أنا من جيت جزيرتى دى
متعود كلما أتغدا بكب باقى الرز للطيور
زمان كنت بكب ليهن رز كتير لكن هسى من شفت دعايتو
بقيت باكل على عماى وكلما أقول خلاص أتذكر ليك الدعايه وأديها أموووح
هيييي ، أديها لقمه
أها .. وطوالى بكب باقى الرز لجماعة ود أبرق لأنو أنا
زمان فى السودان كتلت منهم كميه عييييييييييييييييك
ولما أصل المكان البكب فيهو باقى الأكل جماعة ود أبرق
فررر يجو طايرين ويركو فى كتفى ويدى وكدا
وبعد داك يقعدو ينقدو فى الرز حبه حبه
فى أيام الشتاء ذى الأيام دى بتجينا طيور النورس
وهى كبيره الحجم وأكّاله أكل يا حولااااا
وكلما أكب باقى الأكل تجى وتطرد جماعة ود أبرق
وتلهط بشراهه والواحد فيهم ولا بضوق عشان يبلع أكبر كميه
أمس جانى وفد فى غرفتى من جماعة ود أبرق وقالو لى
ياخ النورس دا جوعنا وتانى لما تجيب لينا الباقى
يا تقيف تحبسنا يا خلينا ناكل معاك فى الصحن فى غرفتك دى
قلت ليهم ما عليكم .. بكره بنظمهم ليكم
اليوم قمت أكلت ليك شويه والباقى عمستو عمس بالشطه الحمرا
الجابوها لينا من السودان ومشيت وكبيت الرز فى المكان وجماعة النورس جو
طايرين ، وقمت وقفت بعيد وعاينت لجماعة ود أبريق وغمزت ليهم بعينى
وكلهم ختو جنحيهم على قداديمهم علشان يكتمو الضحكه
النورس وقوعو ليك فى الرز لهط بالطريقه الصاح
وكملوهو جت أكان بعد شويه الكواريك ضربت
وواااى وااااى رقدت هبطرش ، وريالتهم سالت وقعدو يبعرو
وكتير منهم إدردقو بالواطه وواحده بيضت بيضه لينه خدرا
التقول على أجهضت
وجماعة ود أبرق راكين فى الحيطه وميتين بالضحك وقالو ليهم
تانى تجو مولد ؟ دا مطاميرو وأجركم على الله
رد مع اقتباس
المشاركة الأصلية كتبت بواسطة عنكوليب
المفضلات