الحاجه تلقاها بي الفين يقولو ليك بي عشرين وبعدين انتو يالرجال بتتغشو و................ (تاني ماسكتت )
ركبنا المواصلات طبعا اديت الكمساري حق اثنين
(النفر بي 50قرش يعني خمسميه جنيه بالقديم ) هاجت ليك في الكمساري ليه تشيل الف هسي ماياهو ده السوق وبدت تنق لامن الكمساري حرد القروش ورجعها لينا الوقت داك نحن وصلنا السوق
نواصل بعد الفاصل

[الشمشار]

نواصل
خشينا اول دكان من خشينا كده بتاع الدكان اظنو حافظ ليك منال دي صم ومكجنه ليك قلت لي البنطلون ده بي كم ؟ قال لي ما بطلع قدرك
(البنطلون انا متأكد انو قدري )
لكن احترمت الراجل خصوصا لامن شاف منال وقبل وشو غادي منها منال طبعا مابتسكت قالت لي هسي انت عارف البنطلون ده لي منو ؟ هسي يمكن يكون ماليهو مالك قاهم الراجل كده طوالي والله انتو ياناس السوق بري منكم
الراجل اظنو ضغطو علي فجأه لكن استحمل ومنال مدوره نضمي المهم قلت ليها ارح نخش الدكان داك عشان افكها من الراجل قبل يقع كاضم وفعلا مشينا الدكان التاني اول ما خشينا الدكان بتاع الدكان قال لينا عن اذنكم ماشي افطر
(هارب من منال )
منال قالت لي الفطور طاير تعال نحن مستعجلين قبلت علي وقالت لي البنطلون ده رائيك فيهو شنو ؟ قلت ليها سمح والله زوقك راقي وبي امانه ياجماعه الزوله دي عزاله شديد قالت لي بتاع الدكان البنطلون ده بي كم ؟ قال ليها بي 35 جنيه
(خمسه وثلاثين الف بالقديم )
قالت ليهو ليه ؟ اصلو بتلبس براهو شوف ياعبده
(اكتشفت انها كمان حافظه اسامي تجار السوق كلهم )
البنطلون ده بي 10 جنيه بس
(والله انا في سري قلت ليها بالغتي )
والشمطه دورت هو يقول سعر وهي تقول سعر والزمن جاري ومن دكان عبده لي دكان تاني ومنو لي دكان تاني ومنو لي دكان تاني لحدي الساعه ماجات 8 مساء وما اشترينا اي حاجه وما نابني غير التعب والصداع ووجع الكراع وبدون فائده وانا طالع من السوق ومعاي منال جينا مارين بي صاحب الدكان القبيل قال لي البنطلون ده ما بطلع قدرك قال لي تعال ياولدي مشيت علي قال لي ياولدي البت ام عبايه دي ما تباريها والله امها حاجه التايه كانت منجضانا في السوق ده لامن ماتت هسي هي مسكت دربها ياولدي مافي زول في السوق ده ببيع لي بت التايه ام عبايه دي اخير ليك امش بيتكم انجم
تيت تيت تيت
كمل الرصيد والقصه انتهت
ودعتكم الله

[عنكوليب]

يا وليد هوي النسوان ديـــل كلهم منال ام عباية ،، في المفاوضات ،،
يعني تجي ست تشتري طوالي بعدما يقول ليها التاجر ب 100ج ،،بالله ،،
ال ب100 أكيد حا يبقى ب 70 ج أكثر شيء ،،
وصحي ناس السوق طاااااالعين فوق طوالي ،،
غايتو انا بعتبر الزول ال بشتري طوالي ده - في ايامنا دي - يا مغفل ،
يا ماضاربو حجر دقش في قروشو دي ،، يا مطنقع ساااااكت ،،،


ليها حق والله ،، بس بدون عباطة كمان ،،،منال بت التايه ،،،

[mahagoub]

نجضتك
تستاهل انت البوديك تتشمشر وتباريها شنو ؟؟

[الشمشار]

يا وليد هوي النسوان ديـــل كلهم منال ام عباية ،، في المفاوضات ،،
يعني تجي ست تشتري طوالي بعدما يقول ليها التاجر ب 100ج ،،بالله ،،
ال ب100 أكيد حا يبقى ب 70 ج أكثر شيء ،،
وصحي ناس السوق طاااااالعين فوق طوالي ،،
غايتو انا بعتبر الزول ال بشتري طوالي ده - في ايامنا دي - يا مغفل ،
يا ماضاربو حجر دقش في قروشو دي ،، يا مطنقع ساااااكت ،،،
ليها حق والله ،، بس بدون عباطة كمان ،،،منال بت التايه ،،،

هههههههههههه المفاصله مطلوبه لكن مابي الطريقه دي ولاشنو ؟وزي ماقلتي ما بالعباطه دي
صحي في ناس ولابهمهم بيشترو من طرف وباي سعر
نورتي ياعنكوليب

[الشمشار]

نجضتك
تستاهل انت البوديك تتشمشر وتباريها شنو ؟؟

ههههههههههههه تقول شنو بس مرات الشمشره آخره محفره ههههههههه